دوومین نامه قرنتیانیرا 8
8
دستو دل باز بِه را تشویق کردِ
1برااِن، اَمه بَپیمون اَ فِیضیکا کن خدا مقدونیَه کلیسا اِنِش دوعَیَه بَشِمَه باخبَر آکَم. 2اِمی خونه کن اَیِن موصیبَتی خونه، بَرک وَرداورد آبین، ولی بَرک خَشین و با اِمکن خَیلی دَس دَریسین، ولی دستو دلبازینَه. 3اِمی خونه کن اَز اِشتَن شاهیدیمه کن اَیِن اِشتَن اینجاری قَدَر و حتی بیَیکا نی ویشتَر پیشقدَم بینه، 4بی دِسَرَکرچَنگ گیرینَه اَمَکا خاشتو خازِشون کَردَ واَپیشون بَه کن اِم خیدمتیکا کن موقدسَه آدَمونرا اَنجوم بَبی شریک ببون. 5اَیِن نِه تاکَه اَتَه کن اَمه اینتیظار داریمون بَلکَم اول بَشتَنِشون خداوندیرا وقفِشون کردَ، و چَی به دوملَه خدا ایرادَ واتَنَه، بشتَن اَمَرا وَقف کردشون. 6هِمی خونه، تیتوسیکا اَپیمون بَه هَتَه کن چیمی بَه نَه اِشتَن اولین قدمِش پِگتَه به، ایسَه نی خَیرَ کاری شمَه دلَکا تَمون آکَرَ. 7ولی هَتَه کن هَمه چیکا سَریرون، ایمانیکا، گَفیکا، دانا ایکا، دِسَرَ کرچَنگ نِبِه کا، و شمَه موحبَت کَردِ چَمَه سَردِرِ، پس اِم خَیرَ کاریکا نی گِردیگا سرتر بِبَه.
8اَز اِمی شِمَرا حِکم نِمَکرد، بَلکَم بَپیمه شمَه موحبَتی کن دِسَرَ کرچنگ گیرینَه نییَه، دییَرَ آدَمون غَیرَتی واثیتنَه، ثابیت بکَم. 9اِمی خونه کن چَمه خداوند عیسی مسیح فِیضیکا باخَبَریرون کن هر چَنَه دولتمند بَه، شمِه خونه دَسدَریس آبَه تا شمَه چَی دَسدَریسیکا دولتمند آبَه.
10اَز اِشتَن نظَری اِم موضو خونه باتیم: اِم شمَه نفعیرا اَ، اَوَ سالیکا، شمه نِه تاکَه اِم خَیرَ کاری اَنجوم دوعه کا، بَسکم چَی اَنجوم بِه خَشیکا نی نار دَوَشتیرون. 11پس ایسَه اِم کاری تَمون آکَرَ، تا خَشی ایی کن اِم کاری خونه داریرون، چَی تَمون آکردِ نَه، شمه مالیَه اینجاری اندازَنَه جور ببو. 12اِمی خونه کن اَگَم خَشی ببو، اَ آدَمی خَلا، طبق اَچیی ایی کن بَداشتیَه قِبول بَبی، نِه طبق اَ چیی ایی کن نیشَه.
13اِمی خونه کن چَمَه خواستَه اِم نیَه کن دییَرَ آدَمِن آسایشی کا ببون و شمه فشاریکا، بَلکَم بَپیمون اینصافینَه ببو، 14کن ایسَه شمه فِرَوونی چَوون نیازی برطرف بَکَی، تا ایی روجی نی چَوون فِرَوونی شمه نِیازی برطرَف بکَرِ. اِنتَرَکه اینصاف برقرار ببیَه، 15هَتَه کن توراتیکا نوشتَه آبیَه: « اَ کن وِر جَم آکَرِ، ایضاف نِداریَه، و اَ کن کم جَم آکَرِ، کم نِداریَه.»
پولوس، تیتوسی سیفارش بَکَی
16ولی خدا شِکر بَکَم کن اَ غَیرَتی کن اَز شمَه سَر دارِم تیتوسی دِلیکا نی هِستَه. 17چون کن اَ نِه تاکَه چَمَه خواستَه قِبول کردشَه، بَسکم اَ اِشتَن برکَه خَشینَه، شمَه وَر آمِرا نار دَوَشتَه. 18اَمه تیتوسینَه ایلَه برا اونکا رونَه بکَمون کن کلیسا اِن گِردیکا اِنجیلی موعیظَه کردِ کا سرشناسَه. 19و نِه تاکَه اِم، بَسکم اَ برا کلیسا اون طَرَفیکا اینتخاب بَیه تا اِم خَیرَ کاری اَنجوم دوعه را و ایدارَ کردِ را کن چَمَه وظیفَه یَه اَمنَه همسَفَر ببو. اَ کاری کن خداوندی شکوه جَلالیرا اَ و چَمَه خیر خواهی آمونِه. 20اَمه بَرک موراقبیمون کن اِم خیدمت کن خَلا گِرد آکَردِ اَ، کن دِلیکارَ و چَمَه واسیطنَه اَنجوم بَبی هیچ کَسی چَمه سَریکا عَیب مَپِنَه. 21اِمی خونه کن سعی بَکمون نِه تاکَه خداوندی چَمیکا، بَسکم مردومی نَظریکا نی اَ چیی ایی کن دِرِستَه اَنجوم بدَرم.
22و اِمونَّه، اِشتَن برا نی رونَه بکَمون کن چَندین کرَ اَیِنمون ورداوَرد کردیَه و سرآگِنه ایمون کن خَیلی چییونکا خَشی بَداشتینه، و ایسَه اَ برا، اَ وِرَ ایطمینانی کن شمَه سَر بَداشتی، ویشتر خَشی بداشتی. 23تیتوسی خونه نی پی بواجم کن بَشمِه اَ خیدمت کَردِکا چمن شریک و همکارَ؛ و اَز چَمَه برا اون خونه پی بواجم کن اَیِن کلیسا اون فرستادَاِن و مسیح شکوه و جَلا لینَه. 24پس شمَه اَ موحبت و ایفتخاری کن اَمه شمَه سَر بَداشتیمون، کلیسا اون وَریکا اَ آدَمونرا ثابیت بکَرَ.
اکنون انتخاب شده:
دوومین نامه قرنتیانیرا 8: CTB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company