མད་ཐཱ། 21
21
ཡེ་རུ་ཤ་ལེམ་དུ་ཡེ་ཤུ་ལ་ཕེབས་སུ།
(མར་ཀུ། ༡༡:༡-༡༡; ལུ་ཀ། ༡༩:༢༨-༤༠; ཡོ་ཧ་ནན། ༡༢:༡༢-༡༩)
1དེ་ནས་ཡེ་ཤུ་དང་ཁོང་གི་ཉེ་གནས་ཀྱ་ཡེ་རུ་ཤ་ལེམ་གྱི་ཉེ་འགྲམ་དུ་ཕེབས་ཏེ། སྐྱུར་རུ་ཤིང་གི་རི་རུ་འོད་ཀྱིན་བེད་ཕཱ་གེ་རུ་སླེབས་པ་ལགས། དེ་ནས་ཡེ་ཤུ་ཡིས་ཉེ་གནས་གཉིས་ལ་དེ་རེ་གསུངས་རེ་བརྫངས་བ་ལགས། 2ཁྱེད་ཀྱ་ཡི་གདོང་དུ་འོད་ཀྱིན་ཡུལ་དུ་སོང་། དེ་ནས་འོ་དུ་རུ་སླེབས་ལུང་མེད་ད་ལ། ཁྱེད་ཀྱ་ཡིས་བོང་གུ་གཅིག་རང་གི་བོང་ཕྲུག་མུ་ལ་བཏགས་ཏེ་བཞག་ཞ་རྙེད་ཀྱི་ལགས། འོ་དེ་ཀྱ་ལ་བཀྲོལ་རེ་ངའི་རྩ་རུ་འཁྲིད་དེ་ཤོག 3དེ་ནས་མི་རེས་ཀྱིས་ཁྱེད་ཀྱ་ལ་གཅིག་རེ་སྨྲ་ན་ཁྱེད་གཉིས་བོ་དེ་རེ་སྨྲོས། གཙོ་བོ་ལ་དེ་ཀྱ་དགོས་ལི། དེ་ནས་འོ་དེ་ཡིས་ཁྱེད་ཀྱ་ལ་ལམ་སང་འཁྲིད་དུ་བཅུག་གི་ལགས།
4མངོན་ཤེས་མཁན་གྱི་ཐོག་ནས་དེ་རེ་གསུངས་ཀྱིན་གོ་སྒྲུབ་ཏུ་བཅུག་ཡས་ལ་དེ་རེ་བྱུང་བ་ལགས།
5སི་ཡོན་གྱི་བུ་མོ་ལ་སྨྲོས།
ལྟོས་དང་། ཁྱོའི་རྒྱལ་བོ་གོ་ཉམ་ཆུང་བྱུང་རེ།
བོང་གུ་ཁར་ལ་བོང་གི་བོང་ཕྲུག་གཅིག་ཁར་ལ།
ཁྱོའི་རྩ་རུ་ཕེབས་བའི།#ཟེ་ཀ་རི་ཡཱས། ༩:༩
6དེ་ནས་ཉེ་གནས་གཉིས་བོ་སོང་རེ། ཡེ་ཤུ་ཡིས་གསུངས་ཀྱིན་ཅོག་རེ་བྱས་བ་ལགས། 7དེ་ནས་ཁོང་གཉིས་བོ་ཡིས་བོང་གུ་དང་བོང་ཕྲུག་གོ་ཁྲིད་དེ་འོངས་རེ། རང་གི་གོས་ལག་ཀྱ་འོ་དེ་ཀྱ་ཁར་ལ་བརྒྱབ་སྟེ། དེ་ནས་ཡེ་ཤུ་འོ་དེ་ཁར་ལ་བཅིབས་པ་ལགས། 8མི་ཚོགས་མང་ཆེ་ཡིས་རང་གི་གཟན་གོས་ཀྱ་ལམ་ཁ་ལ་བཏིང་བ་ལགས། དེ་ནས་གཞན་མ་ཀྱ་ཡིས་སྤྱང་མའི་ལོ་མ་ཀྱ་བཅད་དེ་ལམ་ཁ་ལ་བཀྲམ་པ་ལགས། 9དེ་ནས་ཁོང་པ་ཡི་གདོང་དང་རྒྱབ་ལ་རྒྱུག་གིན་མི་ཚོགས་ཀྱ་ཡིས་སྐད་བརྒྱབ་སྟེ་སྨྲས་བ་ལགས།
