Pahayag 21
21
U Bigu a Langet sakay u Bigu a Mundu
1Nadid, káttapos ay netan ko u bigu a langet sakay u bigu a mundu. Dipo nawan dán u date a langet sakay u date a mundu; sakay awan dán be u diget. 2Sakay netan ko u Banal a Banuwan, u bigu a Jerusalem a pasidung a gábwat tu Diyos ti langet. Konna tu bábbey a ikasal a nakabadu ti maganda a handa para tagbuwán nu lállake a makabanga na. 3Sakay nasaneg ko u mabegsák a boses a gábwat tu trono, kinagi na, “Ilingán moy kapisan dán nu Diyos u katolayan tu páppágyanan na! Mákpágyan dán siya nide sakay magin banuwan na dán hide. Sakay pirme di dán a kakaguman u Diyos sakay siya dán u eessa a Diyos de. 4Pahidán na u luwa de hide. Awan dán ti matay, malungkut, magsanget, oni magkasakit dipo limmipas dán u date hide a bagay.”
5Kinagi nu mággetnod tu trono, “Baguwán ko dán u atanan a bagay!” Sakay kinagi na nikán, “Isulat mo iye: Maasaan sakay tatahoden iye hide a upos.” 6Sakay kinagi na pa, “Natupad dán! Hikán u Alpa sakay u Omega, u sapul ay tu katapusan nu atanan. Ni deya man u mauwaw ay atádden ko ti dinom a awan ti bayad a gábwat tu bukal a makapangatád ti biyag a awan ti kahád. 7Iye u matanggap nu magtagumpay. Sakay hikán u magin Diyos na, sakay siya be ay magin anak ko. 8Pero makaánteng u demáttán nu tolay hide a awan nagtiwala ni Jesus dipo tu ánteng de a matay, u awan hide summampalataya, u mágkadangát hide ti gággimitán, u mágbabono hide, u mángngibábbey oni mángngilállake hide, u mágdipoh hide, u mágsamba hide ti diyos-diyosan, sakay u atanan a mágkabule. Ibut hide tu kumán a diget a magapoy-apoy a asupre. Sa iye u kaduwwa a kákkatay.”
U Bigu a Jerusalem
9Immadene nikán u essa tu pitto hide a anghel a te tatawed a pitto a malukung a putat tu pitto a katapusan a salut. Kinagi na, “Karon he, ta ipeta ko niko u bábbey a magin kabanga nu Tupa.” 10Inggiyyaák nu Ispirito, sakay inyangayák nu anghel tu tunay ti langkaw a buked. Impeta na nikán u Jerusalem u Banal a Banuwan a pasidung a gábwat tu Diyos ti langet. 11Magdemlag iye dipo tu kaluwalhatiyan nu Diyos; magkilápkiláp a konna tu alahas a haspe sakay malekmang a konna tu bubug. 12U pader ay tunay a bagál sakay malangkaw, sakay tehhod a sapulo ay ti duwwa a pintuwan, balang essa a pintuwan ay te magbantay a anghel. Nakasulat tu pintuwan hide u ngahan nu sapulo ay ti duwwa a lahe ni Israel. 13Tehhod a tállo a pintuwan tu balang gilid: tállo tu danág ti sikatan, tállo tu danág ti ámiyanan, tállo tu danág ti abagatan, sakay tállo be tu danág ti sahámman. 14Sakay tehhod pa a sapulo ay ti duwwa a pundasyon u kudal nu pader sakay nakasulat hod u ngahan nu sapulo ay ti duwwa a apostol nu Tupa.
15U anghel a kauhon ko ay te tatawed a págsukat a ginto para sukatán u banuwan konna bi hod u pintuwan na hide sakay tu kudal na a pader. 16Kuwadradu u sukat nu banuwan, ni sa kodya u katakdug na ay konna bi hod u lawa na. Nikuna sinukat nu anghel u banuwan ay 2,400 a kilumetro u katakdug na sakay tu kalawa na, konna bi hod u langkaw na. 17Sinukat na be u kudal a pader, 216 a piye u kalangkaw na, sigun tu págsukat a tawed nu anghel. 18U ginamit tu kudal a pader ay bito a haspe, pero u banuwan ay puro a ginto, tunay a lekmang a konna tu bubug. 19U pundasyon hide nu kudal ay napagandaan ti atanan a mágkahalaga a bito. U purumero ay haspe, u kaduwwa ay sapiro, u katállo ay kalsedonia, u kaáppat ay esmeralda, 20u kalimma ay onise, u kaánnám ay kornalina, u kapitto ay krisolito, u kawalo ay berilo, u kasiyam ay topasyo, u kasapulo ay krisopraso, u kasapulo ay ti essa ay hasinto, u kasapulo ay ti duwwa ay amatista. 21U sapulo ay ti duwwa a pintuwan ay perlas, u balang essa ay gábwat ti essa la a perlas. U kakarsada tu banuwan ay puro a ginto sakay tunay a lekmang a konna tu bubug.
22Sakay napansin ko a awan ti templo tu banuwan dipo mismo a u Panginoon a Diyos a Makapangyariyan tu atanan sakay u Tupa u pinakatemplo hod. 23Awan dán kailangan u aldew oni u bulan para mangdemlag tu banuwan, dipo u kaluwalhatiyan nu Diyos u mangdemlag hod, sakay u Tupa u simbuwan. 24I demlagan itod u mangdemlag tu lakadán nu tolay hide tu iba-iba a bansa ti lutaáy; sakay iyangay hod nu hare hide ti munduway u kayamanan de hide. 25Pirme dán a bukas tu maghapun u pintuwan nu banuwan dipo awan dán hod gumibi-gibi. 26Anya man u kayamanan sakay karangalan nu tolay hide tu iba-iba a bansa ay iyangay de ti banuwanan itod. 27Pero awan hod ti makasáddáp a ánya man a bagay a madangát tu pangileng nu Diyos, u makán gimitán ti madukás, sakay u mágkabule hide. Nan u makasáddáp laay hod tu banuwan ay u nakasulat u ngahan na tu libro nu Tupa. Dipo i librowan iye u sássulatan nu ngahan nu naatádden ti biyag a awan ti kahád.
اکنون انتخاب شده:
Pahayag 21: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.