Maraka 1
1
Wutɔnŋ Yuhana wɔ racinwulu ki
(Matiyu 3.1–12; Luki 3.1–18; Yuhana 1.19–28)
1Ka i Kirinŋ wɔ Wulujii ki tɔnpa ki i : Danshuru wɔ̀ po-i Kirinŋ nu, Yesu Kirisa, ǹʼyɔ ninki wulu bi-a. 2Ǹʼsɛbɛ-i Kirinŋ wɔ cintɔnŋ Esayi wɔ sɛbɛ ki ru tu :
« Ǹʼshɛɛli, míŋ i ńʼwɔ cintɔnŋ ki cin ta-a miŋ jɛŋ,
ŋì i ta nʼwɔ saa ki ramɔni nʼjɛŋ.
3Koŋ fali wulu bɛɛ i po-a jaŋ ki faninmwuŋ tu :
‹ Á Ŋuntiŋ ki wɔ saa ki ramɔni,
á i ǹʼwɔ saa pyaanŋ kiri teli. ›#Esayi 40.3. »
4Niŋ ɲaan ki tɛ, Yuhana i na a yɛri ji konaŋ kiri wu jaŋ ki faninmwuŋ. Ntiŋ wuru ǹʼsunjo-a konaŋ kiri tɛ tu, kí ntɔri bi arɔɔ bijɛ mamaan kiri ra, tu kí i wu#1.4 Wu : Ladaŋ yɛ bilinatɔnŋ kwuru ki gbɛ, koŋ finŋ woo finŋ ja ji bili Yesu ra, niŋ wu ki i ntiŋ wɔ bilinabi ki ji-a konaŋ kiri bataa wu Kirinŋ ɲaanfɛ. Niŋ i ji-a sababu bilinatɔnŋ kwuru ki i so a gbɛ faa-a ntiŋ nu, ŋì i ntiŋ bo baara ra. Kí i batisemaanna ki bi-a niŋ wuka ɲaan ki tɛ sɛbɛ., nwɔma Kirinŋ i kɔ́ɔ́ bijɛ kiri tu kí tɛ.
5 Yude sɔɔta ki ru tɔnŋ kiri fa Yerusalɛmutɔnŋ kiri bataa wuru po tiri-ra ntiŋ tɛ. Kí wuru arì tu-a arɔɔ bijɛ kiri ra, niŋ kɔɔtɛ, Yuhana i kí wu-ri Yurudɛn baa ki ru. 6Yuhana yɛɛrajɛrɛbi ki ramɔni wuru ɲɔɔnmi kaan wu, ntiŋ wɔ nukɔlɔfinŋ ki i ji pɔli i. Ntiŋ i a yɛri tɔnnafɛ-ri pyii ri fa jaŋ fan jii ri wu.
7Ntiŋ wuru ǹʼbi-a konaŋ kiri tɛ tu : « Nwɔ̀tiŋ a na míŋ kɔɔtɛ, niŋ wɔ sotinbi ki gbɛ-i mɔ́ɔ́n ki wu, míŋ ŋuniŋ kuru-i niŋ wɔ kari yaa pilitɔnŋ i. » 8Yuhana tu sɛbɛ : « Míŋ i ábɛɛ wu-a ju ra, nka nintiŋ kɔniŋ a na ábɛɛ wu Ɲiniwɔlinŋ ki ra. »
Yesu wu bi ki Yuhana gbɛ
(Matiyu 3.13–17; Luki 3.21–22)
9Niŋ waari ki ru, Yesu i po Nansarɛti, Galile sɔɔta ki ru, ntiŋ i na Yuhana maŋ ki ru. Yuhana i ntiŋ wu Yurudɛn baa ki ru. 10Yesu pora ki ju ki ru, ntiŋ i kirinpɔli ki rawwulumaan ja, Ɲiniwɔlinŋ ki i jɛri ntiŋ sun miŋ tu kilaaŋ. 11Wulu bɛɛ i po kirinpɔli ki ra, niŋ i ǹʼbi tu : « Miŋ i míŋ Danshuru ki i, miŋ bi ki gbɛ-i míŋ gbɛ haali! »
12-13Niŋ mamaan ki kɔɔtɛ, Ɲiniwɔlinŋ ki i Yesu curu bo ta jaŋ ki faninmwuŋ shuu. Ntiŋ i sunŋ yaafuuli ma niŋ jaŋ ki faninmwuŋ. Ŋì i Yesu tu niŋ mani nu, shitaanni i ntiŋ kɔrɔbɔ. A juunshɛn ni ji wuru-i kì, koŋ maŋ myɛ-ni niŋ mani nu kì, mɛlɛkɛn ni wuru ye-a ntiŋ tɛ.
