San Lucas 7
7
Jesús ku ch'ensik u k'ʌni' u Ts'uri a ba'kʌi u winiko' romano
(Mt. 8.5-13)
1Jesús kaj ts'o'k u kʌ'sik u t'ʌn ti a pim a winik, bini ix u kʌjta Capernaum. 2Ti' kʌjʌ' junturi' u ts'uri a ba'kʌi u winiko' romano, yʌnti' junturi' u k'ʌni' a to' ne otsi u yirik, ne mo' uts y tʌn u kimi. 3Ka tu yua u ts'uri a ba'kʌi u tsikbʌtʌ' a Jesús, tu tuchi'taj u ts'urio' u winiko' judío, ti' u p'iskubʌjo' u k'ato' ti' Jesús ka tak u ch'ensik u k'ʌni' u ts'uri a ba'kʌi. 4Y u ts'urio' u winik a judíos k'ucho' tu ti'a a Jesús y tu p'isubʌjo' u k'ato' ti' Jesús, ka tu yao' ti':
—A je' u ts'uri a ba'kʌi ne tsoy a tar a wʌnte;
5A ti' ne otsi u yiko' a to'ex u winko' judío, tu meta' to' u nʌji tu ki much'ik in bʌjo' in xake u t'ʌn a K'uj a teno' a judíos.
6Y Jesús bini yete a layo' y tuk'in xok'o u k'ucho' tu yatoch u ts'uri a ba'kʌi, u ts'uri a ba'kʌi tu tuchi'taj a mok u yet mʌno', ti' u yei'k ti' a Jesús; «Ts'uri, ma' kʌxmetkabʌj a woko ti' watoch, a ten ne mo' tsoyen ti'a woko tin watoch; 7Ben toj mo naj jok'en in bʌji' in t'ʌnech, toj jai' li'se a t'ʌn y jeu' ch'ene y k'ʌni'. 8Bexi' yʌn y ka ts'uri a mok yʌnti' in wui'k u t'ʌn, a bex ten yʌn in ba'kʌi kin li'sik in t'ʌn ti', wa ki wei'k ti' junturi': Xen, ku bin; wa ti'a juntu ki wei'k ti': Ko'ten, ku tar; y a mok la' in k'ʌni' wa ki wei'k ti' mete a je', ku metik.»
9Jesús ka tu yua bex ku yei'k u ts'uri a ba'kʌi, nej tsoyji u yor y tu pʌktaj a winik a tʌn u tar tu pach, y tu ya'tio';
—Mix in wirmʌ ix Israel a mok ku jach ki' aksik tu yor in t'ʌn a bex a je' a xi'ra.
10Kaj sutbʌjo' a mok tuchi'taj ten u ts'uri a ba'kʌi, tu yiro' ch'eni u k'ʌni' a to' ne mo uts ka'chik.
Jesús ku ts'ek u ka kuxta u ti'a a ch'upra a kimen u lak' a ti' u tar Naín
11Pachi, Jesús bini ix u kʌjta Naín, u yet bin yete u kʌ'sa winiko' y yete ne pim winik. 12Ka tʌn u xok'o u k'uchu Jesús ix u kʌjta Naín, tu yiraj tu jor u kʌjta a sutmʌktʌ' yete tunich, tʌn u bisa' muka' junturi' winik kimen, lʌji' u ti'a a ch'upra a kimen u lak', toj jari lʌji' junturi' u ti'a; u yet tar yete ne pim u winki u kʌjta. 13Ka tu yiraj Jesús a ch'upra a kimen u lak', tu ch'a otsi ti' y tu ya'ti':
—Ma' wok'o.
14Y Jesús xok'i ti a ch'upra, y tu tʌraj u ch'aki tu chakintʌ' u ti'a a kimen y a mok u kuchmʌ, xu'ro' y Jesús tu ya'a:
—Meje xi'ra, ti' tech ki wei'k tech, ¡lik'en!
15A mejen xi'ra a kimen tu ka ch'a u kuxta y chu'mpʌ u tʌn, y Jesús tu ts'a a mejen xi'ra ti' u nʌ'. 16Kaj u yiro' tu woro a mok tiʌ tita, laj ja'k'o u yoro' y chu'mpʌjo' u yei'ko' ne tsoy ba' ti' K'uj, t'ʌn y yei'ko':
—Lik'i junturi' ne nuk profeta, bexi' tʌn u yei'ko':
—Tari K'uj u yʌnte u winik.
