Siin Giala 48
48
Zakɔba barka mɛn da Zozɛfu a nɛnyaanan ganaa
1Bɛa siin lɛn kio, ǹ nə́ daa pɛ Zozɛfu ni, mà ǹ di lɛ a lon wa. Zozɛfu ná a nɛgiĩ min paa lɛ kũ, Manaasee laanka Efrayimu ni, ǹ nə́ woo kun. 2Ǹ bɛ́ ǹ nə́ pɛ Zakɔba nɛ, mà a nɛgiĩ Zozɛfu lɛ n die n yii koe a ganaa, á n doa á yoo, á giã a piì la. 3#SGK 28.13-14. Zakɔba tɔ́n pɛ Zozɛfu ni: – Lawa Pàãyiidɛnaa nə́ n din nyaa ma nɛ Luuzu kiwi, Kanaan gána nɛ, á barka da ma ganaa. 4Á pɛ ma-n kɛnɛn: «Ma á re n buluboe, ma n nɛnyaanan mɔnaa, ma n baa tɔrɔ gigiã lɛa. Ma á re gána kɛ lɛ koe n tɔrɔn la, a ǹ wɔ baa duuduu. 5Sisia, nɛgiĩ min paa ke, ǹ nə́ yɛ Ezipti gána nɛ, bɛ̀ masɛ bɛ́ ma tɔn da n li wa, ma din wɔn man ka bɛn nɛ. Efrayimu laanka Manaasee n die masɛ wɔn biɛ, ka Urubɛn laanka Simiɔn bɛ́ maa wɔn lɛa lɔn. 6Sɛnɛ, n bɛ́ re nɛnyaanan mɛnɛn yii bɛn kio, n din wɔn man ka bɛn nɛ. Ǹ tá re bɛn bíi, ǹ nə ǹ kíɛ̃ gii kɔ ǹ la, kun ka ǹ golon ne. 7#SGK 35.16-19. Ma bɛ́ boe Mezopotamii gána-n die ǹ mɛn waáraa, n dan Raseli gã ma ganaa zii la, Kanaan gána nɛ, bɛ̀ ma bɛ́ má diri Efrataa kiwi la foɛɛ̃nɛ. Má a gere bĩ Efrataa zii la walan.» A din Efrataa lɛ nɛ, ǹ tá bíi Bɛtlehɛmu pelo.
8Zakɔba bɛ́ á Zozɛfu a nɛnyaanan lɛn yɛ, á nɔ̀n da: «Dien man kɛn nɛ?»
9Zozɛfu nə́ ǹ di lɛ lɛ si: «Lawa nɛnyaanan mɛnɛn kɔ ma la, Ezipti gána-n kànaa, bɛn lɛn manɛ.»
Á tɔ́n pɛ Zozɛfu ni: «Ǹ kũ, n nə ǹ mɔrɔ ma ganaa, ma barka da ǹ ganaa.»
10Zakɔba zizi kɔ, a yii din ba boe la, á wɔlɔ yii doo wa. Zozɛfu bɛ́ á woo ka nɛnyaanan lɛn nɛ a li, á ǹ kũ á n sɔɔ ǹ nɛ. 11Bɛ kio, á pɛ Zozɛfu ni: «A na á goã ma gɔ́ɔ̃ nɛ, máa maa die n yii doo wa. Sɛnɛ, Lawa bɛ́ á toa ma n yɛ, má n nɛnyaanan dinin yɛ ma yii ni!»
12Zozɛfu nə́ ǹ kũ, á ǹ bɔ ǹ di lɛ gòã la, a din kaa tán a giulun. 13Bɛ kio, a ná a nɛgiĩ min paa lɛ kũ ǹ gɔn ganaa. Á Efrayimu kũ a gusin, bɛ goã Zakɔba gɔsɛ, á Manaasee kũ a gɔsɛ, bɛ goã Zakɔba gusin. Á ǹ kũ á ǹ mɔrɔ ǹ di gole lɛ ganaa. 14Zakɔba ná a gusin a gɔn saa, á da Efrayimu mìi ni, a din lɛ dɔ n kiɛɛrɛ, á n gɔsɛ a gɔn da ǹ gologiĩ Manaasee mìi ni. A na á n gɔnɔn lonlankɔ á zɛnaa miɛ̃, bɛ bie wa, Manaasee lɛ n gole. 15Á barka da Zozɛfu ganaa, á pɛ:
Ma di gole Abrahamu laanka ma di Izaaki tɔ wɔ Lawa yɔrɔ-a,
Lawa mɛn bɛ́ giɛ ma walan,
yǎa á daa á dɔ pelo ganaa,
16Lon a dia dí-a wole mɛn bɛ́,
á ma kirisibaa sii baraa tumaa ganaa,
a din die a barka da nɛgininin kɛn ganaa.
Lawa toa ma tɔ nə n bíi ka ǹsɛn lɛn barka nɛ,
ka ma di gole Abrahamu laanka ma di Izaaki wɔ bɛ́ n bíi lɔn.
Lawa die a n tɔrɔ mɔnaa gána lɛ nɛ.
17Zozɛfu bɛ́ á yɛ, mà ǹ di nə́ n gusin a gɔn da Efrayimu mìi ni, bɛ kɔɔ̃n kɔ a ganaa wa. Á n di lɛ gɔn kũ á bɔ Efrayimu mìi ni, mà a n diɛ Manaasee mìi ni. 18Á pɛ ǹ di lɛ-n kɛnɛn: «Díi, a bie miɛ̃ wa, a giala, kɛ lɛ n gole, n gusin a gɔn da bɛ lɛ mìi ni.»
19Sɛnɛ, ǹ di lɛ nə́ n piã, á pɛ nɛ: «Maa nɛgiĩ, ma á doɛ̃. Manaasee dɔ tɔrɔn tá re mɔnɛɛ, a tɔ á re gole koe. Sɛnɛ, ǹ diɛ̃ lɛ tɔ á re gole koe, a la a wɔ nɛ, a tɔrɔn dɔn tá re mɔnɛɛ, ǹ la a wɔn manɛ.»
20 #
EBR 11.21. Bɛa pinaa lɛ nɛ, á barka da ǹ ganaa, bɛ̀ á pii:
– Izirayeli nɛnyaanan tá re lɛn bǐɛ̃ bíi kɔn li, ka ǹ dinin lɛn tɔ nɛ, bɛ̀ ǹ pɛ kɛnɛn: «Lawa die a n dɔ n lɛ, ka a bɛ́ á n dɔ Efrayimu laanka Manaasee lɛ lɔn!»
Zakɔba Efrayimu da Manaasee nyɛɛn ka bɛa yɔrɔ lɛ nɛ. 21Bɛ kio, Zakɔba pɛ Zozɛfu ni: «Ma á re giɛ̃, sɛnɛ, Lawa á re goɛ̃ kun ka nɛ, á re toɛ, ka wusoo ka da ka digolon gána nɛ. 22Man die Sisɛmu kiwi kɛ koe n la, n da n bǎã gii li, n wɔ la n dɔɔ̃nɔn lɛn wɔ nɛ. Man má zia baa Amɔɔrɔ tɔrɔn ganaa, ka gɔya sa laanka sa nɛ, má bɛa bǎã lɛ si ǹ la ka pàã nɛ.»
اکنون انتخاب شده:
Siin Giala 48: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.