Yɛrinpatɔnŋ kiri dɔri bi ki Yesu gbɛ
(Matiyu 4.12–22; Luki 4.14–15; 5.1–11)
14Yuhana pa bo-i nkasu ki ru waarinŋ wɔ̀ ru, Yesu i ta Galile sɔɔta ki ru, ntiŋ i ta Kirinŋ wɔ Wulujii ki sunjo. 15Ntiŋ wuru ǹʼbi-a tu : « Kirinŋ wɔ waaci kubilimaan ki rafaa-a. Kirinŋ wɔ Masabi ki waari ki myɛ-i. Á ntɔri bi áwɔ bijɛ kiri ra, á i bili Wulujii ki ra. »
16Ŋì i Yesu tu tiri-ra Galile baa ki tonfan, ntiŋ i Simɔŋ fa a pwaŋ Andire ja. Kí wuru jɔ ri bo-a baa ki ru, sabu yɛrinpatiiri wuru-i.
17Yesu tu kí tɛ tu : « Á ǹʼpa míŋ cɛfan, míŋ a ábɛɛ ji koŋ ceelitiiri i. »
18Mìŋ manaanŋ tenŋ ki ru, kí i arɔɔ jɔ kiri tu nmaŋ, kí i ǹʼpa ntiŋ cɛfan.
19Yesu ta-i jɛŋ pyaanniŋ, ntiŋ i Nsebede danshuru fuuli ki ja, Yakuba fa Yuhana. Nini wuru arɔɔ kwurinŋ kiri ru, kí i arɔɔ jɔ kiri myɛ-ni. 20Mìŋ manaanŋ tenŋ ki ru, Yesu i kí dɔri. Kí i arì tiŋ Nsebede fa baara matɔnŋ pyɛ kiri tu buŋ ki ru nmaŋ, kí i ǹʼpa Yesu cɛfan.
Yesu wɔ sotinbi ki ɲinijɛ kiri sun
(Luki 4.31–37)
21Yesu fa awɔ kalindaŋ kiri i ta Galile sɔɔta ki ru kili tɔri ra, nwɔ̀ tɔ ki i tu Kafarinawumu. Nufaan jibi ki na-i so, ntiŋ i ta de Yawutu kiri wɔ kalinfu ki ru, ntiŋ i konaŋ kiri kali-li. 22Ntiŋ wɔ koŋ kalika ɲaan ki botɔnsun i konaŋ kiri pa, sabu ntiŋ wuru konaŋ kiri kali-la miŋ tu sariya kalimɔɔ kiri kì, nka baraka wuru ntiŋ wɔ kalinŋ ki ru.
23Niŋ waari ru, shuru ɲinijɛtiŋ#1.23 Ɲinijɛ ki i suuntɔnbi, juuntɔnbi, pɛli fa tɔntɔnbi i. Ɲinijɛtiŋ i koŋ i, ɲinijɛ i bo-a nwɔ̀tiŋ nu, walima ŋì i ji ntiŋ cɛfan. bɛɛ wuru kalinfu ki ru, niŋ i yaalinpo tu : 24« Heyi! Nansarɛtitɔnŋ kiri wɔ Yesu! Nfɛnŋ yibɛɛ fa miŋ faninmwuŋ? Miŋ na-i yibɛɛ tu kɔ wa? Miŋ i nwɔ̀, míŋ niŋ tɔ-i, miŋ i Kirinŋ wɔ Cintɔnŋ Wɔlinŋ ki i. »
25Yesu i fali ɲinijɛ ki sun tu : « Nʼtɔnŋ ki rala, ŋi i po san weŋ ki ru! »
26Ɲinijɛ ki i weŋ ki fɛɛn kí kanfɛ, ŋì i wu yuuyuu kusɛbɛ, ŋì i yaalinpo, ŋì i po san wú ru.
27Niŋ botɔnsun i konaŋ ki bataa pa, fɔ kí i ǹʼbi-ri arìmaŋ tɛ tu : « Haan! Ka a wulu kwuru danwɔ? Ntiŋ i wulubi-a ɲinijɛ kiri tɛ sotinbi wu, tu yìrì po san koŋ nu, yìrì fani i po-ri ncinŋ. »
28Mìŋ manaanŋ tenŋ ki ru, Yesu tɔ ki i so Galile sɔɔta ki mani ki bataa ru.
Yesu wɔ kiratɔnŋ mwɔɔnna kene bi ki
(Matiyu 8.14–17; Luki 4.38–41)
29Yesu po san-i Yawutu kiri wɔ kalinfu ki ru, ntiŋ fa Yakuba fa Yuhana i ta Simɔŋ fa Andire wɔ mani nu. 30Kí so-i niŋ mani nu, kí i ta fa Simɔŋ famari ki bili wu firikwulu la. Kí i nmari wulu bi Yesu tɛ. 31Yesu i a kpari, ntiŋ i nmari pa a gbɛ sun, firikwulu ki i kɔ. Mari ki i jɔrɔkɔ, nmari i nufinŋ si kí tɛ.
