Markos 9

1Kinagi pa ni Jesus nide, “Tandaan moy, tehhod a sangan he nikam a awan matay hanggan a awan de ketan u pághare nu Diyos a tehhod a kapangyariyan.”

Nagbagu u Idsura ni Jesus

(Mateo 17:1-13; Lukas 9:28-36)

2Kállipas nu ánnám a aldew ay simmangkay ti Jesus tu essa a malangkaw a buked. Awan siya ti agum a kinaguman nan di Pedro, Santiagu sakay ti Juan la. Nikuna hed hide hod ay netan de a nagbagu u idsura ni Jesus. 3Tunay ti pudew u damit na sakay makasile a ilingán, maskin ti deya ti munduwáy ay awan ti makapagpapudew ti konna hod. 4Sakay netan di be hod di Elias sakay ti Moises, a mákpágguhon ni Jesus. 5Kinagi ni Pedro ni Jesus, “Panginoon, mapiyya la ta katoy kami he. Pagbilay mi kam a tállo: ti bábbadit a bilay; essa niko, essa ni Moises, sakay essa ni Elias.” 6Iye u kinagi na dipo awan na tukoy ni ánya u kákkagi-kagiyán na dipo garabi u ánteng na sakay u agum na hide.

7Nadid ay tinaklábben hide nu diklám sakay tehhod hide a nasaneg a boses a gábwat tu diklám, kinagi na “Sa iye u pinakamamahal ko a Anak. Sanigán moy siya!”#9:7 Basaán tu 2 Pedro 1:17-18; Mateo 3:17; Juan 12:28-29. 8Tu kássuleg nu disepulus hide ay awan dán hide ti netan nan ti Jesus dálla.

9Nadid, nikuna a padegson dán hide tu buked ay mahigpit hide a kinagiyan ni Jesus a, “Diyan moy kagiyán maskin ti deya u netan moy, mentaras awanák mabiyag a huway, hikán a Anak nu tolay.” 10Kanya awan de kinagi maskin ti deya i nangyariyan itod, pero nagtanungan hide ni ánya i gustuway a kagiyán ni Jesus tu kinagi na a mabiyag siya a huway. 11Sakay tinanung de ti Jesus, “Bakin a kákkagiyán nu tagapagtoldu hide tu Kautusan a kailangan kan pa a dumemát ti Elias bagu a dumemát u tagapagligtas ti munduwáy?”

12Timmábbeg ti Jesus, “Tatahoden ina, umangay pa he ti Elias, para ihanda u atanan a bagay. Ay hikam, bakin wád a mabasa tu Kasulatan, a u Anak nu Tolay ay badit-baditán sakay maghirap ti garabi? 13Pero kagiyán ko nikam a immangay dán he ti Elias,#9:13 U Elias a kinagi nahe ay ti Juan a Mágbawtismo. pero ginimet de nikuna u gusto de sakay natupad dán ngane u nakasulat tungkul nikuna.”

Pinagpiyya u Anak a Sináddáp ni Madukás a Ispirito

(Mateo 17:14-21; Lukas 9:37-43)

14Nadid, tu kássole di Jesus tu agum na a disepulus ay netan de a makpal a tolay. Katoy bi hod u maisto hide nu Kautusan a mákpagpasuwayan tu disepulus hide ni Jesus. 15Nagtaka u tolay hide nikuna a ketan de ti Jesus. Sakay nagginan hide a timmagbu, sakay bimmate nikuna. 16Tinanung ni Jesus u disepulus na hide, “Ánya u pamágtalu-taluwan moy?”

17Tehhod a essa a lállake tu katolayan a timmábbeg, “Maisto, inyangay ku he niko i anak kuwáy a lállake, dipo sináddáp siya ni madukás a ispirito, sakay awan dán makapagupos. 18Ni pahirapan nu madukás a ispirito ay itumba na siya; magbugak u labi na sakay magngaritengát u ngipán na, sakay umigát u bággi na. Nákpagguhunák dán tu disepulus mu hide a palakadán u madukás a ispirito, pero awan di kaya!”

19Kinagi ni Jesus nide, “Awan ti pánniwala i tolayay nadid a panahun! Hanggan nikasanganák moy a kakaguman? Hanggan nikasangan takam a pagtiisan? Iyangay mo he anake!” 20Kanya inyangay de u anak tu kán Jesus. Pero tu pákketa nu madukás a ispirito ni Jesus ay pinagpágpág na u anak, pinatumba sakay pinaggulung tu luta a magbugak u labi na. 21Tinanung ni Jesus u ama nu anak, “Nikasangan pa siya a nagkakonna hina?”

Timmábbeg u ama. “Sapul pa tu kaanak na. 22Lagi siya a patumbaán nu madukás a ispirito tu apoy oni kaya tu dinom dipo laan na siya a bunuwán. Kanya ni maare ay kagbiyan mo kame, ni ke magimet ka, tulungan mu kame.”

