LUKU 9

Yesu zĩ̀rinɔ zĩnaa

(Mat 10:5-15; Maa 6:7-13)

1Yesu a ìba gbɛ̃nɔn kuri awɛɛplanɔ sìsiai, akũ à ń gbá gbãna kũ ikoo ò tãna buri sĩnda pínki go ḿma, ò gyãnɔ werekɔ̃aḿma. 2Akũ à ń zĩ ò kpata kũ à bò Luda kĩnaa yã waazi kɛ, ò gyãrenɔ werekɔ̃a. 3À pìńnɛ: Ásun pɔ́ke sɛ́ à gɛ́oro, gò ke bɔ̀kɔlokona ke zàna ke ɔgɔ ke uta mɛ̀n pla. 4Ɔn kũ a kipan, àgɔ̃ kú gwe ari à gɛ́ boo wɛ̃tɛ pìi gũn. 5Wɛ̃tɛ kũ odi gbãnakɛ kpáárɛnlo, à bon à lukutɛ̃ warawara á gbánɔa ń tona kũ Ludao sèeda ũ. 6Akũ ò dà zɛ́n, ò kurè wɛ̃tɛ kũ wɛ̃tɛo, ò baaru nna kpàńnɛ, ò gyãnɔ wèrekɔ̃aḿma gu sĩnda pínki.

Hɛrɔdu bídikɛnaa

(Mat 14:1-12; Maa 6:14-29)

7Kũ kína Hɛrɔdu yã birenɔ mà pínki, akũ à bídi kɛ̀, zaakũ gbɛ̃kenɔ tɛn pi Yahaya Da'itɛkɛri mɛ́ à fùtɛ bona gan. 8Gbɛ̃kenɔ pì Iliasu mɛ́ à bò à sùḿma, gbɛ̃kenɔ pì dɔ annabi yãnɔ doke mɛ́ à vù. 9Hɛrɔdu pì: Ma Yahaya mìi zɔ̃̀. Dín gbɛ̃ kũ ma a baaruu màa pì ũ sɛ́ɛ? Akũ àtɛn wɛtɛ ń wɛ́ kɛ pla.

Yesu pɔ́blekpana gɔ̃gbɛ̃ gbɛ̃nɔn dúbu sɔɔronɔa

(Mat 14:13-21; Maa 6:30-44; Yuh 6:1-14)

10Kũ zĩ̀rii pìnɔ sù, akũ ò yã kũ ò kɛ̀nɔ gbã̀ Yesunɛ. Akũ à ń sɛ́tɛ ńtɛ̃nɛ à gɛ̀ɛ kũńwo wɛ̃tɛ kũ òdi pi Bɛtɛsaida. 11Kũ pari dɔ̃̀, akũ ò pɛ̀tɛi. À gbãnakɛ kpàńyĩ, à kpata kũ à bò Luda kĩnaa yã òńnɛ, akũ à gbɛ̃ kũ ò ye ò ń werekɔ̃anɔ wèrekɔ̃a.

12Kũ ifãntɛ̃ bùsa, zĩ̀ri gbɛ̃nɔn kuri awɛɛplanɔ nài ò pìnɛ: Ǹ gbɛ̃nɔ gbarɛ ò gɛ́ kipaki kũ pɔ́bleo wɛtɛ lakutu kũ bura kũ ò kú kãninɔ gũn, zaakũ sɛ̃̀ntɛ pɔ̀rɔtun ó kú la. 13À pìńnɛ: Ákɔ̃nɔ à pɔ́ kpáḿma ò ble. Akũ ò pì: Burodi mɛ̀n sɔɔro kũ kpɔ̀ mɛ̀n plao ó vĩ. Séde ò gɛ́ pɔ́ble lú gbɛ̃ dínɔnɛ ń pínki. 14Gɔ̃gbɛ̃nɔn kú gwe gbɛ̃nɔn dúbu sɔɔro taka. Akũ à pì a ìbanɔnɛ: À tó ò vutɛ gã̀ kũ gã̀ao gbɛ̃nɔn bupla akurikuri. 15Akũ ò kɛ̀ lɛ, ò ń vútɛvutɛ ń pínki. 16Akũ à burodi mɛ̀n sɔɔro kũ kpɔ̀ mɛ̀n pla pìnɔ sɛ̀ à a wɛ́ sɛ̀ musu à arubarikaa dàn. Akũ à lìlikɔ̃rɛ à kpà a ìbanɔa, ò kpàatɛtɛ gbɛ̃nɔnɛ. 17Ò pɔ́ blè ò kã̀ ń pínki, akũ ò a kusu kũ ò gɔ̃̀nɔ sɛ̀tɛ tãnko kuri awɛɛpla pà.

Pita Yesu Arumasihukɛna onaa

(Mat 16:13-23; Maa 8:27-33)

18Zĩkea kũ Yesu tɛn adua kɛ ado, a ìbanɔ sù ò a lè, akũ à ń lá à pì: Dín gbɛ̃nɔ dì pi má de a ũu? 19Ò wèa ò pì: Gbɛ̃kenɔ dì pi Yahaya Da'itɛkɛriimɛ, gbɛ̃kenɔ dì pi Iliasu, gbɛ̃kenɔ dì pi dɔ annabi yãnɔ doke mɛ́ à vù. 20Akũ à ń lá à pì: Ákɔ̃nɔ sɔ̃, dín adì pi má de a ũu? Pita wèa à pì: Luda gbɛ̃ Arumasihumɛ n ũ.

Yesu a ga kũ a vunaao yã'onaa

(Mat 16:21-28; Maa 8:31-9:1)

21Akũ à gìńnɛ òsun yã pì o gbɛ̃ke maro. 22Akũ à pì dɔ: Séde Bisãsiri Nɛ́ wɛ́tãmmana le manamana, gbɛ̃ zɔ̃kɔ̃nɔ kũ sa'orikinɔ kũ ludayãdannɛrinɔ ni gíi, oni a dɛ, a gɔrɔ aakɔ̃de zĩ ani vu.

23Akũ à pìńnɛ ń pínki: Tó gbɛ̃ ye à kɛ ma ìba ũ, séde à gí a zĩda wɛ̃̀ndiii, àgɔ̃ a lígbãndurukpana sɛ́ lákũ gu dìgɔ̃ dɔ nà àgɔ̃ tɛ́omai. 24Gbɛ̃ kũ à ye àgɔ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii ma yãi sɔ̃, ade nigɔ̃ wɛ̃̀ndi vĩ. 25Tó gbɛ̃ andunia lè pínki, à a zĩda lilin kɛ̀o à kùra a wɛ̃̀ndiii, bɔ́ àreen ani lee? 26Tó gbɛ̃ makũ kũ ma yão wé'i kũ̀, Bisãsiri Nɛ́ ni ade wé'i kũ gɔrɔ kũ ani su a gakuri gũn kũ a De gakurio kũ a malaikanɔ gakurio. 27Yãpuran matɛn oárɛ, gbɛ̃kenɔ kú la kũ oni garo ari ò kína kũ Luda kà e.

Yesu linaa

(Mat 17:1-8; Maa 9:2-8)

28Yã pì onaa gbɛra à kà azuma do taka bà, akũ à Pita kũ Yuhanao kũ Yamisio sɛ̀ à dìdi kũńwo kpia de à adua kɛ. 29Kũ àtɛn adua kɛ, a ãnn lìtɛ a pɔ́kasanɔ kɛ̀ púu táitai. 30Kãnto gbɛ̃nɔn planɔn kú kãao, Musa kũ Iliasuo, òtɛn yã o kũ Yesuo. 31Ò bò ò sùa gakuri gũn, òtɛn andunia kũ ani tó zaa Yurusalɛmu yã o. 32I Pita kũ a gbɛ̃nɔo sɛ̀. Kũ ò vù, ò Yesu gakuri è kũ gbɛ̃nɔn pla kũ ò zɛna a sarɛnɔ. 33Kũ gbɛ̃nɔn pla pìnɔ tɛn kɛ̃kɔ̃a kũ Yesuo, Pita pìnɛ: Dikiri, à mana kũ ó kú la. Ò kuta dɔ mɛ̀n aakɔ̃, n pɔ́ mɛ̀n do, Musa pɔ́ mɛ̀n do, Iliasu pɔ́ mɛ̀n do. À dɔ̃ yã kũ átɛn oro. 34Kũ àtɛn o lɛ, ludambɛ luku kìpa à dàńla. Kũ ò kú a gũn, vĩna ń kũ, 35akũ ò kòtoo mà a gũn à pì: Ma Nɛ́ kũ ma a sɛ̀n dí. À a yã ma. 36Kòtoo pì manaa gbɛra ò è Yesu mɛ́ à gɔ̃̀ gwe ado. A ìbaa pìnɔ ń lɛ́ kũ̀, odi yã kũ ò è o gbɛ̃ke ma gɔrɔ kũ̀aro.

Nɛ́gɔ̃gbɛ̃ tãnade werekɔ̃anaa

(Mat 17:14-18; Maa 9:14-27)

37Kũ gu dɔ̀, ò kìpa kpi pìi musu, akũ gbɛ̃nɔ sù da Yesulɛ dasi. 38Zàa gũn gɔ̃gbɛ̃ ke pũ̀tã à pì: Dannɛri, n yã nna! Ǹ ma nɛ́ gwa, zaakũ ma nɛ́ mɛ̀n do kũ má vĩn gwe. 39Tãna dì futɛa, akũ àdi wiki lɛ́ kãnto. Àdi a pãtɛ àgɔ̃ bigiri kɛkɛ àgɔ̃ lɛ́'ifuta bɔtɛ, àdi wari dɔa àdi goa likalikaro. 40Ma wɛ́ kɛ̀ n ìbanɔa ò pɛ́ tãna pìia à bo, akũ ò fùa. 41Yesu pì: Gbãragbɛ̃ yakana ludanaanikɛrisarinɔ! Manigɔ̃ kú kãáo ari bɔrɛɛ? Manigɔ̃ mɛna kãáo ari bɔrɛɛ? Ǹ mɔ́ kũ n nɛ́ pìio la. 42Ari nɛ́ pì gɔ̃ gɛ́ nai, akũ tãna pì a pã̀tɛ, àtɛn bigiri kɛkɛ. Akũ Yesu gì tãna pìinɛ à nɛ́ pìi wèrekɔ̃a, akũ à a kpà a dea. 43Luda gbãna zɔ̃kɔ̃ yã pìi bò ń sarɛ ń pínki.

