ປະຖົມມະການ 22
22
ອັບຣາຮາມຖືກທົດສອບ
1ຕໍ່ມາພຣະເຈົ້າໄດ້ທົດສອບອັບຣາຮາມ. ພຣະອົງກ່າວກັບເພິ່ນວ່າ, “ອັບຣາຮາມເອີຍ!”
ເພິ່ນຕອບວ່າ, “ຂ້ານ້ອຍຢູ່ທີ່ນີ້”.
2ແລ້ວພຣະເຈົ້າໄດ້ກ່າວວ່າ, “ຈົ່ງພາລູກຊາຍຂອງເຈົ້າ, ລູກຊາຍພຽງຄົນດຽວຂອງເຈົ້າ ຜູ້ທີ່ເຈົ້າຮັກ ຄືອີຊາກ ແລ້ວໄປຍັງເຂດໂມຣິຢາ. ຈົ່ງຖວາຍລາວຢູ່ທີ່ນັ້ນເພື່ອເປັນເຄື່ອງເຜົາບູຊາເທິງພູເຂົາແຫ່ງໜຶ່ງທີ່ເຮົາຈະສະແດງແກ່ເຈົ້າ”.
3ຕອນເຊົ້າໆວັນຕໍ່ມາ ອັບຣາຮາມລຸກຂຶ້ນ ແລະ ມັດອານລໍຂອງເພິ່ນ. ເພິ່ນໄດ້ພາຄົນຮັບໃຊ້ຂອງເພິ່ນສອງຄົນ ແລະ ອີຊາກລູກຊາຍຂອງເພິ່ນໄປນຳ. ເມື່ອເພິ່ນໄດ້ຕັດຟືນພໍສຳລັບເຜົາເຄື່ອງບູຊາແລ້ວ, ເພິ່ນຈຶ່ງມຸ່ງໜ້າໄປບ່ອນທີ່ພຣະເຈົ້າໄດ້ບອກເພິ່ນໄວ້. 4ໃນວັນທີສາມ ອັບຣາຮາມເງີຍໜ້າຂຶ້ນ ແລະ ເຫັນສະຖານທີ່ນັ້ນແຕ່ໄກ. 5ເພິ່ນເວົ້າກັບຄົນຮັບໃຊ້ວ່າ, “ຈົ່ງຢູ່ບ່ອນນີ້ພ້ອມກັບລໍຂະນະທີ່ເຮົາກັບເດັກນ້ອຍຄົນນີ້ໄປທີ່ນັ້ນ. ພວກເຮົາຈະໄປນະມັດສະການພຣະເຈົ້າ ແລ້ວພວກເຮົາຈະກັບມາຫາພວກເຈົ້າ”.
6ອັບຣາຮາມຈຶ່ງເອົາຟືນສຳລັບເຜົາເຄື່ອງບູຊາ ແລະ ວາງໃສ່ບ່າອີຊາກລູກຊາຍຂອງເພິ່ນ ແລະ ເພິ່ນເອງຖືໄຟ ແລະ ມີດ. ຂະນະທີ່ທັງສອງກຳລັງຍ່າງໄປນຳກັນນັ້ນ, 7ອີຊາກໄດ້ເວົ້າກັບອັບຣາຮາມພໍ່ຂອງຕົນວ່າ, “ພໍ່ບໍ?”
ອັບຣາຮາມຕອບວ່າ, “ມີຫຍັງບໍລູກ?”
ອີຊາກຖາມວ່າ, “ໄຟ ແລະ ຟືນກໍມີຢູ່ບ່ອນນີ້ແລ້ວ, ແຕ່ລູກແກະສຳລັບເຜົາບູຊານັ້ນຢູ່ໃສ?”
8ອັບຣາຮາມຕອບວ່າ, “ລູກເອີຍ, ພຣະເຈົ້າຈະຈັດຕຽມລູກແກະສຳລັບເຜົາບູຊາໃຫ້ເອງ”. ແລະ ທັງສອງກໍຍ່າງຕໍ່ໄປດ້ວຍກັນ.
9ເມື່ອພວກເພິ່ນມາເຖິງສະຖານທີ່ ເຊິ່ງພຣະເຈົ້າບອກພວກເພິ່ນໄວ້. ອັບຣາຮາມກໍໄດ້ສ້າງແທ່ນບູຊາຂຶ້ນ ແລະ ຈັດຟືນໃສ່ເທິງແທ່ນນັ້ນ. ເພິ່ນມັດອີຊາກລູກຂອງເພິ່ນ ແລະ ວາງລາວລົງເທິງກອງຟືນທີ່ຢູ່ເທິງແທ່ນບູຊາ. 10ຈາກນັ້ນເພິ່ນກໍເດ່ມືອອກໄປຈັບເອົາມີດມາເພື່ອຈະຂ້າລູກຊາຍຂອງຕົນ. 11ແຕ່ເທວະດາຂອງພຣະເຈົ້າຢາເວໄດ້ເອີ້ນໃສ່ເພິ່ນຈາກສະຫວັນວ່າ, “ອັບຣາຮາມ! ອັບຣາຮາມ!”
ເພິ່ນຕອບວ່າ, “ຂ້ານ້ອຍຢູ່ທີ່ນີ້”.
12ເທວະດາກ່າວວ່າ, “ຢ່າເດ່ມືໃສ່ເດັກນ້ອຍນັ້ນ, ຢ່າເຮັດສິ່ງໃດແກ່ລາວເລີຍ. ບັດນີ້ເຮົາຮູ້ແລ້ວວ່າເຈົ້າຢຳເກງພຣະເຈົ້າ, ເພາະເຈົ້າບໍ່ໄດ້ຫວງແຫນລູກຊາຍຂອງເຈົ້າຈາກເຮົາ, ຄືລູກຊາຍພຽງຄົນດຽວຂອງເຈົ້າ”.
13ອັບຣາຮາມເງີຍໜ້າຂຶ້ນ ແລະ ຢູ່ທີ່ນັ້ນເພິ່ນໄດ້ເຫັນແກະເຖິກໂຕໜຶ່ງ#22:13 ສຳເນົາພາສາເຮັບເຣີດັ້ງເດີມສ່ວນໃຫຍ່ວ່າ ແກະເຖິກໂຕໜຶ່ງຂ້າງຫລັງພວກເຂົາ ເຊິ່ງເຂົາທັງສອງຂອງມັນເກາະຄາຢູ່ກັບພຸ່ມໄມ້. ເພິ່ນຈຶ່ງຍ່າງໄປຫາແລ້ວຈັບແກະນັ້ນມາຖວາຍເປັນເຄື່ອງເຜົາບູຊາແທນລູກຊາຍຂອງເພິ່ນ. 14ດັ່ງນັ້ນ ອັບຣາຮາມຈຶ່ງໄດ້ເອີ້ນສະຖານທີ່ນັ້ນວ່າ, “ພຣະເຈົ້າຢາເວຈະຈັດຕຽມໃຫ້”. ແລະ ຍັງເປັນທີ່ເວົ້າກັນຈົນເຖິງທຸກວັນນີ້ວ່າ, “ສິ່ງນັ້ນຈະຖືກຈັດຕຽມໄວ້ເທິງພູເຂົາຂອງພຣະເຈົ້າຢາເວ”.
15ແລ້ວເທວະດາຂອງພຣະເຈົ້າຢາເວເອີ້ນໃສ່ອັບຣາຮາມຈາກສະຫວັນເປັນຄັ້ງທີສອງ 16ແລະ ກ່າວວ່າ, “ພຣະເຈົ້າຢາເວປະກາດວ່າ, ເຮົາຂໍປະຕິຍານໂດຍເຮົາເອງວ່າ, ເພາະເຈົ້າໄດ້ເຮັດເຊັ່ນນີ້ ແລະ ບໍ່ໄດ້ຫວງແຫນລູກຊາຍຂອງເຈົ້າ ຄືລູກຊາຍພຽງຄົນດຽວຂອງເຈົ້າ, 17ເຮົາຈະອວຍພອນເຈົ້າແນ່ນອນ ແລະ ຈະເຮັດໃຫ້ເຊື້ອສາຍຂອງເຈົ້າມີຈຳນວນຫລວງຫລາຍເໝືອນດັ່ງດວງດາວໃນທ້ອງຟ້າ ແລະ ເໝືອນດັ່ງເມັດຊາຍທີ່ຢູ່ແຄມທະເລ. ເຊື້ອສາຍຂອງເຈົ້າຈະຄອບຄອງເມືອງຕ່າງໆຂອງບັນດາສັດຕູຂອງພວກເຂົາ, 18ແລະ ທຸກຊົນຊາດເທິງແຜ່ນດິນໂລກຈະໄດ້ຮັບພອນຜ່ານທາງເຊື້ອສາຍ#22:18 ຫລື ເມັດພັນຂອງເຈົ້າ, ເພາະເຈົ້າໄດ້ເຊື່ອຟັງເຮົາ”.
19ແລ້ວອັບຣາຮາມກໍໄດ້ກັບມາຫາຄົນຮັບໃຊ້ຂອງເພິ່ນ ແລະ ພວກເພິ່ນກໍພາກັນເດີນທາງກັບໄປຍັງເບເອນເຊບາ. ແລະ ອັບຣາຮາມກໍໄດ້ອາໄສຢູ່ທີ່ເມືອງເບເອນເຊບານັ້ນ.
ບັນດາລູກຊາຍຂອງນາໂຮ
20ຕໍ່ມາມີຜູ້ມາບອກອັບຣາຮາມວ່າ, “ມີລະກາກໍໄດ້ເປັນແມ່ແລ້ວ; ນາງໄດ້ເກີດລູກຊາຍຫລາຍຄົນໃຫ້ແກ່ນາໂຮນ້ອງຊາຍຂອງທ່ານຄື:
21ອູເຊເປັນລູກຊາຍກົກ, ບູເຊເປັນນ້ອງຊາຍຂອງລາວ
ເກມູເອນ (ພໍ່ຂອງອາຣາມ),
22ເກເສັດ, ຮາໂຊ, ປິນດາດ, ຢິດລັບ ແລະ ເບທູເອນ”.
23ເບທູເອນເປັນພໍ່ຂອງນາງເຣເບກາ.
ມີລະກາໄດ້ເກີດລູກຊາຍແປດຄົນນີ້ແກ່ນາໂຮນ້ອງຊາຍຂອງອັບຣາຮາມ.
24ເມຍນ້ອຍຂອງເພິ່ນ ຜູ້ທີ່ຊື່ວ່າຣູມາ ກໍໄດ້ເກີດລູກຊາຍເໝືອນກັນຄື:
ເຕບາ, ກາຮາມ, ຕາຮັດ ແລະ ມາອາກາ.
اکنون انتخاب شده:
ປະຖົມມະການ 22: LCV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.