San Lucas 8
8
A ch'uprao' a ku yʌntko' a Jesús
1Pachi a Jesús bini yok'o tu woro a tu ne nuk u kʌjto' y to a mijin u kʌjto' u tsikbʌte u jach tsoyi u t'ʌn tu ku wesintik K'uj a tiʌ kʌ' yete a doce u apóstoles. 2Bexi' yete mo' ne pim ch'uprao' aj ch'ensa' tio' u ya'jo' y a jara' a kisin tu yok'o a lʌjio': A María a bexi' u k'aba' Magdalena a to'o jok'i ti' siete kisin tu yok'o. 3Y a Juana u lak' a Chuza u yʌjkʌni u ba' a Herodes, y a Susana y yete u jer ne pim a ch'uprao' a mok lʌji' ku yʌntko' a Jesús yete u bao'.
Jesús ku tsikbʌtik a mok ku nʌj meaj ix kor jay yʌn u jer u nu'ku u kʌ'sa
(Mt. 13.1-9; Mr. 4.1-9)
4Ne pim winik taro' tu jer kʌjto' ti' u yiko' a Jesús: Y ti' tu ye'sa tio' yete jump'e a kʌ'sa a yʌn u jer u nu'ku:
5«A junturi' a bex a ku pʌk'ba' jok' u pʌk'e u nek' trigo; y ka tʌn u pʌk'ik a trigo juti ti', mo' ne ya'p u nek' yok'o bej y laj po'che'ta' y a ch'ich' tu laj jʌnto'. 6U jer u nek' juti yok'o tunich, kaj ts'eji, se'p' tiji tu mo' ch'ur u lu'mi. 7Bexi' u jer juti yok'o k'i'x, chen u yet ch'iji a k'i'x, tu chʌkubʌj ij kimi. 8Y u jer juti u nek' yok'o tu tsoy u lu'mi ij ch'iji y jump'eri' a trigo tsayi hasta cien u nek'.»
Y a Jesús ne k'ʌ'm tu ya'a: «A mok yʌn u xikin, a u ki' ch'exte baij kin wei'k.»
¿Biken a Jesús ku ye'sik yete u nu'ku?
(Mt. 13.10-17; Mr. 4.10-12)
9Y u kʌ'sa winiko' a Jesús tu k'ato' ti': ¿Baiki u nu'ku a kʌ'sa a yʌn u jer u nu'ku a ta kʌ'sa? 10Y tu nuka tio': «Ti teche'x e'sa' teche'x a mo' nʌj e'sa' a ba' a ti' u tar yok'o tu ku wesintik K'uj a tiʌ kʌ'; chen ti' u jero' a winik kʌ'sa' yete a kʌ'sa a yʌn u jer u nu'ku, tiu chʌ'ntko' y mix ku bin yiro' baiki y tiu yui'ko' y mʌnʌ' u yetko' baiki.
Jesús ku ye'sik baij ku nu'ku a tu kʌ'sa yok'o a ku pʌk' ba'
(Mt. 13.18-23; Mr. 4.13-20)
11»A je' lʌji' u nu'ku a kʌ'sa a yʌn u jer u nu'ku a ba' tin tsikbʌta: u nek' a trigo la' u t'ʌn K'uj. 12A to'o juti yok'o bej au nek' a trigo la' bex a ku yui'ko' u t'ʌn K'uj, chen ku tar a kisin y ku takik tu pixʌn, ti mu' ch'eik u t'ʌn K'uj y ti' mu' taka' ten K'uj. 13A u nek' a trigo a juti yok'o a tunich la' bex a ku yui'ko' u t'ʌn K'uj y tsoy u yoro' ku ch'ei'ko' tu pixʌn, chen a jeo' mʌnʌ' u mots; mu xʌnto', tuk'in ku tunta' u yor, ku p'ʌtik u t'ʌn K'uj. 14A u nek' a trigo a juti yok'o k'i'x la' bex a ku yui'ko' u t'ʌn K'uj, chen muj cheik u k'axa' u tuku ten u t'ʌn K'uj toj jai' ku tukriko' u tenetik más tak'in y u tsoyta u yoro' yok'o a je' a lu'm, y mix ku tsa'ya u wich. 15A u nek' a trigo a juti tu tsoy lu'm, la' bex a ku yui'k u t'ʌn K'uj y ku ch'ei'ko' tu pixʌn y ne ya'p ba' tsoy ku metko' y ne tsoy u tuko'.
Tu woro a ba' ta'kʌ' je'e u laj eta' baiki
(Mr. 4.21-25)
16»Mix mok ku t'ʌbik a kip' y ku tap'ik yete u lek y pachi ku p'ʌtik tu yarʌn u ch'ak, mo' jai' ku t'ʌbik yok'o u candelero ti' u saskintik a mok ku yoko tu tiʌ.
