Zak 12
12
Dɛnaa Lawa á re Zeruzalɛmu kirisibiɛ
1Dɛnaa Lawa a da ǹ boo
á ke Izirayeli a paǹ li,
asɛ mɛn nə lon lɛ bɔ,
a ná a gòã daa,
á fɔfoã kɔ minbuiin nɛ la,
a da ǹ boo á ke:
2– Man die Zeruzalɛmu biɛ kaaran lɛa, piɛ̃ nɛ ka maa foo yoo ǹ duvɛ̃ nɛ. Tɔrɔn mɛnɛn tumaa bɛ́ a lɛnpɛnɛ, á re bɛn yii tii. Bɛ̀ ǹ nə́ yoo Zeruzalɛmu gialaa ǹ mɛn waáraa, ǹ tá re yui Zudaa minin dɔn gialaa. 3Sonbore, bɛa biikoo li, man die Zeruzalɛmu biɛ kɔlɔ guguru lɛa tɔrɔ kɔ́n ná a boe la a saa wa. Tɔrɔ mɛn bɛ́ re n zoɛ̃ a saa li, a n die busu diɛ a din-a. Bɛ lɛ nɛ, tán a tɔrɔn tumaa á re kiɛ kun, ǹ yoo a gialaa. 4Bɛa waáraa, Dɛnaa Lawa a da ǹ boo ne, man die nyɛ́ɛ kiɛ sùin tumaa ganaa, ǹ da baa-a wolen kɛn, ma gàãn yoo bɛn li. Sɛnɛ ma á re giɛ Zudaa walan, ma a zɔ́ɔn sùin tumaa yiin tã. 5Zudaa a kiãn tá re taasiɛ we ǹ pɛ: «Pàã n Zeruzalɛmu minin lon, a giala, ǹ pàã n ka ǹ Lawa, Dɛnaa Lawa Pàãyiidɛnaa nɛ.» 6Bɛa waáraa kəni, ma á re Zudaa a kiã biɛ ka tɛ bɛ́ lɔn gɔn dakɔnla giulun, hinlaa ka tɛ bɛ́ lɔn làpaa ganaa toa giulun. Tɔrɔn mɛnɛn bɛ́ ǹ lɛnpɛnɛ, ǹ tá re bɛn tumaa yɔyɔrɛ lenlen. Sɛnɛ, Zeruzalɛmu minin tá re giɛ̃ ǹ kiwin ni. 7Dɛnaa Lawa n die Zudaa tɔrɔn sumu lɛn kirisibiɛ bibinaa nɛ. Màn mɛn bɛ́ toɛ, Davida a sumu minin laanka Zeruzalɛmu minin baran gugurubaa yɛ a la Zudaa min gialakunun kɛn man wa. 8Bɛa waáraa kəni, Dɛnaa Lawa á re Zeruzalɛmu minin tamɛɛ: Pàã n die goɛ̃ ǹ pàãwɛɛnaan lon ka Davida bɛ́ lɔn. Davida a sumu minin man die goɛ̃ ka Lawa bɛ́ lɔn, ka Dɛnaa Lawa a lon a dia dí-a wole bɛ́ lɔn.
Gána lɛ tumaa á re gɛ̀ koɛ
9Dɛnaa Lawa pɛ: «Bɛa waáraa kəni, tɔrɔn mɛnɛn tumaa bɛ́ re yui Zeruzalɛmu gialaa, man die bɛn tumaa dii lenlen. 10#Zaã 19.37; SNS 1.7#Mat 24.20; SNS 1.7 Man die sonborebaa ǹ yiri laanka Lawa nyankɔ ǹ yiri koe Davida a sumu minin laanka Zeruzalɛmu minin la. Ǹ masɛ mɛn lɛ fɔ̃, ǹ tá re n yiin doɛ ma la, bɛ lɛ taman yii. Ǹ tá re gɛ̀ loe loe la, ka ǹ bɛ́ nɛgiĩ goon toto a gɛ̀ loe loe lɔn. Maǹ die wuu pii la, ka ǹ bɛ́ nɛgiĩ bibinaa a gɛ̀ wuu pii lɔn. 11Bɛa waáraa kəni, gɛ̀ zɛnaa gole n die n zɛnɛɛ Zeruzalɛmu, ka Adaadi-Rimɔn wɔ kɛ bɛ́ lɔn Megidoo nyankɔrɔ basa kɛ nɛ. 12Sumun lɛn mɛnɛn tumaa bɛ́ gána lɛ nɛ, ǹ tumaa n die bɛa gɛ̀ lɛ zɛnɛɛ totoro: Davida a sumu minin, ǹ giĩn laanka ǹ lɔn nɛ, Natan a sumu minin, ǹ giĩn laanka ǹ lɔn nɛ, 13Levii a sumu minin, ǹ giĩn laanka ǹ lɔn nɛ, Simeyii a sumu minin, ǹ giĩn laanka ǹ lɔn nɛ. 14A din yɔrɔ goon kɛ lɛ la, sumu gialakunun kɛn tumaa a minin man die gɛ̀ koɛ, giĩn laanka ǹ lɔn nɛ.
اکنون انتخاب شده:
Zak 12: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.