ປະຖົມມະການ 33
33
ຢາໂຄບພົບເອຊາວ
1ຢາໂຄບໄດ້ເງີຍໜ້າຂຶ້ນ ແລະ ເຫັນເອຊາວ ເຊິ່ງກຳລັງມາພ້ອມກັບຄົນຂອງຕົນສີ່ຮ້ອຍຄົນ; ດັ່ງນັ້ນ ລາວຈຶ່ງໄດ້ແບ່ງບັນດາລູກຂອງນາງເລອາ, ນາງຣາເຊັນ ແລະ ຄົນຮັບໃຊ້ຍິງທັງສອງ. 2ລາວໄດ້ໃຫ້ຄົນຮັບໃຊ້ຍິງທັງສອງ ແລະ ບັນດາລູກຂອງພວກເຂົາຢູ່ທາງໜ້າ, ຕໍ່ມາແມ່ນນາງເລອາກັບບັນດາລູກຂອງນາງ ແລະ ນາງຣາເຊັນກັບໂຢເຊັບຢູ່ທ້າຍສຸດ. 3ສ່ວນລາວເອງໄດ້ຍ່າງອອກໜ້າໄປ ແລະ ຂະນະທີ່ລາວເຂົ້າໄປໃກ້ອ້າຍຂອງລາວນັ້ນ ລາວກໍໄດ້ກົ້ມລົງຄຳນັບຈົນເຖິງພື້ນເຈັດຄັ້ງ.
4ແຕ່ເອຊາວໄດ້ແລ່ນເຂົ້າມາຫາຢາໂຄບ ແລະ ໄດ້ກອດລາວ; ເອຊາວອ້າແຂນໂອບກອດຄໍຂອງລາວໄວ້ ແລະ ໄດ້ຈູບລາວ. ແລ້ວພວກເຂົາຕ່າງກໍຮ້ອງໄຫ້. 5ຫລັງຈາກນັ້ນ ເອຊາວກໍໄດ້ເງີຍໜ້າຂຶ້ນ ແລະ ໄດ້ເຫັນບັນດາແມ່ຍິງ ແລະ ບັນດາເດັກນ້ອຍ. ເອຊາວຈຶ່ງໄດ້ຖາມວ່າ, “ຄົນເຫລົ່ານີ້ທີ່ຢູ່ກັບເຈົ້າແມ່ນຜູ້ໃດ?”
ຢາໂຄບໄດ້ຕອບວ່າ, “ພວກເຂົາເປັນລູກທີ່ພຣະເຈົ້າໄດ້ເມດຕາມອບໃຫ້ຜູ້ຮັບໃຊ້ຂອງທ່ານ”.
6ຫລັງຈາກນັ້ນ ຄົນຮັບໃຊ້ຍິງທັງສອງ ແລະ ບັນດາລູກຂອງພວກເຂົາກໍໄດ້ຫຍັບເຂົ້າມາໃກ້ແລ້ວກໍໄດ້ກົ້ມລົງຄຳນັບ. 7ຕໍ່ມາ ເລອາ ແລະ ບັນດາລູກຂອງລາວກໍໄດ້ເຂົ້າມາ ແລະ ໄດ້ກົ້ມລົງຄຳນັບ. ທ້າຍສຸດແມ່ນໂຢເຊັບ ແລະ ນາງຣາເຊັນກໍໄດ້ເຂົ້າມາ ແລະ ພວກເຂົາກໍກົ້ມລົງຄຳນັບເໝືອນກັນ.
8ເອຊາວໄດ້ຖາມວ່າ, “ຝູງແບ້, ຝູງແກະ ແລະ ຝູງງົວທັງໝົດທີ່ເຮົາພົບນີ້ໝາຍຄວາມວ່າຢ່າງໃດ?”
ຢາໂຄບໄດ້ຕອບວ່າ, “ກໍເພື່ອຂໍຄວາມກະລຸນາຈາກທ່ານ, ນາຍຂອງຂ້ານ້ອຍເອີຍ”.
9ແຕ່ເອຊາວໄດ້ກ່າວວ່າ, “ນ້ອງເອີຍ, ເຮົາມີພຽງພໍຢູ່ແລ້ວ. ຈົ່ງເກັບສິ່ງທີ່ນ້ອງມີໄວ້ສຳລັບເຈົ້າເອງສາ”.
10ຢາໂຄບໄດ້ກ່າວວ່າ, “ຢ່າປະຕິເສດເລີຍ ຂໍກະລຸນາຮັບເອົາສາ!, ຖ້າທ່ານຈະກະລຸນາຂ້ານ້ອຍ, ກໍຂໍໃຫ້ຮັບເອົາຂອງຂັວນນີ້ຈາກຂ້ານ້ອຍ. ເພາະເຫັນໜ້າທ່ານກໍເໝືອນໄດ້ເຫັນໜ້າຂອງພຣະເຈົ້າ, ເວລານີ້ທ່ານໄດ້ຍອມຮັບຂ້ານ້ອຍດ້ວຍຄວາມກະລຸນາແລ້ວ. 11ຂໍໃຫ້ຮັບເອົາຂອງຂັວນທີ່ໄດ້ນຳມາໃຫ້ທ່ານ ເພາະວ່າພຣະເຈົ້າໄດ້ເມດຕາຂ້ານ້ອຍ ແລະ ຂ້ານ້ອຍກໍມີທຸກສິ່ງທີ່ຕ້ອງການ” ແລະ ເພາະຢາໂຄບໄດ້ຢືນຢັນຢ່າງນັ້ນ, ເອຊາວຈຶ່ງໄດ້ຮັບເອົາຂອງຂັວນນັ້ນ.
