2 Pedro 2
2
U Mágkabule a Tagapagtoldu
1Pero nagkahod be ti mágkabule a prupeta tu itod ti Israel. Sakay nadid ay konna bihod dipo tehod nikam a dumemát a mágkabule a prupeta. Magkunware hide a tatahoden u itáttoldu de nikam pero baka-bakán bal. Iye a adal de ay maka sida tu pánniwala moy. Adiyan de u Panginoon a nangtubus nide kaya bigla a dumemát u kapahamakan bilang parusa nide. 2Sakay makpal hide a maakit a mánnampalataya a sumunud tu gimet de a malaswa. Kaya dipo he ay hamak-hamakán nu awan hide mánnampalataya u pánnampalataya tam ni Cristo. 3Sakay tu makasadile de a kagustuwan, ay dayaán dikam tu pamamagitan nu mágkaganda a upos para maalap de u kayamanan moy. Nalay dán a nakahanda u hatul a para nide, sakay u Diyos a mangparusa nide ay awan tidug.#2:1-3 Basaán tu Mateo 5:19, Hebreo 13:9, 1 Juan 2:24-26
4Dipo maski u anghel hide ay awan pinatawad nu Diyos nikuna nagkasala hide. Nan, intápduk na hide tu madisalad sakay madiham a ábbut tánni he di dán hod a uhayán u Aldew nu Pághatul.#2:4 Basaán tu Juan 1:6. 5Awan be kinagbiyan nu Diyos u tolay hide tu itod dipo tu kadukássan de. Awan siya ti inligtas maliban la ni Noe a nángpakapospos tungkul tu malinis a kákkabiyag, sakay tu pitto na a kaguman.#2:5 Basaán tu Genesis 8:18, 6:6-8. 6Pinarusaan be nu Diyos u banuwan a Sodoma sakay Gomora dipo tu kasalanan de, para ipeta tu mággagimitán ti mágkadukás u sangpáttán de.#2:6 Basaán tu Genesis 19:24. 7Pero inligtas nu Diyos ti Lot a essa a malinis a tolay. Nabalisa siya a tahod dipo tu gággimitán a mágkalaswa nu tolay hide a awan maki-Diyos.#2:7 Basaán tu Genesis 19:16-29. 8Aldew-aldew ay awan ti kasayaan ti Lot a mangáeleng tu kadukássan a gággagamitán nu tolay hide mentaras a mákpágyan siya ti lugaran itod. 9Pero tukoy nu Panginoon ni kodya a iligtas tu pagsubuk hide u atanan a tapat nikuna. Sakay ni kodya na a parusaan u mággagimitán hide ti madukás káddemát nu Aldew nu Pághatul.#2:9 Basaán tu Isaias 66:44. 10Lalu dán u sumunud hide tu kagustuwan nu pilas sakay sumássuway tu kapangyariyan nu Diyos. Palalo iye hide a tagapagtoldu a kákkagiyán ko. Awan hide ti ánteng a insultuwán u makapangyariyan hide a linalang ti langet.
11Pero maski u anghel hide a mas mabegsák sakay mas makapangyariyan, ay awan hide ti kinagi a madukás tu atubang nu Panginoon tungkul tu mágkabule hide a tagapagtoldu. 12Iye hide a tolay ay kumán a hayup a awan ti isip. Sássestiyán de u bagay hide a awan de maintendiyan. Kanya maparusaan hide a konna tu mailam a hayup a neenak para dakáppán sakay bunuwán. 13Iye u kagantiyan nu ginággimet de a madukás. Mahilig hide a maggimet ti kalaswaan maskin tu atubang nu katolayan. Dakál a kákkasanike sakay kapintasan u iyatád de nikam. Ikasaya de u págdaya de nikam mentaras hide ay kuman a kaguman moy tu pamágkasayaan moy. 14Ni umileng hide ti bábbey, ay putat ti kákkasoh. Awan hide ti imang ti pakán gimet ti kasalanan sakay ipahamak dipa ti kasalanan u mágkahina hide ti pánnampalataya. Hide ay sakim. Binusong dán hide! 15Inadággen di dán u tama a ugale a gusto nu Diyos sakay u sinunud de ay u madukás a gimet. Inaheg de ti Balaam a anak ni Beor a nagpabayad tu pággimet ti madukás.#2:15 Basaán tu Bilang 22:5, 7. 16Sakay dipo sinuway na u utus nu Diyos, ay pinagkagiyan siya nu hayup na a asno, nagupos a kumán a tolay para masaway siya tu madukás a gággamitán na.#2:16 Basaán ti Bilang 22:21, 23, 28, 30-31.
17U kapareho ni mágkabuliyán iye hide a tagapagtoldu ay u sapa hide a nasáttan sakay tu diklám a inyáppah nu mabegsák a pahás. Inhanda dán nu Diyos u grabit diham a lugar para nide.#2:13-17 Basaán tu Hebreo 13:4, Pahayag 2:20-23. 18Dipo u pangisip de ay tunay hide ti kalalake, pero awan labe ti seserbi u kákkagiyán de. Kákkagiyán de a awan madukás u kássunud tu kagustuwan nu pilas. Kanya maakit de a maggimet a huway ti madukás u bigu palla hide a immadág tu date de a madukás a kákkabiyag. 19Ipáppananto de u kalayaan tu tolay hide a maakit de, pero mismo hide ay alipin nu kasalanan a mángpahamak nide. Dipo u tolay ay alipin nu ányaman a bagay a mangpugád nikuna. 20U tolay hide a nakatukoy dán ni Jesu-Cristo a Panginoon sakay Tagapagligtas ay immadág dán tu magkadukás hide a gimet ti munduwáy. Pero ni sumole hide tu gimet a madukás sakay paalipin hide a huway ti iye, ay mas grabi pa tu date u magin kalagayan de. 21Mas maganda pa ni awan de natukuyan u tungkul tu makadiyos a kákkabiyag, kasera ni natukuyan de iye sakay adággen de labe tu dimodyan a aldew u banal hide a utus a inyatád nide. 22Ni konna hod ay nebagay la nide u kakagiyan a,
“U aso ni magota ay kanán nala be a huway u inyota na.
Konna be tu babuy, ni digusán mu ay sumole labe tu lusak.”#2:22 Basaán tu Kawikaan 26:11.
اکنون انتخاب شده:
2 Pedro 2: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.