San Lucas 9
9
U meaj a doce u apóstoles a Jesús
(Mt. 10.5-15; Mr. 6.7-13)
1Tu much'a a doce u apóstoles a Jesús y tu ts'a u muk' tio', y bexi' ti' u li'sik u t'ʌno' tia kisin ti jok'o ti' a mok akʌ' ti', y ti' u ch'ensik ya'ji. 2Y tu tuchi'to' ti' u tsikbʌtik u t'ʌn tu ku wesintik K'uj a tiʌ kʌ' y u ch'ensik a mok mo' uts 3Y tu ya'tio':
—Ma' nʌj ch'eike'x ba' ti' ix bej, mix xote', mix poxa, mix pʌn, mix tak'in; mix ka'p'e a nok'. 4Y yok'o nʌj tuka k'uche'x, tia' p'ʌte'x hasta ka ka' jok'ex. 5Y tuka k'uche'x yok'o jump'e kʌjta y mo' tsoyiko' a k'uche'x, jok'ene'x tita y tite'x u tʌ'ni a wok, ti u yirko' a ba' tu meto' mo' tsoy.
6Ij jok'o', ij bino' yok'o a tu woro a bex a mejen kʌjta u tsikbʌte u jach tsoyi u t'ʌn K'uj y tu ts'ʌko' winik.
U kimi a Juan a ku but'ik ja' a winiko'
(Mt. 14.1-12; Mr. 6.14-29)
7A Herodes tu yua u ya'ba tu woro a ba' tu meta Jesús y ne tu tukra u bʌj, tuku yei'ko' a Juan ka' lik' tu ka kuxta,
8Juntu ku yei'ko': A Elías ka' jok'i u ye'se u bʌj; y juntu ku yei'ko': lʌji' junturi' a profeta a yʌn uchik.
9Y Herodes tu ya'a:
—A Juan ten tin tuchi'ta xat'a' u jo' ¿Moki a je' a kin wui'k u yei'ko' ne ya'p ba' ku metik?
Bein a Herodes poch u yirik a Jesús.
Jesús ku ts'ek u jʌnʌ cinco mil winik
(Mt. 14.13-21; Mr. 6.30-44; Jn. 6.1-14)
10Kaj u'ro' a apóstoles, tu laj tsikbʌto' ti a Jesús tu woro a ba' tu meto', pachi a Jesús tu pʌyo' yok'o u lu'mi u k'aba' Betsaida tu mix k'ʌs winik tiʌ. 11A winik tu t'u'ro' a Jesús ka tu yuo' ti'ʌ a Jesús yok'o u lu'mi Betsaida y tsoy tu yira a Jesús ka tu yira u k'ucho' a winik tu tiʌ, ij chu'mpʌ tsikbʌtik tio' tu ku wesintik K'uj a tiʌ kʌ' y bexi' tu ch'ensa u ya'ji a winik a mok mo' utso'.
12Kaj nej taki u yak'ʌchʌ, a doce u apóstoles tu yao' ti a Jesús:
—A'e u bin a winiko' u je'se u bʌjo' y u kʌxte u yo'cho' y u kʌxte nʌj tuba u weno', way mix mok kʌjtik y mix k'ʌs ba' yʌn.
13Jesús tu ya'tio':
—Ts'a u jʌno' teche'x
Y tu nuko':
—Toj jai' cinco pʌn yʌnto' y ka'p'e kʌy, je'e u laj jʌno' wa kin bino' in mʌno' o'chi ti ak ts'ekti' tu woro a je' a ne pim a winik.
14Y ne pimo' yʌn cinco mil xi'ra, chen Jesús tu ya'ti' u kʌ'sa winiko':
—A'e'x u kuto' y ku jʌtsik u bʌjo' woro cincuenta cincuenta u pimai.
