Pahayag 11
11
U Duwwa a Tistigu
1Nadid, káttapos ay inatáddinák ti págsukat a kumán a sahukod sakay te nagkagi nikán a, “Tumaknág ka ta angay mo sukatán u templo nu Diyos sakay u altar. Sakay bilangán mo u magsamba hod hide. 2Pero dyan mu dán sukatán u laguwerta nu templo, dipo neatád dán itod tu tolay hide a awan tumenggi tu Diyos. Awan de igalang u Banal a Banuwan tu alay nu áppat a pulo ay ti duwwa a bulan. 3Paangayán ko hod u duwwa ko a tistigu a nakabadu ti pangluksa sakay ipahayag de u upos nu Diyos tu alay nu 1,260 a aldew.”
4I duwwaán iye a tistigu ay konna tu duwwa a ponan a olibo oni u duwwa a págdáttonan ti simbuwan a katoy tu atubang nu Diyos a Panginoon nu atanan a katoy ti lutaáy. 5Ni tehhod a mangpasaket nide ay te magluwas a apoy tu labi de a mangtutod tu kadima de hide. Konna hina u kákkatay nu deya man a mangpasaket nide. 6Te kapangyariyan hide a mangpugád tu uden mentaras a magpahayag hide tu upos nu Diyos. Te kapangyariyan be hide a pagin digiyán u dinom, sakay mangpademát ti salut tu tolay hide maski ánya man a odas a gustuwán de.
7Sakay káttapos de a magbaheta tu upos nu Diyos ay umawas tu ábbut a tunay ti kadsalad u essa a makaánteng a hayup sakay mákpaglaban nide. Matalo hide sakay mabuno nu hayup. 8U bangkay de hide ay kapayad-payad tu karsada nu tanyag a banuwan a nepakuwan nu Panginoon de tu itod. Ngángngahanan de iye a Sodoma sakay Egipto pero bakan iye u tatahoden a ngahan na. 9Tu alay nu tállo a aldew ay ti kalahate, u bangkay di hide ay áelingán nu katolayan a gábwat tu iba-iba a lahe, tribu, upos, sakay awan ti maski deyaman a payagen a mánglábbáng ti bangkayan itod hide. 10Magsaya a tahod u atanan a tolay ti munduwáy dipo tu kákkatay ni duwwaan iye. Mamággatádden hide ti rigalo dipo tu kasayaan de, dipo i duwwaan iye a prupeta u nangatád nide ti dakál a kahirapan. 11Pero kállipas nu tállo ay ti kalahate a aldew ay biniyag hide a huway nu Diyos, sakay timmaknág hide. Kaya konna dálla hod u ánteng nu naketa hide nide. 12Káttapos ay nasaneg de a nagupos u tunay a begsák a boses a gábwat ti langet, “Sumangkay kam he!” Summangkay ngane hide ti langet a nakasakay tu panganurin mentaras a umáeleng nide u kadima de hide. 13Naglinog ti tunay a begsák ti itod be a odas. Nasida u kasapulo a parte nu banuwan, sakay pitto a libu a tolay u natay. Mineántingan u nabuhay hide a tolay, kaya tinengge de u kadakilaan sakay kapangyariyan nu Diyos ti langet.
14Limmipas dán u kaduwwa a makaánteng a pangyayare, pero dumáddadedemát dán u katállo.
U Kapitto a Trumpeta
15Nikuna patánnugán dán nu kapitto a anghel u trumpeta na ay tehhod a mágkabegsák a boses a gábwat ti langet a nagupos, “U pághare ti munduwáy ay neagton dán tu Panginoon tam sakay ni Cristo. Maghare siya hanggan-hanggan” 16Sakay u duwapulo ay ti áppat a tagapangasiwa a mággetnod tu trono de hide tu atubang nu Diyos ay dimmapa sakay summamba nikuna. 17Kinagi de:
“Panginoon a Diyos a Makapangyariyan tu atanan,
Diyos tu kasalukuyan, sakay Diyos tu nakalipas.
Magpasalamat kami niko dipo ginamit mo dán u kapangyariyan mo a awan ti kahád.
Sakay magsapul ka dán a maghare!
18Maiyamut a tahod u tolay hide a awan tumenggi niko.
Dipo dimmemát dán u odas para parusaan mo hide.
Odas dán para hatulan mo u patay hide,
sakay atádden ti piremyo u tagapagserbi mo hide,
a prupeta, u mannampalataya hide,
sakay tu atanan a te ánteng niko, mataas man ay ti mababa.
Odas dán para puksaán mo u nagpahirap tu tolay hide ti munduway.”
19Nabukasan u templo nu Diyos ti langet kaya áelingán u Kaban nu Kasunduwan tu disalad nu templo. Sakay káttapos ay nagkilat sakay nagkádduh. Masaneg be u mágkabegsák a hehaw, sakay maglinog be, sakay maguden ti iyelo.
اکنون انتخاب شده:
Pahayag 11: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.