Juan 21
21
I Jesús xuk'ut rib' chke i wuqub' utijoxelab'
1Chrijil chik ronojel ile i Jesús xuk'ut chik rib' chke utijoxelab' chila chuchi' i semelik ya Tiberias ub'i. I uk'utik rib' chke utijoxelab' keje iri: 2Chila o wi ma Simón Pedro, ma Max, chi a Yox kecha che, ma Natanael, chi aj Caná re i Galilea, i keb' uk'ojol mam Zebedeo xaq keb' chik chke utijoxelab' i Jesús. 3Ma Simón Pedro xub'ij chke i rachi'il:
—Yin kin-e pa chapoj kar.
Ike xkila' uwach:
—Xaq koj-e yoji awu' —xecha che.
Are uri xe'ek, xe'an b'i chupam jun barco. Xwiri che i a'ab' le lik nti xkichapo. 4Are xpe usaqirik, xwinaqir i Jesús ku' utijoxelab' chuchi' i semelik ya, xwiri ike lik keta'am taj we are ire. 5Are uri i Jesús xutz'onoj chke:
—Achiyab', ¿O chik kar ichapom? Ike xkila' uwach che:
—Ntaj, mitene jun qachapom.
6Are uri i Jesús xub'ij chke:
—Chik'aqa b'i ataraya puwiqab'im i barco; lik o ni kiriq chila. Ike keje ile xki'ano, xaq lik x-antajik pacha xub'ij i Jesús chke. Man ketiki ti chik chrelsaxik li ataraya pa ya rumal uk'iyal kar chi o chupam. 7Are uri i tijoxel chi lik k'ax kna' rumal i Jesús, xub'ij che ma Pedro:
—¡Ile are i Ajwal! I ma Pedro are xuta ile, juntir xukoj la b'i u'u', man resam te'eq u'u', te'uri xuk'aq la b'i rib' chwi ya. 8I jub'an chik tijoxelab' xkik'am b'i barco chuchi' i ya xkijukukej b'i ataraya chi nojnaq che i kar, i unajtil chi je o wi te'eq kolo waqib' oxwinaq (66) xik'ab'. 9Are xe'el chupam i barco xkil jun a' nuk'talik, o jun kar puwi xaq o jub'an wa re trigo chila. 10Are uri i Jesús xub'ij chke:
—Chik'ama li keb' oxib' kar chi k'ate xichapo.
11Are uri ma Simón Pedro x-an la chupam i barco xujukukej li ataraya k'a chisaq, chi lik nojnaq che i nimaq taq kar; chi o oxlajuj wuqwinaq (153) kar chupam, tupu lik k'i xwiri xraqch'ij taj. 12Te'uri i Jesús xub'ij chke:
—Chixpetoq, cholitija iwa.
Xwiri mijun chke utijoxelab' xukowij utz'onoxik che pachin Ire, man keta'am chi are Ire, Ajwal. 13Are uri i Jesús xtejeb' pan ku', xuk'am i wa re trigo, xujach chke; xaq keje xu'an che i kar.
14Are uroxmul ile chi i Jesús xuk'ut rib' chke utijoxelab', are walijnaq chik che i kamik.
I Jesús xlapan ru' ma Simón Pedro
15Are xkelej wa'im re usaqirb'al, i Jesús xutz'onoj che ma Simón Pedro:
—Ma Simón, chi at uk'ojol ma Wan, ¡Lik k'ax kinana chkiwach ike le!
I ma Pedro xub'ij che:
—Qatzij, Ajwal; yet aweta'am chi lik k'ax katinna'o.
I Jesús xub'ij che:
—Cheachajiji ral taq inchij.
16I Jesús xutz'onoj chik ukamul che:
¿Ma Simón, chi at uk'ojol ma Wan, lik k'ax kinana'o?
I ma Pedro xula' uwach che:
—Qatzij, Ajwal; yet aweta'am chi lik k'ax katinna'o.
I Jesús xub'ij che:
—Cheachajiji inchij.
17Are uri xu'an urox tz'onb'enik che:
—¡Ma Simón, chi at uk'ojol ma Wan, qatzij chi lik k'ax kinana'o?
I ma Pedro lik xpe ub'is man are uroxmul ile xtz'onox che we k'ax kuna'o; are uri i ma Pedro xula' uwach che:
—Ajwal, yet ronojel aweta'am, yet aweta'am chi lik k'ax katinna'o.
I Jesús xub'ij che:
—Cheachajiji inchij. 18Are uri xub'ij che, lik saq laj tzij kinb'ij chawe: Yet, are k'a at k'ojol ala, kawiq awib' re kat-e xaipa kawaj wi enam, xwiri are katrijab'ik, kasuk'b'a ni a'ab' man jun chik kkojow ni a'u'; xaq katuk'am nu b'i ipa kawaj ti enam.
19Ru' i tzij le i Jesús ktijin chusaqixik wach taq ukamik ma Pedro, xaq ru' ukamik kukoj ni u'ij i Dios. Te'uri xub'ij che:
—Chatterej chwij.
I tijoxel chi lik mas k'ax kna' rumal i Jesús
20I ma Pedro are xtzun chrij, xril i tijoxel chi lik k'ax kna' rumal i Jesús chi ktijin ruponik; i tijoxel le are i xkub'i putzal i Jesús are xkitij i wa'im re i Pascua, xaq are ire xtz'onow che: ¿Pachin taq katjachaw pki'ab' i ajch'oj chawij? 21I ma Pedro are xril uwach i tijoxel le are uri xutz'onoj che i Jesús:
—Ajwal, i tijoxel le, ¿Wach kuk'ulmaj ire?
22I Jesús xula' uwach che:
—We kwaj Yin chi k'a k'as ire le are kink'un tan chik, nti awe yet che. Yet, chatterej chwij.
23Rumal i tzij le, i jub'an chik tijoxelab' xkib'ij chi i tijoxel le kkam taj. Xwiri i Jesús xub'ij taj chi kkam taj, ire xwi xub'ij: —We kwaj Yin chi k'a k'as ire le are kink'un tan chik, nti awe yet che —xcha.
24I tijoxel le xaq are ire xulap ronojel ni'pa i jalajuj taq b'iroxiki chi rilom xaq xutz'ib'aj. Xaq qeta'am chi lik kub'ij i saq laj tzij.
25I Jesús lik k'i jalajuj taq b'iroxik xu'ano chi tz'ib'tal taj, wetene xtz'ib'ax ronojel ile pa taq jujunal kinch'ob' yin chi kok ti ronojel i wuj le chwach ronojel i jyub' ta'aj.
اکنون انتخاب شده:
Juan 21: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