12ແລ້ວເອຊາວໄດ້ເວົ້າວ່າ, “ໃຫ້ພວກເຮົາອອກເດີນທາງ; ເຮົາກໍຈະໄປກັບເຈົ້າເໝືອນກັນ”.
13ແຕ່ຢາໂຄບໄດ້ເວົ້າກັບລາວວ່າ, “ນາຍຂອງຂ້ານ້ອຍກໍຮູ້ວ່າບັນດາລູກທັງຫລາຍຍັງນ້ອຍຢູ່ ແລະ ຂ້ານ້ອຍຍັງຕ້ອງເບິ່ງແຍງຝູງແກະແມ່ ແລະ ງົວແມ່ທີ່ໃຫ້ນົມລູກຂອງຕົນຢູ່. ຖ້າພວກມັນຖືກໄລ່ຕ້ອນໜັກໃນມື້ດຽວ ສັດທັງໝົດນີ້ກໍຈະຕາຍ. 14ດັ່ງນັ້ນ ຂໍໃຫ້ນາຍຂອງຂ້ານ້ອຍລ່ວງໜ້າໄປກ່ອນຄົນຮັບໃຊ້ຂອງທ່ານ, ສ່ວນຂ້ານ້ອຍກໍຈະຄ່ອຍໆເດີນທາງໄປຕາມກຳລັງຂອງຝູງແບ້, ຝູງແກະ ແລະ ຝູງງົວທີ່ອອກໄປກ່ອນຂ້ານ້ອຍ ແລະ ຕາມໄລຍະຫ່າງຂອງບັນດາລູກນ້ອຍທັງຫລາຍ ຈົນກວ່າຂ້ານ້ອຍຈະມາເຖິງນາຍຂອງຂ້ານ້ອຍທີ່ເສອີ”.
15ເອຊາວໄດ້ເວົ້າວ່າ, “ຖ້າຢ່າງນັ້ນໃຫ້ເຮົາປະຄົນຂອງເຮົາບາງຄົນໄວ້ກັບເຈົ້າ”.
ຢາໂຄບໄດ້ຖາມວ່າ, “ແຕ່ເປັນຫຍັງທ່ານຕ້ອງເຮັດຢ່າງນັ້ນ? ຂໍພຽງແຕ່ທ່ານໄດ້ກະລຸນາຂ້ານ້ອຍກໍພໍແລ້ວນາຍຂອງຂ້ານ້ອຍເອີຍ”.
16ດັ່ງນັ້ນ ໃນມື້ນັ້ນເອງ ເອຊາວກໍໄດ້ເລີ່ມອອກເດີນທາງກັບໄປທີ່ເສອີ. 17ເຖິງຢ່າງໃດກໍຕາມ, ຢາໂຄບກໍໄດ້ເດີນທາງໄປທີ່ຊຸກໂກດ, ບ່ອນທີ່ລາວໄດ້ສ້າງທີ່ພັກສຳລັບຕົນເອງ ແລະ ໄດ້ເຮັດທີ່ພັກສຳລັບສັດລ້ຽງຂອງຕົນ. ດ້ວຍເຫດນັ້ນ ສະຖານທີ່ນັ້ນຈຶ່ງມີຊື່ວ່າຊຸກໂກດ.#33:17 ແປວ່າ ຕູບ ຫລື ທີ່ພັກ
18ຫລັງຈາກທີ່ຢາໂຄບໄດ້ມາຈາກປັດດານອາຣາມ#33:18 ນັ້ນຄື ຢູ່ທາງທິດຕາເວັນຕົກສຽງເໜືອຂອງເມໂຊໂປຕາເມຍແລ້ວ, ລາວກໍໄດ້ມາເຖິງເມືອງຊີເຄມໃນການາອານຢ່າງປອດໄພ ແລະ ໄດ້ຕັ້ງຄ້າຍພັກຢູ່ໃກ້ເມືອງນັ້ນ. 19ລາວໄດ້ຊື້ທີ່ດິນບ່ອນທີ່ລາວໄດ້ຕັ້ງເຕັນຈາກບັນດາລູກຊາຍຂອງຮາໂມ, ພໍ່ຂອງຊີເຄມໃນລາຄາໜຶ່ງຮ້ອຍຫລຽນເງິນ.#33:19 ຫລຽນເກຊີຕາເປັນຫົວໜ່ວຍຂອງເງິນຕາທີ່ບໍ່ຮູ້ນ້ຳໜັກ ຫລື ມູນຄ່າ 20ຢູ່ທີ່ນັ້ນລາວໄດ້ຕັ້ງແທ່ນບູຊາຂຶ້ນ ແລະ ໄດ້ເອີ້ນວ່າເອນເອໂລເຮອິດສະຣາເອນ.#33:20 ເອນເອໂລເຮອິດສະຣາເອນສາມາດແປວ່າ ເອນ ຄືພຣະເຈົ້າຂອງອິດສະຣາເອນ ຫລື ຜູ້ມີລິດອຳນາດຍິ່ງໃຫຍ່ຄືພຣະເຈົ້າຂອງອິດສະຣາເອນ
اکنون انتخاب شده:
ປະຖົມມະການ 33: LCV
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.