Pahayag 20
20
U Sanglibu a Taon
1Nadid, káttapos ni itod ay naketaák ti anghel a pasidung a gábwat ti langet, tatawed na u suse nu ábbut a awan ti kahád ti kadsalad sakay u dakál a kadena. 2Dinakáp na u dragon, iye u biklat tu itod a panahun, siya u Diyablo oni Satanas. Sakay inggapus na tu alay nu sanglibu a taon, 3sakay imbut nu anghel tu ábbut a awan ti kahád ti kadsalad. Insiradu na u ábbut sakay tinatakan na u pintuwan tánni awan siya makaluwas sakay makapagdaya tu bansa hide mentaras awan matapos u sanglibu a taon. Pero káttapos ni itod ay mapalaya siya ti sabadit a panahun.
4Káttapos ay naketaák ti makpal a trono, sakay u mággetnod hide hod ay naatádden ti karapatan a maghatul. Sakay netan ko be u kaliduwwa nu pinutulan hide dipo tu págpatunay de tungkul ni Jesus sakay tu págpahayag de tu Upos nu Diyos. Awan hide simmamba tu makaánteng a hayup sakay tu rebulto na, sakay awan hide nagpatatak tu tatak nu makaánteng a hayup tu kidáp de oni tu kamát de. Biniyag hide tán mákapaghare hide a kaguman ni Cristo tu alay nu sanglibu a taon. 5Iye u kapurumeruwan a pángbiyag tu patay hide. U agum a nágkatay ay saka la a biyagán, kállipas nu sanglibu a taon. 6Pinagpala sakay Banal u makaguman hide tu purumero a págbiyag. Awan ti kapangyariyan nide u kaduwwa a kákkatay; magin saserdote hide nu Diyos sakay ni Cristo, sakay maghare hide a kaguman na tu alay nu sanglibu a taon.
U Kákkatalo ni Satanas
7Sakay káttapos nu sanglibu a taon ay palayaán ti Satanas tu kákkepiresu na. 8Lumuwas siya para dayaán u bansa hide ti munduway. Ipunan na u atanan a tolay para mákpaggera. U kakpal de ay konna tu baybay tu gibis nu diget iye u dáddulawán de a Gog sakay Magog. 9Kumalat hide ti buuwáy a mundu sakay palebutan de u pinile hide nu Diyos sakay u banuwan a pinakamaha-mahal na. Pero paudinan hide nu Diyos ti apoy a gábwat ti langet kaya matay hide a atanan. 10Sakay u Diyablo a nangdaya nide ay ibut tu kumán a diget a apoy sakay tu asupre, a nángbutan labe tu makaánteng a hayup sakay tu mágkabule a prupeta. Aldew ay ti gibi ay mamágkaguman hide a pahirapan hod hanggan-hanggan.
U Katapusan a Pághatul
11Káttapos ay netan ko u dakál a trono a mapudew sakay tehod a mággetnod hod. Nawan u luta ay tu langet tu atubang na, sakay awan dán nenetan a huway. 12Sakay netan ko a mágtaknág u nágkatay hide tu atubang nu trono, mágkataas man oni mágkababa. Sakay binuklat u libro hide, pati be u libro a listaan nu tolay hide a inatádden ti biyag a awan ti kahád. Hinatulan u nágkatay hide ayun tu ginimet de mentras biyag hide, konna tu nágkesulat tu libro hide. 13Sakay inyobla nu diget u nágkatay hide a katoy hod. Inyobla be nu luta sakay nu Hades u nágkatay hide a katoy nide. Hinatulan u atanan ayun tu ginimet de. 14Káttapos ay imbut tu kumán a diget a apoy u Kákkatay sakay u Hades. I malawakan iye a apoy ay u kaduwwa a kamatayan. 15Ni deya man u awan ti ngahan tu libro a listaan nu tolay hide a inatádden ti biyag a awan ti kahád ay ibut tu malawak a apoy.
اکنون انتخاب شده:
Pahayag 20: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.