Bɔ bɛ̀rɛbaa nɛ 16
16
Màn-bii laanka siĩ
1Ǹ nə́ soo Elimu, ǹ nə́ woo dɔ Sini don, Elimu laanka Sinayii kele bii ni. Ǹ nə́ woo dɔ walan, ǹ soo Ezipti gána nɛ a mui paabaa ǹ wɔ a lɛawaa fulusooro pinaa. 2Don lɛ gɔ́ɔ̃ nɛ, Izirayeli nɛnyaanan zaman lɛ tumaa zùũzùũ si, Muizu laanka Aarɔn ganaa. 3Izirayeli nɛnyaanan lɛn nə́ pɛ ǹ nɛ: «Á ke le! Wɔ bɛ́ siĩ soɛ̃, wɔ n màn dɔ bii wɔ n kiɛ̃ Ezipti gána nɛ ǹ mɛn waáraa, toa bɛ̀ Dɛnaa na á wɔ dɛ bɛa biikoo kɛ li. Á ke, ka soo ka zaman kɛ tumaa nɛ, ka daa wɔ-n don gɔ́ɔ̃ nɛ, wɔ n die giɛ̃ ka bòo ne!»
4 #
ZAÃ 6.31. Dɛnaa pɛ Muizu ni kɛnɛn: «Man die màn-bii boe lon, ma kaa tán ǹ wɔ lɛa. Zaman lɛ á re soe baraabaraa, ǹ nə ǹ lɛawaa gogoon màn-bii goa. A n die n zɛnɛɛ miɛ̃, màn mɛn bɛ́ toɛ, man da ǹ gɔ́ɔ̃ li, ma ga ǹ ganaa, bɛ̀ ǹ tá re tɔ we a kɔnpɛ ka maa boo ne, hinlaa bɛ̀ ǹ ba re tɔ we a kɔnpɛ-n wa. 5Lɛawaa sɔrɔbaa ǹ wɔ pinaa, bɛ̀ ǹ nə́ woo ǹ màn-bii goa lɛ zɛnaa, ǹ tá re yii a la baraabaraa wɔ a goa lɛ nɛ gunyin paa.»
6-8Muizu laanka Aarɔn pɛ Izirayeli nɛnyaanan lɛn tumaa nɛ: «Wasamiɛ̃nɛ, Dɛnaa á re siĩ koe ka la ka sɔ̃, a giala, ka zùũzùũ mɛn si a ganaa, á ma. Ka á re doɛ̃ kəni, mà a din lɛ na á soo ka nɛ, á ka bɔ Ezipti gána nɛ. Biɛ̃ baayɛlɛ dɔn, á re màn-bii koe ka la a ka bɔ, ka á re a gugurubaa yii. Muizu laanka Aarɔn pɛ ǹ nɛ: Wɔsɛn mìi á kiɛrɛ ka zùũzùũ si wɔsɛn ganaa. Bɛ̀ ka tá zɛnɛɛ dɔn, ka bie wɔsɛn gialaa wa, ka n Dɛnaa din gialaa.»
9Muizu pɛ Aarɔn nɛ: «A pɛ Izirayeli nɛnyaanan zaman lɛ tumaa nɛ, mà ǹ da Dɛnaa yɔrɔ-a, a giala, á ǹ zùũzùũ sii lɛ ma.»
10Aarɔn bɛ́ boo diɛ zaman lɛ nɛ, ǹ nə́ n yɔrɔ bɔyaa ǹ nə́ dia don la, Dɛnaa a fulu tɛ-pɛle tɔn nə n din nyaa tɛmaa bara lɛ bii. 11Dɛnaa boo da Muizu ni: 12«Má Izirayeli nɛnyaanan zùũzùũ sii lɛ ma. A pɛ ǹ nɛ kɛnɛn: Wɔlɔ nyin giɛ̃ biikoo li, ǹ tá re siĩ soɛ̃, baayɛlɛ, ǹ tá re màn bii ǹ kã, ǹ tá re doɛ̃ mà ma din Dɛnaa lɛ nə ǹ Lawa lɛa.»
13Wasamiɛ̃n lɛ din ni, bàan bisinin kɔnɔn nə́ daa ǹ nə́ giã ǹ bǎã lɛ pã, baayɛlɛ dɔn, pele bɔ á giã ǹ bǎã lɛ lɛnpɛnɛ. 14Pele lɛ bɛ́ á kaa, màn kɔ́n tɔn goã tán don lɛ nɛ, a n bisin ka la gii bɛ́ lɔn a golee yɔyɔrɛɛ-n wa. 15#KOR1 10.3. Izirayeli nɛnyaanan lɛn nə́ ga a ganaa, ǹ nə́ pɛ kɔn nɛ kɛnɛn: «Kɛ n wàa lɛa?»
A giala, a bɛ́ màn mɛn lɛa, ǹ goã bɛ doɛ̃ wa. Muizu pɛ ǹ nɛ:
– Màn-bii ni, Dɛnaa n koe ka la mà ka bii. 16Dɛnaa màn mɛn pɛ, bɛ á ke: «Ka bɛ́ boe ǹ mɛn la ka bii, ka bɛ goa. Kiondɛnaa gogoonmaa na a kion minin wɔ goa, a goa a kɔnpɛ a kion minin lɛn nɛ, a goa kunun yii sii min goon wɔ lɛa.»
