LUKU 8

Nɔgbɛ̃ kũ ò tɛ́ Yesuinɔ

1Abire gbɛra Yesu kurè wɛ̃tɛ kũ wɛ̃tɛo, lakutu kũ lakutuo, àtɛn waazi kɛ, àtɛn kpata kũ à bò Luda kĩnaa baaru nna kpáńnɛ. A zĩ̀ri gbɛ̃nɔn kuri awɛɛplanɔ gɛ̀ɛ kãao 2kũ nɔgbɛ̃ kũ à tãnanɔ bò ń gũn à ń wérekɔ̃a kũ ń gyãnɔo. Mariama kũ òdi pinɛ dɔ Mariama Magadalɛni kũ Yesu tãna mɛ̀n supplanɔ bɔ̀tɛ a gũn kú ń tɛ́ 3kũ Hɛrɔdu bɛgwari Kuza nanɔ Yoanao kũ Suzanao kũ nɔgbɛ̃ pãndenɔ dasi. Òdigɔ̃ Yesu kũ a ìbanɔ gwa kũ pɔ́ kũ ò vĩo.

Yãlɛkɔ̃ana kũ pɔ́wɛfãriio

(Mat 13:1-23; Maa 4:1-20)

4Ò bò wɛ̃tɛ kũ wɛ̃tɛo ò kàkara Yesui, akũ à yã lɛ̀kɔ̃ańnɛ à pì: 5Búbari ke mɛ́ à bò à gɛ̀ɛ pɔ́wɛ fã. Lákũ àtɛn fã nà, a kenɔ lɛ̀tɛ zɛ́ gũn ò táa òa, akũ bãnɔ sù ò blè. 6A kenɔ lɛ̀tɛ gbɛ̀ sàraa musu. Kũ ò bùtɛ, akũ ò gàga, kũ odi mɔtɔ lero yãi. 7A kenɔ lɛ̀tɛ lɛ̀nɔ gũn, akũ lɛ̀ɛ fùtɛ kũńwo lɛɛlɛ à nàkaraḿma. 8A kenɔ sɔ̃ à lɛ̀tɛ zĩtɛ mana gũn, akũ ò bùtɛ ò nɛ́ ì lɛu basɔɔro. Kũ à ò lɛ, à pũ̀tã à pì: Gbɛ̃ kũ à sã vĩ à yã pì ma.

9A ìbanɔ a là yã pì bɔkɔtɛnaai. 10Akũ à pì: Luda á gbá zɛ́ à kpata kũ à bò a kĩnaa asirinɔ dɔ̃, ama madì o gbɛ̃ kparanɔnɛ kũ yãlɛkɔ̃anaaomɛ, de ò gu gwa pɔ́ke'enaa sari, ò yã ma a dɔ̀rɔ dɔ̃naa sari. 11Yã pì bɔkɔtɛnaan dí: Pɔ́wɛ pì bi Luda yãmɛ. 12Zɛ́ gũn pɔ́nɔ de lán gbɛ̃ kũ òdi Luda yã manɔ bà, akũ Ibilisi dì su à yã pìi bo ń swɛ̃̀ɛ gũn, de òsun Luda náani kɛ à ń sura baro yãi. 13Gbɛ̀ sàraa musu pɔ́nɔ de lán gbɛ̃ kũ òdi Luda yã ma ò sí kũ pɔnnaonɔ bà, ama ò zĩni vĩro. Òdi Luda náani kɛ gɔrɔ pla, ama tó ò ń yɔ̃ ò gwà, òdi fumɛ. 14Pɔ́wɛ kũ ò lɛ̀ɛ lɛ̀nɔ gũnnɔ de lán gbɛ̃ kũ òdi Luda yã manɔ bà, ama andunia damukɛna kũ aruzɛkɛ yão kũ pɔnnakɛnaaoo dì nakaraḿma, òdi fɔ̃ ò nɛ́ i à màro. 15Zĩtɛ mana pɔ́nɔ de lán gbɛ̃ kũ òdi Luda yã ma kũ nɛ̀sɛpurao òdi sí kũ nɛ̀sɛmanaonɔ bà, akũ òdi mɛna fɔ̃ ari ò gɛ́ karana kɛo.

Yãlɛkɔ̃ina kũ fitilaao

(Maa 4:21-25)

16Òdi fitila na ò ta kútɛa ke ò ditɛ gádo gbáruro. Òdi di a dibɔɔ musumɛ, de gbɛ̃ kũ òtɛn gɛ̃nɔ gupura e yãi. 17Pɔ́ke kú utɛna kũ oni gí boo gupurairo. Asiriyã ke kun kũ oni ma ò gí o gupuraairo. 18Abire yãi à yã ma kũ laakariio. Gbɛ̃ kũ à pɔ́ vĩn Luda ni karanɛ. Gbɛ̃ kũ à pɔ́ke vĩro sɔ̃, bee pɔ́ kũ àtɛn da á vĩ Luda ni sía.

Yesu danɛnɔ

(Mat 12:46-50; Maa 3:31-35)

19Yesu da kũ a dakũnanɔ sù a kĩnaa, akũ odi le ò nàiro pari yãi. 20Akũ ò pìnɛ: N da kũ n dakũnanɔ kú bàai, ò ye n enaai. 21Akũ à wèḿma à pì: Gbɛ̃ kũ òdi Luda yã ma ò zĩ kɛanɔmɛ ma da kũ ma dakũnanɔ ũ.

Yesu zàga'ĩa zɛnaa

(Mat 8:23-27; Maa 4:35-41)

22Zĩkea Yesu gɛ̃̀ gó'itɛ gũn kũ a ìbanɔ, akũ à pìńnɛ: Ò bikũ sɛ̀bɛɛ bara. Akũ ò dà zɛ́n. 23Gɔrɔ kũ òtɛn gɛ́, i Yesu sɛ̀. Akũ zàga'ĩa fùtɛ sɛ̀bɛla, í tɛn ká gó gũn, ò kú kari gũn. 24Akũ a ìbanɔ nài ò a vù ò pì: Dannɛri! Dannɛri! Ótɛn ká í tɛ́! Akũ à fùtɛ à gì ĩanɛ kũ í kũ àtɛni ń gó yĩpayĩpao, akũ à zɛ̀, gu kɛ̀ kítikiti. 25Akũ à pìńnɛ: Á ma náani vĩroo? Akũ yã pìi bò ń sarɛ, vĩna ń kũ, akũ ò òkɔ̃nɛ: Dín gbɛ̃ dí ũ sɛ́ɛ? Bee ĩa kũ ío, àdi yã ditɛńnɛ, akũ àdi a yã mamɛ.

Tãnanɔ gbarɛna alɛdɛnɔa

(Mat 8:28-34; Maa 5:1-20)

26Akũ ò kà Gadara bùsun sɛ̀bɛɛ bara, Galili bùsu ifãboki kpa. 27Kũ Yesu bikũ̀ í bara, à dàkarɛ kũ wɛ̃tɛ pì gɔ̃gbɛ̃ kũ à tãna vĩo. À gɔrɔ pla kɛ̀ adi pɔ́kasa naawaro. Àdigɔ̃ kú bɛro, sé miranɔ tɛ́. 28-29Òdi a yĩ kũ mɔ̀kakɔ̃ananɔ, òdi a da lín a kũna yãi, ama àdi mɔ̀kakɔ̃anaa pìnɔ kɛ̃kɛ̃mɛ, tãna pìi dì a si sɛ̃̀n. Kũ à Yesu è, akũ à wiki lɛ̀, à sù à kùtɛ a arɛ, akũ à pũ̀tã à pì: Yesu, Luda Musude Nɛ́, bɔ́n ó vĩ kɔ̃ ɔĩi? N yã nna! Ǹsun wɛ́ tãmaro. À ò lɛ kũ Yesu ò tãna pãsĩ pì bo a gũn yãimɛ. 30Akũ Yesu a là à pì: N tɔ́n deraa? Akũ à wèala à pì: Ma tɔ́n Dasi. Zaakũ tãnanɔn kú a gũn dasimɛ. 31Akũ tãna pìnɔ kútɛ kɛ̀ Yesunɛ manamana ò pì, àsun ń gbarɛ ò si Zĩngo wɛ̀ɛ lòkotoo gũnlo.

32Alɛdɛ kpàsa zɔ̃kɔ̃ kú gwe, òtɛn pɔ́ ble sĩ̀sĩgɛrɛɛi. Akũ tãna pìnɔ wɛ́ kɛ̀ Yesua à ń gba zɛ́ ò gɛ̃ ń gũn. Yesu ń gbá zɛ́, 33akũ tãnanɔ gò gbɛ̃ pìia ò gɛ̃̀ alɛdɛnɔ gũn. Akũ alɛdɛ kpàsaa pìi wì kũ bàao, ò sòro sĩ̀sĩgɛrɛɛi ò sì sɛ̀bɛn ò gàga gwe. 34Kũ alɛdɛdãrinɔ è lɛ, ò bàa lɛ̀ ò gɛ̀ɛ ò yã pìi bàbańnɛ wɛ̃tɛ gũn kũ buranɔ. 35Akũ ò bɔ̀tɛ de ò yã kũ à kɛ̀ɛ pì gwa. Kũ ò sù Yesu kĩnaa, ò gbɛ̃ kũ tãnanɔ gòaa pìi è vutɛna Yesu gbá sarɛ kũ pɔ́kasao dana, à kú a laakariia. Akũ vĩna ń kũ. 36Kũ gbɛ̃ kũ ò yã pìi è kũ wɛ́onɔ òńnɛ deran ò tãnade pìi wèrekɔ̃a nà, 37akũ Gadara bùsu gbɛ̃nɔ pínki kútɛ kɛ̀ Yesunɛ à bo ń bùsun, zaakũ vĩna ń kũ manamana. Akũ à gɛ̃̀ gó'itɛ gũn, àtɛn tá. 38Gbɛ̃ kũ tãnanɔ gòaa pì kútɛ kɛ̀nɛ de à tá kãao, ama Yesu gìnɛ à pì: 39Ǹ ɛra ǹ tá n bɛa, ǹ yã kũ Luda kɛ̀nnɛ ońnɛ pínki. Akũ à tà, à yã kũ Yesu kɛ̀arɛ kpàkpaa kɛ̀ wɛ̃tɛ pìi gũn pínki.

Yairu nɛ́ vuna kũ nɔgbɛ̃ kũ à ɔ nà Yesu utaaao

(Mat 9:18-26; Maa 5:21-43)

40Kũ Yesu ɛ̀ra à sù, akũ gbɛ̃nɔ gbãnakɛ kpài, zaakũ gbɛ̃ sĩnda pínki tɛni a dãmɛ. 41Akũ gɔ̃gbɛ̃ kũ à de aduakɛkpɛ gbɛ̃ zɔ̃kɔ̃ ũ kũ òdi pinɛ Yairu sù à wùtɛ a kùaa Yesu gbá sarɛ, à kútɛ kɛ̀nɛ de à gɛ́ a bɛa, 42kũ a nɛ́ mɛ̀n do légelege tɛn ga yãi. Nɛ́nɔgbɛ̃ pìi kà wɛ̃̀ kuri awɛɛpla. Kũ Yesu tɛn gɛ́, akũ pari tɛn nakaraa.

43Nɔgbɛ̃ ke kú gwe, aru dì bɔtɛa à kà wɛ̃̀ kuri awɛɛpla. Pɔ́ kũ à vĩ pínki à dɛ̀ ɛzɛdenɔ kĩnaa, ama gbɛ̃ke dí fɔ̃ à a wèrekɔ̃aro. 44Kũ à nà Yesui kpɛ kpa, akũ à ɔ nà a uta lɛ́a. Zaa gwe gɔ̃̀nɔ a arubɔtɛnaa zɛ̀. 45Akũ Yesu pì: Dí mɛ́ à ɔ nàmaa? Akũ ń gbɛ̃ sĩnda pínki pì á a yã dɔ̃ro. Akũ Pita pì: Dannɛri, gbɛ̃nɔ likanyĩ òtɛn nakaramma. 46Akũ Yesu pì: Gbɛ̃ke ɔ nàma, zaakũ má dɔ̃ kũ gbãna bò ma mɛ̀ɛ gũn. 47Kũ nɔgbɛ̃ pìi è ò a yã dɔ̃̀, akũ à sù àtɛn lukaluka, à wùtɛ a kùaa a gbá sarɛ, akũ à yã kũ à tò à ɔ nàaa ò gbɛ̃ sĩnda pínki wára kũ lákũ à aafiaa lè nà gɔ̃̀nɔ. 48Yesu pìnɛ: Nɔgbɛ̃, ma náani kũ n kɛ̀ mɛ́ à n werekɔ̃a. Ǹ tá bɛ aafia.

49Kũ Yesu kpɛ́ àtɛn yã o, ò bò aduakɛkpɛ gbɛ̃ zɔ̃kɔ̃ɔ pì bɛa, ò sù ò pìnɛ: N nɛ́ pìi kɛ̀ sari, ǹsun wari dɔ dannɛriia doro. 50Yesu yã pìi mà, akũ à pì Yairunɛ: Ǹsun tó swɛ̃̀ kɛ̃nguro. Ǹ ma náani kɛ dé, ani werekɔ̃a. 51Kũ à kà a bɛa, adi we gbɛ̃ke gɛ̃̀ kãaoro, sé Pita kũ Yuhanao kũ Yamisio kũ nɛ́ pì de kũ a dao. 52Gbɛ̃ kũ ò kú gwenɔ tɛn ɔ́ɔ dɔ ń pínki, òtɛni ń zĩda kɛ̃kɛ̃. Akũ Yesu pì: Ásun ɔ́ɔ dɔro. Adi garo, àtɛn i omɛ. 53Akũ ò a lalandi kɛ̀, zaakũ ò dɔ̃̀ kũ nɛ́ pìi gà kɔ̀. 54Yesu a kũ̀ a ɔa, akũ à pũ̀tã à pì: Nɛ́nɔkpare, ǹ vu! 55Akũ à wɛ̃̀ndii sù, à fùtɛ gɔ̃̀nɔ. Yesu pì ò pɔ́ble kpáa. 56Yã pìi bò nɛ́ pì de kũ a daoo sarɛ, akũ Yesu òńnɛ òsun yã kũ à kɛ̀ɛ pì o gbɛ̃ke maro.

اکنون انتخاب شده:

LUKU 8: BB2005

های‌لایت

کپی

مقایسه

به اشتراک گذاشتن