Bɔ bɛ̀rɛbaa nɛ 5
5
Muizu laanka Aarɔn a wo Faarahɔn li
1Bɛ kio, Muizu laanka Aarɔn daa pɛ *Faarahɔn nɛ:
– Dɛnaa lɛ, Izirayeli nɛnyaanan Lawa lɛa, bɛ n kɛ pii: «Toa maa zaman soo, ǹ zii tɔ wɔ don bii, ǹ zɔ́n zɛnaa masɛ a lɛa.»
2Faarahɔn pɛ: «Dɛnaa lɛ n die lɛa, ma tɔn nə n too kɔ a boo ganaa, ma toa Izirayeli nɛnyaanan nə woo? Ma a Dɛnaa doɛ̃ wa, ma a toɛ Izirayeli nɛnyaanan nə woo wa.»
3Ǹ nə́ pɛ-n kɛnɛn: «Ebrəən Lawa lɛ na á n din nyaa wɔsɛn manɛ, wɔ doamaa nɛ wɔ lɛawaa sɔɔ zii tɔ wɔ don bii, wɔ *wúlu màn bɔ wɔ kɔ wɔa Dɛnaa Lawa la. Bɛ bie wa a tɔn toa piɛ̃ busu, hinlaa zia da bɔ̀n da wɔ ganaa kooro.»
4Ezipti gána a kii lɛ pɛ ǹ nɛ: «Muizu laanka Aarɔn, wàa na á baa ka n giɛ li, ka zaman lɛ bɔ ǹ dí ni? Ka wusoo ka wo kaa dí nya! 5Ebrəən lɛn bɛ́ ǹ nə́ mɔnaa kanna, ka n giɛ li, ka ǹ dí kɛ a nyɛɛ sàabaa kənlə!»
Faarahɔn màn da Izirayeli nɛnyaanan dí li
6Bɛa pinaa lɛ nɛ, Faarahɔn pɛ dí mìilandɛnan kɛn manɛ, Ezipti minin lɛa, ka zaman-lɛduə̃lin kɛn nɛ, Izirayeli minin lɛa: 7«Ka baran buu kɔ zaman lɛ la doo, ka lɛlɛ bɛ́ lɔn, ǹ toopaa bɔ-n wa. Ka ǹ toa ǹ dinin nə wo buu goa. 8Ǹ da ǹ mìi-n dɔn, ǹ bɛ́ toopaa lɛ mɛn boe lɛlɛ, ǹ bɛ lɛ bɔ, ǹ baran toa ǹ màn bɔ lɛ wa. Yoo-baalin manɛ, bɛ lɛ nɛ ǹ tá n lɛ dii, mà maǹ woe wúlu màn boe koe Lawa la. 9Nɔmaa n siĩni a minin kɛn bɔ taãn-taãnɛ, ǹ dí nya bɛ̀ ǹ nə́ ǹ ba n yiri koɛ soɛ boo-n wa.»
10Dí mìilandɛnan laanka zaman-lɛduə̃lin lɛn nə́ soo, ǹ nə́ pɛ zaman lɛ-n kɛnɛn: «Faarahɔn pɛ, mà asɛ a buu koe ka la doo wa. 11Mà ka dinin nə ga bɛ̀ ka tá buu yii maa, ka wo goa. Sɛnɛ, mà màn kɔ́n dɔ nə n bɔ kaa dí lɛ wa dɛ.»
12Zaman lɛ nə́ n pɛsɛ̃ Ezipti gána paǹ tumaa ganaa, ǹ nə́ ǹ tii ma ǹ buu lɛ goɛ. 13Dí mìilandɛnan lɛn man nə́ goã ǹ yii woɛ̃ mà ǹ nə ǹ dí nyɔmɔɔ! Lɛ mɛn nə n pɛ, mà ǹ bɛ yɛ baraabaraa, ka buu kɔ ǹ la biikoo wɔ lɛ bɛ́ lɔn.
14Faarahɔn a dí mìilandɛnan lɛn nə zaman-lɛduə̃lin mɛnɛn bɔ, ǹ nə́ ǹ koa Izirayeli nyɛnaanan mìi la, ǹ nə́ bɛn dɛ, mà wàa na á baa, ǹ gunun dí laanka pelo wɔ a toopaa lɛ dɔ lɛlɛ wɔ li wa?
15Izirayeli nɛnyaanan-lɛduə̃lin lɛn nə́ daa ǹ busii pɛ Faarahɔn nɛ kɛnɛn: «Pàãma, wàa na á baa n tá kɛ zɛnɛɛ wɔsɛn manɛ? 16Ka a buu koe wɔ la doo wa, ka n pii dɔn mà wɔ toopaa bɔ. Á ke, maǹ wɔ dii dɔn. Sonbore ba n gána minin lɛn lon wa.»
17Kii lɛ pɛ ǹ nɛ kɛnɛn: «Ka n yoo-baalin lɛa taãn-taãnɛ! Bɛ lɛ nɛ ka á pii mà ka n woe wúlu màn boe koe Lawa la. 18Kanna kəni, ka wo dí nya. Ǹ ba re buu koe ka la wa, sɛnɛ, ka n die lɛlɛ a toopaa lɛ lɛ dɔ boe.»
19Izirayeli nɛnyaanan-lɛduə̃lin lɛn nə́ dɔ̃, mà sii lɛ kɔsɛ ǹsɛn ganaa, a giala, maǹ nə́ pɛ ǹ nɛ mà ǹ baran màn bɔ ǹ toopaa lɛ lɛ wa, mà lɛ mɛn nə n pɛ ǹ nɛ, mà ǹ bɛ lɛ bɔ baraabaraa. 20Ǹ bɛ́ ǹ nə́ soo Faarahɔn li, ǹ nə́ daa Muizu laanka Aarɔn li fufuu, ǹ nə́ daa bɛn yaa n yii diɛ ǹ la. 21Ǹ nə́ pɛ ǹ nɛ kɛnɛn: «Dɛnaa din ga kɛ ganaa, a kiri kuru ka la. Ka dinin lɛa nɛ, wɔsɛn tìĩ bɔ Faarahɔn laanka a dí-nyalin nyin ni. Ka n ka gɔya wɔ ǹ gɔn, mà ǹ wɔ dɛ nɛ.»
22Muizu wusoo á woo Dɛnaa li á pɛ: «Dɛnaa, wàa na á baa n zaman kɛ da fuu ni? Wàa na á baa ń ma dia dí kɛ ganaa? 23Ma bɛ́ má daa Faarahɔn li, má boo da nɛ n din tɔ nɛ, á màn da zaman kɛ a nɔmaa li, n nə ǹ bɔ bɛa sii kɛ lɛ dɔ-n duduu wa.»
اکنون انتخاب شده:
Bɔ bɛ̀rɛbaa nɛ 5: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.