San Marcos 5
5
Jesús ku jarik tu yok'o kisin ti' u winki Gerasa
(Mt. 8.28-34; Lc. 8.26-39)
1K'ucho' tu pach peta', yok'o u lu'mi a Gerasa. 2Y kaj jok'i Jesús yok'o chem, tari se'p' junturi' xi'ra akʌ' kisin tu yok'o, a je' a xi'ra tij jok'i tuku muka' winik. 3Ti' kʌjʌ' tuku muka' a winik, y mix mok ku k'ucho' u muk'o u chuko' u k'ʌxo', mix tak yete maska' u sumi (cadena). 4Ne ya'p wʌts' k'ʌrʌ' u yok y bexi' yete maska' u sumi (cadena), chen tu laj t'aka a maska' u sumi y bexi' tu laj p'ika a maska' tu k'ʌra' u yok y mix mok k'ucha' u muk' u lu'se' u muk'. 5Tu woro k'in y ak'bi ku mʌn tu yabot ix jo' wits, tu mukra winik y ku jʌts'ik u bʌj yete tunich. 6Kaj u yira k'ʌs nʌch tʌn u tichi Jesús, se'p' tu k'ʌnaj u yaka' u xonkitubʌj ti' Jesús. 7Y k'ʌ'm abotnʌj kaj u ya'a:
―¿Baij ka k'at ti' ten, Jesús u ti'a a K'uj a jach ne nuk? Kin chich k'atik tech ti' K'uj ma' kʌxmetko'
8Tʌn u yei'k bex tu a'bti' ten Jesús bex:
―Jok'en kisin tu yok'o a xi'ra.
9Jesús tu k'ata ti' a kisin:
―¿Bai ka k'aba'?
Kaj u nuka:
―Legión in k'aba' tu ne jach pimen ake'n tia xi'ra.
10Y ne pim a kisin a akʌ' tia a xi'ra tʌn u chich k'atik ti' Jesús ti' mu' tuchi'ta nʌch to'o a lay u lu'mi tu tiʌ. 11Xok'o yok'o p'uk wits ti' nika' tu jʌno' ne ya'p u kayk'ek'en winik. 12Ka tu chich k'ato' ti' Jesús tu woro a kisin a akʌ' ix a xi'ra:
―A're in bino' ix a lay a nika' a kayk'ek'eno' ti' in ka laj oko' ti'o'.
13Jesús tu cha'a ti'o', lʌji' kaj jok'o a kisin, kaj oko' tu yok'o a kayk'ek'eno' y tu woro a kayk'ek'eno' tu k'ʌnaj u yako' tu ch'ika'n a wits, kaj u laj puro' u bʌjo' ix peta' y laj kimi dos mil kayk'ek'en
14A winiko' a mok ku kʌnʌntik a kayk'ek'en puts'o' ij bino' u ya'o' yok'o kʌjta y bexi' tu woro a mok tiʌ tu xur u kʌjta y tu woro a winiko' taro' u yiro' a ba' mʌni. 15Kaj laj k'ucho' tu tiʌ Jesús y tu yiro' a xi'ra a kurukba a akʌ' ti' kisin u ya'p'i legión, u ki bukimʌ u nok' y ne k'ʌjʌ' ti' kutik, y a winiko' tu sʌjto'. 16A mok tu yiro' a ba' mʌni tu ka tsikbʌta ti'o' a winik aj taro', bik jok'i tia xi'ra a jach pimo' a kisin y baij tu meto' a kayk'ek'en. 17Tu chuno' u chich yei'ko' ti' Jesús kʌ' jok'ok ix u lu'mo'.
18Kaj k'uchi ix chem Jesús y ka tʌn u yoko, a xi'ra a ka'chik akʌ' kisin tu yok'o, tu chich k'ata ti' Jesús ti' u cheik u bin yete. 19Chen a Jesús muj cha'a ti', toj jai' tu ya'ti':
―Xen ix a watoch, tu yʌn a bojo', y xen tsikbʌtej a ne ya'p tsoy ba' tu meta K'uj ti' tech, y bik tu jach ch'a otsi tech.
20Bini a xi'ra, y chu'mpʌ u tsikbʌtik ix u lu'mi Decápolis a ne ya'p tsoy ba' tu meta Jesús yete ti'; tu woro a mok tu yuo' jach peknʌ u yoro'.