17Laj ch'ikibini u jumintiko' tsoy ba' ti' Jesús tu woro a u lu'mi u kʌjta Judea y bexi' ch'ikibini yok'o a tu woro a xok'o a kʌjo'.
U winik a Juan a ku but'ik ja' a winiko' a mok ku mʌsik u t'ʌn
(Mt. 11.2-19)
18U kʌ'sa winiko' a Juan tu tsikbʌto' ti' u yʌjkʌ'si a baij ku metik a Jesús. Y Juan tu t'ʌna ka'to' u kʌ'sa winik, 19Y tu tuchi'tajo' tu yʌn a Jesús ti' u k'atik ti':
—¿Lʌji' jach tech a ku bin u tar ix K'uj o yʌnti' in ch'uktiko' u jer? 20Kaj k'ucho' u kʌ'sa winiko' Juan tu yʌn Jesús, tu yao' ti' Jesús:
—Tu tuchi'to' a Juan a ku but'ik ja' a winiko', ti' in k'atik tech: “¿Lʌji' jach tech a ku bin u tar ix K'uj o yʌnti' in ch'uktiko' u jer”?
21Lʌiti' u k'ini, Jesús ne pim tu ch'ensa u ya'ji a winik yete a mok ne ya'a ba' ku mʌsik, bexi' a mok yʌn kisin tu yok'o, bexi' a mok muj u yik u ber tu laj saskintaj u wich. 22Pachi Jesús tu nuka ti' a u kʌ'sa' winik a Juan:
—Xen a'e'x ti' a Juan baij ta wire'x y ta ch'extex in metik. Tsikutexti' a bex muj u yik u ber laj sasichʌ u wich, a mech u yok laj ch'eni y kaj ximʌnʌ, laj ch'eni a mok yʌn u ya'ji a bex ku pok'o u yot'e, a mok mʌka u xikin laj je'chʌj ti', a mok kimen tu ka ch'a u kuxta y lik'i, y a mok mʌnʌ' u tak'in tsikbʌtʌ' ti' u jach tsoyi u t'ʌn K'uj 23Ne ku bin jach tsoyta u yor a mok muj p'ʌtken tu ki metik tu woro a je' a ba'.
24Kaj bino' u kʌ'sa winiko' Juan, Jesús chu'mpʌ u tsikbʌtik tia winik moki a Juan y bex tu ya'tio': «¿Baij bine'x a wire'x yok'o u lu'mi tu mʌnʌ' nukuch che' woro tikin lu'm yʌn? ¿Ta wire'x a bex u yiji a oj a bex ku yusta ten a ik'? 25¿Baij bine'x a wire'x? ¿Wa lʌji' junturi' xi'ra a ku bukintik u nok' a bex ne ko'o? Ch'ex ta wue in wei'k, a mok ku bukintik ne tsoy u nok' ti' kʌjo' ix u palacio wes y ku ki' jʌno'. 26Chen ¿baij bine'x a wire'x ¿Yʌn wa lʌji' junturi' profeta? Ten kin wei'k tech, lʌji', y más nuk u meaj a ti' 27Lʌji' a Juan a ku tsikbʌtʌ' ix u t'ʌn K'uj a tu ts'ibʌ':
“Bin in yʌn tuchi'tik pʌten a ku mʌsik in t'ʌn:
Lʌji' ku bin u ki metik u beri tuka bin k'uchu.”
28Ki wei'k teche'x, mʌnʌ' tu jer winik a bex a profeta Juan a ku but'ik ja' a winiko' más t'oj; Chen a mok a más ma' t'oj yok'o tu ku wesintik K'uj a tiʌ kʌ' lʌji' más t'oj.»
29Y ka tu yuo' tu woro a winik yete a mok ku k'atik u bo'ri u ba' u bojo', tu meto' u t'ʌn K'uj, y tu but'a ja' tu joo' ten Juan. 30Chen u winiko' a judíos a ku ya'batio' fariseos yete a ku kʌ'sik u t'ʌn K'uj a toj u ts'ibtamʌ a Moisés uchik, muj yuo' u t'ʌn K'uj y mix tu ts'ao' u t'upsao' ja' tu jo'o ten a Juan.
31«Y Jesús tu ya'a: ¿Ba' yete kin bin in katkinte a beje' a winiko' a kuxo'? ¿Y ba' yete lʌiti'? 32Ok bex a bex cho mejeno' a ku kuto' tu baxo' tuku kanik u bao' a winik y ku yʌjtik u bojo' y ku yei'k tio': “Tin pʌxo' chur, chen a teche'x mo ok'otne'x; tin k'ʌyo' u k'ayi tuku muka' winik y mix ok'one'x.” 33Ka wirke'x aj tari a Juan a ku but'ik ja' a winiko' mix ku jʌntik pʌn mix u ya'ri a ts'us, y teche'x ka wei'ke'x: Yʌn kisin tu yok'o. 34Tari u Ti'a Xi'ra, a ti' ku jʌnʌ y ku yuk'u, y teche'x ka wei'ke'x: A je' a xi'ra ne ya'p ku jʌnʌ y ne ku yuk'uba', y ne ku mʌn yete a bex a ku k'atik u bo'ri u ba' u bojo' y yete a bex ne yʌn u k'ebo' 35Chen u tuku a K'uj ku ye'sik tu ku metik tu woro a ba' ti' u tio'.»
Jesús ti'a tu yatoch a Simón a ku ya'bati' fariseo
36Junturi' u winiko' a judíos a ku ya'batio' fariseos tu p'isubʌj u pʌye a Jesús ti' u jʌnʌ y Jesús oki tu yatoch a fariseo, y kuraj tu jʌnʌ ix u pojche'. 37Tiʌ junturi' ch'upra a ne yʌn u k'ebʌn ix a lay u kʌjta, ka tu yua tiʌ Jesús ix u yatoch a Simón, tu tasa jump'e perfume u k'aba' alabastro; 38Y tiʌ a ch'upra tu pach u yok a Jesús, ok'uka' y chu'mpʌ u jutu u ya'ri u wich tu yok a Jesús y yete u tso'tse u jo' tu tisa u yok a Jesús; tu ts'u'ts'a y tu cho'a bexi' yete a perfume. 39Ka tu yiraj a Simón a lʌji' u winiko' a judíos a ku ya'batio' fariseos a lʌji' bexi' u yʌjpʌyi tu jʌnʌ Jesús, tu ya'a tu tuku: «A je', wa jach lʌji' profeta, jeu' yetik ba' ch'upra tʌn u tʌrik, a lʌji' a mok yʌn u k'ebʌn.» 40Ka tu nuka Jesús:
—Simón, yʌn ba' yʌnti' in wei'k tech, y ti' tu nuka:
—A'e ten, wʌjkʌ'si.
41Jesús tu ya'a:
—Junturi' a ku mʌjʌntik tak'in yʌn u mʌjʌba ti' ka'to' xi'ra: Junturi' yʌn u p'ax ti' quinientos denarios y a juntu cincuenta; 42tu ka'to' mʌnʌ' u tak'in ti' u bo'tko' u p'axo', a xi'ra a ku mʌjʌntik tak'in tu sa'sa' ti'o' tu ka'to', y Jesús tu k'ata: A'e ten, ¿moki más ku bin u yakunte?
43Tu nuka Simón:
—A ten in tukrik a mok más ya'p u bo' tu sa'sa' ti'.
Jesús tu ya'ti':
—Taj ka wei'k.
44Ka tu sutubʌj Jesús u pʌkte a ch'upra, tu ya'ti' a Simón:
—¿Ka wirik a je' ch'upra? Kaj oken ta watoch, tech ma' ts'aten ja' ti' in p'o'ik in wok; Chen a je' ch'upra tu p'o'a in wok yete u ya'ri u wich y tu tisa yete u tso'tse u jo'. 45A tech, mo' ta ts'u'ts'a in p'uk ka ta wiren, chen a je' ch'upra toj kaj oken, mo naj xu'ruk u ts'uts'ik in wok. 46A tech, mo' ta cho'a tsats tin jo'; chen a je' ch'upra tu cho'a ix in wok perfume. 47Ki wei'k tech tu woro u k'ebʌn a je' ch'upra laj sa'sa' ti', tu ne otsi u yiken, chen a mok chichin ku sa'sa' ti', mo' ne otsi u yiken
48Y a Jesús tu ya'ti' a ch'upra:
—Tu woro a k'ebʌn laj sa'sa' tech.
49Y mok u yet kuta Jesús ix pojche' tu ku jʌno', chu'mpʌjo' u yei'ko' yete u bojo':
—¿Moki a je' a xi'ra, ku laj sa'sik u k'ebo' a winik?
50Chen Jesús tu ya'ti' a ch'upra:
—A beje' tech laj sa'sa' a si'pi tu taj ki aksa' ta wor ti' ten, tsoy a wor a bin.
اکنون انتخاب شده:
San Lucas 7: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
