Matiyu 16
16
Farinsiyɛnŋ kiri fa Sadusiyɛnŋ kiri wɔ taanmashɛ ceeli bi ki Yesu gbɛ
(Maraka 8.11–13; Luki 12.54–56)
1 Farinsiyɛnŋ kiri fa Sadusiyɛnŋ kiri i arì kpari Yesu tɛ, kí i arì bo ntiŋ fɛ, tu ntiŋ taanmashɛ ki bɛɛ ma, ŋì i po kirinpɔlila.
2Yesu i kí rupwulu tu : « Sunŋ fyiri ki sun, ábɛɛ i ǹʼbi-a tu : ‹ Mani ki ra shɔ po siri, sabu kirina ki kilɛn-i. › 3Niŋ fa, siira ki ru, á i bi-ri tu : ‹ Mani ki shɔ po jiŋ kì, sabu kirina ki mini-i. › Ábɛɛ so-a kirina shɛɛli-i, á i waaci ki ɲaan kiri tɔ-ri, nka yibɛɛ i waaci wɔ̀ ru, ábɛɛ waa-ri niŋ taanmashɛ kiri tɔ-i wa? 4Jiintɔnŋ koŋ jɛ kari, niŋ fa Kirinŋ wulu sɔsɔtɔnŋ kari tu taanmashɛ ma arì ɲaanna, taanmashɛ tɔri tenŋ a ma kí ɲaanna Yonasi wɔ taanmashɛ ki ciniŋ kì. » Yesu niŋ bi kɔ-i waarinŋ wɔ̀ ru, ntiŋ i a san kí kankantɛ, ntiŋ i tiri.
Farinsiyɛnŋ kiri fa Sadusiyɛnŋ kiri wɔ bwuru tuutuufinŋ ki bi ki
(Maraka 8.14–21)
5 Kalindaŋ kiri wuru po-a baa kuŋ tɔri ki tɛ waarinŋ wɔ̀ ru, kí ɲakilila bo-ri bwuru shi kì. 6Yesu tu kí tɛ : « Á á yɛri paka tɔ Farinsiyɛnŋ kiri fa Sadusiyɛnŋ kiri wɔ bwuru tuutuufinŋ ki kɛlina dɛ! »
7Kalindaŋ kiri i ǹʼbi-ri arìmaŋ tɛ tu : « Yibɛɛ bwuru shi kì, niŋ ki ra, ntiŋ i ka bi-ri. »
8Kí wuru nwɔ̀ bi-a, Yesu i niŋ tɔ, niŋ ki ra, ntiŋ tu kí tɛ : « Ábɔɔ bilinabi ki rakuru-i dɛ! Nfɛnŋ na, ábɛɛ i ǹʼmiiri-ri tu ábɛɛ bwuru shi kì, tu ninki ncin-a tu míŋ i ka bi-ri? 9Ka bataa ciiru, ábɛɛ bi kiri ɲaantɔ-i sun kì wa? Míŋ bwuru ŋuŋ taanŋ ki wɔri-i shuru waa taanŋ (5.000) ki tɛ mani wɔ̀ ru, niŋ fa ábɛɛ shɛɛrinŋ kpaa wɔ̀ faa ǹʼpyɛ ki ra, ábɛɛ ɲakililafɔni-i niŋ tɛ wa? 10Niŋ fa bwuru ŋuŋ jɔnpɔni ki lu-i shuru waa pyiiraŋ (4.000) ki tɛ, ábɛɛ shɛɛrinŋ kpaa wɔ̀ kila-i ǹʼpyɛ tumaan ki ra, ábɛɛ ɲakililafɔni-i niŋ tɛ wa? 11A míŋ ǹʼbi tu ábɛɛ á yɛri paka tɔ Farinsiyɛnŋ kiri fa Sadusiyɛnŋ kiri wɔ bwuru tuutuufinŋ kɛlina, nfɛnŋ na ábɛɛ ɲakili i ji ǹʼna tu míŋ nu bwuru wulu bi-a? »
12Niŋ ki ra, kí i kila kí i ǹʼtɔ tu Yesu wuru wulubi-a bwuru tuutuufinŋ bi sun kì, nka tu ntiŋ wuru Farinsiyɛnŋ kiri fa Sadusiyɛnŋ kiri wɔ kalinŋ ki wulu bi-a.