23Tinábbeg siya ni Jesus, “Bakin a na kagi mo a tehhodák a magimet? Mangyare u atanan para tu tolay a maniwala tu Diyos.” 24Agad a timmábbeg ti mabegsák u ama nu anak, “Maniwalaák, patibayán mu ped i pánniwala kuwáy tán magin husto!” 25Tu pákketa ni Jesus tu tunay ti káppal a tolay a tamo nikuna ay kinagiyan na u madukás a ispirito, “Hiko, a ispirito a mágpabángngág sakay mágpabulol umibut ka dán ti anake: sakay diyan ka dán sumole nikuna a huway!” 26Tu pákkakagi hod ni Jesus ay pimmákhaw u madukás a ispirito, sakay pinagpágpág na u anak ti mahigpit, sakay immibut. U anak ay kumán dán a bangkay u idsura na, akala nu tolay hide ay natay dán! 27Pero tinawiden ni Jesus u kamát nu anak sakay pinaikat na. Sakay timmaknág be u anak.

28Tu kássáddáp di Jesus tu bilay ay tinanung siya nu disepulus na hide ti lihim, “Bakin a awan me napalayas u madukás a ispirito?”

29Tinábbeg hide ni Jesus, “I konna ay hod a kalase ni ispirito ay mapalakad la tu pamamag-itan nu págdasal.”

Binanggit a Huway ni Jesus U Kákkatay sakay u Kákkabiyag na a Huway

(Mateo 17:22-23; Lukas 9:43-45)

30Nadid, palihim a limmakad di Jesus ti lugaran itod sakay himmoyot hide ti Galilea. Umád ni Jesus a matukuyan nu tolay hide a atoy hod siya, 31dipo tolduwan na u disepulus na hide. Kinagi na nide, “Hikán a Anak nu Tolay ay itokyunák de, ipabunuwák de, pero huwayák a mabiyag tu katállo a aldew.” 32Pero awan de naintendiyan u kinagi ni Jesus, sakay magalangan be hide a magtanung nikuna.

Ti Deya u Pinakamataas?

(Mateo 18:1-5; Lukas 9:46-48)

33Nadid ay dimmemát hide ti Capernaum. Nikuna a hod dán hide tu bilay ay tinanung hide ni Jesus, “Ánya u pinamágtalu-taluwan moy tu mamaya he tu dilan?” 34Awan hide makatábbeg, dipo u pinamágtalu-taluwan de ay ni deya nide u pinakamataas.

35Kanya immetnod ti Jesus, sakay dinulaw na u sapulo ay ti duwwa a disepulus na, sakay kinagi na nide, “Ni deya man u masoh a magin pinakamataas tu atanan ay dapat a magpakababa sakay dapat a magserbi tu atanan.” 36Tu pákkakagi na ti itod ay dinulaw na u essa a anak sakay pinataknág na tu atubang de. Tu pángkálkál na tu anak ay kinagi na nide, 37“Ni deya man u mangtanggap ti anakáy a konna he dipo nikán ay tinanggapák na sakay u mangtanggap nikán ay tumanggap be tu ama a nángpaangay he nikán.”

Kakampe Tam u Awan Kontara Nikitam

(Lukas 9:49-50)

38Kinagi ni Juan ni Jesus, “Maisto, naketa kame ti tolay a nagpalayas ti madukás a ispirito tu ngahan mo, binawalan me siya dipo awan tam siya kaguman.”

39Pero kinagi ni Jesus, “Diyan moy siya bawalan, dipo maski deya u maggimet ti maganda a gimet tu pamamag-itan nu ngahan ko ay awan magupos ti madukás kontara nikán káttapos na itod a gimitán. 40Dipo u awan kontara nikitam ay kakampi tam. 41Tandaan moy: ni ti deyaman u mangatád nikam maski essa a baso a dinom dipo hod kam ni Cristo ay siguradu a makatanggap ti gantimpala.”#9:41 Basaán tu Mateo 10:42.

U Makapángatád ti Kasalanan

(Mateo 18:6-9; Lukas 17:1-2)

42“Maganda pa tu essa a tolay a báttenan ti gilingan a bito u álleg na, sakay itábbung ti ditaw a diget kasera makapáng-atád siya ti pagkasalaan nu anak hide a maniwala nikán.” 43Kanya kinagi ni Jesus, “Ni u kamát mo u mangatád niko ti págkakasala ay putáddán mo dán! Maganda pa a umangay ka ti langet a putád, kasera ni duwwa u kamát mo a meangay tu apoy a awan maada-adáp. 44Awan hod matay u uhád hide a mangkan nide sakay u apoy. 45-46Sakay ni u tikád mo u dahilan nu pagkasalaan mo, putáddán mo! Mas maganda pa ni eessa la u tikád mo ni tehhod ka a biyag a awan ti kahád, kasera ni duwwa u tikád mo a meangay ti impiyerno. 47Sakay ni u mata mo u dahilan nu pagkasalaan mo ay lábwetán mo! Mas maganda pa ni eessa la u mata mo pero tehhod ka a biyag a awan ti kahád, kasera ni duwwa u mata mo pero ibut ka la be ti impiyerno. 48Awan mata-matay u uhád hod hide sakay u apoy ay awan be maada-adáp.”

49Dipo kinagi ni Jesus, “U atanan a tolay ay pruwebaan tu apoy. 50Maganda u asen, pero ni mawanan ti lasa ay tumablal dán, pakodyaán pa a pasoliyán u asen na? Konna bi hod nikam, dapat magin konna kam tu asen a makatulung tu tolay, tulungan moy u bawat essa támpara magin maayus u pamággagum moy.”

اکنون انتخاب شده:

Markos 9: MBJC

های‌لایت

به اشتراک گذاشتن

مقایسه

کپی