Markos 12

U Talinghaga nu Ubasan sakay tu Mágtarabaho hide

(Mateo 21:33-46; Lukas 20:9-19)

1Nadid, nagtoldu ti Jesus tu tolay hide tu pamamag-itan nu talinghaga. Kinagi na, “Tehhod a essa a tolay a nagmula ti ubas. Kinudal na itod sakay naggimet ti ábbut a págpáspássan ti ubas. Sakay nagtolnák siya ti bilay a págbantayan. Sakay inyintirega na u uma na tu magtarabaho hod hide, sakay inumangay siya ti iba a lugar. 2Nikuna panahun dán nu sákburas ti ubas ay pinaangay na hod u essa a utusan tu mágmula hide, para alapán u kahate na tu bunga nu ubas. 3Pero tu pákketa nu págtarabahuwán na hide tu utusan nu amu de ay binálbág de siya, sakay pinasole di siya a awan ti tawed. 4Kanya u makákkao ay nagpaangay hod a huway ti essa pa a utusan, pero u utusan a pinaangay na hod ay pinakol de sakay pinasanike de. 5Nangutus damman a huway u makákkao ti essa pa a utusan pero binuno di siya. Makpal pa a pina-angay hod u makákkao, pero u iba ay binálbág de sakay u iba ay binuno de. 6Hanggan a awan dán ti nabuhay nan u eessa na dálla a anak a pinakamamahal na. Kanya pinaangay na u anak na tu uma na. Ta u akala na ay igalang de siya. 7Pero nikuna a ketan nu mágmula hide u anak na ay kinagi de, ‘Sa itona u tagapagmana. Kamon he, bunuwán tam siya para me angay nikitam u atanan a manaán na.’ 8Kanya sinunggaben de sakay binuno de, sakay káttapos ay imbut de tu luwas nu kaubasan u bangkay na.”

9Nadid, “Ánya wád i gimitán nay nu makákkao tu ubasan? Siguradu a umangay siya tu mágmula hide sakay bunuwán na hide. Káttapos ay iyintirega na ti iba a tolay u uma na. 10Awan moy pad beman la nabasa u kinagi na tu Kasulatan?

‘U bito a inumádden nu mágbilay hide,

ay siya bál u bito a pinakapundasyon.#12:10-11 Basaán tu Awit 118:22-23; Gimet 4:11; 1 Pedro 2:7.

11Iye u ginimet nu Panginoon,

a makataka-taka sakay tunay ti ganda.’”

12Nikuna a matukuyan nu pinuno nu Judio hide a hide u páppatamaan ni Jesus ti talinghagaan itod ay gusto de a dakáppán ti Jesus. Pero manteng hide tu tolay hide. Kanya pinabayan di dálla ti Jesus, sakay limmakad hide.

U Págbayad ti Buwes

(Mateo 22:15-22; Lukas 20:20-26)

13Nadid, pinaangay nu pinuno nu Judio hide tu kán Jesus u sangan a Pariseo, sakay u sangan a alagad ni Herodes para bantayan de u kákkagiyán na para tehhod hide a mesihe a kontara nikuna. 14Immadene hide sakay kinagi de nikuna, “Maisto, tukoy me a tatahoden u kákkagiyán mo, sakay awan ka ti ayunan. Dipo awan ka umileng tu kalagayan nu tolay, nan ni ánya u tatahoden a tungkul tu kaluuben nu Diyos u itáttoldu mo. Nadid, tama beman a magbayad kitam a Judio ti buwes ni Cesar a hare ti Roma?”

15Pero tukoy ni Jesus a magkukunware la hide, kanya kinagi na, “Bakin páppurbaanák moy? Atáddinák moy ti pilak.” 16Inangayan di ngane ti Jesus ti pilak. Sakay nagtanung ti Jesus, “Kándeya a ngahan sakay letrato u neukit heeh?”

Timmábbeg hide, “Kán Cesar a hare ti Roma.”

17Kanya kinagi ni Jesus nide, “Iyatád moy tu hare u para tu hare, sakay iyatád moy tu Diyos u para tu Diyos.”

Tu pákkasaneg de tu tábbeg na ay nagtaka hide.

U Tanung Tungkul tu Kákkabiyag a Huway

(Mateo 22:23-33; Lukas 20:27-40)

18Nadid, immangay tu kán Jesus u sangan a Saduseo para magtanung. U Saduseo hide ay itáttoldu de a awan mabiyag a huway u patay hide. Kinagi de, 19“Maisto, ayun tu batas a insulat ni Moises: ‘Kapag ni natay u lállake a awan ti anak tu kabanga na ay dapat pakasalan nu wadi na a lállake u nabiluwan na, tám para magkahod hide ti anak para nikuna.’” 20Nadid, kinagi de, “Tehhod a pitto a mátkaka tu itod a lállake. Nákkabanga u ákka, pero natay a awan ti anak. 21Kanya u bilo ay kinabanga nu sumunud tu ákka. Pero natay bi siya a awan ti anak. Konna bi hod u nangyare tu katállo. 22Hanggan tu kapitto de a wadi. Natay hide a atanan a awan ti anak tu bábbey. Tu katapusan ay natay be u bábbey. 23Nadid, ti deya u magin kabanga ni bábbiyan itod tu kaduwwa a biyag dipo nakabanga siya nu pitto?”

