Lawa a wúlu-bɔlen 3
3
Barka da Lawa nɛ ǹ wúlu
1Bɛ̀ min tá die barka da Lawa nɛ ǹ wúlu boe, bɛ̀ tɔɔ golee ne, ta a sa nɛ, hinlaa ǹ dan nɛ, a da nɛ kɔn yɛ ka Dɛnaa Lawa nɛ ǹ kion kɛ yɔrɔ-a. Sɛnɛ, wɔ̀lɔ̀ doamaa bie a goã a ganaa wa. 2Ǹ dɛnaa nə n gɔn da bɛa tɔɔ lɛ mìi ni, a tɔn na a bɔlɔ kuru kɔn yɛ ka Lawa nɛ ǹ kion lɛ a kiɛnlɛ-a. Bɛa biikoo li, Aarɔn a nɛgiĩn wúlu-bɔlen kɛn na a mà si, ǹ pɛpɛsɛ̃ *wúlu bɔ ǹ bǎã lɛ wàãn tumaa ganaa. 3Ǹ bɛ́ re barka da Lawa nɛ ǹ *wúlu màn lɛ a paǹ mɛn tiɛ̃ Dɛnaa Lawa wɔ lɛa, bɛ n ka kɛ nɛ: a nyɔɔ mɛn tumaa bɛ́ pɛnɛɛ nɛ a nàn ganaa, 4a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, nyɔɔ mɛn dɔ bɛ́ a kolon li, ka a foo lɛwɔn nɛ, ǹ bɛ bɔ kun ka a dɔ̀ɔ̃ koronən lɛn nɛ. 5Wúlu-bɔlen lɛn nə bɛ tumaa tã wúlu bɔ ǹ bǎã lɛ a tɛ gɔn lɛ la, kun ka wúlu màn tiɛ̃ kɛ nɛ. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa.
6Bɛ̀ min tá die tɔɔ boɛɛn koe Dɛnaa Lawa la, barka da ǹ wúlu màn lɛa, ta a gɔ̀lɔ̀ nɛ hinlaa ǹ dan nɛ, wɔ̀lɔ̀ doamaa bie a goã a ganaa wa. 7Bɛ̀ sère ne á n die Lawa goe ne, a doamaa nɛ a da nɛ Dɛnaa Lawa yɔrɔ-a bɔrɔ. 8Ǹ dɛnaa nə n gɔn da bɛa tɔɔ lɛ mìi ni, a tɔn na a bɔlɔ kuru kɔn yɛ ka Dɛnaa Lawa nɛ ǹ kion lɛ a kiɛnlɛ-a. Bɛa biikoo li, Aarɔn a nɛgiĩ wúlu-bɔlen lɛn na a mà si, ǹ pɛpɛsɛ̃ wúlu bɔ ǹ bǎã lɛ wàãn tumaa ganaa. 9Barka da Lawa nɛ ǹ màn lɛ a paǹan mɛnɛn bɛ́ nyɔɔ lɛa, ǹ nə́ die tiɛ̃ Dɛnaa Lawa wɔ lɛa, bɛn man ka kɛn nɛ: a muigoã ke, bɛ̀ ǹ na, bɛ̀ ǹ bɔ kɔn ka a kii ni, bɛ tumaa, a nyɔɔ mɛn tumaa bɛ́ pɛnɛɛ nɛ a nàn ganaa, 10a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, nyɔɔ mɛn dɔ bɛ́ a kolon li, a foo lɛwɔn nɛ, a bɛ bɔ kun ka a dɔ̀ɔ̃ koronən lɛn nɛ. 11Wúlu-bɔle lɛ die a bɛ tumaa tã wúlu bɔ ǹ bǎã lɛ lalan, Dɛnaa Lawa wɔ lɛa.
12Bɛ̀ bòe ne min nə́ die Lawa goe ne, a doamaa nɛ a da nɛ Dɛnaa Lawa yɔrɔ-a bɔrɔ. 13Bɛ kio, a n gɔn da bòe lɛ mìi ni, a tɔn na a bɔlɔ kuru kɔn yɛ ka Lawa nɛ ǹ kion lɛ yɔrɔ-a. Bɛa biikoo li, wúlu-bɔlen lɛn min goon na a mà si, a pɛpɛsɛ̃ wúlu bɔ ǹ bǎã lɛ wàãn tumaa ganaa. 14Ǹ bɛ́ re ǹ mɛn tiɛ̃ ǹ Dɛnaa Lawa gɔ nɛ, bɛ n ka kɛ nɛ: a nyɔɔ mɛn tumaa bɛ́ pɛnɛɛ nɛ a nàn ganaa, 15a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, nyɔɔ mɛn dɔ bɛ́ a kolon li, ka a foo lɛwɔn nɛ, ǹ bɛ bɔ kun ka dɔ̀ɔ̃ koronən lɛn nɛ. 16Wúlu-bɔle lɛ die a bɛ tumaa tã wúlu bɔ ǹ bǎã lɛ lalan. Wúlu màn tiɛ̃ nɛ, a gìĩ n kɔɔ̃nɛ.
Màn nyɔɔ tumaa n doe Dɛnaa Lawa ganaa.
17Tɔɔ nyɔɔ tumaa laanka a mà tumaa, ǹ nyan toa ǹ bɛ kɔn wɔ ǹ lɛ-n wa. Bɛ n landa lɛa. Ta maǹ giã-n bǎã mɛn nɛ, ǹ doamaa nɛ ǹ bɛ tamaa biikoo tumaa li.
اکنون انتخاب شده:
Lawa a wúlu-bɔlen 3: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.