Lawa a wúlu-bɔlen 4
4
Sii baraa sawaa ǹ wúlu màn
Wúlu-bɔlen kiã a sii baraa sawaa ǹ wúlu màn
1Dɛnaa Lawa boo da ka Muizu ni á pɛ nɛ: 2A pɛ Izirayeli minin lɛn manɛ: Dɛnaa Lawa a gɔn waa ǹ boon bɛ́ pii mà ka baran sii mɛn tumaa zɛnaa wa, ta min na á sã á bɛa goon dinsɔɔ̃ zɛnaa, ǹ dɛnaa na á sii baraa zɛnaa. Bɛa yɔrɔ bɔ ǹ gɔn nə́ ke:
3Min mɛn bɛ́, ǹ nə́ bɔ ǹ nə́ koa wúlu-bɔlen kiã lɛa, bɛ̀ bɛ́ sii baraa zɛnaa, a na á zɛ̀rɛ saa á zaman lɛ tumaa gɔ nɛ. A sii baraa mɛn zɛnaa, a doamaa nɛ a dii gɔ̀lɔ̀ bɔ, wɔ̀lɔ̀ ná a ba a ganaa wa, a kɔ Dɛnaa Lawa la sii baraa lɛ a sawaa ǹ *wúlu màn lɛa. 4A wo ka dii gɔ̀lɔ̀ lɛ-n kɔn yɛ ǹ kion kɛa kiɛnlɛ-a bɔrɔ, Dɛnaa Lawa yɔrɔ-a. A n gɔn da dii gɔ̀lɔ̀ lɛ mìi ni, a tɔn na a bɔlɔ kuru walan Dɛnaa Lawa yɔrɔ-a. 5Bɛ kio, ǹ wúlu-bɔle mɛn lɛ bɔ ǹ nə́ koa, bɛ dii gɔ̀lɔ̀ mà lɛ kɔn si, a wo ne kɔn yɛ ǹ kion lɛ nɛ. 6A n gòon sã bɛa mà lɛ li, kion bii kuru kɔn-a ǹ mɔnaa kɛa paǹ mɛn bɛ́ dia-n kanaa la, bǎã sonbore kɛ nɛ, a pɛsɛ̃ bɛ ganaa gunyin sɔbaa Dɛnaa Lawa yɔrɔ-a.
7Da yon gìĩ kɔɔ̃n tã ǹ bǎã mɛn dɔ bɛ́ kɔn yɛ ǹ kion kɛ nɛ, Dɛnaa Lawa yɔrɔ-a, a mà lɛ kɔn lɔ bɛ dɔ a karan ganaa. Dii mà lɛ a gialakun kɛ tumaa, a wo bɛ kaa tán wúlu màn tã ǹ bǎã kɛ genli, ǹ mɛn lɛ bɛ́ kɔn yɛ ka Lawa nɛ ǹ kion lɛ a kiɛnlɛ-a. 8A dii gɔ̀lɔ̀ mɛn dɛ a sii baraa lɛ taman yii, a na a gɔ́ɔ̃gɔ́ɔ̃ ǹ nyɔɔ tumaa waa, ǹ mɛn tumaa bɛ́ pɛnɛɛ nɛ a nàn ganaa, 9a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn nɛ, nyɔɔ mɛn dɔ bɛ́ a kolon li, ka a foo lɛwɔn nɛ, ka bɛ bɔ kun ka a dɔ̀ɔ̃ koronən lɛn nɛ. 10Bɛ̀ ǹ nə́ dii gɔ̀lɔ̀ baa barka da Lawa nɛ ǹ wúlu màn lɛa, ǹ bɛ́ màn mɛn tumaa boe bɛ nɛ, wúlu-bɔlen kiã lɛ bɛ lɛ miã bɔ a sii baraa sawaa ǹ wúlu màn lɛ dɔ nɛ, a tã *wúlu bɔ ǹ bǎã kɛ nɛ. 11-12Bɛ kio, dii gɔ̀lɔ̀ lɛ a siĩ mɛn tumaa goã, a ki ni, a mìi ni, a gòãn nɛ, a nàn laanka a gɔ́ɔ̃gɔ́ɔ̃ ǹ mànan nɛ, a wo ka bɛn nɛ bǎã *yoreen kɛ nɛ, giã ǹ bǎã lɛ kio, ǹ bɛ́ wúlu bɔ ǹ bǎã lɛ a ton kiɛ bǎã mɛn nɛ. Ǹ nə ǹ zũ gɔn tɛ nɛ walan. Ǹ doamaa nɛ, ǹ nə ǹ tã bɛa bǎã lɛ nɛ.