དཱ་བིད་ཀྱི་སྲས་ལ་ཧོ་ཤ་ཨ་ནཱ།#༢༡:༩ ཧོ་ཤ་ཨ་ནཱ་སྨྲ་ན་ཨིབ་རི་པ་སྐད་ལ་དཀོན་མཆོག་ལ་བསྟོད་སྒྲ་ལགས།
གཙོ་བོའི་མཚན་ནས་ཕེབས་མཁན་ཁོང་པ་གིན་གྱི་བྱིན་རླབས་ཆེ།
མཐོ་ཤོས་རུ་འོད་ཀྱིན་གོ་ལ་ཧོ་ཤི་ཨ་ནཱ།#གསུང་མགུར། ༡༡༨:༢༥-༢༦
10དེ་ནས་ཁོང་པ་ཡེ་རུ་ཤ་ལེམ་དུ་ཕེབས་ཏེ། རྒྱལ་ས་གི་རི་རུ་འདི་སུ་ལེ་སྨྲས་རེ་དམི་ཅིག་གི་གྲགས་སྐད་བྱུང་བ་ལགས། 11དེ་ནས་མི་ཚོགས་ཀྱ་ཡིས་སྨྲས་བ་ལགས། འདི་ནི་ག་ལིལ་གྱི་ན་ཙ་རེད་ནས་ཡིན་གྱིན་མངོན་ཤེས་མཁན་ཡེ་ཤུ་གོ་ལགས།
ཡེ་ཤུ་ཡེ་རུ་ཤ་ལེམ་མཆོད་ཁང་དུ་ཕེབས་པ།
(མར་ཀུ། ༡༡:༡༥-༡༩; ལུ་ཀ། ༡༩:༤༥-༤༨; ཡོ་ཧ་ནན། ༢:༡༣-༢༢)
12ཡེ་ཤུ་དཀོན་མཆོག་གི་མཆོད་ཁང་གི་གཡབ་ཀུ་རུ་ཕེབས་ཏེ། འོ་དུ་རུ་ཚོང་བྱེད་མཁན་ཀྱ་ལ་ཕི་ལ་བཏོན་མཛད་པ་ལགས། དེ་ནས་དངུལ་རྗེ་མཁན་ཀྱ་ཡི་ཅོག་ཙེ་དང་པུང་མོ་བཙོངས་མཁན་ཀྱ་ཡི་རྐུབ་སྐྱགས་ཀྱ་མགོ་རྟིང་སློག་མཛད་པ་ལགས། 13ཁོང་པ་ཡིས་ཁོང་ཀྱ་ལ་གསུངས་བ་ལགས། ངའི་ཁང་པ་ནི་སྨོན་ལམ་གྱི་ཁང་པ་སྨྲས་རེ་སྨྲ་གི་ལགས་#ཡེ་ཤ་ཡཱ། ༥༦:༧; ཡེར་མི་ཡཱ། ༧:༡༡སྨྲས་རེ་གསུང་རབ་ལ་བྲིས་འོད་ད་ལགས། ཡིན་ནའང་ཁྱེད་ཀྱ་ཡིས་འདི་ལ་ཇག་པ་ཀྱ་ཡི་ཚང་བཟོ་འདུག།
14ཞ་ར་དང་ཞ་ཀྱོག་ཀྱ་མཆོད་ཁང་དུ་ཁོང་པ་ཡི་གདོང་དུ་འོངས་བ་ལགས། དེ་ནས་ཁོང་པ་ཡིས་ཁོང་ཀྱ་ལ་དྲག་གསོ་གནང་བ་ལགས། 15ཡིན་ནའང་ཁོང་པ་ཡིས་དེ་རེ་ཧང་སང་གིན་ཕྱག་ལས་ཀྱ་མཛད་ཀྱིན་གོ་དང་། ཕྲུ་བ་ཀྱ་ཡིས་མཆོད་ཁང་དུ་དཱ་བིད་ཀྱི་སྲས་ལ་ཧོ་ཤ་ཨ་ནཱ་སྨྲས་རེ་སྐད་བརྒྱབ་ཀྱིན་གོ། མཆོད་དཔོན་ཆེ་ཀྱ་དང་ཆོས་ཁྲིམས་ཀྱི་སློབ་དཔོན་ཀྱ་ཡིས་མཐོང་རེ་ཁོང་ཀྱ་ཞེ་སྡང་ལངས་བ་ལགས།
16དེ་ནས་ཁོང་ཀྱ་ཡིས་ཡེ་ཤུ་ལ་དྲིས་བ་ལགས། དེ་ཀྱ་ཡིས་གི་སྨྲིས། ཁྱོས་གོ་རི།
