Galacia 6
6
U Mánnampalataya hide ay Dapat a Magtulungan
1Kákkapatkákka ko hide, ni te nagkasala a kaguman moy, hikam a igággiyya nu Banal a Ispirito ay uhunán moy siya a pasoliyán tu Diyos. Pero magingat kam makay pate hikam ay matokso be. 2Magtulungan kam tu ánya man a problema moy hide, tu konna he a paraan ay matupad moy u utus ni Cristo. 3Ni ti deyaman u magakala tu sadile na a mas higit siya tu agum pero awan labe ay nagbuli-bule tu sadile na. 4Dapatay ay ilingán nu balang essa u sadile na a gimet. Dipo u nakapangatád tu kasayaan nu tolay ay u pággimet na ti maganda bakán au pángpareho na tu agum tu gimet na. 5Dipo managut u bawat essa tu sadile de a ginimet.
6U tináttolduwan hide tu upos nu Diyos ay dapat mangatád tu pagpapala de tu magtoldu nide tu upos nu Diyos.
7Diyan moy lokuwán u sadile moy. U Diyos ay awan maloko nu maskin deya. Ni ánya u immula nu essa a tolay ay itod labe u aniyán na. 8Ni u sásunudán nu essa a tolay ay u hilig nu pilas na ay mepalulung siya. Pero u tolay a u Banal a Ispirito u sássunudán na ay magkahod siya ti biyag a awan ti kahád. 9Kanya diyan kitam magsawa a maggimet ti maganda tu agum a tolay. Dipo dumemát u aldew a makatanggap kitam ti gantimpala tu awan tam káimang tu pággimet ti maganda. 10Kanya ngane samantalaán tam u pagkakataun a makagimet kitam ti maganda tu atanan a tolay, lalu dán tu kákkapatkákka tam hide ti pánnampalataya.
U Katapusan a Paalala
11Mapansin moy wád a dáddakkál a letra i págsulat kuwáy, hikán a mismo u nagsulat he.#6:11 Basaán tu 1 Corinto 16:21.
12U tolay a mangpilit nikam a magpature ay gustu dila a puriyán hide nu agum a tolay. Konna hod gimet diyay dipo paraan de a awan hide mapahirapan a konna tu págpahirap tu tolay a magtoldu au kamatayan la ni Cristo tu kudus u makaligtas tu tolay. 13Maski ngane u nagpature hide ay awan sumássunud tu Kautusan. Gusto dikam la a pature tán mepagmadakál de a hide u nakaakit nikam para sumunud ti kautusanan iye. 14Nakwa awan iye mangyare nikán. U ipagmadakál kula ay u kákkatay nu Panginoon tam a ti Jesu-Cristo. Dipo tu kamatayan ni Cristo tu kudus ay awan dán ti halaga para nikán u bagay hide ti munduwáy, sakay hikán ay awan dámbe ti halaga para ti munduwáy. 15Awan mahalaga ni nature oni awan u essa a tolay. U mahalaga ay u pángbagu nikitam nu Diyos. 16Hikam a atanan a sumássunud tu kinákkagi ko hide, magkahod kam nakwa ti kapayapaan sakay kagbiyan kam nu Diyos, dipo hikam u tolay a pinile nu Diyos a kao na.#6:16 Basaán tu Awit 125:5.
17Kanya sapul nadid ay diyan moy dán nakwa dagdagen i hirap kuwáy. Dipo u peklat hide tu bággi ko ay magpatunay a tagapagserbiyák ni Jesus.
18Kagbiyan kam nakwa nu Panginoon tam a ti Jesu-Cristo kákkapatkákka ko hide. Amen!
اکنون انتخاب شده:
Galacia 6: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.