24Timmábbeg ti Jesus, “Mali kam, dipo awan moy naintendiyan u nakasulat tu Kasulatan nu Diyos sakay u kapangyariyan na. 25Dipo tu kaduwwa a biyag ay awan dán hide mákkabanga. Dipo kapareho dán hide nu anghel hide ti langet. 26Tungkul be tu kákkabiyag a huway, awan moy pad beman la nabasa u insulat ni Moises? Nikuna a hod siya tu maggangat a kayo, kinagi nikuna nu Diyos, ‘Hikán u Diyos ni Abraham, U Diyos ni Isaac sakay u Diyos ni Jacob!’ 27Bakán siya a Diyos nu patay hide, nan Diyos nu biyag hide. Kanya mali kam!”

U Mahalaga a Utus

(Mateo 22:34-40; Lukas 10:25-28)

28Tehhod be a essa a tagapagtoldu hod tu Kautusan a mágsaneg tu mákpagpasuwayan hide ni Jesus. Nasaneg na a mahusay u tábbeg ni Jesus, kanya nagtanung be siya, “Ánya beman u pinakamahalaga a utus?”

29Timmábbeg ti Jesus, “Iye u mahalaga a utus: pakasanigán moy a taga-Israel! U Panginoon tam a Diyos, u Tunay a Panginoon. 30Kanya mahalán mo u Panginoon mo a Diyos ti buo mo a isip, buo a kaliduwwa, sakay tu buo mo a begsák! 31Sakay u kaduwwa ay iye, ‘Mahalán mo u kapatkákka mo a konna tu págmahal mo tu sadile mo.’ Awan dán ti agum a utus a higit a mahalaga kasera ti iye a duwwa.”#12:31 Basaán tu Levitico 19:18; Roma 13:9; Galacia 5:14; Santiago 2:8.

32Kinagi nu tagapagtoldu tu Kautusan, “Tama ka, Maisto! Tatahoden i kinagi muwe a eessa la u Diyos awan dán ti iba. 33Sakay napakahalaga u magmahal nikuna tu buo a puso, buo a pag iisip, sakay tu buo a begsák. Sakay kailangan be a mahalán u kapatkákka konna tu págmahal tam tu sadile tam. Iye u pinakamahalaga kasera tu ánya man a kalase ni alay a táttutudán sakay tu iba pa hide a handug.”

34Nikuna a masaneg ni Jesus a tama u tábbeg na hide ay kinagi na nikuna, “Adene ka dán a masakup nu pághare nu Diyos.” Sapul hod ay awan dán ti nangahas a nagtanung ni Jesus.

U Tungkul tu Ginábwatan nu Cristo

(Mateo 22:41-46; Lukas 20:41-44)

35Nadid, tu págtoldu ni Jesus tu Templo ay tinanung na u tolay hide, “Bakin a kákkagiyán nu tagapagtoldu hide tu Kautusan a u Cristo ay anak ni David?#12:35 Anak ni David: U gusto na a kagiyán ay gábwat tu lahe ni David. 36Awan beman ti David dán u nagkagi tu tulung nu Banal a Ispirito a:

‘Kinagi nu Panginoon tu Panginoon ko,

Mággetnod ka tu kawanan ko,

hanggan a mapasuko ko niko u kadima mo hide.’

37Nadid, ni dinulaw siya ni David a Panginoon, kodya siya a nagin lahe ni David?” Kanya masaya u tolay hide a nágsaneg nikuna.

Babala Kontara tu Mágtoldu hide tu Kautusan

(Mateo 23:1-36; Lukas 20:45-47)

38Kinagi pa ni Jesus tu págtoldu na, “Magingat kam tu tagapagtoldu hide tu Kautusan. Mahilig hide a máglakad-lakad a nakasulot ti mágkalayon a damit. Sakay gugusto de a batiyán hide sakay igalang nu tolay hide. 39Sakay gugusto di be a umetnod tu áetnuden nu mataas a tolay tu sinagoga sakay tu bilay a tehhod a handaan. 40Sakay ugale di be a magdasal ti atakdug, para isipán nu tolay hide a malinis hide. Sakay áubusán de a agiwán u ari-ariyan nu bilo hide. Kanya i tolayan iye hide ay makatanggap ti madágge a parusa.”

U Inyatád nu Bilo tu Diyos

(Lukas 21:1-4)

41Nadid, nággetnod ti Jesus tu adene nu págdáttonan ti ikapo tu Templo. Áelingan na u tolay hide a magdátton ti pilak. Makpal a mágkayaman a nangatád ti dáddakkál a halaga. 42Immadene bi hod u essa a mahirap a bilo sakay nangatád ti duwwa a sentabos. 43Dinulaw ni Jesus u alagad na hide sakay kinagi na, “U tatahoden ay mas dakál u inyatád ni biluwan itona kasera nide a atanan. 44Dipo hide ay nangatád la tu susubra de a pilak. Pero i biluwe ay nangatád maski ni mahirap siya. Inyatád na u atanan a kabiyagen na.”

اکنون انتخاب شده:

Markos 12: MBJC

های‌لایت

به اشتراک گذاشتن

مقایسه

کپی