དེ་ནས་ཡེ་ཤུ་ཡིས་ཁོང་ཀྱ་ལ་གསུངས་བ་ལགས། གོ་རི། ཕྲུ་བ་ཀྱ་དང་འོ་མ་འཐུང་གིན་སྨ་ཉག་ཀྱ་ཡི་ཁ་ནས། ཁྱེད་རང་གི་བསྟོད་ར་བྱེད་དུ་བཅུག་འདུག་#གསུང་མགུར། ༨:༢སྨྲས་རེ་གསུང་རབ་ལ་བྲིས་བྲ་གོ་ཁྱེད་ཀྱ་ཡིས་ནམ་མའང་མ་ཀློག་འོད་དེ། 17དེ་ནས་ཁོང་ཀྱ་ལ་བོར་ཏེ་ཁོང་པ་རྒྱལ་ས་ནས་ཐོན་ད་མཛད་དེ་བེད་ཐ་ནི་རུ་ཕེབས་པ་ལགས། དེ་ནས་འོ་དུ་རུ་བཞུགས་པ་ལགས།
འབྲས་བུ་མེད་ཀྱིན་སེ་ཡབ་ཀྱི་སྡོང་པོ།
(མར་ཀུ། ༡༡:༡༢-༡༤,༢༠-༢༤)
18སྔ་རོག་སྔ་ཏི་ཡེ་ཤུ་རྒྱལ་ས་རུ་ལོག་སྟེ་ཕེབས་བའི་གང་ལ་ཁོང་པ་བཀྲེས་བ་ལགས། 19ལམ་ཁའི་ཟུར་ལ་སེ་ཡབ་ཀྱི་སྡོང་པོ་གཟིགས་ཏེ། ཁོང་པ་འོ་དེ་འགྲམ་དུ་ཕེབས་པ་ལགས། ཡིན་ནའང་འོ་དུ་རུ་ལོ་མ་མ་ན་གཞན་མ་གིའང་མ་རྙེད་པ་ལགས། དེ་ནས་ཁོང་པ་ཡིས་འོ་དེ་ལ་གསུངས་བ་ལགས། འདི་ནས་ཧ་ལ་འབྲས་བུ་ནམ་མའང་མ་སྐྱེ་བ་ཤོག། དེ་ནས་ལམ་སང་འོ་དེ་སེ་ཡབ་ཀྱི་སྡོང་པོ་གོ་བསྐམས་པ་ལགས།
20ཉེ་གནས་ཀྱ་ཡིས་འདི་མཐོང་རེ་ཁོང་ཀྱ་ཧ་ལས་རེ་ཁོང་པ་ལ་ཞུས་བ་ལགས། འདི་སེ་ཡབ་ཀྱི་སྡོང་པོ་གང་གི་བྱས་རེ་ལམ་སང་བསྐམས་པ་ལེ།
21དེ་ནས་ཡེ་ཤུ་ཡིས་ཁོང་ཀྱ་ལ་བཀའ་ལན་དུ་གསུངས་བ་ལགས། ང་ཁྱེད་ཀྱ་ལ་བདེན་པ་རང་སྨྲ་ཡིན། དོགས་པ་མི་བྱེད་ད་དད་པ་བྱེད་ན། སེ་ཡབ་ཀྱི་སྡོང་པོ་འདི་ལ་གི་བྱུང་གིན་གོ་གཅིག་ཀ་བྱས་ཐུབ་ཡས་མིན་ད། འདི་རི་དེ་ལ་དེ་ནས་བཀོག་སྟེ་རྒྱ་མཚོ་ནང་ལ་ལྷིམ་སྨྲས་རེ་སྨྲ་ན། འོ་དེ་རེ་རང་འབྱུང་གི་ལགས། 22ཁྱེད་ཀྱ་ལ་དད་པ་འོད་ན། ཁྱེད་ཀྱི་སྨོན་ལམ་ལ་གི་ཞུ་ལི། འོ་དེ་འཐོབ་ཀྱི་ལགས།
ཡེ་ཤུའི་དབང་ཆའི་སྐོར་ལ་དྲི་བ།
(མར་ཀུ། ༡༡:༢༧-༣༣; ལུ་ཀ། ༢༠:༡-༨)
23དེ་ནས་ཡེ་ཤུ་དཀོན་མཆོག་གི་མཆོད་ཁང་ནང་དུ་ཕེབས་ཏེ། འོ་དུ་རུ་ཆོས་གསུངས་བའི་གང་ལ། མཆོད་དཔོན་ཆེ་ཀྱ་དང་མི་མང་ཀྱ་ཡི་རྒན་པ་ཀྱ་ཁོང་པ་རྩ་རུ་བཅར་ཏེ་ཞུས་བ་ལགས། སུའི་དབང་ཆ་ནས་ཁྱོད་དེ་གི་རི་བྱེད་ད། དེ་ནས་དེ་རེ་དབང་ཆ་ཁྱོད་ལ་སུས་སྟེར་སོ།
24ཡེ་ཤུ་ཡིས་ཁོང་ཀྱ་ལ་གསུངས་བ་ལགས། ངའང་ཁྱེད་ཀྱ་ལ་དྲི་བ་གཅིག་འདྲི་ཡས་ཡིན། དེ་ནས་ཁྱེད་ཀྱ་ཡིས་ལན་སྟེར་ན། ང་དབང་ཆ་ག་ནས་དེ་གི་རི་བྱེད་ད་ལེ་སྨྲས་རེ་ཁྱེད་ཀྱ་ལ་བཤད་ཡས་ཡིན། 25ཡོ་ཧ་ནན་གྱི་ཁྲུས་གསོལ་འདི་ག་ནས་བྱུང་བ་ལེ། ནམ་མཁའི་ཞིང་ཁམས་ནས་བྱུང་བ་ལེ་ཡང་ན་མི་ནས་བྱུང་བ་ལེ།
དེ་ནས་ཁོང་ཀྱ་ཡིས་ཁོ་རང་ཀྱ་ནང་དུ་གྲོས་བྱས་རེ་དེ་རེ་སྨྲས་བ་ལགས། ནམ་མཁའི་ཞིང་ཁམས་ནས་ལགས་སྨྲ་ན། ཁོས་འོ་རང་ལ་ཁོ་ལ་གི་བྱས་རེ་དད་པ་མི་བྱེད་ད་སྨྲ་གུ་ལགས། 26ཡིན་ནའང་མི་ནས་བྱུང་བ་ལགས་སྨྲས་རེ་སྨྲ་ན། མི་གི་རི་ཡིས་ཡོ་ཧ་ནན་ལ་མངོན་ཤེས་མཁན་ལགས་སྨྲས་རེ་བརྩིས་རེ་འོ་རང་མི་ཚོགས་ལ་འཇིགས་བ་ལགས།
27འོ་བྱས་རེ་ཁོང་ཀྱ་ཡིས་ཡེ་ཤུ་ལ་སྨྲས་བ་ལགས། འེ་ཀྱ་ལ་ཤེས་ཡས་མེད།
དེ་ནས་ཁོང་པ་ཡིས་ཁོང་ཀྱ་ལ་སྨྲས་བ་ལགས། དེ་རེ་ཡིན་ན། ང་ཁྱེད་ཀྱ་ལ་དེ་གི་རི་དབང་ཆ་ག་ནས་བྱེད་ད་ལེ་སྨྲས་རེ་མེད་བཤད།
བུ་གཉིས་ཀྱི་དཔེ།
28ཡེ་ཤུ་ཡིས་གསུངས་བ་ལགས། ཁྱེད་ཀྱ་ཡི་བསམ་བློ་དེ་ལ་ག་རེ་འོད་དོ། ད་མི་གཅིག་ལ་བི་ཛ་གཉིས་འོད་ད་ལགས། དེ་ནས་ཁོ་བི་ཛ་ཆེ་གོ་རྩ་རུ་སོང་རེ་སྨྲས་བ་ལགས། བི་ཛའོ། སོང་རེ་དི་རིང་རྒུན་འབྲུམ་གྱི་ལྡུམ་ར་རུ་ལས་ཀ་བྱེད་ལེ། 29བི་ཛ་ཡིས་སྨྲས་བ་ལགས། ང་མེད་འགྲོ། ཡིན་ནའང་གཤམ་ལ་ཁོ་འགྱོད་པ་སྐྱེས་རེ་སོང་བ་ལགས། 30དེ་ནས་ཨ་རྒས་ཀྱིས་བི་ཛ་ཆུང་ང་རྩ་རུ་སོང་རེ་འོ་དེ་རེ་རང་སྨྲས་བ་ལགས། དེ་ནས་ཁོས་སྨྲས་བ་ལགས། ངས་འགྲོ་བོ། ཡིན་ནའང་ཁོ་མ་སོང་བ་ལགས། 31ད་དེ་གཉིས་བོ་ནས་ཨ་རྒས་ཁ་ལ་སུས་མཉན་སོ།
