Markos 13

U Kákkasida nu Templo

(Mateo 24:1-2; Lukas 21:5-6)

1Nadid, nikuna a paluwas dán di Jesus tu Templo ay kinagi nu essa tu disepulus na hide, “Maisto, ilingán mo u kákkagamet nu Templo! Káddakkál nu bito hide a nagamit sakay tunay a ganda u kákkagimet na!” 2Tummábbeg ti Jesus, “I áelingán muwe a dáddákkál a bilay ay mahábba sakay awan ti bito a mawahak a tumáttopo tu kasabito na nan mahábba.”

U Dumemát a Hirap

(Mateo 24:3-14; Lukas 21:7-19)

3Nadid, mentaras a mággetnod ti Jesus tu buked nu Olibo, tu tapat nu Templo ay tinanung siya di Pedro, Santiagu, Juan sakay ti Andres ti lihim. 4“Maari beman a kagiyán mo nikame ni nikasangan a mangyare u kinagi mo? Sakay ánya u tanda ni adene dán a mangyare iye hide a atananan?”#13:4 Basaán tu Lukas 17:20.

5Kanya kinagi nide ni Jesus, “Magingat kam tán awan kam madaya nu maskin deya. 6Dipo makpal a dumemát a magkukunware a hide u Cristo kaya makpal hide a metawtaw. 7Ni makasaneg kam ti labanan a adene nikam sakay makabaheta kam a te labanan be tu adeyo ay diyan kam manteng. Kailangan a mangyare ina hide, pero bakán palla a ina u katapusan. 8Dipo mamáglaban u bansa ti bansa sakay kahariyan ti kahariyan. Maglinog tu iba-iba a lugar, sakay magkahod ti sák-aláp. I iye hide ay sapul pádla nu paghirap a dumemát. Konna la iye tu dipalonga a saket a mabate nu bábbey a adeni dán a magenak.”

9“Humanda kam! Dipo dumemát u panahun a itokyon dikam, sakay bálbággán dikam tu sinagoga hide. Imbistigaan dikam tu atubang nu gubernador hide sakay tu hare hide dipo tu kássunud moy nikán. Iye u págkakataun moy para mángkagi nide tungkul nikán. 10Pero kailangan a mepangaral pa u Maganda a Baheta tu atanan a suluk ni munduwáy bagu a dumemát u katapusan. 11Ni dakáppán dikam sakay bistaán ay diyan kam manteng tu kagiyán moy. Dipo ti itod a odas ay tulungan kam nu Banal a Ispirito ni ánya i dapat moyay a kagiyán.”#13:11 Basaán tu Juan 14:26; 16:7-11; Lukas 12:11-12. 12Kinagi pa ni Jesus, “Káddemát ni panahunan itod ay itokyon nu tolay u kapatkákka na a pabuno; konna bi hod u gimitán nu ama tu anak na. Labanan nu anak u dáddakál na, sakay pabuno na hide. 13Kaiyamutan kam nu atanan dipo tu kássunud moy nikán, pero u manatile a tapat hanggan tu katapusan ay siya u maligtas.”#13:13 Basaán tu Juan 15:21.

U Madukás a Gimet a Awan ti Kapareho

(Mateo 24:15-28; Lukas 21:20-24)

14Nadid, kinagi pa ni Jesus, “Kailangan a intendiyán iye nu mágbasa: Ni ketan moy dán u tunay ti dukás a gimet a awan ti kapareho a katoy tu lugar a awan na dapat a págyanan ay u katoy hide ti Judea ay dapat guminan dán tu buki-buked. 15Sakay ni ti deya u pagabutan tu bubungan nu bilay na ay diyan dán magabala a umogsad a mangalap ti ánya man hina a tawidán na; 16sakay u hod tu uma na ay diyan dán sumole para mangalap ti badu. 17Kakagbi u bábbey hide a mágkabuktet sakay u magpasuso hide ti aldiwan itod!#13:17 Basaán tu Lukas 23:29. 18Idasal moy iye hide tu Diyos a diyan iye mangyare tu panahun nu amiyan, 19dipo maghirap ti husto u tolay hide ti panahunan itod, itod a kahirapan ay awan ti kapareho sapul nikuna a lalangán nu Diyos i munduwáy, hanggan nadid, sakay awan dán iye mahuwa-huway. 20Ni awan paapehitán nu Diyos i aldiwan iye ay awan ti tolay a maligtas; pero paapehitán na i aldiwan itod, alang-alang tu pinile na hide.