15Bex tu meto' y tu yao' u kuto' tu woro a winik. 16Y Jesús tu ch'uka a jumujk'ʌ' (cinco) pʌn y a ka'p'e kʌy, tu li'sa u wich yok'o kʌ', y tu ya'a:
Baij tech K'uj,
Pachi tu p'uya aj pʌn y tu ts'a ti' u kʌ'sa winiko' ti' u jʌtsik ti a winiko'. 17Y jʌno' tu woro y nʌjcho' y tu much'a doce xak aj p'atij u yʌrʌ'.
Pedro ku yei'k moki a Jesús
(Mt. 16.13-19; Mr. 8.27-29)
18U k'ini Jesús ka tʌn u t'ʌnik K'uj tu juni' y to jay tiʌ yete u kʌ'sa winiko', lʌji' kaj u k'ata tio':
—¿Moken a ten ku yei'k a winiko'?
19Tio' tu nu'ku:
—Tax jujuntu ku yei'ko', a Juan a ku but'ik ja' a winiko', u jero' ku yei'ko', Elías, u jero' ku yei'ko', lʌji' profeta a yʌn uchik ka' lik' tu ka kuxta.
20Jesús tu ka' k'ata tio':
—¿Y teche'x moken a ten ka wei'ke'x?
Y a Pedro tu nuka:
—A tech lʌjiech a Cristo a tu tuchi'ta K'uj.
Jesús ku yei'k u kimi
(Mt. 16.20-28; Mr. 8.30—9.1)
21Chen a Jesús tu jach ki a'tio' mu' yei'k ti' mix mok a je' a ba'.
22Y tu ya'a:
—U Ti'a Xi'ra binukaj kaj p'akta ten u ch'ijʌ' u winik a judíos yete u t'ojio' a moko' ku meajo' yok'o u yatoch K'uj y yete a ku kʌ'sko' u t'ʌn K'uj a toj u ts'ibtamʌ a Moisés uchik, y binukaj kinsa', chen ka mʌnʌk oxp'e k'in, jeu bin ix kʌ'.
23Pachi a Jesús tu ya'ti' tu woro a mok tio' tita:
—Wa mok poch u tar ti ten, u tup'se a baij u k'at a ti', u kuche u cruz sastuka' y ka tak tin pach. 24Tu woro a mok ku tukrik u takik u bʌj ti' mu' kimi, a lay binukaj kimi; y a mok ku kimi yok'o ten, a lay jeu bin ix kʌ'. 25¿Ba'wi ti a xi'ra tak ku laj tenetik tu woro a ba' a yʌn yok'o lu'm, si ku kʌxmetik u bʌj o si ku sʌtik u kuxta?. 26Wa mok ku ch'eik su'raki ti' ten yete in t'ʌn a kin kʌ'sa, bexi' u Ti'a Xi'ra ku bin u ch'ae su'raki ti' ka k'uchuk u k'ini u ka' sut yete u muk' y yete u muk' u Tet y yete ne pim a bex mʌnʌ' u naj k'ebo' a lʌjio' a ángeles. 27Jach taj kin wei'k teche'x, a mok tiʌ way, yʌn tax jujuntu mʌnʌ' u kimi hasta ku yirik u tar tu ku wesintik K'uj a tiʌ kʌ'.
Jesús ku waysik u bʌj
(Mt. 17.1-8; Mr. 9.2-8)
28Kaj mʌni ocho k'in a je' a t'ʌn tu ya'a a Jesús, a Jesús tu pʌya a Pedro, a Juan y a Jacobo y nʌ'ki ix a wits u t'ʌne K'uj. 29Y tu ku t'ʌnik K'uj k'axbʌ u wich y ne k'ux sʌki u nok' y ne ch'a'a. 30Y lʌji' ka u ye'sa u bʌj ka'to' xi'ra tʌn u tsikba yete a Jesús, y lʌji' a Moisés y a Elías, 31Jach tu tio' laj sasichʌ a jach k'ux tsoy y tʌn u tsikbo' yete Jesús yok'o a tuku ka' bij bin ix kʌ', bexi' yok'o a ba' ku bin u mete ix Jerusalén. 32Tak a Pedro yete a bojo' a tiʌ yete ne tak u weno', moj weno' y tu yiro' u muk' a Jesús yete a ka'to' xi'ra a tiʌ yete Jesús. 33Y tuk'in a ka'to' xi'ra tʌn u p'ʌtko' a Jesús, Pedro tu ya'ti' a Jesús:
—Wʌjkʌ'si, ¡boj tsoyi ti teno' tu tio' way! Bi meto' oxp'e pʌsa, jump'e ti tech, jump'e ti a Moisés y jump'e ti' a Elías.
