Matiyu 14

Wutɔnŋ Yuhana beŋ ki bi ki

(Maraka 6.14–29; Luki 9.7–9)

1Niŋ waaci ki ru, Ɛrɔdi Antipasi, ninwɔ̀ wuru Galile ŋununu, niŋ i na Yesu wulu ki rama. 2Ntiŋ tu a tɛ baara matɔnŋ kiri tɛ : « Wutɔnŋ Yuhana pwulu namaan yɛ, ntiŋ ŋmɛni po-i konkwuu kiri ru, ninki i ncin-a, ntiŋ i botɔnsunbi kiri ma-ni ka ɲaan ka tɛ. »

3Sɛli yɛ, Ɛrɔdi Wutɔnŋ Yuhana pa kɔli bo wuru nkasu ru. Ntiŋ niŋ ma wuru a pwaŋ Filipu wɔ mari Ɛrɔdiyadi bira. 4Sabu Wutɔnŋ Yuhana wuru tu-a ntiŋ i ǹʼbi-ri Ɛrɔdi tɛ tu : « Ǹʼfu miŋ i ka mari ka cɛn kì. »

5Niŋ na, Ɛrɔdi wuru ǹʼtɛ á i wutɔnŋ Yuhana kilɛn, nka ntiŋ wuru kɛni-na konaŋ kiri jɛŋ. Sabu konaŋ ki gbɛ, Yuhana wuru Kirinŋ wɔ cintɔnŋ i.

6Nka, Ɛrɔdi ji jibi ki jirirakwunu ki na-i so, Ɛrɔdiyadi danmari ki i wɔshɛ masa ki wɔ jɛ namaan kiri ɲaanfɛ. Niŋ i di ntiŋ tɛ kusɛbɛ, 7fɔ ntiŋ i a kɔni maannaanŋ ki tɛ tu, níŋ finŋ woo finŋ nafɛ afinŋ gbɛ, a ra niŋ bataa wɔri níŋ tɛ. 8Maannaanŋ ki ɲiŋ ki i niŋ nuye, tu níŋ ǹʼbi masa ki tɛ tu : « Wutɔnŋ Yuhana ŋuniŋ ki wɔri ńʼtɛ kulu ciiru kwumaŋ. » 9Niŋ wulu ki i furu masa ki sun kusɛbɛ. Nka miŋ tu ntiŋ a kɔni wuru awɔ koŋ dɔrimaan kiri ɲaanna, ntiŋ tu Yuhana ŋuniŋ ki wɔri níŋ tɛ. 10Niŋ ɲaan ki tɛ, ntiŋ i koŋ bo ta Wutɔnŋ Yuhana ŋuniŋ ki kwuru nkasufu ki ru. 11Kí i Yuhana ŋuniŋ ki bo na kulu lu, kí i na ǹʼwɔri maannaanŋ ki tɛ, nínfinŋ i ta ǹʼwɔri a ɲiŋ ki tɛ. 12Wutɔnŋ Yuhana wɔ kalindaŋ kiri i na ntiŋ kwuu ki shi, kí i ta ǹʼye. Niŋ kɔɔtɛ, kí i ta niŋ ɲaanbi Yesu tɛ.

Yesu wɔ nufinŋ wɔri bi ki konaŋ ki tɛ

(Maraka 6.30–44; Luki 9.10–17; Yuhana 6.1–14)

13Yesu niŋ wulu ki rama-i waarinŋ wɔ̀ ru, ntiŋ i po san niŋ mani ki ru, ntiŋ i de buŋ bɛɛ ru, nwɔma a i ta jaŋ faninmwuŋ, a i amaŋ nari konaŋ ki ra. Konaŋ ki niŋ nama-i waarinŋ wɔ̀ ru, kí i po arɔɔ kili kiri ra arì kanŋ na, kí i ta ntiŋ cɛfan. 14Yesu po san-i buŋ ki ru waarinŋ wɔ̀ ru, ntiŋ i konaŋ ki ja. Kí makwulu i ntiŋ pa, ntiŋ i kí ru kiratɔnŋ kiri kene.

15Bilana ki na-i so, kalindaŋ kiri i arì kpari Yesu tɛ, kí i ǹʼbi ntiŋ tɛ : « Sunŋ ki kɔ-i kɔ, á saa wɔri konaŋ ki tɛ, kí i tiri tonfan kili kiri ra, kí i ta nufinŋ ceeli sa, sabu yibɛɛ i jaŋ faninmwuŋ kwumaŋ. »

16Yesu i kí rupwulu tu : « Ǹʼso kí i ta mani tɔri ru kì, ábɛɛ yɛrima kiri nufinŋ wɔri kí tɛ. »

17Kí tu ntiŋ tɛ : « Nufinŋ yibɛɛ gbɛ kwumaŋ, bwuru ŋuŋ taanŋ fa yɛrinŋ daŋ fuuli ciniŋ kì. »

18Yesu tu : « Á nini wɔri ńʼtɛ kwumaŋ. »