21Ni tehhod nikam a magkagi. ‘Atoy he u Cristo!’ oni kagiyán de. ‘Atoy kanon siya!’ diyan kam maniwala. 22Dipo makpal a magwari-ware a hide u Cristo sakay te magwari-ware be a prupeta hide, sakay mángpeta bi hide ti tanda sakay makataka-taka hide a bagay tán itawtaw de ni maare pate u pinile hide nu Diyos.#13:22 Basaán tu Mateo 7:15; Juan 4:48. 23Kanya magingat kam. Dipo impáppadipalongo ku dán nikam a ingkagi u atanan a bagay bagu a mangyare iye hide.”

U Kássole nu Anak nu Tolay

(Mateo 24:29-31; Lukas 21:25-28)

24Sakay kinagi pa ni Jesus, “Káttapos ni aldiwan itod a kahirapan ay magdiklám u aldew, awan dámbe dumemlag u bulan, 25sakay matákneg u biton hide a gábwat ti langet. Sakay mayanág u atanan a kapangyariyan nu kalawakan. 26Káttapos ay ketanák de a Anak nu tolay a dumemát a hod tu panganurin, a tehhod a dakila a kapangyariyan sakay karangalan. 27Paangayán ko u anghel ko hide tu áppat a suluk ni munduwáy tánni ipunán de u tolay hide a pinile nu Diyos.”

U Adal a Gábwat tu Kayo a Igus

(Mateo 24:32-35; Lukas 21:29-33)

28“Intendiyán moy u adal a gábwat tu ponan nu kayo a igus; kapag ni magduun dán u pinget na hide ay tukoy moy dán a adene dán u kássinag. 29Konna bi hod, ni ketan moy dán a mangyare dán iye hide a kinagi ko nikam ay matukuyan moy a adeni dán siya a dumemát; halus atoy dán siya. 30Tatahoden u kagiyán ko nikam: iye hide a atanan ay mangyare bagu a matay u tolay hide a biyag palla nadid.#13:30 Basaán tu Markos 9:1. 31Mawan u langet sakay u luta, pate u atanan a bagay, pero u upos ko ay awan mamawan hanggan-hanggan.”

Awan ti Makatukoy ni nikan u Katapusan ni Munduwáy

(Mateo 24:36-44)

32“Awan ti makatukoy tu aldew oni odas, maski u anghel hide ti langet oni hikán a mismo a Anak nu Diyos. U Diyos Ama la u nakatukoy ti iye. 33Kanya magingat kam sakay lagi a handa dipo awan moy tukoy ni nikan iye a mangyare. 34Iye ay maare tam a ipareho tu essa a tolay a umangay tu adeyo a lugar: bagu siya a lumakad tu bilay na ay inatádden na u bawat essa tu utusan na hide ti tarabaho, sakay kinagiyan na u tagabantay tu pintuwan a dapat lagi a handa tu káddemát na. 35Kanya magin handa kam, dipo awan moy tukoy u káddemát nu kebbilay; maare a ti pággapon, oni hatinggabi, magamulaldew, oni dimadimang. 36Kanya humanda kam makay kedemáttan takam a tidug. 37Iye u bilin ko nikam sakay tu atanan a tolay: pirme kam a nakahanda!”

اکنون انتخاب شده:

Markos 13: MBJC

های‌لایت

به اشتراک گذاشتن

مقایسه

کپی