2 Corintios 11
11
I ma Pablo ku'an ti ire pacha kki'an i ajtijonelab' chi ne te saqil
1Chiya unimal ik'ux che wach kinok chub'ixkil chiwe; tupu xa ch'uj laj tzij kita yix, chikuyu ni inmak. 2Yin lik k'ax kixinna'o, xaq kwaj yin chi xwi chrij i Cristo kixterej wi; i k'axnab'al ink'ux le, lik ru' i Ajwal petnaq wi. In pacha jun qajawxel uya'om umi'al che jun achi; lik apoj laj ali uya'om che, man xwi ru' ire kk'iji wi. Keje yin ile; yin ix inya'om che i Cristo, xwi che ire ix inya'om wi. 3Xwiri kinb'ison chiwe man moqxa kyojtaj inojb'al, xaq kikanaj kan i Cristo; moqxa kikoj ti chik u'ij ru' ronojel ik'ux. Moqxa kixt'ortajik pacha xu'an i ixoq Eva ujer, chi xt'ortaj rumal i kumatz chi lik saqlej unojb'al. 4Ni'pa i keupon iwu', tupu lik junwi kkib'ij chrij upatan i Jesús, yix lik utz kita. Tupu ya ik'ulam chik i Lo'laj Utewal i Dios iwu', xwiri xa kixtijin tan chik chuk'ulaxik jun chik; xaq kixtijin chukojik jun tzij chi are ti tzij k'ak' chi ink'utum yin chiwe re i Dios. 5Xwiri ni'pa i apostolab' le ¿Xatab'a mas nim ki'ij chinwach yin? Nim taj. 6Yin tupu kinriq ti mas ch'awik xwiri mas o inno'oj chkiwach i jub'an chi lik chom kech'awik; lik weta'am usuk' ni'pa i kinb'ij. Ile, lik iweta'am yix chi i saq laj tzij ax iwilom ile chwe, ronojel ni'pa in-anom.
7Yin xintz'onoj ti wajil chiwe are xinb'ij i utz laj tzij k'ak' re i Dios; keje ile xin-ano: Xinqajsaj in-ij yin, nimarsab'al i'ij yix. ¿Xatab'a utz ti xin-ano? 8Are xinb'ij utzij i Ajwal chiwe yix, xintzuqb'ej wib' che i pwaq chi yatal chwe kumal jub'an chik jutzob'aj re i Dios. Xe'eloq pacha xinmaj chke tojb'al we, re tob'al iwe yix. 9Are in o iwu', nti xintz'onoj chiwe wach i rajwaxik chwe; are i qachalal chwach i Cristo aj Macedonia, are ike xkik'am li chwe wach i rajwaxik chwe. Keje ile xinya ti wib' chiqul; nti tzuqb'al wib' xintz'onoj chiwe; ile lik kinmayij ti u'ankil. 10Mas kinkikot rumal, we kintz'onoj ti wajil che inchak. Inkikotemal le mijun kelsaw chwe chila pa Acaya. Saq laj tzij i xinb'ij le, xaqjun ru' pacha i saq laj tzij re i Cristo chi o pink'ux. 11¿B'uchak keje ile kinch'awik? ¿Xatab'a k'ax ti kixinna yix? ¡Dios reta'am chi lik k'ax kixinna'o!
12Kinmayij ti u'ankil inchak pacha kintijin chu'anik, keje ile kinya ti chke i jub'an saqil ti laq taq tijonelab' we kkib'ij, ¡Yoj lik utz i kqa'ano man xaqjun kojtijin chu'anik pacha kki'an i apostolab' re i Cristo! 13Ike le qatzij je apostolab' taj; xa je ajt'oronel. Kki'an che kib' pacha je apostolab', xwiri je are taj. 14Mixupon chwach we keje ile kki'ano man i Itzel xaq keje ku'on ile; ku'on che rib' pacha jun saqil laj ángel re i Dios. 15Rumali mixupon chwach, man ni'pa i ke'anaw uchak i Itzel xaq kki'an che kib' pacha je aj-anol utz. Xwiri, pa k'isb'al re, kpe ni utojb'alil kimak chkij pacha i kmajawik.