Pyɛɛri tu Yesu Kirisa ki i
(Maraka 8.27–30; Luki 9.18–21)
13Yesu so-i Sensare Filipi sɔɔta ki ru, ntiŋ i awɔ kalindaŋ kiri ranɔri : « Konaŋ kiri ǹʼbi-a tu Koŋ Danshuru ki nkɛnŋ? » 14Kí i ntiŋ nupwulu tu : « Ǹʼbɛɛ ri gbɛ, Wutɔnŋ Yuhana yɛ, ǹʼtɔri ri gbɛ, Eli#16.14 Eli : Ǹʼbɛɛ ri i Eli tɔ ki bi-a tu Iliya. yɛ, ǹʼtɔri ri tu Yeremi, walima tu Kirinŋ wɔ cintɔnŋ tɔri. »
15Yesu tu kí tɛ : « Ábɛɛ ji! Ábɛɛ gbɛ, míŋ nkɛnŋ? »
16Simɔŋ wɔ̀ i dɔri-ra tu Pyɛɛri, niŋ tu ntiŋ tɛ : « Ábɛɛ i Kirisa ki i, Kirinŋ ɲaninkulutɔnŋ ki Danshuru ki. »
17Yesu tu ntiŋ tɛ : « Yonasi danshuru Simɔŋ, mɔɔn shɔ-i, sabu nwɔ̀ ka sɛli ka ji-i miŋ wu, niŋ konanmini ki, duu míŋ Tiŋ wɔ̀ i kirinpɔli ki ra. 18Míŋ a nwɔ̀ bi miŋ tɛ, niŋ i kaa : Miŋ i Pyɛɛri#16.18 Pyɛɛri : tɔ ki kɔri ki i tu faa walima kwɔ. i, míŋ a ńʼwɔ bilinatɔnŋ kwuru ki sɔɔ faa wɔ̀ sun. Beŋ ki wɔ so ki a na so finŋ tɔri ma-i nwɔ̀ wu kì. 19Míŋ a na kirinpɔlila Masabi ki bunaŋ ki wɔri miŋ tɛ, a miŋ finŋ woo finŋ kɔli pwɔkulinŋ ki sun, niŋ a kɔli kirinpɔli ki ra, a miŋ finŋ woo finŋ pili pwɔkulinŋ ki sun, niŋ a pili kirinpɔli ki ra. »
20Niŋ kɔɔtɛ, Yesu i ǹʼbi furu awɔ kalindaŋ kiri tɛ, tu kí fa ǹʼbi koŋ tɔri tenŋ tɛ, tu afinŋ Kirinŋ Ɲaannakonshimaan ki i kì.
Yesu wɔ wulu ki a beŋ ki fa a ŋmɛni bi ki bi sun
(Maraka 8.31 ŋì i ta bo 9.1; Luki 9.22)
21Ŋì i shi niŋ waaci ki ru, Yesu i ǹʼfɔɔ bi-ri awɔ kalindaŋ tɛ, tu sii ǹʼna ǹʼnu kì, tu afinŋ kakan a i tiri Yerusalɛmu, a i ta cɔɔri cɛɛnni kiri fa sarakawɔrɔtɔnŋ kiri ŋununtiŋ kiri fa sariya kalimɔɔ kiri gbɛ. Kí i a kilɛn, a i ŋmɛni ǹʼsunŋ byantɔnŋ ki i.
22Pyɛɛri i ntiŋ dɔri po kɛlinsun, niŋ i ta jɛbi-ri ntiŋ gbɛ tu : « Ŋuntiŋ ki, Kirinŋ á mwu niŋ bi kiri wu, nini fa ábɛɛ kila kì. »
23Yesu i a ɲaannupwulu, ntiŋ i jɛbi Pyɛɛri gbɛ tu : « Miŋ shitaanni kaa, nʼsan ńʼtɔntɛ, miŋ i míŋ ŋununlitɔnŋ i, sabu mɔɔn bi jaka ɲaan ki fa Kirinŋ wɔ ki tenŋ i kì, miŋ i nʼwɔ bi kiri ja-a konanmini wɔ jaka ɲaan na. »
Koŋ ǹʼpa-a Yesu cɛfan dɔɔkunŋ?
(Maraka 8.34 ŋì i ta bo 9.1; Luki 9.23–27)
24Yesu i ǹʼbi awɔ kalindaŋ kiri tɛ tu : « Konwɔtiŋ ji ǹʼtɛ a i ǹʼpa míŋ cɛfan, ntiŋ fa a miiri a yɛri ki bira kì. Ntiŋ a kpinkpisuu#16.24 kpinkpisuu ki shi : Niŋ kɔri ki i tu kalindaŋ kiri kakan kí i arì tu kí i yɛlinŋ mwɔɔnna pa arì ra Yesu cɛfan tiri ki ru, hali fɔ ŋì i ta so beŋ ki sun. ki shi jibi woo jibi, ntiŋ i ǹʼpa míŋ cɛfan. 25Sabu konwɔtiŋ i ǹʼtɛ a i a ɲinita ki mwu, nintiŋ a bɔni a ɲinita ki ru, nka konwɔtiŋ bɔni a ɲinita ki ru míŋ bira, nintiŋ a a ɲinita ki kila. 26Juniɲa ki ru finŋ bataa kilamaan na nfɛnŋ shɔ konanmini sun, a ntiŋ bɔni a ɲinita ki ru? Konanmini na so nfɛnŋ wɔri-i Kirinŋ tɛ, nwɔ̀ a ntiŋ ɲini ki sa po? 27A Koŋ Danshuru ki na na Tiŋ ki nɔɔri ki ru, niŋ fa awɔ mɛlɛkɛn kiri wu, ntiŋ a na koŋ fɔn tenŋ tenŋ sali, ŋì i kɛɲɛ a mabi wu. 28Sɛli ki ra, míŋ a ǹʼbi ábɛɛ tɛ, ńʼtu nwɔ̀ri fɔn i kwumaŋ, ńʼtu nini bɛɛ ri ra beeni Koŋ Danshuru ki naanna ki jabali awɔ Masabi ki ru kì. »
اکنون انتخاب شده:
Matiyu 16: JOB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
