LUKU 2

Yesu Kirisi inaa

(Mat 1:18-25)

1Gɔrɔ kũ̀a Siza Ogɔsutu bò kũ yão, à pì ò a bùsu gbɛ̃nɔ naro ń pínki. 2Narona káaku kũ ò kɛ̀n gwe gɔrɔ kũ Kiriniu de Siria bùsu gbɛ̃ zɔ̃kɔ̃ ũ. 3Gbɛ̃ sĩnda pínki gɛ̀ɛ a bɛ wɛ̃tɛn, de ò a tɔ́ da takadan. 4Yusufu sɔ̃, à bò Nazɛra, Galili bùsun, à gɛ̀ɛ Dauda bɛ lakutu Bɛtilihamu, Yudea bùsun, kũ à de Dauda buri ũ yãi. 5À gɛ̀ɛ de ò a tɔ́ da takadan gwe kũ a nɔkpamma Mariama kũ à nɔ̀sinaao, 6akũ gɔrɔ kũ ò kú gwe, a nɛ́'igɔrɔ kà, 7akũ à a nɛ́ dauduu ì. À biza fĩ̀fĩa, à a wùtɛ pɔ́kãdenɔ pɔ́blebɔn, kũ odi gu le nibɔnɔ kipakiaro yãi.

8Sãdãrinɔn kú bùsu dokɔ̃nɔ pìi gũn, òtɛn i sɛ̃̀ntɛ, òtɛni ń sãnɔ dãkpã gwãani. 9Akũ Dikiri malaikaa bò à sùḿma, Dikiri gakuri gupura kũ̀ à lìkańyĩ, akũ vĩna ń kũ manamana. 10Malaikaa pìi òńnɛ: Ásun tó vĩna á kũro, zaakũ ma su mà baaru nna kpáárɛmɛ, gbɛ̃ sĩnda pínki pɔ ni kɛ nna manamana. 11Ò Surabarii ìárɛ Dauda wɛ̃tɛn gwãaniala, àkũmɛ Arumasihu ũ Dikiri ũ. 12Sèeda kũ ani tó à a dɔ̃n dí: Áni nɛ́kpãntɛ̃ e wútɛna pɔ́kãdenɔ pɔ́blebɔɔ gũn, biza fĩfĩa. 13Kãnto ludambɛ gbɛ̃nɔn kú lɛɛlɛ kũ malaika pìio dasidasi, òtɛn Luda sáabu kpá ò pì:

14Ò Luda tɔ́ sɛ́ lei zaa musu,

gbɛ̃ kũ ń yã kɛ̀nɛ nnanɔ aafia le zĩtɛ.

15Kũ malaikaa pìnɔ gòńla ò tà ludambɛ, akũ sãdãrinɔ òkɔ̃nɛ ò pì: Ò gɛ́ Bɛtilihamu, de ò yã kũ à kɛ̀ɛ pì e, yã kũ Dikiri tò o dɔ̃̀. 16Akũ ò fùtɛ ò gɛ̀ɛ likalika, ò bò Mariama kũ Yusufuooa kũ nɛ́kpãntɛ̃ pìio wútɛna pɔ́kãdenɔ pɔ́blebɔɔ gũn. 17Kũ ò a è, ò yã kũ ò òńnɛ nɛ́ pì musu ò. 18Akũ yã kũ sãdãrinɔ òo pìi bò gbɛ̃ kũ ò mànɔ sarɛ ń pínki. 19Mariama yã pì kũna a nɛ̀sɛɛ gũn pínki, àtɛn laasun lɛ́a. 20Sãdãrinɔ ɛ̀ra ò tà, òtɛn Luda tɔ́ bo, òtɛni a sáabu kpá yã kũ ò mà akũ ò è yãi, zaakũ à kɛ̀ lákũ ò òńnɛ nà.

Tɔ́kpana Yesunɛ

21A gɔrɔ sɔraakɔ̃de zĩ nɛ́ tɔ̃̀zɔ̃gɔrɔ kà, akũ ò tɔ́ kpànɛ Yesu, tɔ́ kũ malaikaa ò zaade odi a nɔ̀ síro.

Yesu mɔna Dikirinɛ

22Kũ ń gbã̀bogɔrɔ kà, ò a sɛ̀ ò gɛ̀ɛ à mɔ Dikirinɛ Yurusalɛmu lákũ Musa doka ò nà. 23Zaakũ à kú Dikiri doka takadan ò pì, ò daudunɔ kpá Dikiria. 24Ò sa'opɔ kũ ò dìtɛ Dikiri doka takadan kpà, ò pì potɛ̃nɛ mɛ̀n pla ke lukulukunɛ bɔ̀rɔ mɛ̀n pla.

25Gbɛ̃ke kú Yurusalɛmu, a tɔ́n Simɛɔ. Gbɛ̃ manamɛ, à Luda vĩna vĩ, à wɛ́ dɔ Isarailanɔ surabanaai. Luda Nini kúa, 26akũ à pìnɛ ani ga Dikiri gbɛ̃ kũ òdi pi Arumasihu enaa sariro. 27Luda Nini dònɛ arɛ, akũ à gɛ̃̀ Luda ɔnn. Kũ Mariama kũ Yusufuo sù kũ ń nɛ́ Yesuo yã kũ ò dìtɛ doka takadan kɛna yãi, 28akũ Simɛɔ a sì a ɔĩ, à Luda sáabu kpà à pì:

29Ǹ makũ n zɔ̀bleri gbarɛ aafiaa gũn sà

lákũ n òmɛnɛ nà Dikiri,

30zaakũ ma wɛ́ kɛ̀ pla kũ Surabari kũ n dìtɛo,

31kũ n a yã kɛ̀kɛ buri sĩnda pínki wára.

32Anigɔ̃ de gupura ũ de à gupura kũ buri pãndenɔnɛ,

à n gbɛ̃ Isarailanɔ tɔ́ bo.

33Yã kũ à ò nɛ́ pìi musu bò a de kũ a daoo sarɛ. 34-35Simɛɔ sa mana òńnɛ, akũ à ò nɛ́ pì da Mariamanɛ à pì:

Àkũ mɛ́ anigɔ̃ de sèeda kũ Isarailanɔ ni gíi ũ,

pɔsira ni n swɛ̃̀ zɔ̃ lán fɛ̃nɛda bà.

Isaraila kenɔ ni kakatɛ ń kenɔ ni bo aafia a gãi,

ń nɛ̀sɛɛ gũn yã ni bo gupuraa.

36Nɔgbɛ̃ annabi ke kú gwe, a tɔ́n Ana, Fanuɛli nɛ́, Asa burimɛ. Nɔgbɛ̃ pì zĩ kũ̀ yúkuyuku. À zã kɛ̀ kũ a gɔ̃kpammao wɛ̃̀ supplamɛ, 37akũ à gɔ̃̀ gyaanɔ ũ ari wɛ̃̀ basiikɔ̃ awɛɛsiikɔ̃. Àdi bo Luda ɔnnlo, àdigɔ̃ do Ludai fãnantɛ̃ kũ gwãanio kũ lɛ́yĩnaao kũ aduakɛnaao. 38Zĩ birea gɔ̃̀nɔ à nàńyĩ, à Luda sáabu kpà, àtɛn nɛ́ pì yã o gbɛ̃ kũ ń wɛ́ dɔ Yurusalɛmu bonaainɔnɛ ń pínki.

Ɛra tana Nazɛra

39Kũ Yusufu kũ Mariamao kɛ̀ lákũ à kú Dikiri doka takadan nà pínki ò làka, ò ɛ̀ra ò tà ń bɛ wɛ̃tɛa Nazɛra, Galili bùsun. 40Nɛ́ pìi fùtɛ à gbãna kũ̀. Ɔ̃ndɔ̃ mɔ̀a, àdigɔ̃ kú kũ Luda arubarikaao.

Yesu gɛna Luda ɔnn a nɛ́fitikɛgɔrɔa

41Wɛ̃̀ kũ wɛ̃̀ɛo Yesu de kũ a dao dì gɛ́ Vĩnla dikpɛ kɛ Yurusalɛmumɛ. 42Kũ Yesu kà wɛ̃̀ kuri awɛɛpla, ò ɛ̀ra ò gɛ̀ɛ dikpɛ kɛ lákũ òdi kɛ nà. 43Kũ dikpɛ làka, òtɛn tá, akũ ń nɛ́ Yesu gɔ̃̀ Yurusalɛmu, ò a yã dɔ̃ro. 44Òtɛn da à kú ń gbɛ̃nɔ tɛ́mɛ. Kũ ò táa ò gɔrɔ do, akũ òtɛni a wɛtɛ ń danɛnɔ kũ ń gbɛ̃ dɔ̃nanɔ tɛ́. 45Kũ odi a ero, ò ɛ̀ra ò gɛ̀ɛ a wɛtɛ Yurusalɛmu. 46A gɔrɔ aakɔ̃de zĩ ò a è Luda ɔnn vutɛna yãdannɛrinɔ tɛ́, àtɛn sã kpá ń yãa, àtɛn yã lalaḿma. 47A yã dɔ̃na kũ a yãwemmanaao bò gbɛ̃ kũ òtɛni a yã manɔ sarɛ ń pínki. 48Kũ a de kũ a dao a è, à bò ń sarɛ, akũ a da pìnɛ: Bɔ́yãi n kɛ̀wɛrɛ lɛɛ? N de kũ makũo, ó bídi kɛ̀ n wɛtɛna yãi. 49À wèḿma à pì: À kɛ̀ dera átɛni ń wɛtɛɛ? Á dɔ̃ kũ à kũ̀ mà a De bɔkɔtɛ kɛnloo? 50Ama odi yã kũ à òńnɛ pìi dɔ̀rɔ dɔ̃ro.

51Yesu ɛ̀ra à tà kũńwo Nazɛra, à ń yã mà. A da yã pìnɔ kũna a nɛ̀sɛɛ gũn pínki. 52Yesu zɔ̃kɔ̃ kũ̀, a ɔ̃ndɔ̃ kàra, à nna kũ Ludao kũ bisãsirinɔ.

اکنون انتخاب شده:

LUKU 2: BB2005

های‌لایت

کپی

مقایسه

به اشتراک گذاشتن