Yesu ɛra à a ga yã'onaa

(Mat 17:22-23; Maa 9:30-32)

Gbɛ̃nɔ lɛ́ wɛ̃̀ Yesu yãkɛnaa pínki, akũ à pì a ìbanɔnɛ: 44Àgɔ̃ yã díkĩna kũna á nɛ̀sɛɛ gũn. Oni Bisãsiri Nɛ́ na gbɛ̃nɔnɛ ń ɔĩ tera. 45Odi yã pìi dɔ̀rɔ dɔ̃ro, a mì utɛnańnɛ, ò fùa, akũ vĩna ń kũ ò yã pì gbɛkaa.

Denla yã

(Mat 18:1-5; Maa 9:33-37)

46Akũ ò fùtɛ kũ lɛ́kpakɔ̃ao denakɔ̃la yã musu. 47Yesu laasun kũ à kú ń nɛ̀sɛɛ gũn dɔ̃̀, akũ à nɛ́ fíti sɛ̀ à a zɛ̀ a sarɛ, 48à pìńnɛ: Gbɛ̃ kũ à nɛ́ dí taka sì ma ìbakɛ yãi, makũmɛ à ma si. Gbɛ̃ kũ à ma si sɔ̃, ade gbɛ̃ kũ à ma zĩ sìmɛ. Gbɛ̃ kũ à a zĩda dìtɛ kĩana á tɛ́ mɛ́ à gbɛ̃ zɔ̃kɔ̃ ũ.

Gbɛ̃ kũ adi ibɛrɛ sɛ́ kãáoro bi a gbɛ̃ndomɛ

(Maa 9:38-40)

49Akũ Yuhana pì: Dannɛri, o gbɛ̃ke è, àtɛn tãnanɔ goḿma kũ n tɔ́o, akũ o ginɛ, zaakũ ó gbɛ̃nlo. 50Akũ Yesu pì: Ásun gínɛro, zaakũ gbɛ̃ kũ adi ibɛrɛ sɛ́ kãáoro bi á gbɛ̃ndomɛ.

Samaria bùsu lakutu gina Yesui

51Kũ Yesu tana ludambɛ gɔrɔ kà kãni, à mìi pɛ̀ Yurusalɛmua. 52Akũ à gbɛ̃nɔ gbàrɛ ò dòárɛ arɛ, akũ ò gɛ̀ɛ ò gɛ̃̀ Samaria bùsu lakutu ke gũn de ò soru kɛnɛ. 53Akũ lakutude pìnɔ gì a síi kũ à mìi pɛ̀ Yurusalɛmua yãi. 54Kũ a ìba kenɔ Yamisi kũ Yuhanao è lɛ, ò pì: Dikiri, ń ye ò pi tɛ́ bo ludambɛ à su à ń kakatɛn yá? 55Akũ Yesu lìtɛ à kpã̀kɛ̃ńyĩ. 56Akũ òtɛn gɛ́ lakutu pãndea.

Tɛna Yesui

(Mat 8:19-22)

57Kũ ò tɛ́ zɛ́n, gɔ̃gbɛ̃ ke sù à pì Yesunɛ: Gu kũ ntɛn gɛ́n pínki, manigɔ̃ tɛ́nyĩ. 58Yesu pìnɛ: Gbɛ̃gbonnɔ ń tò vĩ, bãnɔ ń sà vĩ. Bisãsiri Nɛ́ sɔ̃ à ĩampaki vĩro. 59Yesu pì gbɛ̃ pãndenɛ: Ǹ mɔ́ ǹ tɛ́mai. Akũ gbɛ̃ pìi pì: Dikiri, ǹ tó ari ma de gɛ̀ɛ kpágui gĩa. 60Yesu pìnɛ: Ǹ tó gɛ̀nɔ ń gɛ̀nɔ vĩ. Mɔkɔ̃n sɔ̃, ǹ gɛ́ kpata kũ à bò Luda kĩnaa yã waazi kɛ. 61Gbɛ̃ pãnde pì dɔ: Manigɔ̃ tɛ́nyĩ Dikiri, ama ǹ tó mà gɛ́ lɛ́ za ma bedenɔa gĩa. 62Yesu pìnɛ: Gbɛ̃ kũ swakure na a ɔĩ, tó àtɛn kpɛ gwa, ade dí kɔ̃ sɛ́ kũ kpata kũ à bò Luda kĩnaaoro.

اکنون انتخاب شده:

LUKU 9: BB2005

های‌لایت

کپی

مقایسه

به اشتراک گذاشتن