Siin Giala 46
46
Zakɔba laanka a nɛgiĩ Zozɛfu a kɔn yɛ
1Zakɔba ná a mànan tumaa goa, á yoo á zii kũ. A bɛ́ á dɔ Bɛɛr-Sebaa kiwi, á wúlu bɔ ǹ di Izaaki a Lawa-n walan. 2Lawa daa Zakɔba la ka narɛɛ-n tèlò-n, á pɛ nɛ: «Zakɔba! Zakɔba!»
Zakɔba nə́ n nyəə mà asɛ á ke.
3Lawa tɔ́n pɛ nɛ: «Masɛ n Lawa lɛa, n di bɛ́ á goã Lawa mɛn guguru koe. Ezipti gána a woo baran nyɛ́ɛ da n ganaa wa, a giala, ma á re n tɔrɔn mɔnɛɛ walan. 4Ma á re woe kunun n ni Ezipti, ma din dɔ n die n boe Ezipti, ma soo n ne. Bɛ̀ ń gã, Zozɛfu n die n gere biĩ.»
5Zakɔba yoo á n bɔ Bɛɛr-Sebaa. Eziptin kii wotoron mɛnɛn dia, mà ǹ da ǹ goa nɛ, Zakɔba a nɛnyaanan nə́ Zakɔba saa, ǹ nə́ da bɛ kɔ́n nɛ, ǹ nə́ ǹ lɔn dɔn laanka ǹ nɛnyaanan kaa ǹ nɛ. 6#NDS 7.15. Ǹ nə́ ǹ tɔɔn loo, ǹ gɔn màn mɛn tumaa yɛ Kanaan gána nɛ, ǹ nə́ bɛ tumaa goa, ǹ nə́ woo Ezipti gána nɛ, kun ka a tɔrɔ tumaa nɛ. 7Á woo ka a minin tumaa-n Ezipti gána nɛ: A nɛgiĩn laanka a nɛlɔn nɛ, ka a nɔ̀ɔn giĩdɛnan laanka ǹ lɔdɛnan nɛ.
8Zakɔba tɔrɔn mɛnɛn nə da Ezipti gána nɛ, bɛn tɔn man ka kɛn nɛ: Zakɔba din laanka a nɛnyaanan nɛ, ka a nɔ̀ɔnɔn nɛ.
Zakɔba a nɛ bibinaa nə ka Urubɛn nɛ. 9Urubɛn a nɛnyaanan tɔn nə́ ke: Anɔɔki, Paluu, Ɛsirɔn, Karmii.
10Bɛ kio, Simiɔn laanka a nɛnyaanan: Yemoeli, Yamin, Ohadi, Yakini, Sohara, Sawulu. A Kanaan lɔ mɛn saa, bɛa nɛ n ka Sawulu ni.
11Levii laanka a nɛnyaanan: Gɛrsɔn, Keyati, Merarii.
12Zudaa laanka a nɛnyaanan: Ɛrɛ, Onan, Selaa, Perɛzi, Zeraa. Ɛrɛ laanka Onan lɛ sɛ gã Kanaan gána nɛ. Perɛzi a nɛnyaanan man ka Ɛsirɔn laanka Amulu ni.
13Isakaara laanka a nɛnyaanan: Tolaa, Puwa, Yɔɔbu, Simɔrɔn.
14Zabulɔn laanka a nɛnyaanan: Sorɛdi, Elɔn, Yaleeli. 15Zakɔba a lɔ Leyaa nɛnyaanan mɛnɛn yɛ Mezopotamii gána nɛ, bɛn lɛn tɔn man ka bɛn nɛ, a nɛlɔ Diinaa nə n ti ǹ ganaa. Ǹ tumaa a tɔkɔnlɛ ka ǹ yɛ ǹ nɛnyaanan nɛ, maǹ min pɔsɔɔ ka sɔɔ.
16Gaadi laanka a nɛnyaanan: Sifiɔn, Hagi, Sunu, Esibɔn, Erii, Arɔdii, Arelii.
17Asɛɛrɛ laanka a nɛnyaanan: Imnaa, Isiwaa, Isiwii, Beriyaa, ka Seraa nɛ. Bɛ nə ǹ miãnɛn lɛa. Beriyaa a nɛnyaanan man ka Hebɛɛrɛ laanka Malkili ni.