Zaman a sii baraa sawaa ǹ wúlu màn
13Bɛ̀ Izirayeli zaman lɛ tumaa na á sã á sii baraa zɛnaa, Dɛnaa Lawa a gɔn waa ǹ boon bɛ́ pii mà ǹ baran sii mɛn tumaa zɛnaa wa, bɛ̀ ǹ nə́ bɛa goon dinsɔɔ̃ zɛnaa, haalɛ ta ǹ dɔ̃ wa, ǹ zɛ̀rɛ nɛ. 14Bɛ̀ zaman lɛ daa á bɔ a siére-a, mà asɛ na á sii baraa zɛnaa, ǹ dii gɔ̀lɔ̀ goon bɔ sii baraa sawaa ǹ wúlu màn lɛa. Ǹ wo ka dii gɔ̀lɔ̀ lɛ nɛ kɔn yɛ ǹ kion kɛ yɔrɔ-a, 15zaman lɛ a min golen nə ǹ gɔn dada a mìi-n walan, min goon tɔn na a bɔlɔ kuru Dɛnaa Lawa yɔrɔ-a. 16Bɛ kio, ǹ wúlu-bɔle mɛn lɛ bɔ ǹ nə́ koa, bɛ dii gɔ̀lɔ̀ mà lɛ kɔn bɔ, a wo ne kɔn yɛ ǹ kion lɛ nɛ. 17A n gòon sã bɛa mà lɛ li, Dɛnaa Lawa yɔrɔ-a, kion bii kuru kɔn-a ǹ mɔnaa kɛa paǹ mɛn bɛ́ dia-n kanaa la, a pɛsɛ̃ bɛ ganaa gunyin sɔbaa Dɛnaa Lawa yɔrɔ-a. 18Wúlu bɔ ǹ bǎã mɛn bɛ́ kɔn yɛ ǹ kion lɛ nɛ, Dɛnaa Lawa yɔrɔ-a, a mà lɛ kɔn lɔ bɛ dɔ a bìbìn ganaa. Dii mà lɛ a gialakun kɛ tumaa, a wo bɛ kaa tán wúlu bɔ ǹ bǎã lɛ genli, ǹ mɛn lɛ bɛ́ kɔn yɛ ka Lawa nɛ ǹ kion lɛ a kiɛnlɛ-a. 19A dii gɔ̀lɔ̀ lɛ a nyɔɔ tumaa waa, a tã wúlu bɔ ǹ bǎã kɛ lalan. 20A dii gɔ̀lɔ̀ mɛn dɛ a din a sii baraa taman yii, a bɛ́ á bɛ baa lɔn, a kɛ lɛ dɔ baa miɛ̃. Wúlu-bɔle lɛ doamaa nɛ, a ǹ sii baraa sawaa ǹ wúlu bɔ miɛ̃, Lawa á die ǹ sii baraan toɛ ǹ nɛ. 21Dii gɔ̀lɔ̀ lɛ a siĩ mɛn goã, a wo ka bɛ nɛ giã ǹ bǎã kɛ kio, a tã ka a bɛ́ á bibinaa wɔ lɛ tã lɔn. Zaman lɛ a sii baraa sawaa ǹ wúlu màn nə ka bɛ nɛ.
Goledɛnaa a sii baraa sawaa ǹ wúlu màn
22Bɛ̀ goledɛnaa na á sii baraa zɛnaa, Dɛnaa Lawa mɛn bɛ́ a Lawa lɛa, bɛa gɔn waa ǹ boon lɛn bɛ́ pii mà ǹ baran sii mɛn tumaa zɛnaa wa, ta a na á sã á bɛn goon dinsɔɔ̃ zɛnaa, a zɛ̀rɛ nɛ. 23A sii baraa mɛn zɛnaa, bɛ̀ min yɛ á pɛ nɛ, goledɛnaa lɛ doamaa nɛ a butumu bɔ, wɔ̀lɔ̀ ná a ba a ganaa wa. 24A n gɔn da butumu lɛ mìi ni, a tɔn na a bɔlɔ kuru wúlu màn tiɛ̃ kɛa tɔɔ dɛ ǹ bǎã nɛ, Dɛnaa Lawa yɔrɔ-a. Sii baraa sawaa ǹ wúlu màn nɛ. 25Wúlu-bɔle lɛ goon nə n gòon sã bɛa tɔɔ lɛ a mà li, á lɔ wúlu bɔ ǹ bǎã kɛ karan ganaa. Bɛ kio, a tɔn mà lɛ a gialakun kɛ kaa tán wúlu bɔ ǹ bǎã lɛ genli. 26Tɔɔ lɛ a nyɔɔ tumaa, a bɛ tã wúlu bɔ ǹ bǎã kɛ lalan, ka a bɛ́ á barka da Lawa nɛ ǹ wúlu màn lɛ wɔ baa lɔn. Wúlu-bɔle lɛ doamaa nɛ, a goledɛnaa lɛ a sii baraa sawaa ǹ wúlu bɔ miɛ̃, Lawa á die a sii baraa lɛ toɛ nɛ.
