Matiyu 21
21
Ɛnza ŋé lónan Yeluzalɛmu
Maki 11.1-11; Luka 19.28-40; Yaya 12.12-19
1Ii gbaa mínngɛ Yeluzalɛmu la ké i wɛɛ lo Olivyetii óni Bɛtifaze tɔ́ɔfɛ, Ɛnza ŋé kaamɔɔndhye ŋo fyáa bhyáashaa. 2Tó kɛ fɔ i yɛ kó: «Só mín ŋé a ɲɛ́nnzhaafɛ nín, áa táa o la. A kɛ́ lo ndɛ́nmɛn, a yáa táa sofɛɛnin ngbee nɔ́ ní a dhyé ŋó ngúunnin ɲé. Áa i fwée kɛ́nan ni ile ɲɛ́n. 3Ní mɔɔn lɔ́ kɛ kóman, áa fɔ o yɛ kó: ‹Mantii óle manko é a lá.› O kɛ́ kɛ́ i yáa a lábhyaa íkɔlɔ.»
4Oo kɛ́ lé ke kó óo kó é kɛ céla óo kóman mín nvɔ, o a í lafa. A fɔnin ndɛ́ɛ a kwɔ tá ne kó:
5Áa fɔ Siyɔn dhyémuso#21.5 Siyɔn dhyémuso: Ala bhatobhomba ó lɔ́nin ndɛ́ɛ tii mínnga Yeluzalɛmu, o lé tɔ́ɔ tɛɛ kó Siyɔn. Lɔ́lu tɛ́ɛ Yeluzalɛmu kíila Siyɔn tɔ́ɔ o lá wáati lɔ́lu lɔ. olu yɛ kó:
Ɲɔ́ɔn nín, a yɛ́ mansacɛ oo nánla a saala,
a wɛɛ a yɛ́ɛmanyii, a síinin ɲé sofɛɛnin nɔ ngwɔ́ lɔ,
sofɛɛnin ngbee nɔ, sofɛɛninmuso lɔ dhyé.
6Kaamɔɔndhye ŋolu táa o lé lɔ́ Ɛnza ɲɛn cé o la. 7Ii nan sofɛɛnin ngbee ŋo ní sofɛɛninnye ŋó le kɛ i yɛ faani olu lá olu kwɔ́lɔ tó Ɛnza ŋé í síi a kwɔ lɔ. 8Yaman o mɔɔn shɛ́ɛman ɲé i yɛ faani olu lɔ́woo sháa o ka, lɔ́ lúu yíibhoo lu tɛ́ɛkɛ i la lá sháa o ka. 9Yaman mínnu tɛ́ɛ Ɛnza ɲɛn óni mínnu tɛ́ɛ a kwɔ́, o bɛ́ tɛ́ɛ táa gbáa ne kó: Tando é Laula Bhɔ́nzɔ ŋó yɛ́! Mɔɔn mín ŋé nánla Mantii o tɔ́ɔla, tando é o yɛ! Tando é Ala yɛ́ sá ŋó lɔ!
10Ɛnza ŋé lo mínngɛ Yeluzalɛmu só ó la, só óo ɲáanmin. I tɛɛ fɔ́la kó: «Cɛ míin ŋé yɛ́ɛtii le?» 11Mɔɔn olu tɛ́ɛ i yawila kó: «Céla Ɛnza née wé kɛ bhɔ́ Nazalɛti, Galile mala ó lɔ.»
Ɛnza ŋé feekɛbhaa olu gbɛnan Ala bhatobhomba ó lú o kɔ́ɔnnɔn
Maki 11.15-19; Luka 19.45-48; Yaya 2.13-22
12 Ɛnza ŋé lo Ala bhatobhomba ó kɔ́ɔnnɔn, aa lámyaan kɛ feekɛbhaa olu ní sanikɛbhaa olu gbɛ́, aa wɛ́ɛfɛɛmaa olu tá tabɛli ólu bé, kɛ biinin nvelebhaa olu tá gbaanin ŋo bɛ́ bémbe. 13Aa fɔ i yɛ kó: A sɛwɛnin ɲé kó, ɲɛ́n bhó ŋó káa kíi lé kó Ala bhatobho. Wáa: «Ále wɛ́ɛ o bhó ŋó lé kɛ́ so nú lóonaankɛlaa lé nín!»
