Bɔ bɛ̀rɛbaa nɛ 17
17
Maasaa laanka Meribaa a mu
1 #
MNS 20.2-13. Izirayeli nɛnyaan zaman lɛ tumaa yoo Sini don lɛ nɛ, ǹ nə́ woo nyɛɛn ka ǹ tɔ-wɔ nɛ, á kɔnpɛ ka Dɛnaa a boo ne. Ǹ nə́ golee Refidimu bǎã nɛ, sɛnɛ, mu goã a tan zaman nə́ mii wa. 2Zaman lɛ zia da Muizu ganaa, ǹ nə́ pɛ nɛ: «Mu kɔ wɔ la wɔ mi.»
Muizu pɛ ǹ nɛ: «Wàa na á baa ka tá zia diɛ ma ganaa? Wàa na á baa ka tá n diɛ Dɛnaa gɔ́ɔ̃ li?»
3Mu boro zaman lɛ kũ walan, ǹ nə́ zùũzùũ si Muizu ganaa. Ǹ nə́ pɛ: «Wàa na á baa ń soo wɔ nɛ, n wɔ bɔ Ezipti gána nɛ? A n lɔn, ń tá toɛ wɔ n giɛ̃ muboro gɔn, wɔ laanka wɔa nɛnyaanan nɛ ka wɔa tɔɔn nɛ?»
4Muizu Dɛnaa nyankɔ: «Ma doamaa nɛ, ma wàa mɛn zɛnaa zaman kɛ nɛ? Bɛ̀ á kiɛ̃ kɛ la boɛɛn nɛ, ǹ tá re ma dii ka kɔlɔ nɛ.»
5Dɛnaa pɛ Muizu ni: «Kiɛ̃ zaman kɛ nyɛɛnɛ, n Izirayeli nɛnyaanan lɛn min golen kɔnɔn kũ, n nə ǹ kaa kun n din ni. N tà mu lɛ dɛ ka bàlà mɛn nɛ, bɛ lɛ saa n gɔn, n woo. 6Ma á re golee n nyɛɛnɛ, bǎã kɔ́n nɛ kànaa, Orɛbu kele lɛ la. Kele lɛ dɛ, mu á re soe a nɛ, zaman lɛ mi.»
Muizu zɛnaa miɛ̃ Izirayeli nɛnyaanan min golen lɛn yɔrɔ-a.
7Á bɛa bǎã kɛ lɛ bíi mà Maasaa ka Meribaa, bɛn giala mà "Damagɔ́ɔ̃ li" laanka "Zia da ma-a". Izirayeli nɛnyaanan zia kɛ lɛ a lɛa, ka ǹ da Lawa gɔ́ɔ̃ li kɛ nɛ, bɛ̀ ǹ bɛ́ ǹ nə́ pɛ mà Dɛnaa lɛ tá ǹsɛn bii hinlaa a banban.
Amalɛki minin nə zia mɛn da Izirayeli nɛnyaanan ganaa
8Amalɛki minin nə́ daa zia da Izirayeli nɛnyaanan ganaa Refidimu bǎã nɛ. 9Muizu pɛ Zozoe ne: «Giĩn bɔ, n soo n zia baa Amalɛki minin ganaa biɛ̃. Ma á re woe golee tenten lɛ mìi ni, Lawa a bàlà lɛ n ma gɔn.»
10A bɛ́ á pɛ lɔn, Zozoe soo, á zia lɛ giala kɔ Amalɛki minin ganaa. Bɛ á zɛnɛɛ bɛ̀ Muizu ni, Aarɔn nɛ ka Uuru n tenten lɛ mìi ni. 11Haya! Bɛ̀ Muizu nə n gɔn saa lon, Izirayeli minin man boe Amalɛki minin la, bɛ̀ a n gɔn gisĩ, Amalɛki n boe Izirayeli la. 12A gɔnɔn bɛ́ ǹ nə́ laa, Aarɔn laanka Uuru kɔlɔ saa, ǹ nə́ da a giulun á giã la. Ǹ nə́ golee a paǹan paanan li, ǹ nə́ a gɔnɔn kũ lon. Bɛa yɔrɔ kɛ la, a gɔnɔn nə́ goã lon, yǎa wasa a yii siɛ̃ biikoo li. 13Zozoe boo Amalɛki minin lɛn la, á ǹ dɛ ka gɔya nɛ.
14 #
TDP 25.17-19; SAM1 15.2-9. Dɛnaa pɛ Muizu ni: «Kɛ kiɛ̃ sɛ́wɔ nɛ, a goã gũ yiri ni ǹ sii lɛa. A pɛ Zozoe ne, mà má á re Amalɛki minin papaɛ̃ ka lenlen, min din ná a ba ǹ boo diɛ kanaa doo wa!» 15Muizu *wúlu bɔ ǹ bǎã dɔ, á tɔ gole kɔ a ganaa: "Dɛnaa n ka maa ziabaa ǹ zanzan bɛ́ lɔn". 16Á pɛ: «Ka daa wɔ n liɛ, wɔ gɔnɔn nə́ lon, dia-n Dɛnaa a zanzan lɛ la, wɔ pɛ: Zia lɛ ka Amalɛki minin ni, a n yǎa duduu zia lɛa.»
اکنون انتخاب شده:
Bɔ bɛ̀rɛbaa nɛ 17: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.