Bɔ bɛ̀rɛbaa nɛ 40
40
Kion sonbore lɛ a doa laanka a kɔ Lawa la
1Dɛnaa boo da Muizu ni, á pɛ nɛ: 2«Mui bibinaa kɛa lɛawaa bibinaa li, ń die n kɔn yɛ ka Lawa nɛ ǹ kion lɛ doa. 3Ń die n lɛ kɔ kɔn la ǹ boon goo lɛ da kion lɛ nɛ, n duru bii kuru kɔn-a ǹ mɔnaa lɛ kio. 4Ń die n da ka tabala lɛ nɛ, n na a koa tán sii yɔrɔ bɔ. Ń die n da ka bolon da ǹ bǎã kɛ nɛ, n na a bolonən lɛ sã. 5Ń die n sana màn gìĩ kɔɔ̃n tã ǹ bǎã kɛ da *lɛ kɔ kɔn la ǹ goo lɛ yɔrɔ-a, n kion lɛ a kiɛnlɛ mɔnaa kɛ da lon. 6Ń die n *wúlu bɔ ǹ bǎã kɛ koa kɔn yɛ ka Lawa nɛ ǹ kion lɛ a kiɛnlɛ yɔrɔ-a. 7Ń die n doo kaaraa kɛ da kɔn yɛ ka Lawa nɛ ǹ kion lɛ laanka wúlu bɔ ǹ bǎã kɛ bii ni, n mu kaa a nɛ. 8Ń die n sumu lɛ a mɔnaa gɔnɔn doa, n sumu lɛ a kiɛnlɛ mɔnaa da lon.
9«Ń die n minin bɔ ǹ koa ǹ nyɔɔ kɛ saa, n kaa kion lɛ laanka a gɔ́ɔ̃gɔ́ɔ̃ ǹ màn tumaa ganaa, n kion lɛ baa masɛ Dɛnaa wɔ lɛa ka a màn bisinin tumaa nɛ, a màn sonbore baa. 10Ń die n nyɔɔ kaa wúlu bɔ ǹ bǎã kɛ laanka a màn bisinin ganaa, n baa masɛ wɔ lɛa, a wúlu bɔ ǹ bǎã sonbore sonbore baa. 11Ń die n nyɔɔ kaa doo kaaraa kɛ laanka a koamala ǹ màn kɛ ganaa n baa masɛ wɔ lɛa.
12«Ń die n da ka Aarɔn nɛ, ka a nɛgiĩn ni kɔn yɛ ǹ kion lɛ a kiɛnlɛ-a, n nə ǹ zoo mu lɛ li. 13Ń die n mɔnaa sonboren kɛn wɔ Aarɔn ganaa, n nyɔɔ kaa a mìi ni, n bɔ n koa masɛ wɔ lɛa, a boo la a masɛ a wúlu bɔ. 14Da ka a nɛgiĩn kɛn dɔn nɛ, n dɔnkɛn wɔ ǹ ganaa, 15n nyɔɔ kaa ǹ ganaa ka ǹ díi wɔ bɛ́ lɔn, ǹ boo la ǹ masɛ a wúlu bɔ. N nyɔɔ kaa ǹ ganaa kɛnɛn kɛ lɛ n die wúlu-bɔlebaa kɛ biɛ ǹ wɔ lɛa biikoo tumaa li yǎa duduu.»
16Muizu yoo á dí lɛ nya, á zɛnaa sɔnbɔraanɛ ka Dɛnaa bɛ́ á pɛ-n lɔn. 17A lɛ̀ paabaa ǹ wɔ kɛ li, a mui bibinaa a lɛawaa bibinaa pinaa, kion lɛ nə́ n doa.
18Muizu kion lɛ doa, a ná a giãmala ǹ mànan kaa tán, a ná a doa ǹ bàlàn doa, á na a kerekaã ǹ bàlàn ka-a, a ná a gɔn sɔsɔrɔn wɔ. 19Á siã lɛ a mɔnaan lɛ bɔ á ǹ kɔ kion lɛ lɛ, bɛ kio a ná a tamaa ǹ kɔmalɛ kɛ kɔ a lalan lɛ, ka Dɛnaa din bɛ́ á pɛ-n lɔn.