18Zakɔba tɔrɔn man ka bɛn nɛ, á ǹ yɛ Zilpaa ganaa, Laban bɛ̀rɛlɔ mɛn kɔ a nɛlɔ Leyaa la. Ǹ kaa kun nə min fulusɔrɔ.
19Zakɔba a lɔ Raseli na á nɛgiĩ paa yɛ: Zozɛfu laanka Bɛnzamɛn nɛ. 20#SGK 41.50-52. Zozɛfu nɛgiĩ paa yɛ a lɔ Azenati la Ezipti gána nɛ: Manaasee laanka Efrayimu ni. Onə kiwi a wúlu-bɔle Potifeeraa a nɛ n ka a lɔ lɛ nɛ. 21Bɛnzamɛn laanka a nɛnyaanan: Belaa, Bekɛri, Asibeli, Geraa, Naaman, Ehii, Rɔsi, Mupimu, Hupimu, Arde. 22Zakɔba tɔrɔn man ka bɛn nɛ, min fulusii, á ǹ yɛ Raseli la.
23Dan a nɛ n ka Husimu ni.
24Nɛfutalii laanka a nɛnyaanan: Yaseeli, Gunii, Yesɛɛrɛ, Silɛmu.
25Zakɔba tɔrɔn man ka bɛn nɛ, á ǹ yɛ Biilaa la, Laban bɛ̀rɛlɔ mɛn kɔ a nɛlɔ Raseli la. Ǹ kaa kun nə min sɔbaa.
26Zakɔba din a kion minin mɛnɛn nə da Ezipti gána nɛ, ǹ manaan nə́ ǹ ba a-n wa, ǹ kaa kun nə min pɔsɔrɔwensɔrɔ. 27#NDS 7.14. Zozɛfu na á nɛgiĩ paa yɛ Ezipti gána nɛ. Zakɔba a kion minin mɛnɛn nə da Ezipti, ǹ tumaa a kaa kun nə min pɔsɔbaa.
Zakɔba a dɔ Ezipti boo
28Zakɔba Zudaa dia a nyɛɛnɛ, mà a wo pɛ Zozɛfu ni, mà a da n da asɛ lɛ Gosɛnɛ gána nɛ. Ǹ bɛ́ ǹ nə́ dɔ Gosɛnɛ, 29Zozɛfu ná a wotoro yii, á woo n da ǹ di Zakɔba lɛ walan. Zozɛfu bɛ́ á yɛ lɔn gɔrɔ, á n sɔɔ a nɛ, á wuu pɛ, á pɛ, bɛ̀ a gɔn ná a ganaa miɛ̃. 30Zakɔba tɔ́n pɛ-n kɛnɛn: «Ma yii bɛ́ á wusoo á n yɛ, n yii n tɔn koo, ta ma n giɛ̃ sisia kəni, bɛa kaka ma ganaa wa.»
31Zozɛfu tɔ́n pɛ ǹ dɔɔ̃nɔn lɛn laanka ǹ di a kion minin ni:
– Man die woe *Faarahɔn li ma pɛ-n kɛnɛn: «Ma dɔɔ̃nɔn laanka ma di a kion minin mɛnɛn nə goã Kanaan gána nɛ, ǹ nə́ daa ma li.» 32Man die pii-n doo: «Maǹ tɔɔ-lɛduə̃lin lɛa, maǹ tɔɔn toe, maǹ nə́ daa ka ǹ tɔɔ bisinin laanka ǹ tɔɔ dadaran nɛ, ka ǹ gɔn màn tumaa nɛ.» 33Bɛ̀ Faarahɔn n ka bíi, á nɔ̀n da ka la ka kaa nya ǹ dí ni, 34ka pɛ nɛ kɛnɛn: «Wɔ n tɔɔ-lɛduə̃lin lɛa haalɛ wɔa nɛgininbaa waáraa a da sisia yaa, ka wɔ digolon nə goã a lɛa lɔn.» Bɛ̀ ka pɛ miɛ̃, á re Gosɛnɛ gána kɛ koe ka la ka giã a nɛ, a giala, Ezipti minin ba lɛ koe tɔɔ-lɛduə̃li ganaa wa.
اکنون انتخاب شده:
Siin Giala 46: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.