Matta 19
19
Mɛlalɨ Yesui A Dul Jʌtǝm Naakan
(Mar 10:1-12; Luk 16:18)
1Nǝn kwama Yesu a dɨm sʊwatǝm kɛltɨn nɨ gwamɨ, nǝngɔ a bǝla Galiligɨɨ, a shu a Yahudiya nɨ a dʌng Tiyo Urduni. 2Nǝbɔ a lada dangǝn na ja bwang gǝmɨ, nǝngɔ a gung ji a twɨla jinɔ gǝmɨ.
3Nǝngɔ kaam nǝbɔ Farisaɨ a bɛ a daa gǝ woi, sǝ ba jǝ tɛl gǝnɨ. Ja bʌ gǝn gɔ, “A diil bǝnɔ gǝmɨ, n dǝngdǝng nǝl a dem kang a nwala gɔ gǝm, a gola kaa kɛl ka?”
4Yesu a jǝla ji gɔ, “Jǝ́ kiyo bɔ wo nyɔ gɔ, nʊ nɨ a fɛ ji a tǝltǝm yoolii, a fɛ balɨ jǝbɔ nɔɔlɨɨ ka? 5Langǝn bwangǝnɔ a sʊwa gɔ, ‘A dul kɛl nɨɨ, nǝl bǝla bǝla tɛtɛ gɔ jǝbɔ nɛnɛ gɔ, a yɨɨ dakini jǝbɔ nwala gɔ. Ji yo nɨɨ, ja yǝlam bʊtɔgɔ win.’ 6A kǝga nɨ jǝ ke bɔ yo tag, ja yǝlam bʊtɔgɔ win. Jʊ nɨ Kwaama a mʊrkaɨ, ka nǝfili ya kwɨ lɛ.”
7Nǝngɔ ja bʌ gǝn gɔ, “N wɛ a bwɨ Musa a sʊwa gɔ ja mʊla langǝn bwangǝn jʌtǝm naakan, ja dem kang a nɔɔlɨ gǝmɨ?”
8Yesu a sʊwa ji gɔ, “N bǝngɨ lɔl jenɔ Musa a jǝla jem gɔ jǝ́ dem kang a nɔɔtǝm jenɔ gǝmɨ, galɨgǝnɨ mɨ nyɔ. 9Mǝ sʊwa jen nɛ, gwam nʊ nɨ a dem kang a nwala gɔ gǝmɨ, na ke bɔ a kɛl buloni, na ga naa kaaɨ, gǝ maa bulon. Nʊ nɨ a naa nɔɔlɨ nɨ ja dem kangɨ, gǝ maa bulon.”
10Nǝngɔ bɛtɔ mɛlalɨ gǝnɔ a sʊwa gǝn gɔ, “Na gǝ na nyɔ a kʊm balɨ jǝbɔ nwala gɨɨ, a laa jǝl ka batǝmɔ ya naa lɛ nɔɔlɨ.”
11Nǝngɔ a sʊwa ji gɔ, “N ke bɔ nǝbɔ gwam jǝ maa maajɨ lɛ nǝn kɛl nɨɨ, na ke bɔ nǝb nɨ Kwaama a nǝ ji kwaanɨ. 12Kaam nǝbɔ wo ja bʌ ji mɨ ji a lɔ, kaamɨ nǝb a maa jim nyɨɨ, kaamɨ a swɨ bɔ naakan n kɛl dul fɔlɔn lɔ Kwaamaɨ. Gwam nʊ nɨ dwal maatǝmɔ lɛ nyɨɨ, bɛ ga maa.”
Yesu A Dǝg Bɛtɔ Dwalǝnɔ Gǝm Bwili
(Mar 10:13-16; Luk 18:15-17)
13Nǝngɔ ja bɛ gǝm nǝn bɛtɔ dwalǝnɔ sǝ ga dǝg jim bwili, ga maa jim kelii. Nǝngɔ bɛtɔ mɛlalɨ gǝnɔ a ga nǝb nɨ bɛ lɛ nǝn bɛtɨɨ.
14Yesu a sʊwa gɔ, “Jǝ́ bǝla bɛtɔ dwalǝnɔ a bɛ a daa mɨ woi. Bɛ ka jǝ́ kaa ji lɛ. Fɔlɔn lɔ Kwaamaɨ na a jii.” 15A ya jim kang bwiligɨɨ, nǝngɔ a shui.
Bwayǝlɨ Nǝ Shilo
(Mar 10:17-31; Luk 18:18-30)
16Kaa nǝl a kʌl a bɛ a daa Yesu woi gɔ, “Feyi, n maajɨ nyan wɛ mǝ maa lɛ sǝ n nya kʊlɨ nɨ mɨ dɨtǝm woi?”
17Nǝngɔ a sʊwa gǝn gɔ, “N wɛ a bwɨ mʊ bʌ i maajɨ nyan nɛɨ? Nǝ maatǝm jǝ nyanɔ win, nǝn Kwaama kwaagɔ. Na mʊ swɨ lɛ ń nya kʊlɨ nɨ mɨ dɨtǝm woi, bɛ ń kɨla diiltɨn nɨɨ.”
18Nǝngɔ a bʌ gɔ, “Diiltɨn gɔ n nǝb won?” Nǝngɔ Yesu gɔ, “Bɛ ka ń jʌ lɛ nǝl. Bɛ ka ń maa lɛ bulon. Bɛ ka ń kuu lɛ kuul. Bɛ ka ń maa lɛ gabakɛl. 19Nǝ tɛtɛ mɔ dʊʊn jǝbɔ nɛnɛ mɔ. Bɛ ń swɨ fwalɨ yɨm mʊnɔ, kanga mʊ swɨm dul mʊnɔ lɛɨ.”
20Nǝngɔ bwayǝlɨ nɨ a sʊwa gǝn gɔ, “N kɨla kɨlaɨ diiltɨn nɨ gwam. N wɛ a taam mɨ mǝ maa lɛɨ?”
21Nǝngɔ Yesu a sʊwa gɔ, “Na mʊ swɨ lɛ ń yǝlam dǝngdǝngɨ, yɔ ya miyo jʊ mʊ nǝnɨ gwam, ń nǝ nǝb bʊnǝnɔ, mʊ nya nya shilo a dʌbʌl kwama, sǝla ń bɛ ba ń bwang mɨ.”
22Bwayǝlɨ nɨ a nyʊwa nyɨɨ, nǝngɔ a shu nǝn kaltǝm nǝlɨ, jʊ a bwɨɨ n nǝ shilo dangǝn.
23Nǝngɔ Yesu a sʊwa bɛtɔ mɛlalɨ gǝnɔ gɔ, “N bɨlǝngǝn mǝ sʊwa jen nɛɨ, bwa bwa sǝ nǝ shilo a nya dɔtǝm fɔlɔn lɔ Kwaamaɨ. 24Mǝ sʊwa jen nɛ tag, bwa nɨ namtenʌm a dɔ bʊwa lalʌmʌn, na nǝ shilo dɔ dɔ fɔlɔn lɔ Kwaamaɨ.”
25Kwama nɨ bɛtɔ mɛlalɨgɔ a nyʊwa kɛl nɨɨ, ja ta kang a nyiyo, ja sʊwa gɔ, “Na gǝ na nyɨɨ, nuwo la nya bʊʊtǝm lɛɨ?”
26Yesu a dʌng jii, nǝngɔ a sʊwa gɔ, “A daa nǝbɔ woi mɨsɔ maa lɛ, a daa Kwaama woi kanjǝlɔ gwam maa maa.”
27Nǝngɔ Bitrus a sʊwa gɔ, “N wɔ nǝn bǝla kanjǝl nǝnɔ gwam, nǝn bwang mʊn. N wɛ nǝn nya lɛɨ?”
28Yesu a sʊwa ji gɔ, “N bɨlǝngǝn mǝ sʊwa jen nɛɨ, yooligɔ bɛ lɛ wo, n kwama Bʊla Nǝlɨ yɨm lɛ a kotere fɔlɔn dʊʊn gǝn a maa fɔlɔnɨ, jen nɨ jǝ́ bwang mɨɨ, nǝjen jǝ́ yɨ lɛ a kotere fɔlɔn nǝbɔ Israilaɨ nɨ kʊb jeli yoi. Jǝ́ maa maa fɔlɔn nǝbɔ Israilaɨ nɨ kʊb jeli yoi. 29Gwam nʊ nɨ a bǝla lɔ gǝnɨ, a bǝla kɛtǝlam gǝnɔ batǝn jǝbɔ a nɔɔtǝn, bǝ tɛtɛ gɔ jǝbɔ nɛnɛ gɔ, bɛtɨ jǝbɔ twamtɨn gǝnɔ, a kɛl dun mɨɨ, nya nya naagɔ fʊlkʊb, jǝbɔ nyatǝm kʊlɨ nɨ mɨ dɨtǝm woi. 30Nǝb kǝgamɔ a lada, yǝlam nǝb gul, nǝb gulɔ yǝlam nǝb kǝgam.
اکنون انتخاب شده:
Matta 19: DBD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation
