Matiyu 13
13
Yesu wɔ wulusuntalinŋ ki bilaŋ ɲɛɛntɔnŋ bi ki sun
(Maraka 4.1–9; Luki 8.4–8)
1Niŋ shikaŋ, Yesu i po san fu ki ru, ntiŋ i ta sɔɔ baa ki tɔnŋ na. 2Konaŋ mwɔɔnna i na arì rakɔli ntiŋ kɛlina. Konaŋ ki mwɔka jɛ ki, fɔ ntiŋ i de sɔɔ buŋ bɛɛ ru, konaŋ ki i tu tankpiŋ ki sun. 3Ntiŋ i wulu mwɔɔnna bi kí tɛ wulusuntalinŋ ni nu. Ntiŋ tu :
« Shuru bɛɛ po-i, ntiŋ i ta bilantu ɲɛɛn. 4Ŋì i ntiŋ tu awɔ bilaŋ ki ɲɛɛn-na, bilanaŋ kiri bɛɛ ri i ta fɛɛn saa tɔnŋ na, ɲaannaanŋ ni i na nini shi fɔn. 5Bilanaŋ kiri bɛɛ ri i ta fɛɛn faa maŋ ni nu, fwuu mwɔɔnna mani wɔ̀ri ru kì. Nini i shɛnpo farɔn, sabu fwuu ki mwɔ-ni nmaŋ kì. 6Sunŋ ki na-i kwulu, yìrì bataa i wɔli wɔli, yìrì i furu, sabu kanaŋ ɲaansun wuru yìrì ra kì. 7Bilanaŋ kiri bɛɛ ri i ta fɛɛn ɲiŋ ciitiŋ ni faninmwuŋ, niŋ cii kiri i jɔrɔkɔ, yìrì i bilaŋ shɛn ki fɔɔn. 8Nka bilanaŋ tɔri ri i ta fɛɛn pwɔkulinŋ jii ru, nini i daŋ bo. Bilanaŋ tenŋ tenŋ kiri bɛɛ ri i arì bishi yaataanŋ (100) pa, ǹʼtɔri ri i arì bishi yaabyaŋ pa, ǹʼtɔri ri i arì bishi kɔniŋ fa byinŋ pa. 9A wulu lama tɔɔn ji nwɔ̀tiŋ gbɛ, ntiŋ wulu lama. »
Yesu wɔ wulusuntalinŋ kiri bi ŋuŋ ki
(Maraka 4.10–12; Luki 8.9–10)
10Yesu wɔ kalindaŋ kiri i arì kpari ntiŋ tɛ, kí i ntiŋ nanɔri tu : « Nfɛnŋ na, ábɛɛ wulu ki bi-a konaŋ tɛ wulusuntalinŋ nu? »
11Ntiŋ i kí rupwulu tu : « Kirinpɔlila Masabi ki ɲaantɔ gonto ki wɔri-i ábɛɛ kiri tɛ, ǹʼwɔri kíbɛɛ tɛ kì. 12Sabu finŋ i nwɔ̀tiŋ gbɛ, ǹʼbɛɛ ra bo niŋ sun nintiŋ gbɛ, ŋì i mwɔ, nka finŋ nwɔ̀tiŋ gbɛ kì, hali pyaanŋ wɔ̀ i ntiŋ gbɛ, niŋ a mwu san ntiŋ wu. 13Niŋ ki ra, míŋ i wulu ki bi-a kí tɛ wulusuntalinŋ nu, nwɔma kí i maannashɛɛli-li, kí fa finŋ tɔri ja kì. Kí i arì tɔɔncu, kí i wulu lama-ni, nka kí fa ǹʼdaŋ tɔ kì. 14Kirinŋ wɔ cintɔnŋ Esayi cintɔnbi wulu wɔ̀ bi-i, niŋ nafaa koŋ kari sun. Ǹʼbi-i kí bi sun tu :
‹ Ábɛɛ tɔɔncumaan ki a na wulu lama,
nka á ra ǹʼdaŋ tɔ kì.
Ábɛɛ ra na maannashɛɛli,
nka ábɛɛ ra na finŋ tɔri ja kì.
15Sabu ka shiya ka ru konaŋ kiri ciiru ɲakili ki furu-i,
kí i arì tɔɔn kiri raye,
kí i arì ɲaninaŋ kiri rala,
nwɔma arì ɲaninaŋ kiri fa maannaja kì,
arì tɔɔn kiri fa wulu lama kì,
arì ciiru ɲakili kiri fa bi tɔ,
arì i arì ɲaannu pwulu míŋ Kirinŋ tɛ,
nwɔma ŋí i kí kene kì. ›#Esayi 6.9–10. »
16Yesu tu awɔ kalindaŋ kiri tɛ tu : « Ábɛɛ kɔniŋ fɛri-i, sabu ábɛɛ ɲaninaŋ kiri i maannaja-a, á tɔɔn kiri i wulu lama-ni. 17Sɛli ki ra, míŋ i ǹʼbi-a ábɛɛ tɛ, ńʼtu ábɛɛ i nwɔ̀ ja-a jiŋ, ńʼtu cintɔnŋ mwɔɔnna fa koŋ telimaan mwɔɔnna wuru ǹʼtɛ arì i niŋ ja, nka kí ǹʼja kì. Ábɛɛ i nwɔ̀ rama-a, kí wuru ǹʼtɛ arì i niŋ nama, nka kí ǹʼnama kì. »
Yesu awɔ wulusuntalinŋ ki kɔri ki bi-i
(Maraka 4.13–20; Luki 8.11–15)
18Yesu tu awɔ kalindaŋ kiri tɛ tu : « Dɔnsaŋ, míŋ wulusuntalinŋ wɔ̀ bi-i ábɛɛ tɛ bilaŋ ɲɛɛntɔnŋ ki bi ki sun, á á tɔɔnye ǹʼkɔri ki tɛ.
19Konwɔtiŋ i kirinpɔlila Masabi ki wulu ki rama-a, nka ntiŋ ǹʼdaŋ tɔ-a kì, shitaanni ki i na-a wulu lamamaan ki bataa kini san ntiŋ ciiru. Nintiŋ wɔ bi ki i miŋ tu bilanaŋ wɔ̀ri fɛɛn-ɛ saa tɔnŋ na.
20Bilanaŋ wɔ̀ri fɛɛn-ɛ faa maŋ ki ru, niŋ i konaŋ ni i, nwɔ̀ri Kirinŋ wɔ wulu ki rama-i, kí i ǹʼpa farɔn ciirudibi wu. 21Nka, niŋ wulu ki kanaŋ kila-a, ŋì i ta mani narimaŋ nu kí ciiru kì. Kí tu-a niŋ wulu ki sun kì. A fɔɔnbi kí kila, walima a kí ji cɔɔri kila-a niŋ wulu ki bira, kí i ǹʼpani-na shuu.
22Bilanaŋ wɔ̀ri fɛɛn-ɛ ɲiŋ ciitiŋ kiri faninmwuŋ, nini i kpeeri i, nwɔ̀ri i Kirinŋ wɔ wulu ki rama-a, nka juniɲa ka ru ciirufɔnɔbi kiri fa koŋ sunnɛɛn nafulu tɔ kiri i na-a arì la niŋ wulu ki sun, fɔ ŋì so-a daŋ pa-i kì.
23Pwɔkulinŋ jii ru bilanaŋ kiri i kpeeri i, nwɔ̀ri i Kirinŋ wɔ wulu ki rama-a, kí i ǹʼdaŋ tɔ, kí i ǹʼma, kí i daŋ mwɔɔnna pa. Ǹʼbɛɛ ri gbɛ, daŋ tenŋ ki i a bishi yaataanŋ (100) pa-a, ǹʼtɔri i a bishi yaabyaŋ pa-ri, ǹʼtɔri i a bishi kɔniŋ fa byinŋ pa-ri. »
Yesu wɔ wulusuntalinŋ ki ɲiŋ jɛ bi ki sun
24Yesu i wulusuntalinŋ tɔri bi kí tɛ tu : « Kirinpɔlila Masabi ki fa finŋ wɔ̀ po-i, niŋ i kaa : Ji kaantɔnŋ bɛɛ bilantu shɔɔrinŋ ɲɛɛn-ɛ awɔ ji ki ru. 25Cii ki ru, ŋì i konaŋ kiri tu ɲinintan-a, niŋ koŋ ki ɲa bɛɛ i ta ɲiŋ jɛ daŋ ɲɛɛn ntiŋ wɔ ji ki ru sɛbɛ, ntiŋ i tiri. 26Niŋ ɲaan ki tɛ, bilaŋ shɛn ki na-i gbɛ waarinŋ wɔ̀ ru, niŋ ɲiŋ jɛ ki i tɔ. 27Ji ki baara matɔnŋ kiri i na ǹʼbi jitiŋ ki tɛ tu : ‹ Yi ŋununtiŋ, ábɛɛ bilantu shɔɔrinŋ ɲɛɛn-ni áwɔ ji ki ru kì wa? Ka ɲiŋ jɛ kaa yiri-ra da? ›
28Ntiŋ i kí rupwulu tu : ‹ Míŋ ɲa ki bɛɛ mwɔɔn yɛ. ›
Baara matɔnŋ kiri i arì ŋununtiŋ ki ranɔri tu : ‹ Ábɛɛ i ǹʼtɛ, yi i ta niŋ ɲiŋ jɛ ki cɛn cɛn kee wa? ›
29Jitiŋ ki tu kí tɛ : ‹ Aayi, míŋ i kɛni-na ńʼtu niŋ ɲiŋ jɛ ki cɛnmaanna ki fa na bilaŋ shɛn ki bɛɛ cɛn kì. 30Á ǹʼtu nmaŋ, á ncusun yìrì gbɛ arìmaŋ fan, fɔ ŋì i ta so bilaŋ tɛri waarinŋ ki sun. Niŋ waari ru, míŋ a na ǹʼbi bilaŋ tɛritɔnŋ kiri tɛ, tu kí ɲiŋ ki tɛri sun, ńʼtu kí i ǹʼkɔli, kí i ǹʼbilituru, niŋ kɔɔtɛ, kí i ńʼwɔ bilaŋ ki nakɔli bo ńʼwɔ cinŋ ki ru. › »
Yesu wulusuntalinŋ wɔ̀ bi-i mutaridi daŋ ki bi sun
(Maraka 4.30–32; Luki 13.18–19)
31Yesu i wulusuntalinŋ tɔri bi kí tɛ tu : « Kirinpɔlila Masabi ki i miŋ tu mutaridi daŋ, koŋ ninwɔ̀ firi-i awɔ ji ru. 32Mutaridi daŋ ki i wɛɛlafinŋ daŋ kiri bataa ru pyaanŋ ki i, nka ǹʼshɛnpo-i waarinŋ wɔ̀ ru, ŋì i ji-a cu, nwɔ̀ gbɛ-i wɛɛlafinŋ cu kiri bataa wu, fɔ kirinpɔli la ɲaannaanŋ kiri i na-ni arì foo bo-ri kanŋ kiri nu. »
Yesu wɔ wulusuntalinŋ ki lenfe ki bi sun
(Luki 13.20–21)
33Yesu i wulusuntalinŋ tɔri bi awɔ kalindaŋ kiri tɛ tu : « Kirinpɔlila Masabi ki i miŋ tu lenfe. A mari niŋ pyaanŋ shi, nmari i ǹʼbo fani kulu sinaŋ tenŋ nu, nmari i ǹʼnusu, ǹʼyɔ fani ki bataa tuutuu-ra. »
(Maraka 5.33–34)
34Yesu awɔ wulu kari bataa bi-i konaŋ ki tɛ wulusuntalinŋ ni nu, ntiŋ wulubi konaŋ ki tɛ wulusuntalinŋ bali kì. 35Ntiŋ niŋ ma-i, ntiŋ i Kirinŋ wɔ cintɔnŋ ki wɔ wulu bimaan ki rafaa tu :
« Míŋ a wulubi kí tɛ wulusuntalinŋ nu.
Bi wɔ̀ri radu-i kabi juniɲa cɛtu waari ki ru,
míŋ a na nini sunjo kí tɛ. »#Shu kiri 78.2.
Yesu wulusuntalinŋ wɔ̀ bi-i ɲiŋ jɛ ki bi sun, niŋ kɔri ki
36Ka wulu kari bimaan ki kɔɔtɛ, Yesu i konaŋ ki tu niŋ mani nu, ntiŋ i de kulu. Ntiŋ wɔ kalindaŋ kiri i arì kpari ntiŋ tɛ, kí i ntiŋ nanɔri tu : « Á ji ru ɲiŋ jɛ ki wulusuntalinŋ ki kɔri ki bi yi tɛ. »
37Yesu i kí rupwulu tu : « Bilantu sɔbɛ ki ɲɛɛntɔnŋ ki i Koŋ Danshuru ki i. 38Ji ki, niŋ i juniɲa ki i. Bilantu sɔbɛ ki i kirinpɔlila Masabi ki daŋ kiri. Ɲiŋ jɛ ki i shitaanni daŋ kiri. 39Ɲa wɔ̀ ɲiŋ jɛ ki ɲɛɛn-ɛ, niŋ i shitaanni yɛrima ki i. Bilaŋ tɛri waari ki i juniɲa nakɔ waari ki i. Bilaŋ tɛritɔnŋ kiri i ji Kirinŋ wɔ mɛlɛkɛn kiri.
40Miŋ tu konaŋ kiri i ɲiŋ jɛ ki cɛn-a, kí i ǹʼbilituru-ri ɲaan wɔ̀ tɛ, ŋì a na ji ninkunŋ juniɲa nakɔ waari ki ru. 41Koŋ Danshuru ki a na awɔ mɛlɛkɛn kiri cin, yìrì i na koŋ fɔnitɔnŋ kiri fa bi kulinŋ matɔnŋ kiri po san awɔ masabi ki ru konaŋ kiri ru, 42yìrì i kí kee kwulutuu ki ru. Kí a na yaalinpo, kí i arì ɲiinnaŋ nataa-ri niŋ mani nu. 43Nka koŋ telimaan kiri sarinŋ kiri a na cu-ri, miŋ tu sunŋ sarinŋ, arì Tiŋ Kirinŋ wɔ Masabi ki ru. A wulu lama tɔɔn ji nwɔ̀tiŋ gbɛ, ntiŋ wulu lama. »
Yesu wɔ wulusuntalinŋ ki nafulu ladumaan ki bi sun
44Yesu tu sɛbɛ : « Kirinpɔlila Masabi ki i miŋ tu nafulu ladumaan ji bɛɛ ru. Shuru bɛɛ i niŋ ja, ntiŋ i ǹʼnaduka shɔ sɛbɛ, ntiŋ ciirudimaan i ta a gbɛfɛfinŋ kiri bataa ju, ntiŋ i na niŋ ji ki sa. »
Yesu wɔ wulusuntalinŋ ki kuruɲɛ bi ki sun
45Yesu tu : « Kirinpɔlila Masabi ki fa jɔɔ tantɔnŋ po-i sɛbɛ, nwɔ̀ i kuruɲɛ shɔɔrinŋ ceeli-la. 46Ntiŋ i na kuruɲɛ shɔɔrinŋ kpaafuru bɛɛ ja jibi bɛɛ, ntiŋ i ta a gbɛfɛfinŋ kiri bataa ju, ntiŋ i ta niŋ kuruɲɛ ki sa. »
Yesu wɔ wulusuntalinŋ ki yɛrinŋ pa jɔ ki bi sun
