ເອເຊກຽນ 36
36
ຄຳທຳນວາຍສຳລັບພູເຂົາທັງຫລາຍຂອງອິດສະຣາເອນ
1“ບຸດມະນຸດ, ຈົ່ງທຳນວາຍແກ່ພູເຂົາທັງຫລາຍຂອງອິດສະຣາເອນວ່າ, ‘ບັນດາພູເຂົາຂອງອິດສະຣາເອນ, ຈົ່ງຟັງຖ້ອຍຄຳຂອງພຣະເຈົ້າຢາເວ. 2ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ສັດຕູໄດ້ເວົ້າເຖິງເຈົ້າວ່າ, “ນັ້ນເດ! ທີ່ສູງບູຮານທັງຫລາຍກໍຕົກເປັນກຳມະສິດຂອງພວກເຮົາແລ້ວ” ’. 3ເຫດສະນັ້ນ ຈົ່ງທຳນວາຍ ແລະ ກ່າວວ່າ, ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເນື່ອງຈາກພວກເຂົາໄດ້ທຳລາຍ ແລະ ຕາມລ່າເຈົ້າຈາກທຸກດ້ານຈົນເຈົ້າຕົກເປັນກຳມະສິດຂອງປະຊາຊາດທັງຫລາຍ ແລະ ເປັນເປົ້າຂອງການນິນທາ ແລະ ໃສ່ຮ້າຍປ້າຍສີຂອງຄົນທັງຫລາຍ, 4ເຫດສະນັ້ນ ບັນດາພູເຂົາຂອງອິດສະຣາເອນ ຈົ່ງຟັງຖ້ອຍຄຳຂອງພຣະເຈົ້າຢາເວ ອົງເຈົ້ານາຍ, ພຣະເຈົ້າຢາເວ ອົງເຈົ້ານາຍກ່າວແກ່ພູເຂົາ ແລະ ໂນນພູທັງຫລາຍ, ລຳຫ້ວຍ ແລະ ຮ່ອມພູທັງຫລາຍ, ແກ່ຊາກຫັກພັງ ແລະ ບັນດາຫົວເມືອງອັນຮ້າງເປົ່າທີ່ຖືກປຸ້ນຈີ້ ແລະ ຖືກຫຍໍ້ຫຍັນໂດຍຊາດຕ່າງໆ ທີ່ຢູ່ອ້ອມເຈົ້າ 5ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເຮົາໄດ້ກ່າວປະນາມຊົນຊາດທັງຫລາຍ ແລະ ເອໂດມທັງໝົດດ້ວຍຄວາມໂກດຮ້າຍອັນຮ້ອນແຮງຂອງເຮົາ ເພາະພວກເຂົາໄດ້ຢຶດເອົາດິນແດນຂອງເຮົາເປັນກຳມະສິດດ້ວຍຄວາມຍິນດີ ແລະ ການປອງຮ້າຍໃນໃຈຂອງພວກເຂົາ ແລະ ເພາະພວກເຂົາໄດ້ປຸ້ນເອົາທົ່ງຫຍ້າລ້ຽງສັດນັ້ນ’. 6ເຫດສະນັ້ນ ຈົ່ງທຳນວາຍກ່ຽວກັບດິນແດນອິດສະຣາເອນ ແລະ ກ່າວແກ່ພູເຂົາ ແລະ ໂນນພູທັງຫລາຍ, ລຳຫ້ວຍ ແລະ ຮ່ອມພູທັງຫລາຍວ່າ: ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເຮົາເວົ້າດ້ວຍຄວາມໂກດຮ້າຍອັນຫວງແຫນ ເພາະວ່າພວກເຈົ້າໄດ້ທົນຕໍ່ການດູໜິ່ນຈາກຊົນຊາດທັງຫລາຍ. 7ເຫດສະນັ້ນ ພຣະເຈົ້າຢາເວ ອົງເຈົ້ານາຍຈຶ່ງກ່າວດັ່ງນີ້ວ່າ: ເຮົາໄດ້ຍົກມືຂຶ້ນປະຕິຍານວ່າບັນດາຊົນຊາດທັງຫລາຍທີ່ຢູ່ອ້ອມເຈົ້າກໍຈະທົນຮັບການດູໜິ່ນເໝືອນກັນ.
8“ ‘ສ່ວນເຈົ້າ, ບັນດາພູເຂົາຂອງອິດສະຣາເອນ, ເຈົ້າຈະແຕກງ່າ ແລະ ອອກຜົນເພື່ອອິດສະຣາເອນປະຊາຊົນຂອງເຮົາ ເພາະບໍ່ດົນພວກເຂົາກໍຈະໄດ້ກັບຄືນສູ່ຖິ່ນຖານ. 9ເຮົາເປັນຫວ່ງເຈົ້າ ແລະ ຈະເຝົ້າເບິ່ງເຈົ້າດ້ວຍຄວາມກະລຸນາ; ເຈົ້າຈະໄດ້ຮັບການໄຖຄາດ ແລະ ຫວ່ານພືດ, 10ແລະ ເຮົາຈະເພີ່ມທະວີຈຳນວນປະຊາຊົນໃຫ້ອາໄສຢູ່ເທິງເຈົ້າ ຄືຊົນຊາດອິດສະຣາເອນທັງໝົດ. ເມືອງຕ່າງໆຈະມີຄົນອາໄສຢູ່ ແລະ ຊາກຫັກພັງຈະໄດ້ຮັບການສ້າງຂຶ້ນໃໝ່. 11ເຮົາຈະເພີ່ມທະວີຈຳນວນຄົນ ແລະ ສັດທີ່ອາໄສຢູ່ເທິງເຈົ້າ ແລະ ພວກເຂົາຈະມີລູກເຕັມບ້ານມີຫລານເຕັມເມືອງ ແລະ ກັບມີຈຳນວນຫລວງຫລາຍ. ເຮົາຈະໃຫ້ຄົນທັງຫລາຍມາຕັ້ງຖິ່ນຖານຢູ່ເໝືອນໃນອະດີດ ແລະ ຈະເຮັດໃຫ້ເຈົ້າຮຸ່ງເຮືອງກວ່າແຕ່ກ່ອນ. ແລ້ວເຈົ້າກໍຈະຮູ້ວ່າເຮົາຄືພຣະເຈົ້າຢາເວ. 12ເຮົາຈະໃຫ້ຊົນຊາດອິດສະຣາເອນປະຊາຊົນຂອງເຮົາອາໄສຢູ່ເທິງເຈົ້າ. ພວກເຂົາຈະຄອບຄອງເຈົ້າ ແລະ ເຈົ້າຈະເປັນກຳມະສິດຂອງພວກເຂົາ ລູກຫລານຂອງພວກເຂົາຈະບໍ່ຖືກພາກໄປຈາກເຈົ້າອີກເລີຍ.
13“ ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເນື່ອງຈາກຄົນທັງຫລາຍເວົ້າກັບເຈົ້າວ່າ, “ເຈົ້າກືນຊີວິດຂອງຄົນທັງຫລາຍ ແລະ ພາກລູກຫລານໄປຈາກຊົນຊາດຂອງເຈົ້າ”, 14ເຫດສະນັ້ນ ເຈົ້າຈະບໍ່ກືນຊີວິດຂອງຄົນທັງຫລາຍ ຫລື ເຮັດໃຫ້ຊົນຊາດຂອງເຈົ້າບໍ່ມີລູກຫລານ, ພຣະເຈົ້າຢາເວ ອົງເຈົ້ານາຍປະກາດດັ່ງນັ້ນ. 15ເຮົາຈະບໍ່ໃຫ້ເຈົ້າໄດ້ຍິນຄຳເຢາະເຍີ້ຍຂອງຊົນຊາດທັງຫລາຍອີກ ແລະ ເຈົ້າຈະບໍ່ຕ້ອງທົນຕໍ່ການດູໜິ່ນຂອງຊົນຊາດທັງຫລາຍອີກ ແລະ ເຮົາຈະບໍ່ໃຫ້ຊົນຊາດຂອງເຈົ້າຫລົ້ມຈົມອີກ, ພຣະເຈົ້າຢາເວ ອົງເຈົ້ານາຍປະກາດດັ່ງນັ້ນ’ ”.
ການຮັບປະກັນການຟື້ນຟູຂອງອິດສະຣາເອນ
16ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າອີກຄັ້ງໜຶ່ງວ່າ: 17“ບຸດມະນຸດ, ເມື່ອປະຊາຊົນອິດສະຣາເອນໄດ້ອາໄສຢູ່ໃນດິນແດນຂອງຕົນ, ພວກເຂົາກໍເຮັດໃຫ້ແຜ່ນດິນເປັນມົນທິນໂດຍຄວາມປະພຶດ ແລະ ການກະທຳຂອງພວກເຂົາ. ຄວາມປະພຶດຂອງພວກເຂົາເປັນເໝືອນມົນທິນຂອງປະຈຳເດືອນຂອງແມ່ຍິງໃນສາຍຕາຂອງເຮົາ. 18ດັ່ງນັ້ນ ເຮົາຈຶ່ງໄດ້ຖອກຄວາມໂກດຮ້າຍຂອງເຮົາລົງເທິງພວກເຂົາ ເພາະພວກເຂົາໄດ້ເຮັດໃຫ້ເກີດການນອງເລືອດໃນດິນແດນນັ້ນ ແລະ ເຮັດໃຫ້ແຜ່ນດິນເປັນມົນທິນດ້ວຍຮູບເຄົາລົບທັງຫລາຍຂອງພວກເຂົາ. 19ເຮົາໄດ້ເຮັດໃຫ້ພວກເຂົາກະຈັດກະຈາຍໄປຕາມຊົນຊາດຕ່າງໆ ແລະ ໄປຍັງປະເທດທັງຫລາຍ; ເຮົາໄດ້ພິພາກສາລົງໂທດພວກເຂົາຕາມຄວາມປະພຶດ ແລະ ການກະທຳຂອງພວກເຂົາ. 20ແລະ ບ່ອນໃດກໍຕາມທີ່ພວກເຂົາໄປໃນທ່າມກາງປະຊາຊາດຕ່າງໆ ພວກເຂົາກໍເຮັດໃຫ້ນາມອັນສັກສິດຂອງເຮົາເສື່ອມເສຍ ເພາະຄົນທັງຫລາຍໄດ້ເວົ້າເຖິງພວກເຂົາວ່າ, ‘ຄົນເຫລົ່ານີ້ເປັນປະຊາຊົນຂອງພຣະເຈົ້າຢາເວ ແລະ ເຖິງປານນັ້ນພວກເຂົາກໍຍັງຕ້ອງຈາກແຜ່ນດິນຂອງຕົນມາ’. 21ເຮົາເປັນຫ່ວງນາມອັນສັກສິດຂອງເຮົາ ເຊິ່ງເຊື້ອສາຍອິດສະຣາເອນໄດ້ເຮັດໃຫ້ເສື່ອມເສຍທ່າມກາງຊົນຊາດຕ່າງໆທີ່ພວກເຂົາໄປຢູ່.
22“ເຫດສະນັ້ນ ຈົ່ງກ່າວແກ່ຊົນຊາດອິດສະຣາເອນວ່າ, ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ຊົນຊາດອິດສະຣາເອນ, ທີ່ເຮົາຈະເຮັດສິ່ງເຫລົ່ານີ້ນັ້ນ ບໍ່ແມ່ນເພາະເຫັນແກ່ເຈົ້າ ແຕ່ເພາະເຫັນແກ່ນາມອັນສັກສິດຂອງເຮົາ, ເຊິ່ງເຈົ້າໄດ້ເຮັດໃຫ້ເສື່ອມເສຍທ່າມກາງຊົນຊາດຕ່າງໆທີ່ເຈົ້າໄປຢູ່. 23ເຮົາຈະສະແດງຄວາມສັກສິດຂອງນາມອັນຍິ່ງໃຫຍ່ຂອງເຮົາ, ເຊິ່ງຕ້ອງເສື່ອມເສຍທ່າມກາງຊົນຊາດທັງຫລາຍ ນາມທີ່ເຈົ້າເຮັດໃຫ້ໝົ່ນໝອງທ່າມກາງພວກເຂົາ. ແລ້ວຊົນຊາດທັງຫລາຍກໍຈະຮູ້ວ່າເຮົາຄືພຣະເຈົ້າຢາເວ, ເມື່ອເຮົາສະແດງຄວາມບໍລິສຸດຂອງເຮົາຜ່ານທາງເຈົ້າຕໍ່ໜ້າພວກເຂົາ, ພຣະເຈົ້າຢາເວ ອົງເຈົ້ານາຍປະກາດດັ່ງນັ້ນ.
24“ ‘ເພາະເຮົາຈະພາເຈົ້າອອກຈາກຊາດທັງຫລາຍ ເຮົາຈະຮວບຮວມເຈົ້າຈາກທຸກປະເທດ ແລະ ນຳເຈົ້າກັບສູ່ດິນແດນຂອງເຈົ້າ. 25ເຮົາຈະຊິດນ້ຳຊຳລະລົງເທິງເຈົ້າ ແລ້ວເຈົ້າກໍຈະສະອາດ; ເຮົາຈະຊຳລະລ້າງເຈົ້າຈາກມົນທິນເປື້ອນເປິທັງໝົດຂອງເຈົ້າ ແລະ ຈາກຮູບເຄົາລົບທັງໝົດຂອງເຈົ້າ. 26ເຮົາຈະໃຫ້ຫົວໃຈໃໝ່ແກ່ເຈົ້າ ແລະ ໃສ່ວິນຍານໃໝ່ໃນເຈົ້າ; ເຮົາຈະກຳຈັດຫົວໃຈຫີນອອກຈາກເຈົ້າ ແລະ ໃຫ້ເຈົ້າຫົວໃຈຊີ້ນແກ່ເຈົ້າ. 27ແລະ ເຮົາຈະໃສ່ວິນຍານຂອງເຮົາໄວ້ໃນເຈົ້າ ແລະ ໂນ້ມນຳເຈົ້າໃຫ້ປະຕິບັດຕາມດຳລັດຂອງເຮົາ ແລະ ເອົາໃຈໃສ່ຮັກສາກົດບັນຍັດຂອງເຮົາ. 28ເຈົ້າຈະດຳເນີນຊີວິດຢູ່ໃນດິນແດນທີ່ເຮົາໄດ້ມອບໃຫ້ບັນພະບຸລຸດຂອງເຈົ້າ; ເຈົ້າຈະເປັນປະຊາຊົນຂອງເຮົາ ແລະ ເຮົາຈະເປັນພຣະເຈົ້າຂອງເຈົ້າ. 29ເຮົາຈະຊ່ວຍເຈົ້າໃຫ້ພົ້ນຈາກມົນທິນທັງໝົດ ເຮົາຈະລະດົມເມັດເຂົ້າ ແລະ ເຮັດໃຫ້ມັນອຸດົມສົມບູນ ແລະ ຈະບໍ່ນຳການອຶດຢາກອາຫານມາຍັງເຈົ້າ. 30ເຮົາຈະເພີ່ມທະວີຜົນຂອງຕົ້ນໄມ້ ແລະ ຜົນເກັບກ່ຽວທັງຫລາຍຈາກທົ່ງນາ ເພື່ອເຈົ້າຈະບໍ່ຕ້ອງທົນອັບອາຍໃນທ່າມກາງປະຊາຊາດເພາະການອຶດຢາກອາຫານອີກຕໍ່ໄປ. 31ແລ້ວເຈົ້າກໍຈະສຳນຶກໃນວິຖີທາງອັນຊົ່ວຮ້າຍ ແລະ ການກະທຳອັນຊົ່ວຮ້າຍຂອງຕົນ ແລະ ເຈົ້າຈະກຽດຊັງຕົນເອງເພາະບາບ ແລະ ການກະທຳອັນໜ້າກຽດຊັງທັງຫລາຍຂອງຕົນ. 32ເຮົາຢາກໃຫ້ເຈົ້າຮູ້ວ່າ ເຮົາເຮັດການນີ້ບໍ່ແມ່ນເພາະເຫັນແກ່ເຈົ້າ, ພຣະເຈົ້າຢາເວ ອົງເຈົ້ານາຍປະກາດດັ່ງນີ້. ຊາວອິດອິດສະຣາເອນ, ຈົ່ງລະອາຍໃຈ ແລະ ອັບອາຍໃນຄວາມປະພຶດຂອງເຈົ້າ!
33“ ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ໃນວັນທີ່ເຮົາຊຳລະເຈົ້າອອກຈາກບາບທັງໝົດຂອງເຈົ້າ, ເຮົາຈະເຮັດໃຫ້ເມືອງຂອງເຈົ້າມີຄົນອາໄສຢູ່ ແລະ ຊາກຫັກພັງຕ່າງໆຈະໄດ້ຮັບການສ້າງຂຶ້ນໃໝ່. 34ດິນແດນອັນຮົກຮ້າງຈະໄດ້ຮັບການປູກຝັງ ແທນທີ່ຈະຖືກຖິ້ມຮົກຮ້າງທ່າມກາງທຸກຄົນທີ່ຜ່ານໄປມາ. 35ຄົນທັງຫລາຍຈະເວົ້າວ່າ, “ດິນແດນແຫ່ງນີ້ທີ່ຖືກຖິ້ມຮົກຮ້າງໄດ້ກາຍເປັນເໝືອນສວນເອເດນ; ເມືອງຕ່າງໆທີ່ເປັນຊາກຫັກພັງ, ຖືກຖິ້ມຮົກຮ້າງ ແລະ ຖືກທຳລາຍ, ບັດນີ້ໄດ້ມີປ້ອມປ້ອງກັນທີ່ເຂັ້ມແຂງ ແລະ ມີຄົນອາໄສຢູ່”. 36ແລ້ວຊົນຊາດທັງຫລາຍທີ່ຍັງເຫລືອຢູ່ອ້ອມເຈົ້າກໍຈະຮູ້ວ່າເຮົາຜູ້ເປັນພຣະເຈົ້າຢາເວໄດ້ສ້າງສິ່ງທີ່ຖືກທຳລາຍແລ້ວຂຶ້ນມາໃໝ່ ແລະ ໄດ້ປູກພືດພັນໃນດິນແດນທີ່ຖືກຖິ້ມຮົກຮ້າງອີກຄັ້ງໜຶ່ງ. ເຮົາຜູ້ເປັນພຣະເຈົ້າຢາເວໄດ້ເວົ້າໄວ້ ແລະ ເຮົາກໍຈະເຮັດຕາມນັ້ນ’.
37“ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເຮົາຈະຍອມຕາມຄຳອ້ອນວອນຂອງຊົນຊາດອິດສະຣາເອນອີກຄັ້ງໜຶ່ງ ແລະ ເຮົາຈະເຮັດສິ່ງນີ້ເພື່ອພວກເຂົາຄື: ເຮົາຈະເຮັດໃຫ້ປະຊາຊົນຂອງພວກເຂົາມີຈຳນວນຫລວງຫລາຍເໝືອນຝູງແກະ, 38ມີຈຳນວນຫລວງຫລາຍເໝືອນຝູງສັດສຳລັບຖວາຍບູຊາທີ່ເຢຣູຊາເລັມໃນຊ່ວງເທດສະການຕ່າງໆຕາມກຳນົດ. ດັ່ງນັ້ນ ເມືອງທີ່ຫັກພັງທັງຫລາຍກໍຈະກັບມີຝູງຊົນໜາແໜ້ນ. ແລ້ວພວກເຂົາກໍຈະຮູ້ວ່າເຮົາຄືພຣະເຈົ້າຢາເວ”.
اکنون انتخاب شده:
ເອເຊກຽນ 36: LCV
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.