U ch'upra ti'a a Jairo yete a ch'upra a tu tʌraj u nok' Jesús
(Mt. 9.18-26; Lc. 8.40-56)
21Kaj ka sutpʌji Jesús yete chem tu pach u xur a peta', tu much'a bojo' ne pim a winik tu ti'a Jesús, y Jesús p'atij ix chem yok'o u xur a peta'. 22Tari junturi' xi'ra u ts'uri u nʌji tuku much'ik u bʌjo' a judíos tuku xakik u t'ʌn K'uj, u k'aba' Jairo; kaj u yira Jesús, tu jach ki xonkitubʌj ti' Jesús. 23Kaj u p'isubʌj u chich k'atik ti':
—In ch'upra in ti'a tʌn u kimi; Ko'ten, ka tʌk'e a k'ʌ' tu yok'o ti' u ch'ene y ti' u cheik u kuxta
24Bini Jesús yete Jairo, ij t'u'ra' u pach ti' ne jach pim winik kaj tʌn u laj pech'a' Jesús. 25Tiri' ix a pimo' a winik a tu t'u'ro' u pach Jesús, ti' yʌn junturi' ch'upra mo' uts, yʌn doce yaxk'in muj xu'ru u yeme u p'oik' u nok' 26Jach nej ki k'uxti' u mʌn ti' ne pim a mok u yej ts'ak, tu laj xupaj tu woro u tak'in, y mix ch'eni toj jai' ti'p'i ti' u ya'ji. 27Kaj u yua tʌn u tsikbʌtʌ' Jesús, tari tu pach Jesús tu yaj nika' a ne pim a winik, y tu tʌra u nok' a Jesús. 28A ch'upra tu ya'a yok'o u tuku: «Wa jai' ki tʌrik u nok' je'e in ch'ene.» 29Toj ka tu tʌra' u nok' Jesús, tsits u k'ik'e a ch'upra, tu yua u bʌj yok'o u bʌk'e, jach ch'eni u ya'ji a ne yaj. 30Toj se'p' kaj u yua Jesús u jok'o u muk' tu yok'o, kaj u sut u bʌj u pʌktaj a pimo', ka u k'ata':
―¿Mok tu tʌra in nok'?
31U kʌ'sa winiko' Jesús kaj u yao' ti':
―Ka wirik a jach pim winik ku nʌktʌntikech, biken ka wei'k: “¿Mok tu tar in nok'?”
32Chen Jesús tu pʌktaj tu woro a mok tiʌ tu yʌn, ti' u yirik mok tʌrik. 33A ch'upra, tu sʌjta y laj peknʌ u bʌk'e, yok'o a ba' toj u ye ba' tu meta', ij bini tu yʌn a Jesús y tu xonkitubʌj ti' Jesús y tu ya'ti' a ba' tu meta'. 34Jesús tu ya'ti' a ch'upra:
―In ch'upra in ti'a, tu ta ki waksa ta wor ti' ten lʌji' tu ch'enech; xen, beje' ch'eni a ya'ji a ne yaj.
35Mo' tey ts'okak u tsikba Jesús, jeo' kaj k'ucho' jun yʌrʌ' mok tiʌ ix yatoch a Jairo, u ts'uri u nʌji tuku much'ik u bʌjo' a judíos tuku xakik u t'ʌn K'uj, kaj u yao' ti a Jairo:
―U ch'upra a ti'a yaj kimi, ¿ba'wi ka kʌxmetik a wʌjkʌ'si?
36Chen ka tu yua Jesús a ba' ku ya'ba ti' a Jairo, tu ya'ti' a Jairo:
―Ma' a sʌjtik, toj jai' ki akse ta wor ten.
37Muj cha u tar u jer winik tu pach a Jesús, chen jai' Pedro bin tu pach a Jesús yete Jacobo yete Juan u yits'in Jacobo. 38Kaj k'ucho' tu yatoch u ts'uri u nʌji tuku much'ik u bʌjo' a judíos tuku xakik u t'ʌn K'uj, tu yira jach jumuknʌk a winiko' tʌn u yok'o, jach k'ʌ'm tʌn u yak'tiko'. 39Oki Jesús ix u nʌji, tu ya'tio';
—¿Biken ka jumo' y ka wok'e'x? A cho ch'upra mo' kimen, jai' wenuka'.
40Kaj p'asta' Jesús ten a mok a ti' yʌno' tu yatoch a Jairo, chen Jesús tu laj jara jaknʌki a tu woro a mok ti' yʌno' tu tiʌ, pachi oki Jesús tu tiʌ a cho ch'upra jari yete u tet y u nʌ' y yete a mok u yet tar a Jesús, 41Jesús tu mʌcha u k'ʌ' a cho ch'upra kaj u ya'ti':
―Talita kumi; (u k'at yei'k: «Cho ch'upra kin wei'k tech, lik'en»).
42Se'p' kaj lik'i a cho ch'upra, y tu chuna u xima, y a cho ch'upra yʌn doce yaxk'in ti', y nej jak'i u yoro' a winiko'. 43Chen Jesús tu li'sa' u t'ʌn ti'a winiko', mu bin u tsikbʌto' ti' mix mok a ba' tu yiro', pachi tu ya'a ka ts'abak u jʌnʌ a cho ch'upra.
اکنون انتخاب شده:
San Marcos 5: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
