Bɔ bɛ̀rɛbaa nɛ 4
4
Lawa nə n din pàã nyaa Muizu-n lɔn
1Muizu ná a lɛ si: «Sɛnɛ, á ke! Izirayeli nɛnyaanan lɛn ba re golee ma li wa, ǹ ba re n too koe ma lon wa. Ǹ tá re pii, mà Dɛnaa nə n din nyaa masɛ-n wa.»
2Dɛnaa pɛ-n kɛnɛn: «Wàa nə n gɔn?»
A ná a lɛ si mà bàlà nɛ.
3«A zũ tán.»
Á zũ tán. Bàlà lɛ miɛ̃ baa, Muizu baa si a nyɛɛnɛ. 4Dɛnaa pɛ Muizu ni: «N gɔn saa n kũ a mui ganaa.»
Muizu nə́ n gɔn saa á kũ. Miɛ̃ lɛ wusoo á bàlà baa a gɔn. 5Dɛnaa pɛ-n kɛnɛn: «A zɛnaa miɛ̃, n nyaa ǹ nɛ, mà má n din nyaa n nɛ, ma din Dɛnaa lɛ, ǹ digolon Lawa lɛa, Abrahamu ni, Izaaki ni ka Zakɔba nɛ, màn mɛn bɛ́ toɛ, ǹ golee n li.»
6Dɛnaa pɛ nɛ doo: «N gɔn da n foo bii kəni.»
Á n gɔn da a foo bii, á wusoo á bɔ. Gɔ̀nɔn ki busu babaraa ná a gɔn lɛ kũ, á fu kɔ ka piepie.
7Dɛnaa pɛ nɛ: «Wusoo doo n nə n gɔn da n foo bii.»
Á wusoo á da walan, á tɔ́n bɔ. A gɔn lɛ wusoo á bǐɛ̃ kɔ. 8Dɛnaa pɛ-n kɛnɛn: «Haya! Bɛ̀ ǹ lɛ kɔ, ǹ nə́ n too kɔ n lon, sii-nyaa bibinaa kɛ a lɛa wa, ǹ tá re n too koe n lon a paabaa ǹ wɔ kɛ a lɛa. 9Bɛ̀ ǹ golee bɛa sii nyaa ǹ sii paa kɛ lɛ li, ǹ nə́ n too kɔ n lon wa, n die n tà lɛ a mu si n kaa tán. N mu mɛn si tà lɛ nɛ ń kaa tán, bɛ á re mà biɛ.»
Lawa Aarɔn bɔ Muizu a koamala wole lɛa lɔn
10Muizu pɛ Dɛnaa nɛ: «Dɛnaa, ma nə n nyankoe, masɛ a boe boo la wa. Bɛ bie á n giala kɔ gunun wa, giĩ bie wa, a kũ n din a boo da masɛ-n ganaa, ma tɔn nə n bɔyaa wa. Ma lɛ á guguru.»
11Dɛnaa pɛ-n kɛnɛn: «Die na á lɛ kɔ minbuiin nɛ la? Die n minbuiin nɛ lɛ tiɛ̃, a nà a too tã? Die n toɛ a yii á wɔlɔ yii, die na a yii tiɛ̃? Ma din Dɛnaa Lawa bie wa? 12Kanna kəni, woo, ma din tá kun n lɛ nɛ, n doamaa bɛ́ nɛ n boo mɛn da, ma á re n darɛɛ bɛ ganaa.»
13Muizu pɛ: «Dɛnaa, ma nə n nyankoe, min kɔsɔ mɛn bɛ́ kɔɔ̃nɛ n ganaa, bɛa dɛnaa dia a wo boo kɛ lɛ pɛ.»
14Lawa foo yoo Muizu li á pɛ nɛ: «N dɔɔ̃ngiĩ Aarɔn banban wa ya, Levii tɔrɔ min kɛ lɛ? Ma á doɛ̃, ma bɛ á boe boo la. Á ke, á soo dinin á die n diɛ n lɛ. Bɛ̀ a yii nə n yɛ, a foo á re kɔɔ̃n koe. 15Boon lɛn pɛ nɛ, n nə ǹ wɔ a lɛ-n. Ma dinmaa tá kun n lɛ nɛ, kun ka a dɔ wɔ nɛ. Ka doamaa bɛ́ ka màn mɛn zɛnaa, ma á re bɛ nyɛɛ ka nɛ. 16Aarɔn sɛ á re boo diɛ zaman lɛ nɛ n bǎã nɛ, á n die goɛ̃ n boo gii-dali lɛa, nsɛ goã ka a Lawa bɛ́ lɔn. 17Bàlà kɛ lɛ sɛ saa n gɔn, n tá re sii nyaa ǹ siin zɛnɛɛ ka bɛ nɛ.»
Muizu wusoo á wo a tɔrɔ minin li
18Muizu wusoo, á woo ǹ daãgiĩ Zetro li, á pɛ-n kɛnɛn: «Ma á siĩni ma wusoo, ma wo ma din tɔrɔ minin kɛn li Ezipti gána nɛ, ma ga bɛ̀ ǹ yii á tɔn koo.»
19Zetro pɛ nɛ: «Wo ka là nyantoro ne!»
Dɛnaa pɛ Muizu ni Madiã gána lɛ nɛ: «Wusoo n wo Ezipti gána nɛ, a giala, min mɛnɛn tumaa bɛ́ giɛ n li ǹ nə n nyin bɔ, bɛn nə́ gã.»
20Muizu ná a lɔ kũ ka a nɛnyaanan nɛ, á ǹ kaa dundun la, á wusoo á woo Ezipti gána nɛ. Á Lawa a bàlà lɛ saa a gɔn. 21Dɛnaa pɛ Muizu-n doo:
– Á ke, n bɛ́ wusii woe kanna ma pàã kɔ n la máa n kaãbaa ǹ siin mɛnɛn tumaa zɛnaa, n die n bɛn zɛnaa *Faarahɔn yɔrɔ-a. Sɛnɛ, ma din tá re a too kaka koe, a re toɛ zaman lɛ woo wa. 22N die n pɛ Faarahɔn nɛ: Dɛnaa n boo diɛ kɛnɛn: «Maa nɛgiĩ bibinaa n ka Izirayeli ni. 23#BBN 12.29. Man pii n ni: Toa maa nɛgiĩ woo, a dí nya ma nɛ. Bɛ̀ n nə́ n piã n toa á woo wa, haya, man die n din a nɛgiĩ bibinaa dii a gã.»
24Ǹ bɛ́ zii lɛ tɔ we, ǹ golee ǹ bǎã kɔ́n nɛ, Dɛnaa daa mà a n Muizu dii á giɛ̃. 25Sipora yoo á kɔlɔ lɛ-bɔle saa, a ná a nɛgiĩ lɛ gɔrɔ lɛwɔn kuru ni, á lɔ a dɔ wɔ ganaa, á pɛ-n kɛnɛn: «A n ma zuũ lɛa ma gɔn,» 26bɛ giala, mà kurii kɛ a lɛa nɛ, Lawa ná a nyin toa.
27Dɛnaa pɛ Aarɔn nɛ: «Wo don bii, n nə n da Muizu lɛ.»
Á woo, á n da lɛ Lawa a kele kɛ la, á n sɔɔ a nɛ. 28Dɛnaa boon mɛnɛn tumaa kɔ Muizu la, mà a ǹ pɛ, a sii nyaa ǹ siin mɛnɛn tumaa nyaa nɛ, mà a ǹ zɛnaa, á ǹ laakalaa Aarɔn nɛ. 29Muizu laanka Aarɔn woo Izirayeli nɛnyaanan min golen tumaa lɛ sɔkɔn. 30Dɛnaa boon mɛnɛn tumaa kɔ Muizu la, a sii nyaa ǹ siin mɛnɛn dɔn nyaa nɛ, Aarɔn boon lɛn pɛ, Muizu dɔ́ siin lɛn zɛnaa zaman lɛ yɔrɔ-a. 31Zaman lɛ golee ǹ li. Ǹ ná a giala ma, mà Dɛnaa na á Izirayeli nɛnyaanan lɛn nɔmaa ǹ gɔn lɛ yɛ, mà a na á daa, á n die ǹ sii sii la. Ǹ nə́ kaa tán, ǹ nə́ Lawa guguru kɔ.
اکنون انتخاب شده:
Bɔ bɛ̀rɛbaa nɛ 4: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.