14Fyóo ŋolu ní kuugba lɔ́ lúu í mángbaa Ɛnza nán Ala bhatobhomba o lú o kɔ́ɔnnɔn yénɔn, aa olu lákɛɛnya. 15Faanlɛɛɲansebhaa olu kúnndii ólu ní sɛliya kaamɔɔn ólu ɲán é lɔ o káwananngo ólu lɔ́ mínngɛ, óni kɛ dhyémuu ólu yé gbáanan Ala bhatobhomba ó lú o kɔ́ɔnnɔn kó: «Tando é Laula Bhɔ́nzɔ ŋó yɛ!» Ii mwɛ́nnɛn. 16Ii fɔ Ɛnza ɲɛn kó: «Í tóo é i kan ŋo lɔ a?» Ɛnza ŋé i yawi kó: «Ɔɔn! Bháanin ále mán a fɔnin ɲé kitabu o lɔ́ bhá ŋan kó: Í wɛ́ɛ kɛ háanin dhyémuu lú ní dhyéɲɛɛnninngwaa lu bɛ́ bɛ́ í tándo la?» 17O fɔ́nin ŋó kwɔ, aa i tó yénɔn kɛ bhɔ́ só ó la kɛ táa si Betani.
Ɛnza ŋé fígisun nɔ dáanla
Maki 11.12-14,20-24
18Sɔ́ɔ ó mán, i tɛɛ í kwɔ́sɛɛla mínngɛ Yeluzalɛmu, kɔ́ɔn é Ɛnza myaan. 19Aa fígisun nɔ yé sháa o gboo nvɛ́, aa í mángbaa a lá, wáa a man dhyé nzɔ́ɔ o la fo búu gbɛɛgbɛɛ. Oo kɛ́ mínngɛ aa fɔ fígisun ŋo mán kó: «Íle táa í dhyé ngɛ́ bhée!» Íkɔlɔ téeman, fígisun ŋóo já. 20Kaamɔɔndhye ŋolu ɲán é o kó ó yé, óo bhɔ́ i kɔ́ɔman gbúnigbukɛ, kó: «Aa kɛ́ díi tó fígisun míin ŋé já íkɔlɔ cé?» 21Ɛnza ŋé i yawi kó: «Tó ní fɔ a yɛ́ tínɲan in ne ngo, ni lánanya kɛ́ kɛ́ a yóso o lɔ, óni ní síka mán kɛ́ a yóso ó lɔ, ní kó mín ngɛ fígisun míin nan, a yáa sé o lɔ́ kɛ́la, a yɛ́ɛ ló ɲáan sé fɔ́la tii míin ɲɛn kó ‹bhɔ́ ywáa míin nɔn yánun, íi táa í yɛ́ɛ láfii kɔɔji o lɔ,› tó óo o kɛ́. 22Ni lánanya kɛ́ kɛ́ a yóso o lɔ, a kɛ́ fé ŋóo fé ngófɔ sɛɛ o lɔ, a yáa o sɔ́ɔ.»
Yɛ́nee kó ólu kɛ́ ó sé kɛ́la Ɛnza ɲɛn?