20Muizu dí-pɛ fù lɛ a kɔlɔ sɛlɛɛn kɛn goa, á ǹ koa goo lɛ gɔ́ɔ̃ nɛ, a ná a bàlàn kaa a ganaa, a ná a lɛpii kɔ lɛ. 21Á daa ka goo lɛ nɛ kion lɛ gɔ́ɔ̃ nɛ, bɛ kio, a ná a bii kuru kɔn-a ǹ mɔnaa kɛ da lon, á kɔ lɛ kɔ kɔn la ǹ goo lɛ siã, ka Dɛnaa din bɛ́ á pɛ-n lɔn.
22Muizu tabala lɛ da kɔn yɛ ǹ kion lɛ gɔ́ɔ̃ nɛ, a gɔsɛ a wàã ganaa, bii kuru kɔn-a ǹ mɔnaa lɛ yɔrɔ-a. 23Á Dɛnaa gɔ ǹ buurun kɛn kaa la ka Dɛnaa bɛ́ á pɛ-n lɔn.
24Á bolon da ǹ bǎã lɛ da kion lɛ gɔ́ɔ̃ nɛ, a gusin a wàã ganaa, tabala lɛ para li. 25Á tɛ da bolonən lɛn ganaa Dɛnaa yɔrɔ-a, ka Dɛnaa din bɛ́ á pɛ-n lɔn.
26Màn gìĩ kɔɔ̃n tã ǹ bǎã ke sana lɛa, Muizu bɛ da kion lɛ gɔ́ɔ̃ nɛ, bii kuru kɔn-a ǹ mɔnaa kɛ lɛ yɔrɔ-a, 27yǎa a màn gìĩ kɔɔ̃n kaa a nɛ, á tã, ka Dɛnaa din bɛ́ á pɛ-n lɔn.
28Muizu kion lɛ a kiɛnlɛ mɔnaa da lon. 29A bɛ́ á wúlu bɔ ǹ bǎã lɛ da kion lɛ gɔ́ɔ̃ nɛ, a kiɛnlɛ yɔrɔ-a gɔrɔ, á *wúlu màn tã la, ka Lawa gɔ ǹ màn nɛ, ka Dɛnaa din bɛ́ á pɛ-n lɔn.
30Muizu doo kaara lɛ koa kion lɛ laanka wúlu bɔ ǹ bǎã lɛ bii ni, á mu kaa a nɛ, *gɔ̀ bɔ ma-a ǹ wɔ lɛa. 31Muizu ni, Aarɔn nɛ ka a nɛgiĩn ni, ǹ nə́ ǹ gɔnɔn laanka ǹ gòãn pii ni. 32Bɛ̀ ǹ tá we kion lɛ nɛ, bɛ̀ ǹ tá n mɔrɛ wúlu bɔ ǹ bǎã kɛ dɔ ganaa, maǹ gɔ̀ boe ǹ dinin ganaa, ka Dɛnaa din bɛ́ á pɛ-n lɔn.
33Muizu sumu lɛ doa á kion lɛ laanka wúlu bɔ ǹ bǎã lɛ lɛnpɛnɛ nɛ, á sumu lɛ a kiɛnlɛ mɔnaa da lon. Muizu na á dí lɛ tumaa nya á nya kɛnɛn.
Dɛnaa a gugurubaa daa kion lɛ pã
34 #
KIIN1 8.10-11; IZA 6.4; EZE 43.4-5; SNS 15.8. Tɛmaa bara lɛ daa n kuməə kɔn yɛ ǹ kion lɛ la, Dɛnaa a gugurubaa kion lɛ pã. 35Muizu goã boe la á we kɔn yɛ ka Lawa nɛ ǹ kion lɛ-n wa, a giala, tɛmaa lɛ goã a nɛ, Dɛnaa a gugurubaa dɔ goã piɛ̃-n kion lɛ gɔ́ɔ̃ nɛ.
36Bɛ̀ tɛmaa lɛ yoo kion lɛ lalan ǹ mɛn waáraa, Izirayeli nɛnyaanan dɔn man yui ǹ nə́ ǹ zii tɔ wɔ. 37Bɛ̀ tɛmaa lɛ yoo duduu wa, ǹ dɔn ba n gòã woɛ̃ wa. Maǹ nə́ n yii diɛ yǎa tɛmaa lɛ a yoo pinaa kɔsɔ doe.
38Dɛnaa a tɛmaa lɛ na á goã kion lɛ la lɛawaa li, sɛnɛ tèlò-n, tɛ n boe a nɛ. Izirayeli nɛnyaanan lɛn tumaa yii goã bɛ yii, ǹ zii tɔ wɔ lɛ gɔ́ɔ̃ nɛ.
اکنون انتخاب شده:
Bɔ bɛ̀rɛbaa nɛ 40: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.