लुका 24
24
इसु मर्याबाट ज्युँदिया
(मत्ति २८:१-१०; मर्कुस १६:१-८; युहन्ना २०:१-१०)
1हप्ताको पैलो दिन छगलै तिँ स्हैनिहरुले आपै बुनाया मलम र बास आउन्या तेल ल्हिइ च्यान गइन् 2तिनुहरु ताँइ पुग्यापछि च्याना ढुंगो हटाया देखिन्। 3तर तिनुहरु च्यान भित्त पैथा प्रभु इसुको हड देखिनुन्। 4तिनुहरु यइकै बारेमै अल्मलिरयाइ छिन्, तेइबेला उज्याला टाला लाया दुइ जुन मान्ठ तिनुहरुका काखति ढुक्या। 5र तिनुहरुले भेइमानिकन घोप्ट्या पडिन्। अनि तिँ दुइ जुन मान्ठले भुन्या, “ज्युँदा मान्ठकन मर्याहरुका च्यानमै क्यान खोइदिछौ। 6तिँ न्या नाइ तर मर्याबाट ज्युँदा भइ उठ्याछुन्। अनि गालिलमै भया बेला तुमिहरुकन उनुले क्या भुन्याछिया तेइ स्हुम्जः 7‘मान्ठको छोरो पापि मान्ठका हातमै पड्न्याछ, क्रुसमै टाँगिन्याछ र तिन दिनमै फेरि ज्युँदो भइ उठ्न्याछ।’”
8तब तिनुहरुले इसुको बचन स्हुम्जिन्। 9अनि तिनुहरु च्यानबाट फर्केर एगार जुना मुख्य चेलाहरुकन र अरु स्हबैकन यिँ कुडा स्हुनाइन्। 10तिँ स्हैनिहरु मरियम मग्दलिनि, याकुबकि आमा मरियम र योअन्ना छिन्। तिनुहरु स्हात भयाइ अरु स्हैनिहरुले पुनि यिँ कुडा मुख्य चेलाहरुकन भुनिन्। 11तर तिँ स्हैनिहरुले भुन्या कुडा स्हाँचा हुन भुनि तिनुहरुले बिसास गर्यानुन्। 12तर पत्तुरुस जुडुक्क उठ्यार दगुड्डै च्यान गया। तिनुले ताँइ भित्त निउडिकन हेर्या कात्तोबाएक अरु केइ देख्यानुन्। ताँइ भया कुडा देखेर अचुम्म मान्दै घर फर्क्या।
इसु इम्माउसको बाटोमै
(मर्कुस १६:१२-१३)
13तेइ दिन इसुका चेलाहरुमद्दि दुइ जुन यरुसलेमबाट एगार किलोमिटर टाडा पड्न्या इम्माउस नाउको गाउँतिर गैरया छिया। 14तिनुहरु भख्खरै भया घटनाका बारेमै आपु आपु कुडा गद्दैछिया। 15तेइबेला इसु आपै आयर तिनुहरु स्हात हड्न लाग्या, 16तिनुहरुले इसुकन देख्या रपुनि राउन स्हक्यानन्। 17इसुले तिनुहरुकन स्होद्या, “तुमिहरु हड्डै आपु आपु क्या कुडा गद्दाछौ?”
तिनुहरु हड्डा हड्डै ढुक्या र तिनुहरुका उनुहार उदास देखिन्छिया। 18अनि तिँ दुइ मद्दि क्लेओपास नाउँ भयाले इसुकन जबाप दिया, “यरुसलेम घुमफिर गरि आइकन पुनि ताँइ क्या भयाछ तुमिकन थाँ नाइ?”
19इसुले तिनुहरुकन स्होद्या, “क्या कुडा?”
तिनुहरुले जबाप दिया, “नासरतका इसुका बारेमै भया कुडा। तिँ एक जुन परमेसोरका रैबार्या छिया, अनि परमेसोर र स्हबै मान्ठहरुका अगेडि तिँ काम र बचनमै सक्तिसालि छिया। 20तर हाम्मा मुख्य पुजारिहरुले उनुकन मार्नका निम्ति रोमि सासन गन्न्याहरुति स्हुम्पिदिया, र तिनुहरुले उनुकन क्रुसमै टाँग्या। 21अनि इस्राएलको मुक्ति गद्दिन्या तिँ नै हुन भुन्न्या हामिले आसा गर्या छियौं। यि स्हबै घटना घट्या आज तिन दिन भयो। 22हामिहरु मद्दिकि कोइ कोइ स्हैनिले हामिकन अच्चुम्म बुनायाइ छुन्। तिनुहरु आज छगलै च्यान गइन, 23तर इसुको हड देखिनुन्। तिनुहरुले आइ हामिकन भुनिन्, ‘हामिले सोर्गका रैबार्याहरुकन देख्यौ, र तिनुले इसु ज्युँदिया छुन् भुन्या।’ 24हामिहरु मद्दिको कोइ कोइ च्यानमै गया र तिँ स्हैनिले ज्या भुन्याइ छिन्, तेइतै छियो तर तिनुहरुले इसुकन देख्यानुन्।”
25इसुले तिनुहरुकन भुन्या, “ए मुर्ख मान्ठौ, तुमिहरु परमेसोरका रैबार्याहरुले भुन्या कुडाहरुमै बिसास गन्न कति स्हैतै गद्दाछौ! 26क्या मुक्ति दिन्या ख्रिस्टले आम्नो महिमामै जानु भुन्दा पैला यि दुख्खहरु पाउनु खाँचो छियोन र?” 27तब मोसाले र स्हबै परमेसोरका रैबार्याले धर्मसास्त्रमै आम्ना बारेमै लेख्या कुडाहरुको अथ्थ इसुले तिनुहरुकन बुजाइदिया।
28अनि तिनुहरु जो गाउँमै जाँदैछिया ताँइ नजिकै पुग्यापछि इसु अँजै अग्यार जान खोज्या। 29तर तिँ दुइ जुनले इसुकन यइथो बिन्ति गर्या, “आज हामि स्हातै बस, क्यानकि बेल बुडिग्या र झल पड्न लाइगो।” अनि इसु तिनुहरु स्हात बैन घरमै गया। 30जब इसु तिनुहरु स्हात खान बस्या तब उनुले रोटो स्हमात्यार परमेसोरकन धन्याबाद दिया। अनि भ्हाँच्यार तिनुहरुकन दिया। 31तब परमेसोरले तिँ दुइजुनाकन उनु नै इसु हुन् भुनि रौन स्हक्न्या बनाया। अनि इसु तिनुहरुकै अगेडिबाट बिलाया। 32तिनुहरुले आपु आपु भुन्न लाग्या, “उनुले हामि स्हात बाटोमै हन्डै धर्मसास्तरको अथ्थ बुजाइदिँदा हाम्मो हिद्दया आनन्दले गद्गद् भया छियोन र?”