Maki 11.27-33; Luka 20.1-8
23Ɛnza ŋé táa Ala bhatobhomba ó la. A tɛ́ɛ mɔɔn ólu kalanan mínngɛ. Faanlɛɛɲansebhaa olu kúnndii ólu ní só o cɛba ólu í mángbaa o lé lɔ kɛ a manɲaankɛ kó: «Íi kó míinnu kɛ́la sébhaaya mínnɛɛn lé la? Yɛ́ɛtii o sébhaaya ó dí í mán?» 24Ɛnza ŋe í yawi kó: «Né káa ále mánɲaankɛ láfaɲan kéene la, kéembe, ni a kɛ́ ɲáwi, o kɛ́ kɛ́, ní bhɔ́la kó míin nú kɛ́ ó sébhaaya ó lé ywáa mínnɔn, ní o fɔ́ a yɛ́: 25Yɛ́ɛtii é Yaya Bátizelikɛbhaa bhyáashaa kɛ́nan mɔɔn ólu bátize, Ala bháa, bháa mɔɔn ólu?» Ii fɔ ɲɔ́ɔnɲɛn kó: «Ní án ngɛ a yawi kó Ala lée a bhyáashaa, a yáa án mánɲaankɛ kó mínnɛɛn lé kósɔn tó án mán lá Yaya la? 26Tó ní án ngɛ fɔ kó mɔɔn lée lúu a bhyáashaa, án ngákan kɛ sháan yaman o ɲɛn, kɛ mansɔɔ mɔɔn bɛ́ tɛ́ɛ Yaya yacela céla lé le.» 27Kó ólu kɛ́ɲan man cé, íi Ɛnza ɲawi kó: «Án mán lɔ.» Ɛnza ŋé i yawi o le lɔ kó: «Ni a kó cé, née kó mínnu kɛ́la nín, née ólu kɛ́la sébhaaya mínnan ndáa o fɔ́ a yɛ́.»
Sáanan mín ŋé dhyénjɛ fyáa ólu ka
28Ɛnza ŋé fɔ íkwɔ kó: «Ngáa kó mín nvɔ a yɛ́ nín, áa a tá ɲánla ó fɔ́ ɲɛ́n o kó ó tá fa nvɛ́: Dhyénjɛ fyáa tɛ́ɛcɛ lɔ́ bhóo. Aa fɔ jónan ó yɛ kó: ‹Nyénjɛ, táa bháala kɛ́ lɛ́zɛnnvyɛ ó lɔ́ bí.› 29O kó a yɛ kó a táa kɛ, wáa kwɔ́ o la, aa nan caanlɔngii tó kɛ táa bháala kɛ́ lɛ́zɛnnvyɛ ó lɔ. 30Facɛman ŋóo o kóman kée ŋó fɔ́ dhyénjɛ tɔ́ kée ŋó yɛ. Oo fɔ kó: ‹Mantii o, ŋwɛ́ɛn myɛ́n, ɲáan táa›, wáa a man táa.» 31Ɛnza ŋé i manɲaankɛ kó: «O dhyénjɛ fyáa ó mínnɛɛn lée i fa sáonanngo ó kɛ?» I ko Ɛnza ɲɛn kó: «Aa jónan mín nje.» Ɛnza ŋé fɔ ale faanlɛɛɲansebhaa olu kúnndii ólu ní Yawudhyaa cɛba ólu yɛ́ o lé lɔ kó: «Tó ní fɔ a yɛ́ tínɲan in ne ngó, háanin nísɔɔnmyaanbhaa olu ní tútu olu yáa Ala yɛ́ Mansaya ó hɛ́lɛ o sɔ́ɔ álee ɲɛn, 32kɛ mansɔɔ Yaya Bátizelikɛbhaa é nan a saala nin sháa téenin ŋó le, a mán lá a lá. Wáa nísɔɔnmyaanbhaa olu ní tútu olu lá a lá. Tó ále gbúlu ɲán é lɔ o kó ó lɔ, wáa a mán díminsa tó kɛ lá a lá.»
