Lawa a wúlu-bɔlen 8
8
Aarɔn laanka a nɛgiĩn koa
1Dɛnaa Lawa boo da ka Muizu ni á pɛ nɛ: 2Aarɔn laanka a nɛgiĩn bíi. Lawa a wúlu-bɔlen mɔnaan kɛn, ka ǹ bɔ a koa ǹ nyɔɔ kɛ nɛ, a pɛ minin manɛ, ǹ bɛn goa, ǹ da ǹ nɛ. Dii gɔ̀lɔ̀ ke sii baraa sawaa ǹ *wúlu màn lɛa, ka sère gɔ̀lɔ̀ màn paa kɛ nɛ, ǹ da ka bɛn dɔn nɛ. Kankaan ke buuru ná a nɛ, yɔ bù ná a ba li wa, ǹ da ka bɛ dɔ nɛ. 3Bɛ kio, n zaman lɛ tumaa bíi n da ǹ nɛ kɔn yɛ ǹ kion lɛ a kiɛnlɛ-a.
4Dɛnaa Lawa pɛ Muizu-n lɔn, Muizu zɛnaa miɛ̃. Zaman lɛ daa n lɛ sɔkɔn kɔn yɛ ǹ kion lɛ a kiɛnlɛ-a. 5Dɛnaa Lawa dí mɛn pɛ Muizu ni, Muizu bɛ yɔrɔ pɛ zaman lɛ nɛ. 6Bɛ kio, Muizu lɛ dia Aarɔn laanka a nɛgiĩn la, á landa a zoo kɛ wɔ ǹ ganaa. 7Dɔnkɛ sonbore ke nyaǹ ná a ganaa, á bɛ wɔ Aarɔn ganaa, á ná a binbin yii ǹ màn kɛ da la. Bɛ kio, á dɔnkɛ sasa kɛ wɔ a ganaa, á dí nya ǹ mɔnaa kɛ da la, á bɛ lɛ gɔnɔn kũ á ǹ yii a dɔ̀ɔ̃ nɛ. 8Bɛ kio, á tìãbii zéwo kɛ lɔɔ a ganaa, á Lawa dùũ dɔ̃ ǹ mànan kɛn kaa bɛ nɛ. 9Á mìi yii ǹ mɔnaa gɔn kɛ yii a mìi-a, sana ke da buũ a kɔnboe lɛa, á bɛ da mɔnaa gɔn kɛ ganaa a nyanlɛ-a. Bɛ n nyɛɛ mà ǹ nə́ Aarɔn bɔ ǹ nə́ koa Dɛnaa Lawa wɔ lɛa, ka Dɛnaa Lawa bɛ́ á goã á pɛ Muizu-n lɔn.
10Bɛ kio, Muizu bɔ a koa ǹ nyɔɔ lɛ saa. Á ǹ kɔn kaa kɔn yɛ ǹ kion kɛ laanka a gɔ́ɔ̃gɔ́ɔ̃ ǹ mànan ganaa, á ǹ baa Lawa wɔn lɛa. 11Á nyɔɔ lɛ pɛpɛsɛ̃ *wúlu bɔ ǹ bǎã kɛ laanka a mànan tumaa ganaa gunyin sɔbaa, á pɛpɛsɛ̃ *gɔ̀ bɔmaa ǹ doo kaaraa kɛ dɔ laanka a giala da ǹ bǎã ganaa, á ǹ baa Lawa wɔn lɛa. 12Á bɛa nyɔɔ lɛ kɔn kaa Aarɔn mìi ni, á bɔ á koa Lawa wɔ lɛa.
13Bɛ kio, Muizu Aarɔn a nɛgiĩn bíi ǹ nə́ daa. Dɔnkɛ sonboren kɛn nyàn nə́ ǹ ganaa, á bɛn wɔ ǹ-a, á bii yii ǹ màn da ǹ la, á Lawa a wúlu-bɔlen bafolon kɛn wɔ ǹ gogoonmaa mìi-a, ka Dɛnaa Lawa goã á pɛ Muizu-n lɔn.
14Bɛ kio, ǹ bɛ́ re dii gɔ̀lɔ̀ mɛn biɛ sii baraa sawaa ǹ wúlu màn lɛa, Muizu pɛ, mà ǹ bɛ baã ǹ da nɛ. Aarɔn laanka a nɛgiĩn lɛn nə́ n gɔn dada bɛa dii gɔ̀lɔ̀ lɛ mìi ni.
