Maraka 2
2
Yesu wɔ mwurunku ki kene bi ki
(Matiyu 9.1–8; Luki 5.17–26)
1Sunŋ dama fwuudemaan kɔɔtɛ, Yesu i a pwulu ta Kafarinawumu. Konaŋ ki ǹʼtɔ-i tu ntiŋ fu ki ru waarinŋ wɔ̀ ru, 2kí i na arì rakɔli ntiŋ kɛlina, kí i fu ki faa fɔ ŋì i na so taanna, hali tumaŋ wuru kila-a niŋ mani ki tɔri ru kì. Ntiŋ i Kirinŋ wɔ wulu ki bi-ri konaŋ ki tɛ. 3Niŋ mani nu, koŋ pyiiraŋ bɛɛ ri i mwurunku bɛɛ shi na. 4Kí ǹʼja-i tu arìbɛɛ ra demaŋ kila fu ki ru konaŋ ki gbɛɛra arɔɔ kiratɔnŋ ki wu kì, kí i tunpa fu ki ŋununu, kí i ǹʼmani ki bɛɛ warinka, kí i mwurunku ki jɛri bilifinŋ nu, niŋ ta ki ra, Yesu ɲaanfɛ konaŋ ki faninmwuŋ. 5Yesu ǹʼja-i tu niŋ koŋ kiri bili afinŋ na kusɛbɛ, ntiŋ i ǹʼbi : « Ńʼdanshuru, mɔɔn bijɛ kiri tu-i nʼtɛ. »
6 Sariya kalimɔɔ wɔ̀ri sɔɔ wuru niŋ mani nu, nini i ǹʼmiiri-ri arì ciiru tu : 7« Ka a nkɛnŋ kɔɔn, ntiŋ i Kirinŋ tɔ ki li-ri ka ɲaan ka tɛ? Nkɛnŋ tenŋ so-a koŋ wɔ bijɛ tu-i ntiŋ tɛ Kirinŋ kɔɔtɛ? »
8Nka Yesu i kí ciiru wɔ ki tɔ shuu, ntiŋ tu kí tɛ : « Nfɛnŋ na, ka ɲakilila jɛ ka bishi i ji ábɛɛ ciiru? 9Ŋi i ǹʼbi mwurunku ki tɛ, tu wúwɔ bijɛ kiri tu wú tɛ, walima ŋi i ǹʼbi wú tɛ, tu wú jɔrɔkɔ, wú i awɔ bilifinŋ ki shi, wú i tiri tan, ka wulu fuuli kari ru, ǹʼdanwɔ bimaŋ di? 10Nka míŋ i ǹʼtɛ, ŋí i ǹʼji ábɛɛ wu jiŋ, tu so Koŋ Danshuru ki gbɛ, ŋì i konaŋ kiri wɔ bijɛ kiri tu kí tɛ, ntiŋ i tu pwɔkulinŋ ki sun. » Niŋ bimaan ki kɔɔtɛ, Yesu i ǹʼbi mwurunku ki tɛ : 11« Míŋ i bi-a miŋ tɛ, jɔrɔkɔ, ŋi i nʼwɔ bilifinŋ ki shi, ŋi i tiri kulu. »
12Mìŋ manaanŋ tenŋ ki ru, weŋ ki i jɔrɔkɔ koŋ bataa ɲaanna, wú i awɔ bili byɛ ki shi. Niŋ botɔnsun i kí bataa pa, kí i Kirinŋ gbɛ-ri tu : « Yibɛɛ bi ka bishi ja ja-i sun kì dɛ! »
Lewi dɔri bi ki Yesu gbɛ
(Matiyu 9.9–13; Luki 5.27–32)
13Jibi tɔri, Yesu i ta Galile baa ki tɔnŋ na sɛbɛ. Konaŋ ki i na ntiŋ tɛ, ntiŋ i kí kali. 14Ntiŋ fwuudera ki i Alife danshuru Lewi sɔɔ ja ɲinisarakɔlɔtɔnŋ kiri wɔ baara mamaŋ ki ru. Ntiŋ i ǹʼbi niŋ tɛ : « Ǹʼpa míŋ cɛfan. » Lewi i jɔrɔkɔ, ntiŋ i ǹʼpa Yesu cɛfan.
