Juan 20
20
Uwalijik i Jesús che i kamik chkixol i kamnaq
1Are xuriq i nab'e ij re seman, i ati Mariy Magdalena, lik k'a equm, x-e chila ipa muqtal wi i Jesús, are xuponik, xrilo chi elsam chik ab'aj chuchi' i jul ipa xmuq wi i Jesús. 2Are uri x-e la pa'anem chub'ixkil che ma Simón Pedro xaq che i jun chik tijoxel chi lik k'ax kna' rumal i Jesús. Xub'ij chke:
—¡Xk'am b'i uch'akul i Ajwal, nti chik chila ipa xmuq wi; qeta'am taj ipa xk'am wi b'ik! —Xcha.
3Are uri ma Pedro xaq i jun chik tijoxel xe'e la ipa muqtal wi i Jesús. 4Chekeb' pa'anem xe'e junam, xwiri i jun chik tijoxel mas xuch'ij anem chwach ma Pedro; rumali chi nab'e xupon chila ipa xmuq wi i Jesús. 5Are uri xchakiqaj chutaqexik upam i jul; xwiri xwi xril i k'ul o chila, xwiri ire xok tu b'ik. 6Te'uri xupon ma Simón Pedro, ire xok b'i chupam i jul, are uri xrilo chi xwi chik i k'ul o chila. 7Xaq xrilo chi i k'ul chi xkipasb'ej ujolom i Jesús, junam ti chik o wi ru' i jub'an chik k'ul. B'orom i yatal ti chik junam. 8Are uri xaq xok chub'i i jun tijoxel chi xupon nab'e; are xrilo wach uk'ulmam; are uri xukojo chi Jesús lik k'as tan chik. 9I tijoxelab' k'amaja kkita ub'e wach i tz'ib'tal kan chupam uwuj i Dios, chi i Jesús kwalij ni chkixol i kamnaq. 10Are uri, i tijoxelab' le xetzalij chub'i chi kachoch.
Jesús xuk'ut rib' che ati Mariy Magdalena
11I ati Mariy ko'ik xkanaj kan pa okb'al che i jul. Ko'ik xchakiqajoq, xtaqen b'i pa jul ipa xmuq wi i Jesús, 12are uri xril kiwach keb' ángel, saq ki'u', je kul chila ipa xkiya wi te'eq uch'akul i Jesús. Jun chujolom i jun chik chi raqan. 13I ángel le xkitz'onoj che:
—Ixoq, ¿B'uchak kato'ik?
Are uri ati Mariy xub'ij chke:
—Man xk'am b'i Wajwal, weta'am taj ipa xkiya wi —xcha.
14Are xb'itaj ile rumal xtzun chrij; are uri xril uwach i Jesús, xwiri xretamaj taj we are i Jesús. 15Are uri i Jesús xutz'onoj che:
—Ixoq, ¿B'uchak kato'ik? ¿Pachin katzukuj?
I ati Mariy xuch'ob'o chi are kchajiw i tikonb'al, rumali xub'ij che:
—Ta, we yet xak'am b'i uch'akul i Jesús, chab'ij chwe ipa xaya wi man yin kink'am b'ik.
16Are uri i Jesús xub'ij che:
—¡Al Mariy! Are uri ire xupiskilij rib' i lik xuk'am utaqexik i xub'ij che pkich'ab'al aj hebreo:
—¡Raboni! (Chi ke'eloq ¡Tijonel!)
17I Jesús xub'ij che:
—Chinawo'taj, man k'amaja kin-e chila ipa o wi Inqajaw. Xwiri, jat ku' i watz incha', chab'ij chke chi kin-e ru' Inqajaw chi xaq Iqajaw yix, in-Dios chi xaq i-Dios yix.
18Are uri ati Mariy Magdalena x-e chub'ixkil chke i tijoxelab' chi lik xril uwach i Jesús, xaq xub'ij chke wach xub'ij i Jesús che.
Uk'utik rib' i Jesús chke utijoxelab'
19I ij chrijil i ij re uxlanb'al ij chi are nab'e ij re i seman, i tijoxelab' kimolom kib' pa ja, kitz'apim uchija man kkixij kib' chke i kaj-atzil aj Judío. Are uri xok b'i i Jesús ku' xtak'i chkixol xuya rutzil kiwach xaq xub'ij chke:
—¡Ch-ol uxlanb'al k'uxij iwu'!
20Are xb'itaj i tzij le chke, xuk'ut u'ab' xaq uk'alk'ax chke. Are uri ike lik xekikotik man xkil chik uwach i Jesús. 21Are uri i Jesús xub'ij chik chke:
—¡Ch-ol uxlanb'al k'uxij iwu'! Pacha xu'an i Ta chwe yin chi xinutaq loq, xaq keje kin-an Yin ile chiwe yix, kixintaq b'ik.
22Are uri xuxut'ij b'i ruxlab' pkiwi utijoxelab' xaq xub'ij chke:
—Chik'ama i Lo'laj Utewal i Dios. 23I winaq chi kikuy kimak yix, lik kkuytaj ni uri kimak chke, xwiri we kikuy ti kimak chke xaq kkuytaj ti uri kimak —keje ile xub'ij i Jesús chke.
Ma Max xril uwach i Ajwal are walijnaq chik che i kamik
24I ma Max le are jun chke i kab'lajuj tijoxelab' chi xaq ma Yox kecha che, xwiri nti tan ku' are xuk'ut rib' i Jesús chke. 25Are uri i jub'an chik tijoxelab' xkib'ij che ma Max:
—Yoj xqil uwach i Ajwal —xecha che.
Xwiri ma Max xula' uwach chke:
—Yin, we kwil ti i tel chi o che u'ab' ipa xok wi i klawux xaq we kinmin ti uwi in-ab' che i tel chi o puk'alk'ax, lik kinkoj ti uri.
26Wajxaqib' ij rik'awik ile, i tijoxelab' kimolom tan chik kib' chupam jun ja xaq keje i ma Max o ku'. Tupu tz'apil uchija xwiri i Jesús xok b'i ku', xtak'i chkixol xaq xuya rutzil kiwach ru' i tziji:
—¡Ch-ol uxlanb'al k'uxij iwu'! —Xcha.
27Are uri su' xub'ij che i ma Max:
—Chawila in-ab'i xaq i ink'alk'ax xaq lik chamina uri uwi a'ab' che i teli. Ma'an ile chi kakoj taj, ¡lik chakojo! —Xcha.
28Are uri ma Max ko xub'ij i tziji:
—¡Wajwal chi xaq at In-Dios!
29Are uri i Jesús xub'ij:
—¿Kakojo man xawil inwach? ¡Lik utz ke i winaq chi kekojonik tupu kilom ti inwach! —Xcha.
Wach uchak xtz'ib'ax i wuji
30O jub'an chik nimaq taq il xu'an i Jesús chkiwach utijoxelab', chi xtz'ib'ax ti chupam i wuji. 31Xwiri ronojel ni'pa i xtz'ib'axiki re kiwetamaj chi i Jesús are i Cristo, chi Uk'ojol i Dios. Man yix we kikoj ile, o ni uri ik'aslemal rumal Ire.
اکنون انتخاب شده:
Juan 20: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