Gána min kɔsɔ a sii baraa sawaa ǹ wúlu màn
27 #
MNS 15.27-28. Bɛ̀ gána lɛ a min kɔsɔ mɛn na á sã á sii baraa zɛnaa, Dɛnaa Lawa a gɔn waa ǹ boon lɛn bɛ́ pii mà ǹ baran sii mɛn tumaa zɛnaa wa, bɛ̀ a na á sã á bɛn goon dinsɔɔ̃ zɛnaa, a zɛ̀rɛ nɛ. 28A sii baraa mɛn zɛnaa, bɛ̀ min yɛ á pɛ nɛ, a doamaa nɛ a bòe dan bɔ a sii baraa lɛ taman yii, sɛnɛ, wɔ̀lɔ̀ nyan goã a ganaa wa. 29A n gɔn da bɛa tɔɔ lɛ mìi ni, a tɔn na a bɔlɔ kuru wúlu màn tiɛ̃ kɛ a tɔɔn dɛ ǹ bǎã nɛ. 30Wúlu-bɔle lɛ goon nə n gòon sã a mà li, a lɔ wúlu bɔ ǹ bǎã lɛ karan ganaa. Bɛ kio, a tɔn mà lɛ a gialakun kɛ tumaa kaa tán wúlu bɔ ǹ bǎã lɛ genli. 31A tɔɔ lɛ a nyɔɔ tumaa waa, ka a bɛ́ á barka da Lawa nɛ ǹ wúlu màn lɛ wɔ waa lɔn. Wúlu-bɔle lɛ bɛ tã wúlu bɔ ǹ bǎã lɛ nɛ, wúlu màn lɛa, a tɛmaa gìĩ n kɔɔ̃n Dɛnaa Lawa ganaa. Wúlu-bɔle lɛ sii baraa zɛnaali lɛ a sii baraa sawaa ǹ wúlu bɔ miɛ̃, Lawa á die a sii baraa toɛ nɛ.
32Bɛ̀ ǹ dɛnaa n li a da ka sère ne, a sii baraa lɛ a sawaa ǹ wúlu màn lɛa, a doamaa nɛ a da ka sère dan nɛ, wɔ̀lɔ̀ ná a ba a ganaa wa. 33A n gɔn da bɛa tɔɔ lɛ mìi ni, a tɔn na a bɔlɔ kuru a sii baraa a lɛa, wúlu màn tiɛ̃ kɛ a tɔɔn dɛ ǹ bǎã nɛ. 34Wúlu-bɔle lɛ goon nə n gòon sã tɔɔ lɛ a mà li, a lɔ wúlu bɔ ǹ bǎã kɛ karan ganaa. Bɛ kio, a tɔn mà lɛ a gialakun kɛ tumaa kaa tán wúlu bɔ ǹ bǎã lɛ genli. 35Á tɔɔ lɛ a nyɔɔ tumaa waa, ka ǹ bɛ́ ǹ nə́ barka da Lawa nɛ ǹ sère nɛ lɛ wɔ waa lɔn. Wúlu-bɔle lɛ bɛ tã wúlu bɔ ǹ bǎã lɛ nɛ, kun ka Dɛnaa Lawa gɔ ǹ wɔ kɛ nɛ, bɛ̀ ǹ tã. Wúlu-bɔle lɛ doamaa nɛ a sii baraa zɛnaali a sii baraa sawaa ǹ wúlu bɔ miɛ̃, Lawa á die a sii baraa lɛ toɛ nɛ.
اکنون انتخاب شده:
Lawa a wúlu-bɔlen 4: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.