17Tu woro a ba' taka' binukaj laj e'sa' baiki, y tu woro a ba' a mo' naj aʌ' binukaj eta' baiki
18»Ki ue'x a baij ka wui'ke'x, a mok yʌnti' ku bij ts'abati' más, chen a mok mʌnʌ' ti' binukaj laj taka' ti' a ba' ku tukrik yʌnti'.»
U nʌ' y u yits'ino' a Jesús
(Mt. 12.46-50; Mr. 3.31-35)
19Y u nʌ' y u yits'ino' a Jesús k'uchi tu tiʌ, chen mo bik u k'uchu tu ne pim a winiko'. 20Yʌn mok kaj u ya'ti' a Jesús:
—Ti' yʌno' a nʌ' yete a wits'ino' jaknʌki y poch u yirikech.
21Jesús tu nuka tio':
—In nʌ' y in wits'ino' lʌji' a mok a ku yui'k u t'ʌn K'uj y ku metik.
A Jesús ku xurik chʌk ik'
(Mt. 8.23-27; Mr. 4.35-41)
22Jump'e k'in, Jesús oki ix chem yete u kʌ'sa winiko' y tu ya'tio':
—Kox mʌn tʌtʌjʌn a peta'.
Ij bino'. 23Chen ka tʌn u bino', a Jesús weni, ij lik'i chʌk ik' yok'o peta'; y chu'mpʌ u yoko ja' yok'o a chem y nej taki u juro', 24Ij bino' u yʌso' a Jesús y tu yao' ti':
—¡Wʌjkʌ'si, Wʌjkʌ'si, tʌn ak juru!
A Jesús lik'i y tu xura a ik' y u nukuch yʌ'mi a ja', y ts'o'ki u tar. 25Y Jesús tu ya'tio':
—¿Maj ki akse'x ta wor ti ten?
Chen tio' ne sajako' y ne peknʌ u yoro', tʌn u yei'ko' yete u bojo':
—¿Moki a je' a xi'ra, a ku yua u t'ʌn tia ik' y au nukuch yʌ'mi tuk'in ku li'sik u t'ʌni ti'?
A xi'ra a kʌ' kisin tu yok'o a lʌji' u winki Gerasa
(Mt. 8.28-34; Mr. 5.1-20)
26Jesús y kʌ'sa winiko' yete u chem k'ucho' ix u lu'mi a gadarenos a tiʌ tu pach u lu'mi Galilea. 27Kaj emi Jesús yok'o chem, jok'i yok'o u kʌjta junturi' xi'ra akʌ' ti' kisin y xok'i ti' Jesús. Ne uch muj tʌkik u nok' y muj kʌjta yok'o nʌj, to jay ti ku kʌjta tu mukra winik. 28A je' a xi'ra ka tu yira a Jesús abotnʌj y tu wuts'a u pix ti' Jesús y tu ya'a:
—Jesús, u ti'a a K'uj a jach ne nuk ¿Baij ka ba mete ten? ¡Ki jach k'atik tech ma' kʌxmetken!
29Tu ya'a bex a kisin tuj a'bti' u jok'o ti a xi'ra, y ya ne ya'p wʌts' ku woro oko tia xi'ra; y chen a winik tʌn u chukik u k'ʌ' y k'ʌxa' u yok yete maska' u sumi (cadena), chen a xi'ra ku laj t'akik y a xi'ra ku bisa ten a kisin yok'o u lu'mi tu mʌnʌ' winik. 30A Jesús tu k'ata ti':
—¿Baiki u k'aba'?
Y tu nuka:
—In k'aba' Legión.
Bex tu ya'a tu ne pim a kisin yʌno' tia xi'ra. 31A kisin tu p'isubʌjo' u k'ato' ti' Jesús ti' mu' tuchi'tiko' yok'o u lu'mi tuku bo'tiko' u si'po' tu woro a kisin.
32Y xok'o tita tiʌ ne pim kayk'ek'en tʌn jʌno' yok'o wits y a ne pim a kisin tu p'isubʌjo' u k'ato' ti a Jesús ka' u cha'e u yoko tu yok'o a kayk'ek'eno' y a Jesús tu cha'a u yoko'. 33Y a ne pim kisin a jok'o ti a xi'ra y oko' to u bʌk'e a kayk'ek'eno' y tu k'ʌnaj u yako' tu ch'ika'n a wits y juto' ix a peta', tita tu jʌk'to' ja' ij kimo'.