17Izirayeli nɛnyaanan man nə́ zɛnaa kɛnɛn: Ǹ tɛnɛn nə́ goa á kiɛ̃, ǹ tɛnɛn nə́ goa á nyaabaa. 18#KOR2 8.15. Wɔ zɔɔ̃ min gogoonmaa wɔ yii li: min mɛn goa á kiɛ̃, màn mɛ bɛa dɛnaa wɔ li wa, min mɛn goa á nyaabaa, màn nyaabaa bɛ dɔ wɔ ganaa wa. Didie ná a wɔ yɛ á kɔnpɛ ka a din nàn yii ni.
19Muizu pɛ ǹ nɛ: «Min kɔ́n baran a giala koa yǎa baayɛlɛ wa!»
20Ǹ tɛnɛn nə n too kɔ a lon wa, ǹ ná a giala koa yǎa baayɛlɛ, sɛnɛ, nyuun nə́ kaa a nɛ, á bɔɔ̃. Muizu foo tɔ́n yoo ǹ li. 21Maǹ nə́ goã goɛ baayɛlɛ woo baayɛlɛ, didie n goɛ á kɔnpii ka a din nàn yii ni. Bɛ̀ wasa dii, a gialakun kɛ n yoe.
22Lɛawaa sɔrɔbaa ǹ wɔ pinaa, maǹ goɛ á kɔnpii lɛawaa paa màn-bii ni, kunun yii kiwisi min goon wɔ lɛa. Zaman lɛa nyɛɛnaandɛnan tumaa daa a yɔrɔ pɛ nɛ. 23#BBN 20.8-11. Muizu tɔ́n pɛ ǹ nɛ: «Dɛnaa na á bɛ lɛ pɛ, biɛ̃ n *susu ǹ pii lɛa, Dɛnaa din a lɛawaa nɛ. Màn mɛn bɛ́ kɔrɛ ǹ wɔ lɛa, ka bɛ kɔrɛ pelo, ka a pipi ǹ wɔ pipi. A giala mɛn bɛ́ goɛ̃, ka bɛ tamaa yǎa baayɛlɛ.»
24Ǹ ná a giala lɛ koa yǎa baayɛlɛ, ka Muizu bɛ́ á pɛ lɔn. Màn bɔɔ̃ wa, nyuun dɔ wɔ a-n wa. 25Á pɛ: «Ka bɛ bii pelo, pelo n Dɛnaa a susu ǹ pii lɛa. Pelo, ka a re bɛa màn kɛ lɛ yii kaa giã ǹ bǎã lɛ kio wa. 26Maǹ goɛ lɛawaa sɔrɔ gɔ́ɔ̃ nɛ, sɛnɛ, lɛawaa sɔbaabaa ǹ wɔ ke, bɛ n susu ǹ pii lɛa, a re yii bɛa pinaa wa.»
27Minin nə́ yɛ zaman lɛ bii, ǹ nə́ soo mà maǹ goɛ bɛa pina kɛ lɛ nɛ, ǹ màn kɔ́n yɛ wa. 28Dɛnaa pɛ Muizu ni: «Ka bɛ́ tɔn nə n piɛ̃ ka maa dí-pɛn laanka maa daraan kɛn lɛ sii ni, yǎa biĩ kəni ka tɔ́n masɛ lɛ sii? 29Ka ga a ganaa, Dɛnaa susu ǹ pii kɔ ka la, bɛ lɛ nɛ, lɛawaa sɔrɔbaa ǹ wɔ pinaa ke, a n lɛawaa paa màn-bii koe ka la. Didie giã a bǎã nɛ. Min kɔ́n baran soo a n bɔ a piɛ lɛawaa sɔbaabaa ǹ wɔ pinaa kɛ-n wa.» 30Bɛ lɛ a lɛa, zaman lɛ nə́ n susu lɛawaa sɔbaabaa ǹ wɔ pinaa kɛ lɛ nɛ.
31 #
MNS 11.7-8. Izirayeli minin lɛn nə́ bɛa màn-bii soree kɛ lɛ bíi *maánə. A na á goã ka da we tɔrɔ bisin kɔ́n bɛ́ lɔn, a n fu, kɔɔ̃n ka zoo mɔ̀mɔ bɛ́ lɔn.
32Muizu pɛ:
– Á ke Dɛnaa pɛ: «Ka kunun yii sii tamaa ka kio kaa nɛnyaanan lɛa, màn mɛn bɛ́ toɛ, ma ka dininmaan lɛn too ka màn-bii mɛn nɛ don gɔ́ɔ̃ nɛ, bɛ̀ ma bɛ́ má soo ka nɛ má ka bɔ Ezipti gána nɛ, ka kio nɛnyaanan lɛn die ǹ bɛ dɔ̃.»
33 #
EBR 9.4. Á pɛ Aarɔn nɛ: «Màn saa, n maánə lɛ a kunun yii sii kaa a nɛ, n koa Dɛnaa yɔrɔ-a, a goã tamaa nɛ ǹ kio nɛnyaanan lɛa.»
34Dɛnaa pɛ Muizu-n lɔn, Aarɔn màn lɛ koa lɛ kɔ kɔn la ǹ kɔlɔn kɛn genli. 35#ZOZ 5.12. Izirayeli nɛnyaanan lɛn man nə́ maánə bii lɛ̀ pusi gɔ́ɔ̃ nɛ, yǎa ǹ nə́ woo dɔ giã ǹ gána kɔ́n nɛ, bɛ n ka Kanaan gána nɛ. 36Ǹ baraabaraa a màn goa lɛ, kunun yii sii, bɛ n kɔnpii ka ǹ màn zɔɔ̃ ǹ màn goon a talɛɛ fù baa ǹ wɔ nɛ, bɛ tɔ n efaa.
اکنون انتخاب شده:
Bɔ bɛ̀rɛbaa nɛ 16: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.