San Lucas 4
4
Kaj tunta' u yor Jesús ten kisin
(Mt. 4.1-11; Mr. 1.12-13)
1Jesús turu ti' u Pixʌn K'uj, jok'i ix u uk'un Jordán, bisa' ten u Pixʌn K'uj yok'o u lu'mi tu mʌnʌ' nukuch che' woro tikin lu'm yʌn 2Tita tu mʌsa cuarenta, a kisin tita tu tunta u yor, y a lay tu woro u k'ini mo' jʌni, pachi kaj mʌni a cuarenta u k'ini, wij'chʌji. 3A kisin tu ya'ti' a Jesús:
—Wa jach u Ti'ech K'uj, a'ti' a je' a tunich u waysubʌj aj pʌn.
4Jesús tu nuka ti':
—Toj ts'ibʌ' yok'o u t'ʌn K'uj: “Mo' che jari pʌn ku ts'ek u kuxta a winik. Jari u t'ʌn K'uj, lʌji' ku jach ts'ek u kuxta a winik.”
5Ij bisa' ten a kisin yok'o yaj wits, tu ne kʌ'nʌ, y tu laj e'sa'ti' tu woro u kʌjta a lu'm, tu yʌn u wesi. 6A kisin tu ya'ti':
—Ti' tech kin bin in ts'atech ti' a wesintik a tu woro a je' u muk'o y tu woro u t'oji a jeo' ka wirik u kʌjta yok'o lu'm; toj ti' ten ts'abten, y ten in we mok poch in ts'ekti' ki ts'ekti'. 7O ka wuts'ik a pix ti' ten y ka k'ujintiken, tu woro a ba' ka wirik, ti' tech ka bin a tenetej.
8Tu nuka Jesús:
—Xen, Satanás#4.8 Satanás A je' lʌji' u k'aba' ku ya'bati' a kisin, toj ts'ibʌ' yok'o u t'ʌn K'uj: “Jari ak Ts'uri K'uj ka bin a k'ujintik, jari ka meaj ti'.”
9Y a kisin tu bisa' a Jesús ix Jerusalén, y tu nʌ'sa tu ne kʌ'nʌ u jo' u yʌj yatoch K'uj, y tu ya'ti':
—Wa jach u Ti'ech K'uj, purabʌj kaba; 10toj ts'ibʌ' yok'o u t'ʌn K'uj:
“Ku bin u tuchi'te ti' tech a ángeles, ti' u kʌnʌntikech;
11y yete u k'ʌo' ku bin u li'sech,
ti' ma' k'ʌrʌ'che'tik tunich yete a wok.”
12Tu nuka Jesús:
—U t'ʌn K'uj bexi' ku yei'k: “Mʌnʌ' a tuntik u yor ak Ts'uri a K'uj.”
13Y kʌ' ts'oki a kisin u tuntik u yor a Jesús yete ne ya'p ba', tu jʌnch p'ʌta.
III. A BA' TU META JESÚS IX GALILEA
(4.14—9.50)
Jesús ku chu'sik u meaj ix u lu'm Galilea
(Mt. 4.12-17; Mr. 1.14-15)
14Y a Jesús sutbʌj ix u lu'mi Galilea turu yete u muk' u Pixʌn K'uj y laj ch'ikibini u jumintiko' tsoy ba' ti' Jesús yok'o a tu woro a xok'o u kʌjta. 15Y laj mʌni Jesús tu kʌ'sa' winik tu yʌn u nʌji tuku much'ik u bʌjo' a judíos u xake u t'ʌn K'uj y tʌn u ya'ba ne tsoy ba' ti' Jesús ti' a tu woro a winik.
Jesús tiʌ ix u kʌjta Nazaret
(Mt. 13.53-58; Mr. 6.1-6)
16Jesús k'uchi ix u kʌjta Nazaret, tuj ch'iji, u k'ini ku je'sik u bʌjo' a judíos#4.16 U k'ini ku je'sik u bʌjo' a judíos: A lʌji' u k'ini sábado a ku je'sik u bʌjo' a judíos ti' u t'ʌnko' K'uj., oki ix u nʌji tuku much'ik u bʌjo' a judíos u xake u t'ʌn K'uj, a bex toj sukti' u metik, y lik'i u xake u t'ʌn K'uj. 17Y ts'abti' u ju'ni a ba' tu ts'ipta' uchik a profeta Isaías; ka tu jea' u ju'ni, tu yiraj tu ts'ibʌ' a je' a t'ʌn:
18«U Pixʌn K'uj tiʌ yete ten,
ka tu tejten
ti' in bin in tsikbʌte u jach tsoyi u t'ʌn K'uj, ti'a mok mʌnʌ' u tak'in,
tu tuchi'ten ti' in tsoykintik u yor a mok yaj u pixʌn a ne mo' tsoy u yoro',
ti' in tsikbʌtik ti' u sipta' a mok chuka',
ti' u jea' u wich a mok muj yik u ber;
ti' in takik a mok ku kʌxmeta'.
19Ti' in tsikbʌtik teche'x, a je' a yaxk'in bi u ye'se K'uj jach otsi u yiko'.»
20Y tu bʌra u ju'ni, tu ts'ati' a mok ku meaj tu yatoch K'uj, y bini tu kuta Jesús; y tu woro a mok ti'a yok'o u nʌji tuku much'ik u bʌjo' a judíos u xake u t'ʌn K'uj, a mok tio' tita muj juts'ko' u wicho' ti' Jesús. 21Y chu'mpʌ u yei'k tio':
—Beje' nupsa a ts'ibʌ' yok'o u t'ʌn K'uj, a tʌntʌ a wike'x in xakik.
22Tu woro a winik ne tsoy ba' tu tsikbʌtʌ' a ba' tu meta' Jesús y peknʌ u yoro' ka tu yuo', jach tsoy u t'ʌn, y tʌn u yei'ko':
—¿A je' mo' la' u ti'a José?
23A Jesús tu ya'tio':
—Toj in we a teche'x ka bin a wa'ten a toj aʌ' a t'ʌn: “O a we ts'ak, ts'ʌkabʌj” A bex tin wuo' a ne ya'p ba' ta meta' ix Capernaum, bexi' mete way yok'o u lu'mi tuj ch'ijech.
24Jesús tu ya'a:
—Jach taj kin wei'k teche'x, mix mok a bex lʌji' a profeta ku ki' cha'ba u yoko yok'o u lu'mo' tuj ch'iji. 25Jach taj kin wei'k teche'x, a ba' mʌni uchik u k'ini Elías, yʌn ne pim a ch'upra a laj kimen u lak', moj tari u ya'ri yok'o tu woro u lu'm Israel oxp'e yaxk'in ku ta chumuk yaxk'in, ij tari ne ya'p wi'ji yok'o u lu'm Israel. 26K'uj muj tuchi'taj ti' u yʌntik a ne pim a ch'upra a kimen a u lak' a yʌn yok'o u lu'mi Israel, toj jari tu tuchi'ta u yʌnte junturi' ch'upra a kimen u lak' u winki u kʌjta Sarepta xok'o u kʌjta Sidón. 27Ne pim a uchik ne yʌn u ya'ji a winik a bex ku laj pok'o u yot'e, yok'o u kʌjta Israel u k'ini a profeta Eliseo; a yʌno' mix mok tu ts'ʌka, toj jari junturi' xi'ra tu ts'ʌka u k'aba' Naamán u winki u lu'mi Siria.
28Ka tu yuo' a ba' tu ya'a Jesús a mok tiʌ yok'o u nʌji tuku much'ik u bʌjo' a judíos u xake u t'ʌn K'uj, ne ts'ikcho' tu woro;
29Lik'o tu woro, y tu jaro' a Jesús jaknʌki yok'o u kʌjta u lu'mo', y bisa' tu ne ch'ika'n a wits, tu nen kʌ'nʌ menʌ' u kʌjta u yatocho', ti' u tech'inta' Jesús, ti' u kinsa'. 30Chen a Jesús mʌni chumuk tu tiʌ pim a winik, y bini.
Ti'ʌ junturi' xi'ra akʌ' kisin tu yok'o
(Mr. 1.21-28)
31Jesús bini yok'o u kʌjta u k'aba' Capernaum, u lu'mi Galilea; tij mʌni tu kʌ'sa winik woro u k'ini ku je'sik u bʌjo' a judíos.
32A winiko' ne tsoy tu yuo' u kʌ'sa' Jesús, ka tu yiro' jach yʌn u muk' u kʌ'sa.
33Yok'o u nʌji tuku much'ik u bʌjo' a judíos u xake u t'ʌn K'uj, tiʌ junturi' xi'ra yʌn kisin tu yok'o, kaj abotnʌj ne k'ʌ'm, y tu ya'a:
34—¡Ma' kʌxmetko'! ¿Biken ka tar a kʌxmeto', Jesús nazareno? ¿Tarech a take y muk'o? Ten In we mokech a tech, a tech lʌji' u Ti'a K'uj a mix k'ʌs yʌn u si'pi.
35Jesús tu k'eya y tu ya'ti':
—¡Mʌkachi', jok'en tu yok'o a xi'ra!
Y tech'inta' a xi'ra ix lu'm ten a kisin ix u chumuki tu yʌno' a pim a winiko', jok'i a kisin tu yok'o, y mix k'ʌs tu k'ara a xi'ra. 36Y tu woro laj peknʌ u yoro' a mok ti'a tita, kaj tsikbʌnʌj yete u bojo', tu yao':
—¿Ba' t'ʌn ti' a je' a xi'ra, jach t'o'o y ne yʌn u muk' ti' u yei'k ti' a mok yʌnti' kisin tu yok'o jok'en y ku jok'o?
37Y laj ch'ikibini u jumintiko' tsoy ba' ti' Jesús tu woro a xok'o u kʌjta.
Jesús ku ch'ensik u yixkit Pedro
(Mt. 8.14-15; Mr. 1.29-31)
38Lik'i Jesús y jok'i ix u nʌji tuku much'ik u bʌjo' a judíos u xake u t'ʌn K'uj, ti' bini tu yatoch a Simón, oki ix u yatoch, y u yixkit a Simón ne t'ʌba' u chʌkbi; tu jach p'isubʌjo' u k'ato' ti' Jesús u ch'ensik. 39Xok'i Jesús tu charʌ' u yixkit a Pedro, ka tu jach chich a'ti' a chʌkbi ti' u jok'o, y jok'i u chʌkbi se'p'; kaj se'p' lik'i u yixkit Pedro ti' u jʌnsik Jesús yete a mok tari ix yatoch.
Ne pim winik tu ch'ensa Jesús ka ojk'inchʌ
(Mt. 8.16-17; Mr. 1.32-34)
40Kaj ojk'inchʌ, tu woro a mok yʌn u bojo' a mo' uts, tarak ba' ya'ji yʌnti', tu laj puro' ti' Jesús ti' u ch'ensik y Jesús tu tʌk'a u k'ʌ' ti' tu woro a mok mo' uts, y laj ch'eni tu woro. 41Bexi' a mok yʌnti' kisin tu yok'o, laj jok'i ti'o', a kisin kaj ne k'ʌ'm abotno', tu yao':
—¡Tech u Ti'ech K'uj! Chen a Jesús tu k'eya a ne pim a kisin y muj chaa' u t'ʌno', a kisin toj u yej moki a Cristo lʌji' a jach u Ti'a K'uj.
Jesús mʌni ix Galilea u tsikbʌte u t'ʌn K'uj
(Mr. 1.35-39)
42Kaj sasi, jok'i tu yʌn y bini ix u lu'mi tu mʌnʌ' nukuch che' woro tikin lu'm yʌn, tʌn u kʌxta' tea winik, y kaj i'ri a Jesús, tu p'isubʌjo' u k'ato' ti' u p'ata Jesús ti' mu' bin. 43Jesús tu ya'tio':
—Yʌn ti' in bin ix u jer kʌjta in tsikbʌte u jach tsoyi u t'ʌn tu ku wesintik K'uj a tiʌ kʌ', toj ti' lʌji' tu tuchi'ten ti' in tsikbʌtik a jach tsoy u t'ʌn.
44Y mʌni u tsikbʌte tu yʌn u nʌji tuku much'ik u bʌjo' a judíos u xake u t'ʌn K'uj ix u lu'mi Galilea.
اکنون انتخاب شده:
San Lucas 4: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
