Matiyu 17
17
Yesu nɔɔri ki ji bi ki kalindaŋ kiri bɛɛ ri wu
(Maraka 9.2–13; Luki 9.28–36)
1Sunŋ taanmani fwuudemaan kɔɔtɛ, Yesu i Pyɛɛri fa Yakuba niŋ fa a tindaŋ Yuhana dɔri, ntiŋ i ta kí wu tɔnŋ ŋmani bɛɛ sun arì cinŋ. 2Niŋ mani nu, ntiŋ ɲaanfɛ ki i rapwulu kíbɛɛ yɛri kiri ɲaanna, ntiŋ sunjuulinŋ kiri i fɔɔ pɛlipɛli, ntiŋ ɲaanfɛ ki i cucu-ri miŋ tu sunŋ sarinŋ. 3Mìŋ manaanŋ tenŋ ki ru, kalindaŋ kiri i cintɔnŋ Musa fa cintɔnŋ Eli#17.3 Eli : Ǹʼbɛɛ ri i Eli tɔ ki bi-a tu Iliya. ja wulubi-a Yesu tɛ.
4Pyɛɛri tu Yesu tɛ : « Ŋuntiŋ ki, yibɛɛ jimaan ki kwumaŋ, niŋ shɔ-i dɛ! A ábɛɛ á tu míŋ a juulinfu byaŋ tan, ábɔɔ tenŋ, Musa wɔ tenŋ, niŋ fa Eli wɔ tenŋ. »
5Ŋì i Pyɛɛri tu wulu ki ra Yesu tɛ, loŋ bɛɛ i na kí sunla, niŋ wuru cucu-a. Kí i wulu bɛɛ rama, ŋì i po niŋ loŋ ki ru tu : « Ka i míŋ dintɛ Danshuru ki i, nwɔ̀ bidi-i míŋ tɛ haali, á á tɔɔnye ǹʼtɛ. » 6Kalindaŋ kiri niŋ wulu ki rama-i waarinŋ wɔ̀ ru, kí kɛnika jɛ ki, kí bataa i fɛɛn, kí i arì ɲaannu kiri da fwuniŋ ki sun.
7Nka Yesu i a kpari kí tɛ, ntiŋ i a gbɛ pa kí ra, ntiŋ tu : « Á fa kɛni kì, á jɔrɔkɔ. » 8Kí arì ŋuniŋ kiri fɛshi-i, kí koŋ tɔri ja Yesu fan kili kì.
9Kí ji-i jɛri po-a tɔnŋ ki ru, Yesu i ǹʼbi furu kí tɛ tu : « Ábɛɛ jafinŋ wɔ̀ ja-i, á fa niŋ bi koŋ tɛ sun kì, sana Koŋ Danshuru ki i na ŋmɛni po san konkwuu kiri kanfɛ. »
Kalindaŋ kiri wɔ Yesu ranɔri bi ki Eli bi sun
(Maraka 9.10–13)
10Yesu wɔ kalindaŋ kiri i ntiŋ nanɔri tu : « Nfɛnŋ na, sariya kalimɔɔ kiri i ǹʼbi-ri tu Eli kakan ntiŋ i na sun? »
11Yesu i kí rupwulu tu : « Sɛli yɛ, Eli kakan-i ntiŋ i na, ntiŋ i na finŋ bataa ramɔni sɔɔ a ɲaan tɛ sun. 12Nka míŋ a ǹʼbi ábɛɛ tɛ, ńʼtu Eli na kɔ, nka konaŋ kiri ntiŋ tɔ kì, kí arì dintɛ bi ki ma-i ntiŋ wu. Mìŋ ɲaan tenŋ ki tɛ, kí a na Koŋ Danshuru ki makwulujuu. »
13Niŋ ɲaan ki tɛ, ntiŋ wɔ kalindaŋ kiri i ǹʼtɔ tu ntiŋ Wutɔnŋ Yuhana wulu bi-a arìbɛɛ tɛ.