I k'ax chi xik'aw i apóstol Pablo chupam
16Kinb'ij julaj chik chiwe, mich'ob' yix moqxa in ch'uj. Xwiri we keje ile kich'ob'o, chita ni uri jub'i' intzij pacha utzij jun ch'uj; chiya ni chwe chi kinlap jub'i' wib' kojb'al re in-ij. 17Are i kinb'ij chiwe wo'or, pacha ch'uj laj tzij, man i Ajwal ub'im ti chwe we utz kin-an iri, chi xa ukojik in-ij yin kin-ano, pacha taq ch'uj. 18Xwiri je k'i i to' winaq chi kki'an nim che ki'ij rumal wach ki'anom waral chwach i jyub' ta'aj; b'ay, xaq keje kin-an ni yin wo'or, kinkoj ni in-ij. 19Keje kin-an ile, man yix lik kiya unimal ik'ux chutayik kitzij i je ch'uj, tupu yix lik o i nojb'al, kib'ij. 20Kwil yin xa kiya unimal ik'ux chke i kiya'om kib' piwi; xa keikuy ni'pa i kek'isaw b'i ub'itaq iwe; xaq xa keikuy ni'pa i kki'ano pacha i kkaj ike; xa kiya unimal ik'ux chke i kki'an nimaq che kib', xaq chke i kixkich'ay che ipalaj; to' kich'ijo. 21Tupu kink'ix chub'ixkil, chi nti ukowil ink'ux chu'anik chiwe pacha kki'an ike.
Xwiri ike, we lik kkikoj ki'ij, xaq keje yin kinkowirsaj ni ink'ux chukojik in-ij, tupu kin-an iri, xwiri kinna yin, xa ch'uj laj tzij kintijin chub'ixkil. 22Kkib'ij ike chi nim ni ki'ij man je aj Hebreo winaq; b'ay, xaq keje yin in aj Hebreo winaq. Kkikoj ki'ij man je aj tinimit Israel; b'ay, xaq keje yin in aj Israel. Xaq kkikoj ki'ij man je umuq uxikin kan i mam Abraham; xaq keje yin in umuq uxikin kan ire. 23Xaq kkib'ij chi je aj-anol uchak i Cristo; b'ay, yin mas in aj-anol uchak i Cristo chkiwach ike. Xwiri, are kinlap wib' keje ile, kinna yin xa ch'uj laj tzij kinb'ij. Yin, mas in chakunnaq chkiwach ike; mas intijom inlo'xik chkiwach ike; mas intijom i prexil chkiwach ike, xaq k'iyalmul xink'iji chwach i kamik. 24I aj Judío winaq jo'mul xinkich'ay ru' b'elejlajuj juwinaq (39) asial jutaq yak. 25Xaq i aj Roma winaq oxmul in kich'ayom ru' che'; xaq juyak, laj xinkikamsaj ru' ab'aj#11.25 Hechos 14.19.. Oxmul laj in ji'naq pa ya are xmuqtaj i barco chi in o chupam; julaj xinch'ij jun a'ab' ru' jun ij chi to' kinmuxan chik chwi mar (man xmuqtaj i barco pa ya). 26Mas in malkatnaq chu'ankil uchak i Ajwal, laj in kamnaq pa taq ya; laj in kamnaq pki'ab' taq ili'omab'; laj in kikamsam i je wach aj tinimit, xaq i je wach ti aj tinimit. Xink'iji ni chwach i kamik pa taq tinimit, xaq pa taq es, xaq pa mar. Xaq intijom i k'ax pki'ab' i jub'an chi kkib'ij je qachalal chwach i Cristo, xwiri je qachalal taj. 27Lik mas in chakunnaq, olik laj in kamnaq rumal i kosik. K'iyalmul to' in k'ask'atnaq; intijom i numik xaq i k'atik; wo'tam inwa'im rumal inchak; in ch'ijom i tew chi lik joron; xaq olik lik nti in-u'.
28Xaq o chik jub'an k'ax intijom; xaq xwi ta la ile, ij ij lik kink'achir chke i je ni'pa jutzob'aj re i Dios; ile pacha jun eqan o chinqul kinna yin. 29Are kwil jun chi kpe uyob'il xaq kpe inyob'il yin, i kmi' woywal xaq kink'ix che are kwilo chi k-ani i makunik chke i jub'an chik 30We o uchak kinlap wib', xwi kinlap ile chi ku'aljinsaj chi yin nti incho'ab'. 31I Dios, chi uqajaw i Ajwal Jesucristo, reta'am chi lik saq laj tzij i kinb'ij le; are ire choksax u'ij k-e ij saq chrij. 32Yin ujer, are in o pa tinimit Damasco, i aj-ok'al utzam tinimit le, chi raqan u'ab' i ajawinel mam Aretas, xraj ire kinutz'apij prexil. Xukoj chajal pa taq okb'al b'ik pa tinimit chapb'al we, kkib'ij ike. 33Xwiri i qachalal xinkesaj pa wantana; xinkiqajsaj pa chikach rij tapial. Keje ile xin-anmaj pki'ab'.
اکنون انتخاب شده:
2 Corintios 11: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala