2 Pedro 3
3
U Pananto a Káddemát nu Panginoon
1Mahal ko hide a kákkapatkákka, iye u kaduwwa ko a sulat nikam. Tu sulat ko hide, ay pinagsumakitan ko a lukagán u isip moy tu mágkaganda hide a gimet, tu pamamag-itan nu pág-paalaala nikam tu sangan hide a bagay. 2U gusto ko ay lagi a sumariwa tu isip moy u upos nu prupeta hide nu Diyos tu itod, sakay u utus a inyatád nu Panginoon sakay Tagapagligtas tu pamamag-itan nu apostol hide, a pinaangay na hina nikam. 3Dipalongo tu atanan, ay dapat moy a matukuyan a tu dimodyan a aldew ay dumemát u magseste hide sakay sunudán de u mágkadukás de a kagustuwan. 4Sakay kagiyán de a, “Awan beman nagpananto ti Cristo a dumemát? Hadya ran siya nadid? Nágkatay dán u dáddakál me hide pero awan pade ti págbabagu sapul nikuna a lalangan i munduwáy.” 5Umád de a kilalaán a linalang nu Diyos u langet sakay tu luta tu kapangyariyan nu upos na. Nilalang u luta gábwat tu dinom sakay tu pamamag-itan nu dinom.#3:5-6 Basaán tu Genesis 1:6-8, 7:11. 6Sakay tu pamamag-itan be nu dinom ay linonso tu itod nu Diyos i munduwáy. 7Tu pamamag-itan be nu upos na, u kasalukuyan nadid a langet sakay luta ay intakda nu Diyos a tutudán ti apoy tu aldew nu pághatul sakay págparusa tu awan hide sumunud tu Diyos.#3:7 Basaán tu Santiago 3:6, 2 Tesalonica 1:9, Juan 1:7.
8Pero dyan moy nakwa kali-kalimunan, mahal ko hide a kákkapatkákka: a tu Panginoon, u essa a aldew ay kumán a sanglibu a taon, sakay u sanglibu a taon ay kumán la a saldew.#3:8 Basaán tu Awit 90:4. 9Kaya dyan moy isipán a nalimunan dán nu Panginoon u impananto na tungkul tu katapusan ni munduwáy a konna tu akala nu agum a tolay. U tatahoden ay atádden na palla ti pagkakataun u atanan tolay a makapagsise, dipo awan na gusto a mepahamak u maskin deya man.#3:9 Basaán tu Gimet 17:30.
10Pero u aldew a kássole nu Panginoon ay dumemát a konna tu káddemát nu essa a mágtakaw. Awan ti makatukoy! Ti aldiwan itod, u langet ay bigla a mawan a tehhod a makaánteng a galungogung. Matunaw tu apoy u atanan a bagay. Maski u luta sakay tu atanan a katoy he ay matutod. 11Ni konna he u mangyare tu atanan a bagay, ay dapat kam a mabiyag a tehhod a kalinisan sakay makadiyos a kákkabiyag, 12mentaras a uhayán moy u aldew a káddemát nu Diyos. Ti aldiwan itod ay matutod u langet sakay matunaw u atanan bagay a katoy ti lutaáy.#3:12 Basaán tu Isaias 34:4. 13Pero ayun tu pananto nu Diyos, ay maguhay kitam tu bigu a langet sakay bigu a luta a awan ti maski ánya man hod a kadukássan.#3:10-13 Basaán tu Mateo 24:30-42, Hebreo 10:25, Pahayag 16:14-15.
14Kaya ngane, mahal ko hide a kákkapatkákka, mentaras maguhay kam ti iye hide a bagay, ay pagsikapan moy a mabiyag a te kapayapaan, malinis sakay awan ti dangát tu pangileng na.#3:14 Basaán tu 1 Pedro 1:22, 1 Juan 3:33. 15Alalahanán moy a kaya awan palla dumemát u Panginoon ay para atádden na pa ti pagkakataun a maligtas u tolay hide, konna tu insulat nikam nu kapatkákka tam a ti Pablo tu pamamag-itan nu karunungan a inyatád nikuna nu Panginoon. 16Tu atanan nu sulat na hide ay pirme a konna hina i paalaala naay. Tehhod a parte nu sulat na a mágkatánnáb kaya mahirap a maintendiyan. Kaya male u pángpakahulugen nu kulang hide ti karunungan. Konna be hina u gággimitán de tu agum a parte nu banal a Kasulatan, kaya dipo ti iye ay mismo a hide u mángpahamak tu sadi-sadile de.
17Nadid ta tukoy moy dán iye, mahal ko hide a kákkapatkákka, dapat kam a mag-ingat para awan kam metaw-taw nu tolay hide a awan ti maganda a gimet. Tán para awan kam mehiwalay tu maganda moy a kalagayan tu atubang nu Diyos. 18Pero lumagu kam tu kagbi nu Diyos sakay tu pákkatukoy moy tu Panginoon tam sakay Tagapagligtas a ti Jesu-Cristo. Puriyán siya nadid sakay magpakahanggan! Amen.#3:18 Basaán tu Lukas 2:52, 2 Pedro 1:5-8.
اکنون انتخاب شده:
2 Pedro 3: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.