Chen Pedro ya mu' u yue baij ku yei'k. 34Ti'tʌj ku tsikba Pedro kaj tari jump'eri' muyaj ij xu'ri tu tio' ij boi'chʌ, ka tu yiro' bex laj jak'i u yoro'. 35Pachi yok'o a muya jok'i jump'eri' t'ʌn, ku yei'k:
«A je' lʌji' in ti'a a jach otsi wirik, ue'x u t'ʌn.»
36Kaj ts'o'k yu'iko' u t'ʌn, tu ka' iro' Jesús tu juna y ya mix mok tiʌ yete. Chen u kʌ'sa winiko' a Jesús tu jʌnch mukro' y muj naj a'tio' ti' mix mok a ba' tu yiro'.
Jesús ku ch'ensik junturi' chijʌntʌ xi'ra akʌ' ti' kisin tu bʌk'e
(Mt. 17.14-21; Mr. 9.14-29)
37Kaj sasi, emo' yok'o wits Jesús, jok'i ne pim winik u yiro' a Jesús. 38Ti yʌn junturi' xi'ra tu pimai y ne k'ʌ'm tu ya'a:
—Wʌjkʌ'si, kin k'atik tech a wʌntik in ti'a, ka wirik jai' junturi' yʌnten. 39Y jump'e kisin ku yoko tu bʌk'e y ku ts'ek u yabot y ku ts'ek u lik'i ti' p'is u p'uju u ya'ji y ku laj jok'o u yom u chi', ne ku kʌxmetik y mu k'at u jok'o tu bʌk'e. 40Y tin k'ata ti a kʌ'sa winiko' u jarik ti' y moj k'uchu u muko' u jarko'.
41Jesús tu nuka ti':
—¡Teche'x toj maj ki aksa ta worex ti ten y ne mo' tsoy a tuke'x! ¿Hasta tuk'in yʌn ti' in muk'tike'x y yʌnti' p'ata yete teche'x?
Lʌji' a Jesús kaj u ya'ti' u tet a chijʌntʌ a xi'ra:
—Tase a ti'a.
42Y ka tʌn u xok'o a xi'ra, a kisin tu tech'inta a chijʌntʌ a xi'ra y tu ka' ts'a u lik'i ti' u p'uju u ya'ji; chen a Jesús tu k'eya y tu jara ti a kisin tu bʌk'e ij ch'eni a chijʌntʌ a xi'ra y tu sutaj ti' u tet. 43Tu woro jach ne pekno' u yoro' a tu tu yiro' ne yʌn u muk' K'uj.
Jesús ku ka' ei'k binukaj kimi
(Mt. 17.22-23; Mr. 9.30-32)
A winik xuy tʌn u jumo' yok'o a ba' tu yiro' u metik a Jesús, Jesús tu ya'ti' u kʌ'sa winiko':
44—Ki ch'exte a wue'x a ba' ki bin in wae y ma' tup'sike'x: U Ti'a Xi'ra binukaj k'uba' ti' a winik.
45Chen tio' muj ki uiko' baij u k'at u yei'k a Jesús, tu mo' k'uchʌ' tu k'ini u jea' u tuko' ti' u ki uiko' y bexi' tu sajako' u k'atko' ti' Jesús baiki u nu'ku tu ya'a.
¿Moki a más t'o'o?