Sáanan mín ŋé lɛ́zɛnmaalakɛbhaa yóo ŋólu ka
Maki 12.1-12; Luka 20.9-19
33Ɛnza ŋé fɔ kó: «Áa í tóomanlɔ saanan gbɛ́ɛ lɔ: Lɛ́zɛnnvyɛtii lɔ lée lɛ́zɛn no kɛ yɔ́sɔ kɛ́ a man. Kɛ lɛ́zɛnjibhɔjaan lɔ́ bhɔ́, kɛ o kɛ́ lɛ́zɛn ŋó jíbhɔlaa le, tó kɛ gbáta lɔ́ lɔ́ sɛɛnkunnansiibhaa olu yɛ. Aa sɛɛn ó kɛ́ɛfa o lé lɔ bháalakɛdhye ŋólu mán, tó kɛ táa táamanla. 34Lɛ́zɛn bhɔ́ wáati oo sé mínngɛ, aa a yɛ bháalakɛdhye ŋolu bhyáashaa lɛ́zɛn ŋo bháalakɛbhaa olu saala kó ii a ta fa ŋo di. 35Wáa lɛ́zɛnmaalakɛbhaa olu a yɛ bháalakɛdhye ŋolu myáan kɛ a kée gbasi, kɛ kée ŋó fáa tó kɛ a sawaɲɔn o bwó káwa la. 36Lɛ́zɛnnvyɛtii oo bháalakɛdhye ngbɛ́ɛlu bhyáashaa. Olu tɛ́ɛ sháa mɔɔn jónan ólu le. Wáa lɛ́zɛnmaalakɛbhaa olu o kó kée ŋó lé lá olu la íkwɔ. 37Alabha ŋo la, aa a dhyénjɛ bhyáashaa. A tɛɛ fɔ́la kó i yáa nyénjɛ ó bhɛ́ɛsii. 38Wáa lɛ́zɛnmaalakɛbhaa olu cɛ ó dhyénjɛ o yé mínngɛ, íi fɔ ɲɔɔnɲɛn kó: ‹Cɛ́ntabhaa ó lée nín! Áa nan, án ní a fáa ké cɛ́n o a tó án bhóo.› 39Ii a myaan o lé lɔ kɛ a lafii lɛ́zɛnnvyɛ o kwɔ́shaafɛ tó kɛ a fáa.»
40Ɛnza ŋé ɲaanli kɛ kó: «Lɛ́zɛnnvyɛtii o kɛ́nan, a káa mínnɛɛn lé kɛ́ lɛ́zɛnmaalakɛbhaa olu la?» 41Ii a yawi kó: «A yáa o kóyoongɛbhaa olu fáa, a táa mánɲwaan i la. A yáa a yɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán mínnu káa a yɛ lɛ́zɛn ŋó tɔɔn ó ló a bhóo a san lɔ.»
42 Ɛnza ŋé fɔ i yɛ kó: A mán tínminnaa míin ngála Kitabu o lɔ bhá ŋan?
Bhónɔbhaa olu tɛ́wɛɛ í bá tɛfɛ mínnɔn,
o lé wɛ́ɛ kɛ́ tɛfɛ kúugbɛɛ ŋo le.
O fáanan Mantii ó lé la,
oo kóba lé lé án née bhóo!
43Ɛnza ŋé wɛɛ kɛ fɔ kó: «O lé kósɔn, tó ní fɔ a yɛ́ ngó: Ala yɛ́ Mansaya ó hɛ́lɛ o táa dí a mán bhée, a yáa ló lananbhɛɛ olu bhóo, mín núu sé a lɔko o kɛ́la. 44[Mɔɔn óo mɔɔn kɛ́ í bé o tɛ́fɛ ó ka, o tíi o kóo olu yáa í lɔ́kɛɛngɛɛ, ni o tɛfɛ ó ló ngɛ́ bé mɔɔn mínnga, o tíi o yáa í lɔ́muɲuu.]»
45 Faanlɛɛɲansebhaa olu kúnndii ólu ní Falizɛn ŋolu Ɛnza ɲɛn saanan olu myɛ́n mínngɛ, ii bhɔ́ ɲan le óo Ɛnza ngan ndɛ́ɛ ile léelu mán wé. 46Oo kɛ́ mínngɛ, í tɛ́ɛ ɲánɲiinnan Ɛnza myaanko ó mán, wáa i tɛɛ sháannan yaman o ɲɛn, kɛ mansɔɔ bɛ́ tɛ́ɛ Ɛnza ɲacela Ala yɛ céla lé le.
اکنون انتخاب شده:
Matiyu 21: MXX
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active), Wycliffe Bible Translators, Inc. All rights reserved.