19Ntiŋ tu konaŋ ki sɔɔ sɔɔ ta ɲiŋ cɔ ki sun. Ntiŋ i bwuru ŋuŋ taanŋ ki fa yɛrinŋ daŋ fuuli ki shi, ntiŋ i a ŋuniŋ fɛshi kirinpɔlila, ntiŋ i baraka bi Kirinŋ tɛ, ntiŋ i bwuru ki rucɛn cɛn, ntiŋ i ǹʼwɔri kalindaŋ kiri tɛ, tu kí ǹʼlu konaŋ ki tɛ. 20Konaŋ ki bataa i nuŋ nu, kí i pyii. Kí i ǹʼpyɛ tumaan ki sɔɔ, kí i shɛɛrinŋ bwununfuuli faa. 21Koŋ wɔ̀ri ka nufinŋ ka nu wuru-i, kí ru shuru kiri so wuru koŋ waa taanŋ (5.000) sun, mari kiri fa tiraŋ kiri nini nu kì.

Yesu tiri bi ki ju ki sun

(Maraka 6.45–52; Yuhana 6.15–21)

22Niŋ bi kiri mamaan ki kɔɔtɛ shuu, Yesu i ǹʼbi awɔ kalindaŋ kiri tɛ tu kí de buŋ ki ru, kí i tiri a jɛŋ baa ki kuŋ nu, tu afinŋ a saa ki wɔri-ri konaŋ ki tɛ. 23Konaŋ ki bataa pyɛ-i waarinŋ wɔ̀ ru, Yesu i tunpa tɔnŋ ki sun, ntiŋ i ta Kirinŋ nafɛ a cinancinŋ, fɔ cii ki i na so, ŋì i ntiŋ tenŋ tu nmaŋ. 24Niŋ waari ru, kalindaŋ kiri wuru buŋ wɔ̀ ru, niŋ maŋ nari wuru tankpiŋ ki ra kɔ. Niŋ mani nu, buŋ ki i waa-ri tiri-i jɛŋ, sabu faa ki wuru ǹʼŋununafu-a, jukwululuŋ kiri i ǹʼbwɔ-ri. 25Sisarimantɔnŋ ki sun, Yesu i tiri ta-ri ju ki sun awɔ kalindaŋ kiri maŋ ki ru. 26Kí ntiŋ ja-i tiri na-a ju ki sun arì tɛ, kí tɔnŋ i cɛn, kí ǹʼbi tu konminiŋ i. Kɛmi i de kí ru, kí i kɛmi na yaalinpo-ri.

27Mìŋ manaanŋ tenŋ ki ru, Yesu i wulubi kí tɛ tu : « Á fa kɛni kì, MÍŊ YƐ, á á ɲakili ki sɔɔ tenŋ sun. »

28Pyɛɛri i ǹʼbi Yesu tɛ tu : « Ŋuntiŋ ki, a ábɛɛ ji-i ncinŋ, á ǹʼbi tu míŋ yɛrima ki tiri ta ábɛɛ tɛ ju ki sun. »

29Yesu i ǹʼbi ntiŋ tɛ tu : « Na. »

Pyɛɛri i po san buŋ ki ru, ntiŋ i a bo tiri sun baa ju ki sun, ntiŋ i tiri-ri Yesu tɛ. 30Nka Pyɛɛri na-i ǹʼja tu faa ki gbɛka jitan, ntiŋ i kɛni. Ntiŋ i jɛri ki tɔnpa ju ki ru, niŋ na, ntiŋ i yaalinpo, ntiŋ i ǹʼbi tu : « Ŋuntiŋ ki, á ńʼmwu! »

31Mìŋ manaanŋ tenŋ ki ru, Yesu i a gbɛ ki wɔri Pyɛɛri tɛ, ntiŋ i ntiŋ pa, ntiŋ tu : « Mɔɔn bilinabi ki kuru-i dɛ, nfɛnŋ na miŋ i sii? »

32Kí de-i buŋ ki ru waarinŋ wɔ̀ ru, faa ki i tu.

33Koŋ wɔ̀ri wuru buŋ ki ru, nini i arì kwushiri, kí i Yesu gbɛ, kí i ǹʼbi tu : « Sɛli ki ra, ábɛɛ i Kirinŋ Danshuru ki yɛrima ki i. »

Konaŋ kiri kene bi ki Yesu gbɛ Genesarɛti kili ki ra

(Maraka 6.53–56)

34Yesu fa awɔ kalindaŋ kiri baa ki fwuu-u, kí i de Genesarɛti sɔɔta ki ru. 35Niŋ mani nu tɔnŋ kiri i ntiŋ tɔ, kí i ǹʼsunjo arì tonfan kili kiri bataa ra. Kí i arɔɔ kiratɔnŋ kiri bataa po na ntiŋ tɛ. 36Kí i ntiŋ nafɛ, tu ntiŋ ncusun arì arì gbɛ pa bantenŋ tan a sunjuulinŋ ki tɔnŋ ki ra. Koŋ woo koŋ myɛ-ɛ niŋ na, niŋ bataa i kene.

اکنون انتخاب شده:

Matiyu 14: JOB

های‌لایت

به اشتراک گذاشتن

کپی