(Mt. 18.1-5; Mr. 9.33-37)
46Y u kʌ'sa winiko' a Jesús chu'mpʌjo' u ts'iko' yete u bojo' yok'o ti' u yetko' mok más t'o'o. 47Jesús ka tu ki' u'a a ba' ku tukriko' u kʌ'sa winiko', lʌji' kaj u pʌya junturi' cho mejen ti' u ch'ikta tu yiknʌ. 48Y tu ya'tio':
—―A mok ku yaksik junturi' cho mejen yok'o a ten, ten ku yaksiken y a mok ku yaksiken, mo ja'ri' ten ku yaksiken, lʌji' ku yaksik a mok tu tuchi'ten. Bein a mok más chichin yok'o teche'x lʌji' más nuk
A mok muj p'aktiko' toj lʌji' ket yor yete to'
(Mr. 9.38-40)
49A Juan tu nuka:
—Wʌjkʌ'si, tak ira' juntu ku jarik kisin yete a k'aba' y tak a'ti' mu' metik bex tu mo' la' ak bojo'.
50Jesús tu ya'a:
—Ma' wei'k ti' mu metik, a mok muj p'aktiko' lʌji' ket yor yete to'.
IV. U BIN IX JERUSALÉN
(9.51—19.27)
Jesús ku k'eyik a Jacobo y a Juan
51Tuk'in taki u k'uchu tu k'ini u bin ix kʌ', Jesús tu chich'kunta u yor ti' u bin Jerusalén. 52Y tu tuchi'ta pʌti a mok ku mʌsik t'ʌn, a lʌjio' bino' ix u kʌjta u k'aba' Samaria, ti' u toj kʌxtiko' tu ku bij p'ato' tu weno'. 53Chen moj cha' bu yoko ti u winki a lay a kʌjta, tu u yeo' ti ku bin Jesús ix Jerusalén. 54Tuk'in u kʌ'sa winik a Jesús a lʌji' a Santiago yete Juan tu yiro' a ba' mʌni tu yao' ti' a Jesús:
—Ts'uri, ¿cha'e in t'ʌnko' K'uj tiu jutu k'ak' yok'o kʌ', ti' u laj ch'esik a je' u winik, a bex tu meta a Elías?
55Lʌji' kaj u sutubʌj Jesús u pʌkte u kʌ'sa winiko' y tu ya'tio':
—A teche'x toj ma' a we'x mok ka k'ujintik. 56A u Ti'a Xi'ra moj tari ti' u kinsik winik, a ti' tari ti' u takik a winik. Pachi bino' tu jer u kʌjta
A mok poch u bin tu pach a Jesús
(Mt. 8.19-22)
57Ka tʌn u bino' Jesús ix u beri, junturi' xi'ra tu ya'ti' Jesús:
—Ts'uri, jei in t'urkech ch'ik tu ka bin.
58Tu nuka Jesús y tu ya'a:
—A u pek'i k'ax yʌn u jor tu ku wene bexi' a ch'ich' yʌn u k'u' tu ku wene, chen u Ti'a Xi'ra mʌnʌ' tu ku chata u je'se u bʌj.
59Jesús tu ya'ti' a juntu:
—Ko'ten tin pach,
Y ti tu nuka:
—Ts'uri, cha'e in yʌ bin in mukej in tet.
60Jesús tu nuka ti':
—Cha'e a mok kimen u mukik a mok kim ti'; tech xen y tsikbʌte u t'ʌn tu ku wesintik K'uj a tiʌ kʌ'.
61Kaj u ya'a a juntu:
—Ts'uri a ten je' in tar ta pach jay cha'e in yʌn bin in t'ʌne a mok tiʌ tin watoch.
62Jesús tu nuka ti':
—A mok ku chu'sik u ju'ptik u lu'm y ku sutik u chʌ'te u pach, a lay mo' tsoy ti u yoko yok'o tu ku wesintik K'uj a tiʌ kʌ'.
اکنون انتخاب شده:
San Lucas 9: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