32Sunfyiri ki sun, konaŋ kiri i na arɔɔ kiratɔnŋ kiri bataa fa arɔɔ ɲinijɛtiŋ kiri wu Yesu tɛ. 33Kili ki ru tɔnŋ kiri bataa i na arì rakɔli fu ki tɔnŋ na. 34Kiratɔnŋ kwuru ki fɔn wuru kí ru. Yesu i kí bataa kene, ntiŋ i ɲinijɛ ri kwɔ po san koŋ mwɔɔnna nu. Ntiŋ i ncusun ɲinijɛ kiri i wulubi kì, sabu yìrì wuru ntiŋ tɔ-a.
Yesu wɔ Kirinŋ wɔ wulu bi ki Galile sɔɔta ki ru
(Luki 4.42–44)
35Sisarimantɔnŋ ki sun jona, Yesu i po tiri jaŋ fan, ntiŋ i ta Kirinŋ nafɛ. 36Simɔŋ fa a kaashi kiri i jɔrɔkɔ, kí i ta ntiŋ ceeli. 37Kí ta-i ntiŋ ja waarinŋ wɔ̀ ru, kí tu ntiŋ tɛ : « Konaŋ ki bataa i ábɛɛ ceeli-la. »
38Yesu tu kí tɛ : « Yi tiri tonfan kili kiri ra, míŋ kakan-i ŋí i ta Kirinŋ wɔ wulu ki sunjo niŋ mani kiri ru sɛbɛ, sabu míŋ cin ŋuŋ ki i niŋ i juniɲa ki ru. »
39Niŋ ɲaan ki tɛ, ntiŋ i tiri Kirinŋ wɔ wulu ki sunjo Galile sɔɔta ki mani ki bataa ru, Yawutu kiri wɔ kalinfu kiri ru, ntiŋ i ɲinijɛ kiri kwɔ po san konaŋ kiri ru.
Tuutiŋ bɛɛ kene bi ki Yesu gbɛ
(Matiyu 8.1–4; Luki 5.12–16)
40Tuutiŋ bɛɛ i na, ntiŋ i ta a kwushiri Yesu fɛ, ntiŋ i nafɛ tan tu : « Ŋuntiŋ, a ábɛɛ á tu, ábɛɛ ra so míŋ kene-i, á i nɔɔ#1.40 Nɔɔ : Yawutu kiri gbɛ, tuu ki i kira, nwɔ̀ i nɔɔbi i Kirinŋ ɲaanfɛ. Hali tuutiŋ ki kene, ntiŋ kakan-i ntiŋ i ta a yɛri ji Kirinŋ tɛ sarakawɔrɔtɔnŋ kiri wu, ntiŋ i saraka wɔri Kirinŋ tɛ a wu fɔɔ wɔ. ka san míŋ na. »
41Tuutiŋ ki makwulu i Yesu pa, ntiŋ i a gbɛ bili wú sun, ntiŋ i ǹʼbi : « Míŋ ńʼtu-i, kene! »
42Mìŋ manaanŋ tenŋ ki ru, tuu ki i san weŋ ki ra, wúwɔ nɔɔ ki i kɔ. 43Yesu i weŋ ki bo tiri, nka ntiŋ i ǹʼbi furu wú tɛ tu : 44« Ǹʼshɛɛli, fa nʼkene wulu ki bi koŋ tɛ kì, nka ta nʼyɛri ji Kirinŋ tɛ sarakawɔrɔtɔnŋ kiri ŋununtiŋ ki wu. Kirinŋ wɔ cintɔnŋ Musa saraka wɔ̀ wulu bi-i tuu kenemaan ki saraka ki i, ŋi i niŋ san, nwɔma ŋi i ǹʼji konaŋ ki bataa wu tu miŋ kene.#Sarakawɔrɔtɔnŋ kiri 14.1–32. »
45Yesu a kaan-a, tu weŋ ki fa a kene wulu ki bi koŋ tɛ kì, niŋ fa a fɔn na, wú i ta niŋ bi kiri bataa sunjo de mani ki bataa ru, fɔ Yesu wuru so-a de-i kili tɔri tenŋ nu konaŋ kiri gbɛɛra kì. Ntiŋ wuru tu-a jaŋ ki fan nmaŋ. Konaŋ kiri i po-ri mani kiri bataa ru, kí ta-ri ntiŋ kila-ri nmaŋ.
اکنون انتخاب شده:
Maraka 1: JOB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