15Muizu tɔ́n na a bɔlɔ kuru, a ná a mà si. Á n gòon sã bɛa mà lɛ li, karan mɛnɛn tumaa bɛ́ wúlu bɔ ǹ bǎã lɛ gùrùn ganaa, á lɔ bɛn ganaa, a wúlu bɔ ǹ bǎã lɛ baa Lawa wɔ lɛa. Á mà lɛ a gialakun kaa tán wúlu bɔ ǹ bǎã lɛ genli màn mɛn bɛ́ toɛ a Lawa wɔ baa, ǹ boo la, ǹ sii baraa sawaa ǹ wúlu bɔ la. 16Nyɔɔ mɛn tumaa bɛ́ pɛnɛɛ-n tɔɔ lɛ nàn ganaa, Muizu bɛ waa. Á ná a foo lɛwɔn kɛ bɔ, ka a dɔ̀ɔ̃ koron màn paa kɛ laanka nyɔɔ mɛn bɛ́ doa-n bɛn ganaa, á ǹ tumaa tã wúlu bɔ ǹ bǎã lɛ lalan. 17Dii gɔ̀lɔ̀ lɛ a paǹ gialakun ke, a ki ni, a siĩ ni, ka a nàn nɛ, ǹ nə́ bɛ tumaa tã ǹ giã ǹ bǎã kɛ kio, ka Dɛnaa Lawa goã á pɛ Muizu-n lɔn.
18Bɛ kio, ǹ bɛ́ re sère gɔ̀lɔ̀ mɛn biɛ wúlu màn tiɛ̃ lɛa, Muizu pɛ mà ǹ bɛ baã ǹ da nɛ. Aarɔn laanka a nɛgiĩn nə́ n gɔn dada sère gɔ̀lɔ̀ lɛ mìi ni, 19Muizu tɔ́n na a bɔlɔ kuru, a ná a mà pɛpɛsɛ̃ wúlu bɔ ǹ bǎã lɛ ganaa, á ná a lɛnpɛnɛ nɛ. 20Bɛ kio, Muizu sère gɔ̀lɔ̀ lɛ kakã a gù lɛ yii li. A mìi ni, a gùn lɛn nɛ, ka a nyɔɔ nɛ, á bɛn tã. 21Muizu tɔɔ lɛ a nàn laanka a kèrèn pii, á ná a tumaa tã wúlu bɔ ǹ bǎã kɛ lalan. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa, á n tã a wɔ lɛa, ka a din bɛ́ á goã á pɛ Muizu-n lɔn.
22Bɛ kio, á pɛ ǹ nɛ, mà ǹ da ka sère gɔ̀lɔ̀ paabaa ǹ wɔ kɛ nɛ, min koa wúlu-bɔle lɛa ǹ wɔ lɛa. Aarɔn laanka a nɛgiĩn nə́ n gɔn dada bɛa sère gɔ̀lɔ̀ lɛ mìi ni. 23Muizu tɔ́n tɔɔ lɛ bɔlɔ kuru, a ná a mà si á lɔ Aarɔn too lɛwɔn ganaa, á ǹ kɔn lɔ a gusin a gɔn a gòon mìi gole ganaa, á ǹ kɔn lɔ a gusin a gòã a gòon mìi gole ganaa. 24Bɛ kio, Muizu Aarɔn a nɛgiĩn bíi á daa ǹ nɛ. Á mà lɛ kɔn lɔ ǹ dɔn gusin a too lɛwɔnɔn ganaa, á ǹ kɔn lɔ ǹ gusin a gɔn a gòon mìi golen ganaa, á ǹ kɔn lɔ ǹ gusin a gòã a gòon mìi golen ganaa. Bɛ kio kəni, á mà lɛ a gialakun kɛ pɛpɛsɛ̃ wúlu bɔ ǹ bǎã lɛ ganaa, a ná a lɛnpɛnɛ nɛ. 25Tɔɔ lɛ a paǹan mɛnɛn bɛ́ nyɔɔ lɛa, Muizu bɛn goa: a muigoã nɛ, nyɔɔ mɛn tumaa bɛ́ a gɔ́ɔ̃ nɛ, a foo lɛwɔn nɛ, a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, ka a gusin a nyàa nɛ. 26Yɔ bùbaã buuru kaa ǹ kankaan mɛn bɛ́ koa-n Dɛnaa Lawa yɔrɔ-a, á buuru kɔn bɔ walan: ǹ mɛn bɛ́ yɔ bù ná a ba li wa, ǹ mɛn dɔ bɛ́ ǹ nə́ zɛnaa ka nyɔɔ nɛ, ka mɔ̀mɔ kɔn nɛ, á ǹ kaa tɔɔ lɛ a nyɔɔ bǎãn laanka a gusin a nyàa lɛ lalan. 