Yesu wɔ daŋ ɲinijɛtiŋ kene bi ki
(Maraka 9.14–29; Luki 9.37–43)
14Yesu fa awɔ kalindaŋ kiri na-i so konaŋ ki kankantɛ waarinŋ wɔ̀ ru, shuru bɛɛ i na a kwushiri ntiŋ fɛ, ntiŋ i ǹʼbi tu. 15« Ŋuntiŋ ki, á ńʼdaŋ ki sunmakwulupa, kirinkirinsaa i bo-a wú ru, ŋì i wú cɔɔri-ra kusɛbɛ. Waaci kiri bɛɛ ri ru, wú i fɛɛn-na tuu ru, walima ju ru. 16Míŋ na-i wú wu ábɔɔ kalindaŋ kiri tɛ, nka kí so wú kene-i kì. »
17Yesu tu kí tɛ : « Ábɛɛ koŋ jɛ bilinabali kari, míŋ a tu ábɛɛ fan fɔ waarinŋ danwɔ ru? Míŋ a ábɔɔ bi kiri kwun ńʼnu, fɔ ŋì i ta so waaci danwɔ sun? Á na daŋ ki wu kwumaŋ. »
18Yesu i jɛbi ɲinijɛ ki gbɛ, ŋì i po san weŋ ki ru, wú i kene mìŋ manaanŋ tenŋ ki ru.
19Niŋ na, kalindaŋ kiri i arì kpari ntiŋ tɛ arì cinancinŋ, kí i ntiŋ nanɔri tu : « Nfɛnŋ na, yibɛɛ so ka ɲinijɛ ka kalikali-i kì? »
20Yesu i ǹʼbi kí tɛ tu : « Sabu ábɔɔ bilinabi ki rakuru-i. Sɛli ki ra, míŋ a ǹʼbi ábɛɛ tɛ, ńʼtu a ábɔɔ bilinabi ki gbɛka ki ji wuru so-ri hali mutaridi#17.20 mutaridi : Yawutu kiri gbɛ, mutaridi ki daŋ ki kuru-i bilanaŋ kiri bataa wu. daŋ sali, ńʼtu ábɛɛ wuru-ra so ǹʼbi-i tɔnŋ ka tɛ tu : ‹ Jɔrɔkɔ san ka mani ka ru, ŋì i ta sɔɔ kaa keŋ ›, ńʼtu ǹʼwuru-ra ǹʼma. Ábɛɛ wuru-ra waa bi tɔri ra kì. 21[Nka, ka ɲinijɛ kwuru ka so-a kalikali-i Kirinŋ nafɛ fa sunŋ de ciniŋ kì.] »#Maraka 9.29.
Yesu wulubi bi ki a beŋ ki fa a ŋmɛni bi sun sɛbɛ
(Maraka 9.30–32; Luki 9.43–45)
22Jibi bɛɛ, ŋì i kalindaŋ kiri bataa rakɔlimaan ki tu arìmaŋ fan, Galile sɔɔta ki ru, Yesu i ǹʼbi kí tɛ tu : « Koŋ Danshuru ki a pa, ntiŋ i wɔri konaŋ kiri tɛ. 23Kí a na ntiŋ kilɛn, nka ntiŋ beŋ ki sunŋ byantɔnŋ ki, ntiŋ a ŋmɛni. »
Niŋ wulu ki i kalindaŋ kiri tɔnfɔɔ kusɛbɛ.
Kirinfusinaŋ ki ra jalinŋ sali bi ki
24Yesu fa awɔ kalindaŋ kiri so-i Kafarinawumu waarinŋ wɔ̀ ru, Kirinfusinaŋ ki ra jalinŋ nakɔlɔtɔnŋ kiri i ǹʼbi Pyɛɛri tɛ tu : « Ábɔɔ kalimɔɔ ki Kirinfusinaŋ ki wari ki sali-la kì wa? »
25Pyɛɛri i ǹʼnupwulu tu : « Aawe. »
Pyɛɛri de-i fu ki ru waarinŋ wɔ̀ ru, Yesu jɔnɔ ki i wulu ki shi, ntiŋ i ǹʼbi tu : « Simɔŋ, miŋ ɲakilila ki ǹʼdanwɔ? Nkɛnŋ kakan ntiŋ i ɲinisa ki walima faan wari ki sali wɔri juniɲa ka ru masa kiri tɛ? Danji kiri daa, jɛ kiri? »
26Pyɛɛri tu : « Jɛ kiri. »
Yesu tu : « Niŋ na, danji kanŋ niŋ nu kì dɛ! » 27Yesu tu sɛbɛ tu : « Nka, niŋ fa a fɔn na, nwɔma yi fa koŋ kari tɔnfɔɔ kì, tiri baa ki ru, ŋi i ta myɛɛnni ki bo, a miŋ ta yɛrinŋ jɔnɔ wɔ̀ pa, ŋi i niŋ daru ki ruwaa, miŋ a jalinŋ kila ǹʼdaru, nwɔ̀ a koŋ fuuli wɔ po, ŋi i ta niŋ wɔri jalinŋ nakɔlɔtɔnŋ kiri tɛ, míŋ fa mɔɔn. »
اکنون انتخاب شده:
Matiyu 17: JOB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
