Matta 28
28
Guntǝm Yesui A Bwaa
(Mar 16:1-8; Luk 24:1-12; Yoh 20:1-10)
1Kum Fǝbtǝm Yahudawagɨɨ a shui, nǝn dibɨlɨ nǝn kumsʌl, nǝngɔ Maryamu bwɛn Magadaliyaɨ jǝbɔ Maryamu wini ja yɔ dʌngtǝm tuugɨɨ.
2Tʌgo a kang, nǝngɔ ja maa kaa dalɨ mǝgtǝm tǝmɨ, jʊ a bwɨɨ kaa bwɛ twama Tɛlalɔɨ a gǝla a dʌbʌl a tʊngǝm tɛl nɨ ja swa a nyanga tuugɔ gǝmɨ, a yɨ a dʌbʌl gǝn. 3Beta lɛ na kwama, bɛllɛ gǝnɔ a fulo nǝn fǝbfǝb nyɔ na fǝmǝn. 4Nǝb tɔɔtǝmɔ a kuwo gǝnɨ, taalɔ a ta ji dangǝn, bʊtɔ jinɔ ka lɛ nǝn kʌbkʌb nyɔ. Nǝngɔ ja tǝla a tǝm mǝ ja bʊlala bʊlalaɨ.
5Nǝngɔ bwɛ twama Kwaamaɨ a sʊwa nɔɔtǝm nɨ gɔ, “Ka jǝ́ nyʊwa lɛ taal, n nyǝm jǝ́ saa Yesu wʊnɨ ja kʊʊɨ. 6Mɨ fɔ. A gun kanga a sʊwaɨ. Ba jǝ́ kuwo daagɔ ja yam gǝnɨ. 7Jǝ́ yɔ dǝbǝr dǝbǝr ya jǝ́ sʊwa bɛtɔ mɛlalɨ gǝnɔ gɔ, ‘A gun a bwaagɔ gǝm. N wɔ ya laa jen laa a Galili, n daa gɔ jǝ́ kuwom gǝn nɛɨ.’ N jʊ a bɛ nǝn mǝ sǝ ba n sʊwa jeni.”
8Nǝngɔ ja bǝla tuugɔ dǝbǝr dǝbǝr nǝn taalɨ, jǝbɔ fulotǝm nǝl a lada. Jǝ mwal lɛ sǝ ya jǝ sʊwa bɛtɔ mɛlalɨ Yesui. 9Nǝngɔ Yesu nǝn kang gǝn a tǝga jii. A sʊwa ji gɔ, “Mǝ yal jen nɛ.” Nǝngɔ ja kʌl ba ja kwal naa gǝnɔ ja jʊng ja nǝ gǝn dʊʊnɨ. 10Nǝngɔ Yesu a sʊwa ji gɔ, “Ka jǝ́ nyʊwa lɛ taal. Ya jǝ́ sʊwa kɛtǝlam mɨɨ ja shu a Galili, n daa gɔ ya jǝ kuwo i lɛ woi.”
Fulon Kɛl Nǝb Dʌngtǝm Tuugɨɨ
11Nɔɔtǝm nɨ shu lɛɨ, nǝngɔ kaam nǝb a mʊgɔ nǝb dʌngtǝm tuugɔ a dɔ mʊgɔ tuulɔngɨɨ, ja sʊwa dʊʊm nǝbkǝlamɔ fulon jʊ nɨ a bwɨɨ. 12Nǝngɔ nǝbkǝlamɔ jǝbɔ nǝb dʊʊm nǝbɨɨ ja mʊrka ja kiyo kɛlɨ, ja nɨ sʊwajaamtɨnɔ kemʌnɔ a lada nyɨɨ. 13Nǝngɔ ja sʊwa gɔ, “Jǝ́ sʊwa nǝbɔ jengɔ bɛtɔ mɛlalɨ gǝnɔ a yɔ nǝn kum ya ja kuum gǝn nǝn kwama jǝ́ daam dum lɛɨ. 14Na fulon kɛl nɨ a dɔ lɔl gwamnagɨɨ, nǝn kela gǝn kela sǝ a jǝg jen a gaalan.” 15Nǝngɔ sʊwajaamtɨnɔ a yo kemʌnɔ nǝngɔ ja maa kanga ja sʊwa jii. Fulon kɛl nɨ wo dwiyen Yahudawagɔ sʊwa lɛ wo.
Maajɨ Nɨ Yesu A Nǝ Bɛtɔ Mɛlalɨ Gǝnɨ
(Mar 16:14-18; Luk 24:36-49; Yoh 20:19-23; Mbt 1:6-8)
16Nǝngɔ bɛtɔ mɛlalɨ nɨ kʊb jeli wini a shu a Galilii. Ja yɔ a yem a daa nɨ Yesu a sʊwa gɔ ja yɔ woi. 17Ja kuwo gǝnɨ, nǝngɔ ja jʊng ja nǝ gǝn dʊʊnɨ, kaamɨ a kɨɨ nǝl. 18Nǝngɔ Yesu a yɔ nǝn dɔɔm a sʊwa ji woi gɔ, “Kwaama a nɨ ɨ fɔlɔnɔ gwam a dʌbʌl jǝbɔ tǝm. 19A dul kɛl nɨ ya jǝ́ sʊwa nǝbɔ tǝm yooli nɨ gwam ja yǝlam nǝb bwangtǝm mɨ, jǝ́ yʊ ji mwɛ sagsagɔ a mʊgɔ dun Tɛtɛɨ, jǝbɔ a Bwɛɨ, jǝbɔ a Yʊwa Kwaamaɨ. 20Jǝ́ mɛla jim ja bwangtǝn kanjǝl nɨ gwam mǝ sʊwa jeni. Jǝ́ nyǝm mǝ na dakini nǝbɔ jen kwangkwang a yɔ nǝn a dɨltǝm yooli.”
اکنون انتخاب شده:
Matta 28: DBD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation
