San Lucas 5
5
U k'ini ka lutsa' ne ya'p kʌy
(Mt. 4.18-22; Mr. 1.16-20)
1Ka ti'ʌ Jesús xok'o yok'o u chi' u peta' Genesaret, y a winiko' bij p'ujta tu tio' Jesús ti' u yui'k u t'ʌn K'uj. 2Y Jesús tu yiraj ka'p'e chem xok'o yok'o u chi' a peta'; y a ku nʌj lutsko' kʌy, emo' yok'o u chemo', ti' u p'o'iko' a tu ku chujko' kʌy. 3Y Jesús oki yok'o chem, a to' la' u chem a Simón, tu k'ata ti' u k'uye chichin to' u xur a peta'; kuraj Jesús y chu'mpʌ u kʌ'sa yok'o chem ti' u pim a winik. 4Ka ts'o'k u t'ʌn, tu ya'ti' a Simón:
—Pese a chem tu chumuki a peta', y ka purke'x a ba'i a u ku chuka kʌy.
5Tu nuka Simón:
—Wʌjkʌ'si, tu mʌnʌ' ak'ʌ' meajno', y mix k'ʌs chuka' kʌy; chen tech ka li'sik a t'ʌn je'e in purik.
6Ka tu puro', ne k'ux ya'p kʌy tu jaro', y chu'mpʌ u jata u ba'i. 7Y chu'mpʌ u ye'sik u k'ʌ' ti' u yet bojo' a tio' yok'o u jer a chem, ti' u tar u yʌnte; y taro', tu turso' tu ka'p'e a chem, ne tu turso' y a chem tʌn u bij juru. 8Ka tu yiraj bex a Simón Pedro, tu wuts'a u pix ti' Jesús, y tu ya'a:
—¡K'uyabʌj ti' ten Ts'uri, a ten yʌn y k'ebʌn!.
9A ka tu yiraj ne ya'p kʌy tu chuko', nej jak'i u yor y a bexi' a mok tio' yete. 10Y bexi' a Jacobo y a Juan, u ti'a Zebedeo, u yet meaj a Simón, chen a Jesús tu ya'ti' a Simón:
—Ma' sʌjtik; a toj beje' ku chu'mpʌ a lutsik winik.
11Tu laj puro' a chem tu xur a peta', tu laj p'ʌto' tu woro u bao', y tu t'u'ro' a Jesús.
Jesús ku ch'ensik junturi' a yʌn u ya'ji a bex ku ts'uku u yot'e
(Mt. 8.1-4; Mr. 1.40-45)
12U k'ini, tiʌ Jesús yok'o jump'e u kʌjta, k'uchi jump'e xi'ra a yʌn u ya'ji a bex ku ts'uku u yot'e, tu yiraj Jesús, tu xonkitubʌj ix lu'm y tu p'isubʌj u k'ate ti':
—Ts'uri, wa a k'at a ch'ensik in ya'ji, ch'ense in ya'ji.
13Jesús tu tʌk'a u k'ʌ' ti' a xi'ra, tu ya'ti':
—In k'at; kin toj ch'ensik a ya'ji, y a ya'ji a bex ku ts'uku u yot'e toj yayaj ch'eni ti'. 14Y a Jesús tu li'sa' u t'ʌn ti';
—Ma' bin a wae tu ka mʌn bik kaj ch'enech, toj jai' xen e'sabʌj ti' a mok ku meaj yok'o u yatoch K'uj, ka ch'eik a siji tuj ch'enech a bex tu ye'sa Moisés uchik, ti' u yetko' jach ch'ense'ch.
15Y ne tʌn u bin u jumintiko' tsoy ba' ti' Jesús, y ne pim tu much'a u bʌjo' a winik ti' u ch'extik u tsikba a Jesús y ti' u ch'ensa' u ya'jo'. 16Chen Jesús ku jʌnch bin u t'ʌne K'uj tu mʌnʌ' winik a bex nʌj t'ʌrʌ' u metik.
Jesús ku ch'ensik a xi'ra a muj xima
(Mt. 9.1-8; Mr. 2.1-12)
17U k'ini, Jesús tʌn u kʌ'sa, ti' nika' a u winiko' a judíos a ku ya'batio' fariseos yete a bex a ku kʌ'sko' u t'ʌn K'uj a toj u ts'ibtamʌ a Moisés uchik, A to'o ti' u taro' ix u lu'mi Galilea, U jer ti' u tar u lu'mi Judea. U jer ti' u tar ix u kʌjta Jerusalén; y u muk' ak Ts'uri K'uj tiʌ yete Jesús ti' u ch'ensik winik. 18Pachi taro' ma' ne pim xi'ro' u tasmo' jump'e u bojo' a muj xima yok'o mo' ne yaja ch'ak, u k'ato' u yaksik ichi ix nʌj tu tiʌ Jesús. 19Chen tu ne pim a winik mo' tu yiro' tuba u yaksik, y lʌji' kaj nʌ'ko' tu pach u nʌji ti' u k'ʌs lʌkik u pach yatoch ti' u yensik u bojo' a muj xima yete mo' ne yaja ch'ak, to u chumuki a nʌj tu tiʌ Jesús. 20Jesús ka tu yiraj a mok tasik a muj xima ku jach aksik tu yoro' ti', tu ya'ti' a muj xima:
—Xi'ra, tu woro a k'ebʌn ki laj sa'sik tech.
21A u winiko' a judíos a ku ya'batio' fariseos yete a ku kʌ'sko' u t'ʌn K'uj a toj u ts'ibtamʌ a Moisés uchik, tu chu'so' u tukriko': «¿Moki a je' a ku yei'k mo' tsoy ba' ti' K'uj? ¿Moki ku sa'sik u k'ebo' a winik? Toj ja'ri' K'uj ku sa'sik»
22Jesús tu yeta baij ku tukriko', tu nuka y tu k'ata tio':
—¿Biken bex ka tukrike'x yok'o a pixʌne'x? 23¿Baiki mo' ne mo ya in wei'k: “In sa'sik tu woro u k'ebʌn” o in wei'k: “Lik'en y xen”? 24Ti'a wetik u Ti'a Xi'ra yʌn u muk' ix lu'm ti' u sa'sik u k'ebo' a winik, tu ya'ti' a xi'ra a muj xima:
—Tech ki wei'k tech, Lik'en, ch'ae a mo' ne yaja a ch'ak y xen ta watoch.
25Se'p' kaj lik'i ch'ikta a xi'ra ʌkʌtʌn tu bojo' kaj yiraj u ch'eik u ch'ak yete u way kaj bin ix yatoch kaj ya'ti' K'uj:
—Baij tech K'uj taj ch'ensen.
26Tu woro laj peknʌ yoro', tu sʌjto' y tʌn u yei'ko' ne tsoy ba' ti' K'uj, y tu yao':
—Beje' tak ira' ne tsoy ba'.
Jesús ku pʌyik a leví
(Mt. 9.9-13; Mr. 2.13-17)
27Pachi kaj ts'o'ki u metik tu woro a lay a ba', jok'i Jesús, y tu yira junturi' a winik a ku meaj ti' wes a ku k'atik u bo'ri u ba' u bojo', u k'aba' Leví, kurukba yok'o k'ʌnche' yete u pojche' tuku k'atik u bo'ri u ba' u bojo' ti' u wesi Roma, y Jesús tu ya'ti':
—T'u'ren tu ki bin.
28Lik'i a Leví, tu laj p'ʌta tu woro u meaj y tu t'u'ra Jesús.
29Pachi a Leví, tu meta ne ya'p u yo'ch ix u yatoch ti' u ki' jʌno' y ti'a yete ne pim u bojo' a mok ku meaj ti' wes a ku k'atik u bo'ri u ba' u bojo' y bexi' tio' yete u jer u bojo' kurukbʌjo' yok'o u pojche'. 30Chen a winiko' a u winiko' a judíos a ku ya'batio' fariseos yete a ku kʌ'sko' u t'ʌn K'uj a toj u ts'ibtamʌ a Moisés uchik, chu'mpʌ u mukut'ʌno' ti' u kʌ'sa winiko' a Jesús, tu yao':
—¿Biken ka jʌnex yete a winik a mok ku meaj ti' wes a ku k'atik u bo'ri u ba' u bojo', y yete a mok yʌn u si'pi?
31Jesús tu nuka:
—A mok ne uts mo' sik u kʌxta' ti' a mok u ye ts'ak, jai' ku kʌxta' ti' a mok mo' uts. 32A ten moj tari pʌye a mok mʌnʌ' u si'pi, a ten taren in pʌye a mok yʌn u si'pi ti' u sutik u t'ʌn ti' K'uj.
U k'ata' ti' a Jesús yok'o a tuku muk'tiko' u jʌno' a bex ku ya'bati' ayuno
(Mt. 9.14-17; Mr. 2.18-22)
33A layo' tu k'ato' ti' Jesús:
—¿Biken u kʌ'sa winiko' a Juan y u winiko' a judíos a ku ya'batio' fariseos, ku muk'tiko' u jʌno' ne ya'p wʌts', ku t'ʌnik K'uj, chen a tech a kʌ'sa winiko' ku jʌno' y ku yuk'o'?
34Jesús tu nuka:
—¿Yʌn je'e u muk'tiko' u jʌno' a mok tiʌ tuku ch'eik u bʌjo', wa ti'ʌ u lak' a ch'upra yete tio'? 35Binukaj tar u k'ini ku bin taka' ti' u lak' a ch'upra; y a layo' u k'ini bi u muk'to' u jʌno'.
36Jesús tu ye'sa' tio' jump'eri' a kʌ'sa a yʌn u jer u nu'ku, ti' u ki ch'eik u tuko':
—Mix mok ku jʌtik junxet' a tumen u nok' ti' u ch'eik u chuye yok'o jump'e u nok' a ne uchmen, wa ku metik bex, mo' jai' ku bu kʌxmete a tumen u nok', bexi' au xet'e a tumen a nok' mo' tsoy ku bij p'ʌta yok'o a uchmen a nok'. 37Bexi' mix mok ku t'ʌjik a tumen u ya'ri aj ts'us yok'o jump'e uchmen ba'ay a menʌ' u yot'e bʌk'; wa ku t'ʌja' a tumen u ya'ri aj ts'us jeu' jʌntik a uchmen a ba'ay a menʌ' u yot'e bʌk', jeu' laj jochbʌ u ya'ri aj ts'us, y bi u laj kʌxmetubʌj a ba'ay a menʌ' u yot'e bʌk'. 38Chen wa ka t'ʌjik a tumen u ya'ri aj ts'us yok'o tumen ba'ay a menʌ' u yot'e bʌk', mʌnʌ' u k'asta u ya'ri aj ts'us mix u kʌxmetkubʌj a ba'ay. 39Y mix mok a ku yuk'ik a uchmen u ya'ri aj ts'us, ku yei'k poxti' a tumen u ya'ri aj ts'us, jai' ku bu ya'e: “Lʌji' ne ki' a uchmen u ya'ri aj ts'us.”
اکنون انتخاب شده:
San Lucas 5: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