33तिनुहरु तेइबेला तुरुन्तै उठ्यार यरुसलेममै फर्क्या र एगार मुख्य चेलाहरु र तिनुहरु स्हात जुम्मा भयाहरुकन भेट्या, 34तब तिनुहरुले तिँ दुइ जुनाकन यइथो भुन्या, “प्रभु स्हाँचि नै मर्याबाट ज्युँदिया छुन् र सिमोनति देखाला पड्या रैछुन्!”
35अनि तिँ दुइ जुनले बाटोमै भया कुडाहरु र रोटो भ्हाँच्या बेला क्यागरि तिनुहरुले इसुकन रया छिया, तेइ भुन्या।
इसु चेलाहरुति देखिया
(मत्ति २८:१६-२०; मर्कुस १६:१४-१८; युहन्ना २०:१९-२३; प्रेरित १:६-८)
36तिनुहरुले यि कुडा बोल्दा बोल्दै इसु तिनुहरुका म्हाँजौदा देखिया र भुन्या, “तुमिहरुकन सान्ति होस्।”
37अनि “हामिले त भुत देख्यौ” भुनि तिनुहरु तर्स्या, र भेइले आत्तिया। 38तर इसुले तिनुहरुकन भुन्या, “तुमिहरु क्यान बिचल्लित हुन्छौ, र तुमिहरुका मुनौदो क्यान संका गद्दाछौ? 39मेरा हात र गोड हेर, मु नै हुँ। मुकन छामेर हेर क्यानकि भुतका त मासु र हाड हुदैनुन्, तर मेरा त छुन्, तुमिहरुले देख्छौ।”#२४:३९ इसुले तेइ भुन्या क्यानकि आम्ना हात र गोडामै किलाका दागहरु तिनुहरुकन हेराइकन मुइ इसु हुँ भुनि भुन्न।
40यस्तो भुन्दै तिनुहरुकन इसुले हात र गोडा देखाया। 41तिनुहरु खुसिले पत्याउन नस्हकिन्या गरि अचुम्म मान्या, तेइभइकन इसुले भुन्या, “नेइ तुमिहरु स्हात केइ खान्या कुडा छ?” 42अनि तिनुहरुले पोल्या माछाको चोक्टा इसुकन दिया। 43तब उनुले ल्हियार तिनुहरुकै अगेडि खाया।
44अनि इसुले तिनुहरुकन भुन्या, “तुमिहरु स्हात हुँदा मोइले बोल्या बचनहरु यिँ नै हुन्। मोसाको अइनमै, परमेसोरका रैबार्याले र भजनका किताबमै मेरा बारेमै लेख्या स्हबै कुडा पुरा हुनै पड्छ।”
45तब धर्मसास्त्रमै लेख्या बचन बुइन इसुले तिनुहरुको दिमाग खोलिदिया। 46र इसुले तिनुहरुकन भुन्या, “यइथो लेख्याछ, मुक्ति दिन्या ख्रिस्टले दुख पाउनु र तिन दिनमै मर्याबाट ज्युँदिनु पड्छ, 47अनि इसुको नाउँमै पछ्ताप र पाप माफको बारेमै यरुसलेमबाट सुरु गरि स्हबै देसका मान्ठहरुकन प्रचार हुनुपड्छ। 48तुमिहरु यि स्हबै कुडाका स्हाँचि हुनु पड्छ। 49अब स्हुन, मेरा बाबाले गर्या कबुल तुमिहरुति पठाउन्याछु, तर परमेसोरको सक्ति नपाउँदा स्हुम्म तुमिहरु यइ सहरमै बसिरया।”
इसु सोर्ग गया
(मर्कुस १६:१९-२०; प्रेरित १:९-११)
50अनि इसुले चेलाहरुकन बेथानिया स्हुम्म ल्हिया, र आम्ना हात उठाइ तिनुहरुकन असिपात दिया। 51इसुले तिनुहरुकन असिपात दिदैगद्दा, इसु तिनुहरुबाट छुट्टियार सोर्गमै ल्हिइया। 52अनि तिनुहरुले इसुकन ढोग गर्या, र सारै आनन्दित भइ यरुसलेम फर्क्या। 53तब तिनुहरुले उकुरि मुन्दिरमै बसि परमेसोरको गुनगान गर्या।
اکنون انتخاب شده:
लुका 24: JUML
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 (Active), Mother Tongue Translators Society and Wycliffe Bible Translators, Inc. All rights reserved.