34Y a mok ku kʌnʌntiko' a kayk'ek'eno' tu yiro' a ba' mʌni ij puts'o' ij bino' u tsikbʌto' yok'o kʌjta y bexi' yok'o tu meje kʌjto' a winik. 35A winik jok'o u yiro' baij mʌni, y kaj k'ucho' tu tiʌ a Jesús tu yira a xi'ra a akʌ' ti kisin ka'chik kurukba xok'o ti' Jesús y u tʌkmʌ u nok' y ne k'ʌjʌ'ti' kutik y a winik a tiʌ tita tu sʌjto'. 36Y a mok tu yiro', tu tsikbʌto' tio' bik jara a kisin tu yok'o a xi'ra. 37Y tu woro u winki a lay u lu'mi a Gerasa yete u sajkio' chu'mpʌjo' u p'iskubʌjo' u k'atko' ti a Jesús ka' jok'ok yok'o u lu'mo', y a Jesús oki yok'o u chem ij bini. 38Y a xi'ra a jara' kisin tu yok'o ten a Jesús, tu p'isubʌj u k'atik ti' Jesús ka u cha'e u bin yete, chen a Jesús tu ya'ti':
39—Xen ta watoch, y tsikbʌte a ba' tu meta tech K'uj,
Ij bini u tsikbʌte yok'o tu woro u lu'mi, tu woro a ba' meta' ti' ten a Jesús.
U cho ch'upra ti'a Jairo, y a ch'upra a tu tʌra u nok' a Jesús
(Mt. 9.18-26; Mr. 5.21-43)
40Kaj sutbʌj Jesús, a winik ne tsoy u yoro', toj tu woro tʌn u ch'uktiko' a Jesús. 41Lʌji' kaj tari junturi' xi'ra u k'aba' Jairo, a ti' lʌji' u jach wesi u nʌji tuku much'ik u bʌjo' a judíos u xake u t'ʌn K'uj y a xi'ra tu xonkitubʌj ti Jesús y tu p'isubʌj u k'ate ti' u bin to' u yatoch; 42tu yʌn junturi' u ch'upra u ti'a a yʌnti' doce u yaxk'in, tʌn u kimi.
Jesús tʌn u yup'a' ten a winik ka tʌn u bin, tu ne jach pim a winik.
43Bexi' tita tu pimai a winik tiʌ junturi' ch'upra yʌn doce yaxk'in mo uts, muj xu' u p'o'ik u nok' y ne tu xupaj u tak'in tu tu kʌxta a mok u yej ts'ak y mix ts'ʌka'. 44Xok'i tu pach a Jesús y tu tʌra u nok' ij toj se'p' ch'eni.
45Y a Jesús kaj u ya'a:
—¿Mok tu tʌren?
Y tu woro tʌn u yei'ko' mo' lʌjio' tu tʌro', y a Pedro tu ya'a yete a mok tiʌ yete:
—Wʌjkʌ'si, a winik ku pech'kech y tʌn u tech'itikech y ka wei'k: ¿Moki a lay tu tʌren?.
46Chen a Jesús tu ka' a'a:
—Yʌn mok tu taren, tin wu'a u jok'o muk' tin wok'o.
47A ch'upra ka tu yua mo' bik u ta'kik a ba' tu meta, laj peknʌ u bʌk'e ij tari tu yʌn a Jesús y tu xonkitubʌj ti', tu laj a'a tu pimai biken tu tʌra u nok' a Jesús y bik toj se'p' ch'eni. 48Jesús ka tu ya'ti' a ch'upra:
—In ch'upra in ti'ech, tu ta ki' aksa ta wor ti ten lʌji' tuj ch'enech, tsoy a wor a bin.
49Ti'tʌj tʌn u t'ʌn a Jesús, tari u ya'e junturi' u winik u ts'uri u nʌji tuku much'ik u bʌjo' a judíos tuku xakik u t'ʌn K'uj:
—A u ch'upra a ti'a kimi, ya ma' kʌxmetik ak wʌjkʌ'si.
50Kaj yua Jesús a ba' a'a ti' Jairo, tu ya'a Jesús ti':
—Ma' sʌjtik, chen jari ki akse ta wor ten, y je'e u kuxta u ch'upra a ti'a.
51Kaj k'uchi ix yatoch a Jairo, Jesús muj cha'a yoko mix mok, chen jari a Pedro yete Juan y a Jacobo, ket yete u tet yete u nʌ' a cho ch'upra. 52Y tu woro laj ok'uka' yok'o a cho ch'upra chen a Jesús tu ya'tio':
—Ma' wok'e'x, a cho ch'upra mo' kimen, jay wenuka'.
53Ka tu p'asto' a Jesús, tu tu yiro' jach kimen a cho ch'upra. 54Y Jesús tu mʌcha u k'ʌ' a cho ch'upra y k'ʌ'm tu ya'ti':
—¡Cho ch'upra, lik'en!.
55Y a cho ch'upra tu ka ch'a u kuxta se'p' y toj se'p' lik'i, y Jesús tu tuchi'ta ka ts'abak u jʌnʌ. 56U tet yete u nʌ' a cho ch'upra nej pekno' u yoro', chen Jesús tu ya'tio' muj bin u yao' a baj mʌni tita.
اکنون انتخاب شده:
San Lucas 8: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
