إنجيل يوحنا 4
4
يسوع يتكلم مع حرمه سامرية
1ولما عرف الرب أنو الفريسيين سمعوا إنو ياخد تلاميذ ويعمد أكتر من يوحنا، 2مع إنو يسوع نفسه ما كان يعمد بس تلاميذة كانوا همه اللي يعمدوا 3ترك منطقة اليهود ورجع لمنطقة الجليل. 4وكان لازم عليه أنو يمر بمنطقة السامرة 5ووصل لبلدة فيها اسمها سوخاز، قريبة من الأرض اللي اعطاها يعقوب لإبنة يوسف. 6عند بير يعقوب. ولما تعب يسوع من السفر، جلس على طرف البير، وكانت الساعة تقريبا سته.
7وجت حرمة سامرية للبير علشان تاخد موية، قال لها يسوع: «اسقيني!» 8علشان تلاميذة راحوا للبلد علشان يشتروا أكل. 9قالت له الحرمة السامرية «أنت يهودي وأنا سامرية، كيف تطلب مني أني أسقيك؟» لأنو اليهود ما يتعاملوا مع أهل السامرة. 10رد عليها يسوع وقال: «لو كنتي تعرفي عطية الله، ومين هو اللي يقول لك: اسقيني، لكنتي أنتي طلبتي منو وكان أعطاكي موية كلها حياه!» 11قالت الحرمة: «لكن يا سيّد، ما عندك دلو، البير عميق. فا من فين لك الموية الحية ؟ 12إنتا رح تكون أعظم من أبونا يعقوب اللي ورثنا عنة هادا البير، وشرب منه هو وولاده ومواشية؟» 13قاللها يسوع: «كل واحد يشرب من هادي الموية يرجع يعطش. 14بس اللي يشرب من الموية اللي أديلو هيا أنا، ما رح يعطش مرة تانية بالمره، والموية اللي أديه هيا تصير جُوّاه نبع ما ينتهي ويعطية حياة ابدية». 15قالت له الحرمة: «يا سيد، أديني هادي الموية علشان ما أعطش ولا أرجع لهنا علشان آخد موية». 16قاللها: « روحي وأزهمي زوجك وارجعى لهنا». 17ردت: «ما في عندي زوج!» قال: «صدقتي انك قلتي: مافي عندي زوج 18لأنو كان ليكي خمسه أزواج، واللي تعيشي معاه داحيين مو زوجك هادا اللي قلتيه صدق!» 19قالت له الحرمة: « يا سيد، أنا شايفة انك نبي. 20جدودنا عبدوا الله في هادا الجبل، وانتوا اليهود تصروا على أن اورشليم لازم تكون مركز العبادة الوحيد». 21رد عليها يسوع: « صدقيني يا حرمة، رح تيجي الساعة اللي تعبدوا فيها الأب مو في هادا الجبَل ولا في اورشليم. 22انتوا تعبدوا شي تجهلوه، وإحنا نعبد اللي نعرفه، لأنو الخلاص هو من عند اليهود. 23رح تيجي ساعة، والساعة هي داحين، لما يعبد العابدين الصادقين الأب بالروح وبالحق. لأنو الأب يبغى زي هدول العابدين. 24الله روح، علشان كدا لازم للي يعبدوه يعبدوه بالروح وبالحق». 25قالتللو الحرمة: « أنا أعرف أنو المسيح، رح ييجي، ومتى جا هو رح يقول لنا كل شي». 26رد عليها يسوع: «أنا هو اللي يكلمك»
رجع التلاميذ ليسوع
27ولما وصل التلاميذ وتعجبوا لما شافوا يسوع يكلم الحرمة ورغم كدا ما سألة أحد منهم «ايش تبغى منها؟» أو « ليه تكلمها»
28سابت الحرمة جرتها ورجعت للقرية، وصارت تقول للناس: 29«تعالوا شوفوا انسان كشفلي كل اللي سويتو! يمكن يكون هو المسيح؟» 30طلع أهل سوخار وجووا لعندو.
31وبنفس الوقت كان التلاميذ يلحوا ويقولوا له: «يا استاذ ، كل» 32رد عليهم: عندي أكل آكله بس انتوا ما تعرفوه. 33صار التلاميذ يتساؤلوأ: « ممكن أحد جابلة أكل؟» 34قالهم يسوع: «أكلي هوأني أسوي اللي يبغاه اللي ارسلني وأنا أسوي عمله. 35انتوا تقولوا: بعد أربع شهور ييجي الحصاد! بس أنا أقوللكم: شوفوا الحقول كويس، هادي هي نضجت وجا موعد حصادها. 36واللي يحصد بياخد أُجْرتو، ويجمع الثمار للحياة الأبدية، ينبسط اللي يزرع واللي يحصد سوا. 37حتى يحقق المقولة: واحد يزرع والتاني يحصد. 38أنا ارسلتكم علشان تحصدوا اللي انتوا ما تعبتوا فيه، غيركم تعب، وانتم داحين تجنوا ثمر تعبهم ».
كتارمن السامرة يآمنوا
39آمن ليسوع كتيرمن السامريين من أهل ديك البلد بسبب الكلام اللي قالتة الحرمة واللي كانت تشهد وتقول: «كشفلي كل اللي سويته». 40ولما قابلوه عند البير عزّموا عليه ينزل عندهم، ونزل عندهم يومين، 41وزاد عدد اللي آمنوا فيه بسبب كلامه، 42وقالوا للمرأه : «احنا داحين ما بنآمن بسبب كلامك، لكن نآمن لأننا سمعنا بنفسنا وعرفنا أنو انت مخلص العالم بجد»
يسوع يشفي ابن راجل من حاشية الملك
43وبعد ما جلس يومين في سوخار، مشي يسوع من هناك وسافر لمنطقة الجليل، 44وهو نفسه اللي قال وشهد: «لا كرامة لنبي في وطنة!» 45ولما وصل للجليل رحبوا فيه أهلها، وشافوا كل اللي سواه في اورشليم وقت عيد الفصح، لأنهم كمان راحوا للعيد.
46ووصل يسوع لقانا بالجليل، المكان اللي حول فيها الموية لخمر. وكان في كفر ناحوم راجل من حاشية الملك ابنه مريض. 47ولما سمع أنو يسوع ترك اليهودية وجا للجليل، راح لعندوا وطلب منو أنو ينزل معاه لكفر ناحوم علشان يشفي ابنه اللي قرب يموت. 48قال يسوع: «ما تأمنوا الا اذا شوفتوا الآيات والعجائب!»
49فا توسل له الراجل وقال: « يا سيد، انزل معايا قبل ما ابني يموت!» 50رد عليه يسوع: «روح! ابنك حي!» وآمن الراجل لكلمة يسوع اللي قالها لو، ومشى.
51ولما كان نازل في الطريق، قابلة عبيدة وبشروه بأنو ابنه حي، 52وسألهم متى إنشفى ، جاوبوه: «في الساعة سبعه امس المسا، راحت الحمى عنه» 53وعرف الأب أنها الساعه اللي قال له يسوع فيها «إنو ابنك حي». وآمنوا هو وأهل بيته كلهم.
54هادي المعجزه هي تاني آيه سواها يسوع بعد ما طلع من اليهوديه للجليل.
اکنون انتخاب شده:
إنجيل يوحنا 4: HNAV
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Hijazi New Arabic Version © 2024 Strategic Resource Group