27Á ná a tumaa kaa Aarɔn laanka a nɛgiĩn lɛn gɔn tisi bii, á pɛ ǹ nɛ: Ka a kɔ Lawa la ǹ sii zɛnaa Dɛnaa Lawa yɔrɔ-a. 28Muizu wusoo á bɛa mànan lɛn si ǹ la, á ǹ tã wúlu bɔ ǹ bǎã kɛ nɛ, kun ka wúlu màn tiɛ̃ kɛ nɛ. Min koa wúlu-bɔle lɛa ǹ wúlu màn nɛ, á n tã Dɛnaa Lawa wɔ lɛa, a tɛmaa gìĩ n kɔɔ̃nɛ a ganaa. 29Muizu tɔɔ lɛ a tìãbii saa, a ná a kɔ Lawa la ǹ sii zɛnaa Dɛnaa Lawa yɔrɔ-a. Min bɔ a koa wúlu-bɔle lɛa ǹ sère lɛ tìãbii n Muizu wɔ gii lɛa, ka Dɛnaa Lawa bɛ́ á goã á pɛ Muizu-n lɔn.
30Bɛ kio, Muizu bɔ a koa ǹ nyɔɔ kɛ laanka mà kɔn saa màn nɛ, wúlu bɔ ǹ bǎã kɛ lalan. A ǹ pɛpɛsɛ̃ Aarɔn laanka a mɔnaan ganaa, á ǹ pɛpɛsɛ̃ a nɛgiĩn lɛn dɔn laanka ǹ mɔnaan ganaa. A na á zɛnaa miɛ̃ á Aarɔn laanka a mɔnaan baa Lawa wɔn lɛa, á ná a nɛgiĩn lɛn dɔn laanka ǹ mɔnaan baa Lawa wɔn lɛa.
31Muizu tɔ́n pɛ Aarɔn laanka a nɛgiĩn lɛn manɛ: Ka sère gɔ̀lɔ̀ paabaa ǹ wɔ lɛ a siĩ kɔrɛ kɔn yɛ ǹ kion kɛ a kiɛnlɛ-a. Ka ǹ sɔ̃ walan kun ka buuru kɛ nɛ, ka ǹ kaa kankaan nɛ, min koa wúlu-bɔle lɛa lɛ taman yii. N din Aarɔn laanka n nɛgiĩn ni, ka dininsɔɔ̃nɔn doamaa nɛ, ka bɛa siĩ lɛ sɔ̃. Ma pɛ ka-n lɔn, ka zɛnaa miɛ̃. 32Siĩ lɛ a mɛn laanka buuru lɛ a mɛn bɛ́ á goã, ka bɛ tã. 33Ka giã kɔn yɛ ǹ kion lɛ a kiɛnlɛ-a lɛawaa sɔbaa gɔ́ɔ̃ nɛ, ka n ka a woe bǎã-n wa, yǎa koa wúlu-bɔle lɛa ǹ landa lɛ a nya pinaa. A giala, ka koa wúlu-bɔle lɛa ǹ landa lɛ a dí nə n nyɛɛ yǎa lɛawaa sɔbaa. 34Wɔ zɛnaa lɔn pelo ke lɛn, Dɛnaa Lawa na á pɛ mà a n zɛnaa miɛ̃, màn mɛn bɛ́ toɛ, a kaa sii baraan toa ka nɛ. 35Ka giã kɔn yɛ ǹ kion lɛ a kiɛnlɛ-a, baayɛlɛ laanka tèlò ne, yǎa lɛawaa sɔbaa. Dɛnaa Lawa dí mɛn kɔ ka la, ka bɛ nya, màn mɛn bɛ́ toɛ, a baran ka dɛ wa. Dɛnaa Lawa dí mɛn pɛ ma nɛ, a din ni ka kɛ nɛ.
36Dɛnaa Lawa dí mɛn tumaa pɛ Muizu ni, mà a pɛ Aarɔn laanka a nɛgiĩn lɛn manɛ, Aarɔn laanka a nɛgiĩn lɛn ná a tumaa nya, ka Muizu bɛ́ á pɛ ǹ nɛ lɔn.
اکنون انتخاب شده:
Lawa a wúlu-bɔlen 8: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.