ປະຖົມມະການ 21
21
ການເກີດຂອງອີຊາກ
1ບັດນີ້ພຣະເຈົ້າຢາເວມີພຣະຄຸນຕໍ່ນາງຊາຣາ ດັ່ງທີ່ພຣະອົງໄດ້ກ່າວໄວ້ ແລະ ພຣະເຈົ້າຢາເວກໍໄດ້ກະທຳແກ່ນາງຊາຣາໃນສິ່ງທີ່ພຣະອົງໄດ້ສັນຍາໄວ້. 2ນາງຊາຣາກໍໄດ້ຖືພາ ແລະ ໄດ້ເກີດລູກຊາຍໃຫ້ອັບຣາຮາມເມື່ອເພິ່ນເຖົ້າແກ່ແລ້ວ, ເຊິ່ງກົງກັບເວລາທີ່ພຣະເຈົ້າໄດ້ສັນຍາໄວ້ກັບເພິ່ນ. 3ອັບຣາຮາມໄດ້ຕັ້ງຊື່ລູກຊາຍທີ່ນາງຊາຣາໄດ້ໃຫ້ກຳເນີດນັ້ນວ່າອີຊາກ.#21:3 ມີຄວາມໝາຍວ່າ ເພິ່ນຫົວຂວັນ 4ເມື່ອອີຊາກລູກຊາຍຂອງເພິ່ນມີອາຍຸໄດ້ແປດວັນແລ້ວ, ອັບຣາຮາມກໍໃຫ້ລາວຮັບພິທີຕັດຕາມທີ່ພຣະເຈົ້າໄດ້ສັ່ງເພິ່ນໄວ້. 5ເມື່ອອີຊາກລູກຊາຍຂອງເພິ່ນເກີດມານັ້ນ ອັບຣາຮາມມີອາຍຸໄດ້ໜຶ່ງຮ້ອຍປີ.
6ນາງຊາຣາກ່າວວ່າ, “ພຣະເຈົ້າເຮັດໃຫ້ຂ້ອຍຫົວຂວັນ ແລະ ທຸກຄົນທີ່ໄດ້ຍິນເລື່ອງນີ້ກໍຈະຫົວຂວັນຮ່ວມກັບຂ້ອຍດ້ວຍ”. 7ແລະ ນາງໄດ້ເວົ້າຕື່ມວ່າ, “ຜູ້ໃດຈະເວົ້າກັບອັບຣາຮາມວ່ານາງຊາຣາຍັງຈະໄດ້ລ້ຽງລູກຢູ່? ແຕ່ຂ້ອຍໄດ້ເກີດລູກຊາຍໃຫ້ເພິ່ນເມື່ອເພິ່ນເຖົ້າແກ່ແລ້ວ”.
ນາງຮາກາ ແລະ ອິດຊະມາເອນຖືກສົ່ງໜີໄປ
8ເດັກນັ້ນກໍເຕີບໃຫຍ່ຂຶ້ນ ແລະ ອອກນົມແລ້ວ ແລະ ໃນວັນທີ່ອີຊາກອອກນົມນັ້ນ ອັບຣາຮາມກໍໄດ້ຈັດງານລ້ຽງໃຫຍ່ຂຶ້ນ. 9ແຕ່ຊາຣາເຫັນວ່າລູກຊາຍຂອງນາງຮາກາຊາວເອຢິບທີ່ເກີດໃຫ້ແກ່ອັບຣາຮາມກຳລັງເຢາະເຢີ້ຍຢູ່, 10ແລະ ນາງຈຶ່ງເວົ້າກັບອັບຣາຮາມວ່າ, “ຈົ່ງໄລ່ຍິງຂ້າທາດຄົນນີ້ກັບລູກຂອງນາງ, ເພາະລູກຂອງຍິງຄົນນີ້ຈະບໍ່ມີວັນໄດ້ຮັບສ່ວນແບ່ງໃນມໍລະດົກກັບອີຊາກລູກຊາຍຂອງນ້ອງ”.
11ເລື່ອງນີ້ເຮັດໃຫ້ອັບຣາຮາມທຸກໃຈຫລາຍເພາະກ່ຽວຂ້ອງກັບລູກຊາຍຂອງເພິ່ນ. 12ແຕ່ພຣະເຈົ້າກ່າວກັບເພິ່ນວ່າ, “ຢ່າທຸກໃຈເລື່ອງເດັກຄົນນັ້ນ ແລະ ຍິງຂ້າທາດຂອງເຈົ້າເລີຍ. ຈົ່ງເຮັດຕາມສິ່ງທີ່ນາງຊາຣາບອກເຈົ້າ, ເພາະເຊື້ອສາຍ#21:12 ຫລື ເມັດພັນຂອງເຈົ້າຈະນັບທາງອີຊາກ. 13ເຮົາຈະເຮັດໃຫ້ລູກຊາຍຂອງຂ້າທາດກາຍເປັນຊົນຊາດໜຶ່ງເໝືອນກັນ, ເພາະວ່າລາວກໍເປັນເຊື້ອສາຍຂອງເຈົ້າ”.
14ແຕ່ເຊົ້າໆຂອງວັນຕໍ່ມາອັບຣາຮາມກໍເອົາອາຫານຈຳນວນໜຶ່ງ ແລະ ນ້ຳໜຶ່ງຖົງໜັງແລ້ວມອບໃຫ້ແກ່ຮາກາ. ເພິ່ນໄດ້ຈັດສິ່ງເຫລົ່ານັ້ນໃສ່ບ່າຂອງນາງ ແລ້ວສົ່ງນາງອອກໄປພ້ອມກັບລູກຊາຍນັ້ນ. ນາງກໍໄປຕາມທາງຂອງນາງ ແລະ ໄດ້ພະເນຈອນເຂົ້າໄປໃນຖິ່ນແຫ້ງແລ້ງເບເອນເຊບາ.
15ເມື່ອນ້ຳໃນຖົງໜັງໝົດແລ້ວ, ນາງຈຶ່ງປະລູກຊາຍໄວ້ກ້ອງພຸ່ມໄມ້ຟຸ່ມໜຶ່ງ. 16ແລ້ວຍ່າງໜີແລ້ວໄປນັ່ງຢູ່ຫ່າງອອກໄປປະມານໄລຍະຍິງລູກທະນູຕົກ, ເພາະນາງຄິດວ່າ, “ຂ້ອຍບໍ່ສາມາດທົນເບິ່ງລູກຊາຍຕາຍໄປ”. ແລະ ຂະນະທີ່ນາງນັ່ງຢູ່ທີ່ນັ້ນ, ນາງ#21:16 ສະບັບເຊັບຕູອາຈິນວ່າ ເດັກຄົນນັ້ນກໍເລີ່ມຮ້ອງໄຫ້ສຽງດັງ.
17ພຣະເຈົ້າໄດ້ຍິນສຽງຮ້ອງຂອງເດັກຊາຍນັ້ນ, ແລ້ວເທວະດາຂອງພຣະເຈົ້າໄດ້ເອີ້ນນາງຮາກາຈາກສະຫວັນ ແລະ ກ່າວກັບນາງວ່າ, “ຮາກາ, ມີເລື່ອງຫຍັງບໍ? ຢ່າຢ້ານເລີຍ; ພຣະເຈົ້າໄດ້ຍິນສຽງຮ້ອງຂອງເດັກຊາຍໃນຂະນະທີ່ລາວນອນຢູ່ບ່ອນນັ້ນແລ້ວ. 18ຈົ່ງໄປຍົກລາວຂຶ້ນ ແລະ ຈູງມືລາວໄປ ເພາະເຮົາຈະເຮັດໃຫ້ລາວກາຍເປັນຊົນຊາດໃຫຍ່”.
19ແລ້ວພຣະເຈົ້າເປີດຕາຂອງນາງ ແລະ ນາງກໍເຫັນນ້ຳສ້າງແຫ່ງໜຶ່ງ. ດັ່ງນັ້ນນາງຈຶ່ງໄປຕັກນ້ຳໃສ່ເຕັມຖົງໜັງ ແລະ ເອົາໃຫ້ລູກຊາຍນັ້ນດື່ມ.
20ພຣະເຈົ້າສະຖິດກັບເດັກຊາຍຄົນນັ້ນເມື່ອລາວເຕີບໃຫຍ່ຂຶ້ນ. ລາວອາໄສຢູ່ໃນຖິ່ນແຫ້ງແລ້ງ ແລະ ກາຍເປັນນັກຍິງທະນູ. 21ໃນຂະນະທີ່ລາວອາໄສຢູ່ໃນທະເລຊາຍແຫ່ງປາຣານນັ້ນ ແມ່ຂອງລາວກໍໄດ້ຫາເມຍຈາກເອຢິບໃຫ້ລາວ.
ສົນທິສັນຍາທີ່ເບເອນເຊບາ
22ໃນເວລານັ້ນອາບີເມເຫລັກ ແລະ ແມ່ທັບຟີໂກນກ່າວຕໍ່ອັບຣາຮາມວ່າ, “ພຣະເຈົ້າຢູ່ກັບທ່ານໃນທຸກສິ່ງທີ່ທ່ານກະທຳ. 23ບັດນີ້ ຂໍໃຫ້ທ່ານປະຕິຍານກັບເຮົາທີ່ນີ້ຕໍ່ໜ້າພຣະເຈົ້າວ່າທ່ານຈະບໍ່ຫລອກລວງເຮົາ ຫລື ລູກຫລານຂອງເຮົາ ຫລື ເຊື້ອສາຍຂອງເຮົາ. ຈົ່ງສະແດງຄວາມເມດຕາຕໍ່ເຮົາ ແລະ ຕໍ່ບ້ານເມືອງບ່ອນທີ່ທ່ານມາອາໄສຢູ່ໃນເວລານີ້ໃນຖານະຄົນຕ່າງດ້າວເໝືອນກັນກັບທີ່ເຮົາໄດ້ສະແດງຕໍ່ທ່ານ”.
24ອັບຣາຮາມໄດ້ເວົ້າວ່າ, “ຂ້າພະເຈົ້າຂໍປະຕິຍານ”.
25ແລ້ວອັບຣາຮາມຈຶ່ງຮ້ອງທຸກຕໍ່ອາບີເມເຫລັກເລື່ອງນ້ຳສ້າງແຫ່ງໜຶ່ງທີ່ຄົນຮັບໃຊ້ຂອງອາບີເມເຫລັກໄດ້ຢຶດໄປ. 26ແຕ່ອາບີເມເຫລັກຕອບວ່າ, “ເຮົາບໍ່ຮູ້ວ່າຜູ້ໃດໄດ້ເຮັດເຊັ່ນນີ້. ທ່ານບໍ່ໄດ້ບອກເຮົາ ແລະ ເຮົາຫາກໍໄດ້ຍິນເລື່ອງນີ້ວັນນີ້ເທົ່ານັ້ນ”.
27ດັ່ງນັ້ນ ອັບຣາຮາມຈຶ່ງໄດ້ນຳເອົາຝູງແກະ ແລະ ງົວມາ ແລ້ວມອບສັດເຫລົ່ານັ້ນໃຫ້ແກ່ອາບີເມເຫລັກ, ແລ້ວຊາຍທັງສອງກໍໄດ້ເຮັດເຮັດສົນທິສັນຍາກັນ. 28ອັບຣາຮາມແຍກເອົາລູກແກະໂຕແມ່ເຈັດໂຕອອກຈາກຝູງ, 29ແລະ ອາບີເມເຫລັກກໍໄດ້ຖາມອັບຣາຮາມວ່າ, “ລູກແກະໂຕແມ່ເຈັດໂຕທີ່ທ່ານແຍກອອກມາຈາກຝູງນີ້ມີຄວາມໝາຍຢ່າງໃດ?”
30ເພິ່ນຕອບວ່າ, “ຂໍຈົ່ງຮັບລູກແກະເຈັດໂຕນີ້ຈາກມືຂ້າພະເຈົ້າເພື່ອເປັນພະຍານວ່າຂ້າພະເຈົ້າເປັນຜູ້ຂຸດນ້ຳສ້າງນີ້”.
31ດັ່ງນັ້ນ ບ່ອນນັ້ນຈຶ່ງໄດ້ໃສ່ຊື່ວ່າເບເອນເຊບາ,#21:31 ມີຄວາມໝາຍວ່າ ນ້ຳສ້າງແຫ່ງທີເຈັດ ຫລື ນໍ້າສ້າງແຫ່ງຄຳສາບານ ເພາະຊາຍທັງສອງໄດ້ປະຕິຍານຄຳສາບານຢູ່ທີ່ນັ້ນ.
32ຫລັງຈາກເຮັດສົນທິສັນຍາທີ່ເບເອນເຊບາແລ້ວ, ອາບີເມເຫລັກ ແລະ ແມ່ທັບຟີໂກນກໍກັບຄືນສູ່ດິນແດນຟີລິດສະຕີນ. 33ອັບຣາຮາມໄດ້ປູກຕົ້ນສົນໝອກຕົ້ນໜຶ່ງໃນເບເອນເຊບາ ແລະ ນະມັດສະການຮ້ອງອອກນາມພຣະເຈົ້າຢາເວ, ພຣະເຈົ້າອົງນິລັນດອນ. 34ແລະ ອັບຣາຮາມກໍອາໄສຢູ່ໃນດິນແດນຂອງຊາວຟີລິດສະຕີນເປັນເວລາດົນນານ.
اکنون انتخاب شده:
ປະຖົມມະການ 21: LCV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.