Aba Vatowo 23
23
Sera ina kámasa tetelina
1E Sera ana tala 127 bogina ibabane, 2Asa Ariba Kenani sinaena goi ikaaiyaka ikámasa. (Aribayana youyuwoina moe Ebironi.) Tuwo Eberamo ina Sera ina yoyou goi itáiya tauyana manuna. 3Itáiya ikavava, mana nuwomou inuwonúwana kana,
‘Nako goi bei avaliwoge?’
Inuwonúwana geya, tuwo itáoya ina Eta tubunao ilatuwokoidi idigo kana,
4‘Yau tomalatonikasa yaimi goi akaaiyaka,#Iberiu 11:9,13. tauna geya guna poyapoyamo. E geya itoboineguta bei guna tomata avaliwoge. Tuwo akawanoi yaimi bego valiwoga tukubu agimone bei tomatayana avaliwoge.’#Guinuwa 7:16.
5Go kidi Eta tubunao sidigo kadi,
6‘Tomoya, kunovēma. Kom tomoya toolagaim yaima goi. Ava valiwoga tukubu dedevina toina, e moeko goi im tomata kuvaliwoge. Madabokima bogina katagona. Geya vatau tayaamo bei ivagagalakoim o isanabodem im tomata kuvaliwoge.’
7Tuwo Eberamoyana itáoya, Eta tubunaoyadi matadi goi ivatugúyala ikanakabobo 8go, idigo kana,
‘Neta moitamo imi nuwonúwana bego ameko goi guna tomata avaliwoge, e konovēgu. Sokara natuna Epironi yaina goi kokawanōi manugu 9bei ina tukubu Makipela goi itagone agimone. Tukubuyana ikaaiyaka Epironi ina poyapoya dadava tayamo goi. E amoko goi guna tomata avaliwoge. Tauyana kolatuwōko latuwogu agimone go, neta aivina ana maisa, madabokina komi matami goi bei aemaisi.’
10E kina go Epironiyana ina bodao nauyayanaidi iitusobu asa ana kaba siu goi moe idi kaba tugúguna. Tuwo senao liliudi matadi goi itáoya, Eberamoyana ilatuwoko idigo kana,
11‘Guna tomoya, moe nakae geya. Kunovēgu. Poyapoyayana be nakae tukubuyana guna bodao matadi goi avinim. Kūna im tomata kuvaliwōge.’
12Eberamo itáoya go, aiyuwoina ivatuguyalamna ikanakabobo tomotayadi matadi goi 13idigo kana,
‘Moe dedevina go, kunovēgu. Neta kutagona, e poyapoyayana madabokina ana maisa toina goi aemaisi. Am mani kwābi go, ana amoko goi guna tomata avaliwoge.’
14Go kina Epironiyana idigo kana,
15‘Guna tomoya, kunovēgu. Poyapoyayana ana maisa siriba ana badabada 400 go, moe dogoi besobeso yaida ae? Poyapoyayana avinim. Tuwo kūna im tomata kuvaliwōge.’
16Eberamo poyapoya ana maisa inove, idigo kana,
‘Nakae dedevina. Atagona; bei aemaisi.’
Tuwo Eta tubunao matadi goi ina mani ikatuyaivi nakae Epironi idige. Ikatuyaivi ikavava, ivini.
17-19Tuwo Eta tubunao matadi goi poyapoyayana, tukubuyana be nakae alovaidi adi lovina isaidámana ina Eberamo yaina. Poyapoyayana ikaaiyaka Makipela goi. Moe asayana Mamre go, bomatu dadavina goi ikaaiyaka. Mamreyana Ebironi asaina Kenani sinaena. E niga go Eberamo ina Makipela goi tukubuyana sinaena Sera ivaliwoge. 20Tauna nakae Eta tubunao poyapoyayana be nakae tukubuyana adi lovina Eberamo ikabi aba valiwoga manuna.
اکنون انتخاب شده:
Aba Vatowo 23: GVS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2019, Wycliffe Bible Translators, Inc. All rights reserved.