ཁོང་ཀྱ་ཡིས་སྨྲས་བ་ལགས། བི་ཛ་ཆེ་ཡིས།
ཡེ་ཤུ་ཡིས་ཁོང་ཀྱ་ལ་གསུངས་བ་ལགས། ང་ཁྱེད་ཀྱ་ལ་བདེན་པ་རང་སྨྲ་ཡིན། ཁྲལ་སྡུད་མཁན་ཀྱ་དང་གཞང་འཚོང་མ་ཀྱ་ཁྱེད་ཀྱ་ནས་ཨེན་ལ་དཀོན་མཆོག་གི་རྒྱལ་སྲིད་དུ་འགྲོ་གི་ལགས། 32གི་བྱས་རེ་སྨྲ་ན་ཁྲུས་གསོལ་མཁན་ཡོ་ཧ་ནན་ཁྱེད་ཀྱ་ལ་དྲང་བདེན་གྱི་ལམ་སྟོན་དུ་འོངས་བ་ལགས། དེ་ནས་ཁྱེད་ཀྱ་ཡིས་ཁོ་ལ་དད་པ་མ་བྱས་བ་ལགས། ཡིན་ནའང་ཁྲལ་སྡུད་མཁན་ཀྱ་དང་གཞང་འཚོང་མ་ཀྱ་ཡིས་ཁོ་ལ་དད་པ་བྱས་བ་ལགས། དེ་ནས་ཁྱེད་ཀྱ་ཡིས་དེ་མཐོང་རེའང་ཁྱེད་ཀྱ་ཡི་སེམས་བསྒྱུར་ཏེ་ཁོ་ལ་དད་པ་མ་བྱས་བ་ལགས།
རྒུན་འབྲུམ་ལྡུམ་རའི་དཔེ།
(མར་ཀུ། ༡༢:༡-༡༢; ལུ་ཀ། ༢༠:༩-༡༩)
33ཡེ་ཤུ་ཡིས་ཡང་གསུངས་བ་ལགས། དཔེ་གཞན་མ་གཅིག་ཉན། ནང་གི་བདག་པོ་གཅིག་གིས་རྒུན་འབྲུམ་ལྡུམ་ར་གཅིག་བཏབ་སྟེ། ཕྱོགས་བཞི་ལ་བར་བསྐོར་པ་ལགས། དེ་ནས་རྒུན་ཆང་བཙིར་བྱེད་བཟོས་རེ་ཐོག་ཁང་གཅིག་བཟོས་བ་ལགས། དེ་ནས་འོ་དེ་ལྡུམ་ར་བོགས་མ་ལ་བཏང་རེ། ཁོ་རང་ཡུལ་གཞན་མ་གཅིག་ལ་སོང་བ་ལགས། 34དེ་ནས་འབྲས་བུ་སྡུད་ཀྱིན་དུས་ཚོད་འོང་ང་རང་། ཁོས་ཁོ་རི་སྐལ་ད་ལེན་དུ་གཡོག་པོ་ཀྱ་ལ་འོ་དེ་བོགས་མ་ལ་ལེན་མཁན་ཀྱ་རྩ་རུ་བཏང་བ་ལགས། 35ཡིན་ནའང་འོ་དེ་ཀྱ་ཡིས་ཁོའི་གཡོག་པོ་ཀྱ་ལ་ཁྲིད་དེ་སོང་རེ་གཅིག་ལ་བརྡུངས། གཅིག་ལ་བསད། དེ་ནས་གཅིག་ལ་རྡོ་གོང་བཞུས་པ་ལགས། 36ལྡབ་ལེ་བདག་པོ་ཡིས་ཨེན་མ་ནས་མང་ང་གཡོག་པོ་ཀྱ་ལ་བརྫངས་བ་ལགས། དེ་ནས་ཁོང་ཀྱ་ཡིས་འོ་དེ་ཀྱ་ལ་ཨེན་མ་ཅོག་རེ་བྱས་བ་ལགས།