47Yesu tu : « Kirinpɔlila Masabi ki fa yɛrinŋ pa jɔ po-i sɛbɛ, konaŋ kiri i ninwɔ̀ kee-ra baa ju ki ru, kí i yɛrinŋ kwuru ki bataa pa-ri. 48A jɔ ki faa waarinŋ wɔ̀ ru, yɛrinpatɔnŋ kiri i ǹʼcɛɛn po-a tankpiŋ ki ra. Kí i sɔɔ, kí i yɛrinŋ kiri rubi. Kí i yɛrinŋ shɔɔrinŋ kiri rubi bo-a arì gbɛ finŋ nu, kí i yɛrinŋ jɛ kiri kee. 49Ŋì a na ma ninkunŋ juniɲa nakɔ waaci ki ru. Mɛlɛkɛn kiri ra na koŋ jɛ kiri rubi po san koŋ telimaan kiri ru, 50koŋ jɛ kiri i bo kwulutuu ki ru. Kí a na yaalinpo, kí i arì ɲiinnaŋ nataa-ri niŋ mani nu. »
Nafulu ŋunaŋ ki bi ki fa nafulu bwuumaan ki bi ki
51Yesu i kí ranɔri tu : « Ábɛɛ bi kari bataa ɲaantɔ-i wa? »
Kí tu : « Aawe. »
52Ntiŋ tu kí tɛ : « Niŋ ɲaan ki tɛ, sariya kalimɔɔ finŋ woo finŋ kali-i kirinpɔlila Masabi ki bi sun, ntiŋ fa kanintiŋ po-i, nwɔ̀ i nafulu ŋunaŋ fa nafulu bwuumaan shi po-a awɔ nafulu bomaŋ ki ru. »
Nansarɛtitɔnŋ kiri kaan bi ki Yesu tɛ
(Maraka 6.1–6; Luki 4.16–30)
53Yesu kɔ-i awɔ wulusuntalinŋ kiri ra waarinŋ wɔ̀ ru, ntiŋ i po san niŋ mani nu. 54Ntiŋ i tiri a rakili kili ki ra, ntiŋ i ta konaŋ kiri kali-li Yawutu kiri wɔ kalinfu kiri ru. Ntiŋ wɔ kalinŋ ki botɔnsun i konaŋ kiri pa, fɔ kí i ǹʼbi-ri tu :
« Wú ka ɲakilitinbi ka kila da? Wú so-a ka botɔnsunbi kari bataa ma-i dɔɔkunŋ? 55Jirinŋ sɛritɔnŋ ki danshuru ki i ji-i kili wa? Mariyamu wú ɲiŋ ki i kì wa? Wú pwaŋ kiri Yakuba fa Yusufu fa Simɔŋ fa Yudasi kì wa? 56Wú narinmari kiri bataa yibɛɛ kanfɛ kwumaŋ kì wa? Wú dumiŋ i ka bataa kila da? »
57Niŋ ɲakilila ki ncusun kí i so bili-i Yesu ra kì.
Niŋ na, Yesu i ǹʼbi kí tɛ tu : « Cintɔnŋ ki fyɛbi kila-a mani tɔri ru kì, duu a ji kili ki fa awɔ kaninsuntɔnŋ kiri gbɛ. »
58Niŋ mani nu tɔnŋ kiri wɔ bilinabalibi ki bira, Yesu botɔnsunbi mwɔɔnna ma niŋ mani ki ru kì.
اکنون انتخاب شده:
Matiyu 13: JOB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