15Niŋ kɔɔtɛ, Yesu fa awɔ kalindaŋ kiri i ta nufinŋ nu Lewi wɔ mani nu. Kí fa ɲinisarakɔlɔtɔnŋ mwɔɔnna niŋ fa bijɛmatɔnŋ mwɔɔnna tɔri ri wuru niŋ nufinŋ ki nu-a arìmaŋ fan, sabu kíbɛɛ mwɔɔnna ǹʼpa wuru Yesu cɛfan. 16Farinsiyɛnŋ kiri ru sariya kalimɔɔ kiri ǹʼja-i tu Yesu fa niŋ koŋ kiri nufinŋ ki nu-a arìmaŋ fan waarinŋ wɔ̀ ru, kí i ntiŋ wɔ kalindaŋ kiri ranɔri tu : « Nfɛnŋ na, ábɔɔ kalimɔɔ ki fa ɲinisarakɔlɔtɔnŋ kiri fa bijɛmatɔnŋ kiri nuŋ ki nu-a arìmaŋ fan? »
17Yesu niŋ wulu ki rama-i, ntiŋ tu kí tɛ : « Koŋ kenemaan kiri maku janmatɔnŋ na kì, nwɔ̀ i kiratɔnŋ kiri i, nini maku i ǹʼna. Míŋ na koŋ telimaan kiri dɔri kì, duu bijɛmatɔnŋ kiri. »
Yesu wulu wɔ̀ bi-i sunŋ de bi ki sun
(Matiyu 9.14–17; Luki 5.33–39)
18Jibi bɛɛ, ŋì i Yuhana wɔ kalindaŋ kiri fa Farinsiyɛnŋ kiri sunŋ demaan kiri tu, koŋ bɛɛ ri i na Yesu ranɔri tu : « Nfɛnŋ na, Yuhana wɔ kalindaŋ kiri fa Farinsiyɛnŋ kiri wɔ kalindaŋ kiri i ji sunŋ na, mɔɔn kiri dumiŋ sunŋ de-a kì? »
19Yesu i wulu ka bi kí tɛ a yɛri bi sun tu : « Cɛn nu wɔshuru kiri ra so sunŋ de-i ŋì i kí fa marishinŋ ki tu arìmaŋ fan wa? Ŋì i kí fa marishinŋ ki tu arìmaŋ fan, wɔshuru kiri ra so sunŋ de-i kì. 20Nka jibi ri yirira i nmaŋ, marishinŋ ki a na shi san kí ra, niŋ jibi kiri ra, kí a na sunŋ de-ri. »
21Yesu tu kí tɛ sɛbɛ : « Koŋ juulinŋ ŋunaŋ bwulu sɔɔ-ra, ŋi i juulinŋ bwuumaan nada kì. A niŋ ma, juulinŋ ŋunaŋ bwulu ki a juulinŋ bwuumaan ki cɛɛn-ɛ, ŋì i ǹʼgbɛri. Ǹʼgbɛri ta ki a gbɛ a jɔnɔ ki wu. 22Koŋ dunfɛnŋ juuraŋ bo-a foroko bwuumaan ni nu kì. A niŋ ma, dunfɛnŋ juuraŋ ki borama ki a foroko bwuumaan kiri gbɛri, dunfɛnŋ ki a kɔnkɔli, foroko kiri i ji-a li. Niŋ na, dunfɛnŋ juuraŋ ki fa foroko ŋunaŋ kakan-i. »
Yesu wulu wɔ̀ bi-i Nufaan jibi ki bi sun
(Matiyu 12.1–8; Luki 6.1–5)
23 Nufaan jibi bɛɛ sun, Yesu fa awɔ kalindaŋ kiri wuru fwuude-a koŋ bɛɛ wɔ alikaanma ji ru. Ntiŋ wɔ kalindaŋ kiri i alikaanma kaarinŋ kiri bɛɛ ri yali-li. 24Farinsiyɛnŋ kiri i Yesu ranɔri tu : « Bi wɔ̀ fu Nufaan jibi ki sun kì, nfɛnŋ na mɔɔn kalindaŋ kiri i niŋ ma-ni? »
25Yesu i kí rupwulu tu : « Waaci wɔ̀ ru, bɛɛ ki bo-i Dawuda fa a cɛfantɔnŋ kiri sun, nufinŋ dumiŋ wuru kí gbɛ kì, ntiŋ bi wɔ̀ ma-i, ábɛɛ niŋ kali kì wa? 26Kirinŋ tɛ sarakawɔrɔtɔnŋ Abiyataari wɔ sunŋ ki ra, Dawuda de-i Kirinŋ wɔ fu ki ru, bwuru wɔ̀ri wɔri wuru saraka Kirinŋ tɛ, ntiŋ i ta nini bɛɛ shi nu, ntiŋ i ǹʼbɛɛ wɔri a cɛfantɔnŋ kiri tɛ sɛbɛ. Koŋ tɔri dumiŋ wuru niŋ bwuru ki nu-a Kirinŋ tɛ sarakawɔrɔtɔnŋ kiri kɔɔtɛ kì. »#Samuyɛli (1) 21.2–7.
27Niŋ kɔɔtɛ, Yesu tu kí tɛ sɛbɛ : « Kirinŋ Nufaan jibi ki wɔri-i konanmini tɛ, nka konanmini wɔri Nufaan jibi ki tɛ kì. 28Niŋ ɲaan ki tɛ, Koŋ Danshuru ki i Nufaan jibi ki ŋununtiŋ i. »#2.28 Ǹʼbɛɛ ri tu ka mani ka ru tu Kirinŋ Nufaan jibi ki wɔri-i konanmini tɛ, nka konanmini wɔri Nufaan jibi ki tɛ kì. Ka mani ka i nwɔ̀ bi-a niŋ i tu Nufaan jibi ki wɔri konanmini wɔ ɲaanfɛfili bira, nka tu konanmini kakan ŋì i ji Nufaan jibi ki wɔ joŋ i kì.
اکنون انتخاب شده:
Maraka 2: JOB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