37དེ་ནས་ཁོང་ཀྱ་ཡིས་ངའི་བི་ཛ་ལ་བརྩིས་གྲོ་སྨྲས་རེ། ཁོས་ཞུག་ལ་ཁོ་རི་བི་ཛ་གོ་བརྫངས་བ་ལགས། 38ཡིན་ནའང་འོ་དེ་བོགས་མ་ལ་ལེན་མཁན་ཀྱ་ཡིས་བི་ཛ་གོ་ལ་མཐོང་རེ་དེ་རེ་སྨྲས་བ་ལགས། འདི་ནི་བརྒྱུད་འཛིན་གོ་ལགས། ཤོག།ཁོ་ལ་བསད་དེ་ཁོའི་ཐོབ་ཐང་གོ་འོ་རང་འཕྲོག་བོ། 39དེ་ནས་ཁོང་ཀྱ་ཡིས་ཁོ་ལ་ཟིམ་ཏེ་ཁྲིད་དེ་སོང་རེ། ལྡུམ་ར་ཕི་ལ་གཡུག་སྟེ་བསད་པ་ལགས།
40ད་ལྡུམ་ར་ཡིས་བདག་པོ་གོ་འོང་བའི་གང་ལ་ཁོས་ཁོང་ཀྱ་ལ་གི་བྱེད་འདིག་འོད་གྲོ།
41ཁོང་ཀྱ་ཡིས་སྨྲས་བ་ལགས། ཁོས་འོ་དེ་ངན་པ་ཀྱ་ལ་སྡུག་པོ་བཏང་རེ་བསད་གྲོ། དེ་ནས་དུས་ཚོད་ལ་ཁོ་རི་ཐོབ་ཐང་འབྲས་བུ་སྟེར་གྱིན་མི་གཞན་མ་ཀྱ་ལ་འོ་དེ་ལྡུམ་ར་གོ་བོགས་མ་ལ་སྟེར་གྲོ།
42ཡེ་ཤུ་ཡིས་ཁོང་ཀྱ་ལ་གསུངས་བ་ལགས། ཁྱེད་ཀྱ་ཡིས་གསུང་རབ་ལ་འདི་མ་སྒྲོགས་འོད་དེ།
རྩིག་དཔོན་ཀྱ་ཡིས་སྤངས་རེ་བཞག་ཞ་རྡོ་གོང་གོ།
ཟུར་གྱི་རྡོ་གོང་གཙོ་གོ་བྱུང་འདུག།
འདི་ནི་གཙོ་བོ་ཡིས་མཛད་སྟངས་ལགས། དེ་ནས།
འདི་འོ་རི་དམིགས་བ་ལ་ཡམ་སངས་ང་འདུག#གསུང་མགུར། ༡༡༨:༢༢,༢༣
43འོ་བྱས་རེ་ང་ཁྱེད་ཀྱ་ལ་སྨྲ་ཡིན། ནམ་མཁའི་རྒྱལ་སྲིད་དེ་ཁྱེད་ཀྱ་ནས་འཕྲོག་སྟེ་འབྲས་བུ་སྐྱེད་ཀྱིན་མི་རྒྱུད་ཀྱ་ལ་གནང་གི་ལགས། 44དེ་རྡོ་གོང་ཁར་ལ་འགྱེལ་མཁན་གོ་དུམ་བུ་དུམ་བུ་ལ་ཆག་གི་ལགས། དེ་ནས་འོ་དེ་སུའི་ཁར་ལ་ལྷིམ་ན། འོ་དེ་ཡིས་ཁོ་ལ་ལད་ཀྱི་ལགས།
45ད་མཆོད་དཔོན་ཆེ་ཀྱ་དང་ཕཱ་རུ་ཤི་པ་ཀྱ་ཡིས་དེ་དཔེ་ཀྱ་གོ་རི་གང་ལ། ཁོ་རང་ཀྱ་ཡི་སྐོར་ལ་གསུངས་བའི་སྨྲས་རེ་ཧ་གོ་པ་ལགས། 46དེ་ནས་ཁོང་ཀྱ་ཡིས་ཡེ་ཤུ་ལ་ཟིམ་ཡས་ལ་ཐབ་ཤེས་བྱས་བ་ལགས། ཡིན་ནའང་ཁོང་པ་ལ་མངོན་ཤེས་མཁན་གཅིག་ལགས་སྨྲས་རེ་རྩི་གིན་གོ་ལ་ཁོང་ཀྱ་མི་ཚོགས་མུ་ལ་འཇིགས་པ་ལགས།།
اکنون انتخاب شده:
མད་ཐཱ། 21: LOY
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. and Nepal Bible Society
